40 تاراۋ
قۇدايدى قالاي قۋانتا الامىز؟
ٴبىز قۇدايدى قۋانتۋ ٷشىن نە ىستەي الامىز؟ وعان بىردەڭە بەرە الامىز با؟ ~ ەحوبا: «ورمانداعى اڭداردىڭ ٴبارى مەنىكى»،— دەدى. سونداي-اق ول: «كۇمىس تە، التىن دا مەنىكى»،— دەپ ايتقان (زابۋر 23:1؛ 49:10؛ ناعاي 2:8). بارلىعى قۇدايدىكى بولسا دا، ٴبىز وعان ٴبىر نارسە بەرە الامىز. ونىڭ نە ەكەنىن بىلەسىڭ بە؟ ~
ەحوبا بىزگە وزىنە قىزمەت ەتۋدى نە ەتپەۋدى تاڭداۋعا مۇمكىندىك بەردى. ول ٴبىزدى ٶزىنىڭ ەركىن ورىنداۋعا ماجبۇرلەمەيدى. كەل، قازىر ەحوبا بىزگە نەگە وسىنداي ەركىندىك بەرگەنىن ٴتۇسىنىپ كورەيىك.
سەن روبوت دەگەننىڭ نە ەكەنىن بىلەتىن شىعارسىڭ. ول — قۇراستىرۋشىسى ەنگىزگەن بۇيرىقتاردى ورىندايتىن ماشينا. سوندىقتان روبوت نە ىستەيتىنىن ٶزى شەشە المايدى. ەحوبا ٴبىزدى دە روبوت سياقتى ەتىپ جاراتۋىنا بولار ەدى. سوندا ٴبىز ونىڭ قالاعان نارسەسىن عانا ورىندار ەدىك. ٴبىراق قۇداي ولاي ەتكەن جوق. نەگە ەكەنىن بىلەسىڭ بە؟ ~ ويلانىپ كورەيىك. روبوت ويىنشىقتى بىلەتىن شىعارسىڭ. ونىڭ كنوپكاسىن باسساڭ، ول تەك بەلگىلى ٴبىر قيمىلداردى عانا جاسايدى. سەن قانداي روبوت ويىنشىقتى بىلەسىڭ؟ ~ ٴجيى مۇنداي ويىنشىقپەن ويناۋدان جالىعىپ كەتەسىڭ، سولاي عوي؟ ويتكەنى ول ٴبىر ىستەگەن قيمىلىن قايتالاي بەرەدى. ولاي بولسا، قۇداي دا ٴبىزدىڭ وزىنە روبوت سياقتى مويىنسۇنعانىمىزدى قالامايدى. وعان جاقسى كورىپ قىزمەت ەتكەنىمىز جانە شىن جۇرەكتەن مويىنسۇنعانىمىز ۇنايدى.
نەگە قۇداي ٴبىزدى روبوت ەتىپ جاراتپادى؟
ٴبىز كوكتەگى اكەمىزگە ٶز قالاۋىمىزبەن مويىنسۇنساق، ول نە سەزىنەدى؟ ~ ايتشى، اتا-اناڭا سەنىڭ ٴجۇرىس-تۇرىسىڭ قالاي اسەر ەتەدى؟ ~ كيەلى كىتاپتا: «اقىلدى بالا — اكەسىنىڭ ٴسۇيىنىشى، اقىلسىز بالا — شەشەسىنىڭ كۇيىنىشى»،— دەلىنگەن (ناقىل سوزدەر 10:1). سەن اتا-اناڭنىڭ ٴتىلىن العاندا، ولاردىڭ قۋانعانىن بايقاعانسىڭ با؟ ~ ال ٴتىلىن الماساڭ شە؟ ~
ەحوبا مەن اتا-اناڭدى قالاي قۋانتا الاسىڭ؟
ەندى كوكتەگى اكەمىز ەحوبا جايلى ويلانىپ كورەيىك. ول بىزگە ٶزىن قالاي قۋانتۋعا بولاتىنىن ايتقان. سونى كيەلى كىتاپتان وقىپ كورەيىك. ناقىل سوزدەر 27:11 دە قۇداي بىزگە بىلاي دەيدى: «بالام [نەمەسە قىزىم]، پاراساتتى بولساڭ، مەنى قۋانتاسىڭ، سوندا ٶزىمدى قورلاعاندارعا جاۋاپ بەرە الامىن». قورلاۋعا نە جاتاتىنىن بىلەسىڭ بە؟ ~ مىسالى، بىرەۋدىڭ سەنى مازاقتاعانى جانە قولىڭنان كەلەتىن نارسەنى ىستەي المايسىڭ دەپ ايتقانى — سەنى قورلاعانى. شايتان ەحوبانى قالاي قورلادى، بىلەسىڭ بە؟ ~ كەل، سونى قاراستىرايىق.
ەسىڭدە مە، 8 تاراۋدان شايتاننىڭ باسقالاردان جوعارى بولىپ، ادامداردى وزىنە باعىندىرعىسى كەلگەنىن بىلگەن ەدىك. ول ادامدارعا جالا جاۋىپ، ولار ەحوباعا ماڭگىلىك ٶمىر ٷشىن عانا عيبادات ەتىپ ٴجۇر دەپ ايتتى. شايتان ادام مەن حاۋانى ەحوبانىڭ ٴتىلىن الماۋعا يتەرمەلەگەن سوڭ، ٶزى دە وعان قارسى شىعىپ، بىلاي دەدى: «ادامدار ٶز پايداسى ٷشىن عانا ساعان قىزمەت ەتىپ ٴجۇر. ماعان مۇمكىندىك بەرسەڭ، ولاردىڭ ٴبارىن سەنەن باس تارتقىزامىن».
