26 تاراۋ
دۇرىس نارسەنى ىستەۋ نەگە قيىن؟
ساۋل ماسىحشىلەردى قۋدالاعاندا، كىم قۋانعانىن بىلەسىڭ بە؟ ~ شايتان ٸبىلىس. سونداي-اق ياھۋدي ٴدىنباسىلارى قۋاندى. ٴبىراق ساۋل كەيىنىرەك پاۋىل دەپ اتانىپ، ۇلى ۇستازدىڭ شاكىرتى بولعاندا، ٴدىنباسىلارى ونى جەك كورىپ كەتتى. يسانىڭ شاكىرتتەرىنە دۇرىس نارسەنى ىستەۋ نەگە قيىن بولعانىن ەندى ٴتۇسىندىڭ بە؟ ~
دۇرىس نارسە ىستەگەنى ٷشىن پاۋىل قانداي قيىندىقتارعا كەزىكتى؟
سۋرەتتەن كورىپ تۇرعانىڭداي، اناني ەسىمدى باس ٴدىني قىزمەتكەر پاۋىلدى بەتىنەن ۇرۋعا بۇيرىق بەردى. ٴتىپتى ونى تۇرمەگە قاماۋعا دا تىرىستى. يسانىڭ شاكىرتى بولعانى ٷشىن پاۋىل كوپ ازاپ شەكتى. جامان ادامدار ونى ۇرىپ-سوقتى جانە تاس لاقتىرىپ ولتىرۋگە تىرىستى (ەلشىلەردىڭ ىستەرى 23:1، 2؛ قورىنتتىقتارعا 2-حات 11:24، 25).
كوپ ادام ٴبىزدى قۇدايعا ۇنامايتىن ىستەر جاساۋعا يتەرمەلەيدى. سەن دۇرىس نارسە ىستەۋدى قانشالىقتى جاقسى كورەسىڭ؟ دۇرىس نارسە ىستەگەنىڭ ٷشىن ادامدار سەنى جەك كورسە دە، ونى ىستەي بەرەسىڭ بە؟ بۇل ٷشىن باتىلدىق قاجەت، سولاي ەمەس پە؟ ~
«جاقسى نارسە ىستەگەنىمىز ٷشىن ادامدار ٴبىزدى نەگە جەك كورەدى، قايتا، قۋانۋ كەرەك ەمەس پە؟»— دەپ تاڭعالاتىن شىعارسىڭ. وسىلاي ويلاعانىڭ اقىلعا قونىمدى، ويتكەنى سولاي بولۋ كەرەك. يسانى دا ادامدار مەيىرىمدى ىستەرى ٷشىن جاقسى كورگەن. مىسالى، ونىڭ اۋرۋلاردى ساۋىقتىرىپ جاتقانىن ەستىگەندە، بۇكىل قالا تۇرعىندارى سول جەرگە بارعان بولاتىن (مارقا 1:33).
ٴبىراق ادامدارعا يسانىڭ ٴتالىمى ۇناماعان كەزدەر دە بولعان. ول ارقاشان دۇرىس نارسەلەردى ۇيرەتكەندىكتەن، كەيبىرەۋلەر وعان اشۋلاناتىن. ٴتىپتى شىندىقتى ايتقانى ٷشىن ولار يسانى جەك كوردى. يسا بالالىق شاعى وتكەن نازارەت قالاسىنا بارعاندا، ونىمەن وسىنداي جاعداي بولدى.
يسا ٴماجىلىسحانادا جازبالارعا نەگىزدەپ كەرەمەت بايانداما ايتىپ جاتقان. ٴماجىلىسحانا ياھۋديلەردىڭ قۇدايعا عيبادات ەتەتىن جەرى ەدى. العاشىندا بايانداما تىڭداۋشىلارعا ۇنادى. ونىڭ ايتقان جاقسى سوزدەرىنە ادامدار تاڭعالىستى. ولار ٶز قالالارىندا وسكەن بۇل قاراپايىم جىگىتتىڭ وسىلاي سويلەگەنىنە سەنەر-سەنبەسىن بىلمەي قالدى.
ٴبىر ۋاقىتتا يسا باسقا ٴبىر تاقىرىپقا كوشتى. ول ەۆرەي ەمەس حالىقتارعا قۇدايدىڭ ەرەكشە كوڭىل بولەتىن ۋاقىتى جايلى ايتا باستادى. بۇل ٴماجىلىسحانادا وتىرعانداردىڭ اشۋىنا ٴتيدى. قالاي ويلايسىڭ، نەگە؟ ~ ولار قۇدايدىڭ ەرەكشە ىقىلاسىنا وزدەرىن عانا لايىق دەپ ەسەپتەيتىن، ٵرى ٶز ۇلتتارىن باسقالاردان ارتىق كورەتىن. سوندىقتان ايتقان ٴسوزى ٷشىن يسانى جاقتىرماي قالدى. بۇدان سوڭ ولار يساعا نە ىستەمەكشى بولعانىن بىلەسىڭ بە؟ ~
كيەلى كىتاپتا بىلاي دەلىنگەن: «ولار يسانى ۇستادى دا، دەرەۋ قالانىڭ سىرتىنا الىپ شىقتى. تىك جاردىڭ باسىنا اكەلدى دە، يتەرىپ جىبەرىپ، ولتىرمەك بولدى. ٴبىراق يسا ارالارىنان سىتىلىپ شىعىپ كەتتى» (لۇقا 4:16—30).
مىنا ادامدار يسانى نە ٷشىن ولتىرگىسى كەپ تۇر؟
ەگەر سەن يسانىڭ ورنىندا بولساڭ، سول ادامدارعا قايتادان بارىپ، قۇداي تۋرالى ايتار ما ەدىڭ؟ ~ بۇل ٷشىن باتىلدىق قاجەت، سولاي ەمەس پە؟ ~ يسا شامامەن ٴبىر جىلدان كەيىن نازارەت قالاسىنا قايتادان باردى. «سول جەردە ول ٴماجىلىسحانادا ٴتالىم بەرە باستادى»،— دەيدى كيەلى كىتاپ. كوردىڭ بە، يسا قۇدايدى جاقسى كورمەيتىن ادامداردان قورىقپاي، شىندىقتى ايتا بەرگەن (ماتاي 13:54).
باسقا ٴبىر كۇنى يسا ٴماجىلىسحانادا قولى ىستەمەي قالعان ٴبىر كىسىنى كەزدەستىرەدى. قۇداي يساعا ساۋىقتىراتىن كۇش بەرگەن ەدى. ٴبىراق كەيبىر ادامدار يساعا الگى كىسىنى ساۋىقتىرۋعا كەدەرگى جاساعىسى كەلدى. سوندا ۇلى ۇستاز نە ىستەدى ەكەن؟ ~ الدىمەن ولارعا سۇراق قويدى: «ەگەر بىرەۋىڭدە قوي بولسا، ول دەمالىس كۇنى شۇڭقىرعا ٴتۇسىپ كەتسە، ونى شىعارىپ الماس پا ەدىڭدەر؟»
ارينە، ولار دەمالىس كۇنى جۇمىس ىستەمەۋ كەرەك بولسا دا، قويلارىن شۇڭقىردان شىعارىپ الار ەدى. سوندىقتان يسا ولارعا: «ادام قويدان الدەقايدا ارتىق قوي. دەمەك، دەمالىس كۇنى جاقسىلىق جاساۋعا بولادى»،— دەدى. وسىلاي يسا ناۋقاس ادامدى ساۋىقتىرعان دۇرىس ەكەنىن ٴتۇسىندىردى.
يسا الگى كىسىگە: «قولىڭدى سوز!»— دەدى. سول ساتتە-اق ونىڭ قولى جازىلىپ كەتتى. سوندا ول قالاي قۋاندى دەسەڭشى! ال كەدەرگى جاساعىسى كەلگەن ادامدار شە، ولار قۋاندى ما؟ ~ جوق. كەرىسىنشە، ولار يسانى ودان بەتەر جەك كوردى. ولار عيباداتحانادان شىعىپ كەتتى دە، يسانى ٶلتىرۋدىڭ جوسپارىن قۇرۋعا كىرىستى (ماتاي 12:9—14).
قازىرگى كەزدە دە جاعداي وسىنداي. نە ىستەسەك تە، بارلىق ادامعا جاعۋ مۇمكىن ەمەس. سوندىقتان ەڭ الدىمەن كىمگە ۇناعىمىز كەلەتىنىن شەشىپ الۋىمىز كەرەك. ەگەر ەحوبا قۇداي مەن ونىڭ ۇلى يسا ماسىحكە ۇناعىمىز كەلسە، سولاردىڭ ايتقانىن ىستەۋىمىز قاجەت. الايدا بۇل ٷشىن ٴبىزدى بىرەۋلەر جەك كورىپ، جاقسىلىق جاساۋعا كەدەرگى جاساۋى مۇمكىن. ولار كىمدەر ەكەنىن ايتشى؟ ~
بىرىنشىدەن، شايتان ٸبىلىس. تاعى كىم؟ ~ شايتاننىڭ وتىرىگىنە سەنىپ قالعان ادامدار. مۇنداي ادامدارعا ٴدىنباسىلاردىڭ دا جاتاتىنىن كورسەتىپ، يسا ولارعا بىلاي دەگەن: «سەندەردىڭ اكەلەرىڭ — ٸبىلىس، سونىڭ ايتقانىن ورىنداعىلارىڭ كەلەدى» (جوحان 8:44).
ىبىلىسكە ۇنايتىن ادامدار كوپ. يسا ولاردى «وسى دۇنيە» دەپ اتاعان. يسا «وسى دۇنيە» دەپ نەنى ايتقىسى كەلدى؟ ~ كانەكي، جوحان 15 تاراۋ، 19 تارماقتى اشىپ كورەيىك. ول جەردە بىلاي دەلىنگەن: «ەگەر وسى دۇنيەلىك بولساڭدار، دۇنيە سەندەردى ٶز ادامدارى رەتىندە جاقسى كورەر ەدى. ٴبىراق وسى دۇنيەلىك ەمەسسىڭدەر. مەن سەندەردى وسى دۇنيەدەن تاڭداپ الدىم. سوندىقتان دا ول سەندەردى جەك كورەدى».
«دۇنيە» دەگەن ٴسوز يسانىڭ سوڭىنان ەرمەگەن ادامداردى بىلدىرەدى. ولار نەگە يسانىڭ شاكىرتتەرىن جەك كورەدى؟ ~ وي جۇگىرتىپ كورەيىك. وسى دۇنيەنىڭ بيلەۋشىسى كىم ەكەنىن بىلەسىڭ بە؟ ~ كيەلى كىتاپ: «بۇكىل دۇنيە شايتاننىڭ بيلىگىندە»،— دەپ جاۋاپ بەرەدى (جوحاننىڭ 1-حاتى 5:19).
دۇرىس نارسەنى ىستەۋ نەلىكتەن قيىن ەكەنىن ٴتۇسىندىڭ بە؟ ~ شايتان مەن ونىڭ دۇنيەسى بىزگە كەدەرگى جاساعاندىقتان ەكەن. 23 تاراۋدان بىزگە كەدەرگى جاسايتىن باسقا ٴبىر جايتتىڭ بارىن بىلگەن ەدىك. قانداي ەكەنى ەسىڭدە مە؟ ~ بۇل — ٴبارىمىزدىڭ كۇناكار بولىپ تۋىلاتىنىمىز. بولاشاقتا كۇنا، ٸبىلىس پەن ونىڭ دۇنيەسى قۇرىپ جوق بولعاندا، ٶمىرىمىز كەرەمەت بولاتىنىمەن كەلىسەسىڭ بە؟ ~
وسى دۇنيە جويىلعاندا، دۇرىس نارسە ىستەگەندەر نەگە قۋاناتىن بولادى؟
كيەلى كىتاپتا: «وسى دۇنيە وتەدى دە كەتەدى»،— دەلىنگەن. دەمەك، ۇلى ۇستازدىڭ ايتقانىن ىستەمەگەندەر بولاشاقتا بولمايدى. ولارعا ماڭگىلىك ٶمىر سيعا بەرىلمەيدى. ال كىمدەر ماڭگى ٶمىر سۇرەدى؟ ~ «قۇدايدىڭ ەركىن ورىنداۋشى ماڭگى ٶمىر سۇرەدى»،— دەيدى كيەلى كىتاپ (جوحاننىڭ 1-حاتى 2:17). ياعني «قۇدايدىڭ ەركىن ورىنداپ»، دۇرىس نارسەنى ىستەيتىندەر عانا جاڭا دۇنيەدە ٶمىر سۇرەدى. ەندەشە، جاقسىلىق جاساۋ قيىن بولسا دا، ونى جاساي بەرەيىك، جاراي ما؟ ~
كەلەسى تارماقتار دۇرىس نارسەنى ىستەۋ نەگە قيىن ەكەنىن كورسەتەدى: ماتاي 7:13، 14؛ لۇقا 13:23، 24 جانە ەلشىلەردىڭ ىستەرى 14:21، 22.