ادام مەن حاۋا كۇنا جاساعاننان كەيىن، شايتان ەحوباعا قالاي قارسى شىقتى؟
راس، ٴدال وسى سوزدەر كيەلى كىتاپتا جازىلماعان. ٴبىراق شايتاننىڭ قۇدايعا وسىعان ۇقساس سوزدەر ايتقانى ٵيۇپتىڭ وقيعاسىنان انىق كورىنەدى. سول كەزدە شايتان ٵيۇپتىڭ ادالدىعىنا كۇمان كەلتىردى. بۇل داۋدىڭ شەشىلگەنى قۇداي ٷشىن دە، شايتان ٷشىن دە ماڭىزدى ەدى. كانەكي، وسى وقيعانىڭ قالاي بولعانىن ٵيۇپ كىتابىنىڭ 1، 2 تاراۋىنان وقىپ كورەيىك.
ٴبىرىنشى تاراۋدا ايتىلعانداي، پەرىشتەلەر كوكتە ەحوبانىڭ الدىنا جينالادى، سول جەرگە شايتان دا كەلەدى. ەحوبا ودان: «سەن قايدان كەلدىڭ؟»— دەپ سۇراعاندا، شايتان جەردى ارالاپ كەلگەنىن ايتتى. سوندا ەحوبا شايتانعا: «ٵيۇپ دەگەن قىزمەتشىمدى كوردىڭ بە؟ ول ەشقانداي جاماندىق جاسامايدى»،— دەدى (ٵيۇپ 1:6—8).
شايتان مۇنى وزىنشە ٴتۇسىندىرىپ، بىلاي دەدى: «ارينە، ٵيۇپ ساعان قىزمەت ەتەدى، ويتكەنى ول ەش قيىندىق كورىپ جاتقان جوق. ەگەر ونى قورعاماي، باتاڭدى الىپ قويساڭ، ول ساعان قارعىس ايتادى». سوندا قۇداي وعان: «مىنە، ايۇپتە باردىڭ ٴبارى سەنىڭ قولىڭدا، ٴبىراق ونىڭ وزىنە تيىسپە»،— دەدى (ٵيۇپ 1:9—12).
وسىدان كەيىن شايتاننىڭ نە ىستەگەنىن بىلەسىڭ بە؟ ~ ول ٵيۇپتىڭ ٸرى-قارا مالى مەن ەسەكتەرىن ۇرلاتقىزىپ، مالشىلارىن ولتىرتكىزدى. نايزاعاي ٴتۇسىرىپ، قويلارى مەن قويشىلارىن ٶلتىردى. كەيىن ادامدار تۇيەلەرىن ۇرلاپ، ال باعۋشىلارىن ٶلتىرىپ كەتتى. اقىر سوڭىندا شايتان قاتتى جەل تۇرعىزدى. سونىڭ كەسىرىنەن ٵيۇپتىڭ ون بالاسى جينالىپ وتىرعان ٷي قۇلاپ، ٴبارى قىرىلىپ قالدى. وسىنداي اۋىر قيىندىققا تاپ بولسا دا، ٵيۇپ ەحوباعا قىزمەت ەتە بەردى (ٵيۇپ 1:13—22).
شايتان ەحوبانىڭ الدىنا تاعى دا كەلگەندە، ەحوبا ٵيۇپتىڭ ادالدىق ساقتاعانىنا نازار اۋداردى. ال شايتان ونى قايتادان جوققا شىعارىپ: «ماعان ونى ازاپتاۋعا جول بەرسەڭ بولعانى، ونىڭ ساعان قالاي لاعىنەت ايتقانىن كورەسىڭ»،— دەدى. سوندا ەحوبا شايتانعا ٵيۇپتى ازاپتاۋعا جول بەردى، ٴبىراق ولتىرۋگە رۇقسات بەرمەدى.
ٵيۇپ قانداي قيىندىقتارعا ٴتوزدى؟ بۇل نەگە ەحوبانى قۋانتتى؟
شايتان ٵيۇپتىڭ بۇكىل دەنەسىنە جارا قاپتاتتى. جارا ىرىڭدەپ ساسىعاندىقتان، ەشكىم ونىڭ قاسىنا جولاعىسى كەلمەدى. ٴتىپتى ايەلى وعان: «قۇدايعا لاعىنەت ايتىپ، ولە سالمايسىڭ با!»— دەدى. كەيىن دوسسىماقتارى كەلىپ، قيىندىقتارى ٷشىن ٵيۇپتىڭ ٶزى كىنالى دەپ، جانىنا باتاتىن سوزدەر ايتتى. شايتان ٵيۇپتى قانشا ازاپتاسا دا، ول قۇدايعا دەگەن ادالدىعىنان تايمادى (ٵيۇپ 2:1—13؛ 7:5؛ 19:13—20).
قالاي ويلايسىڭ، ٵيۇپتىڭ ادالدىق ساقتاعانى ەحوباعا قالاي اسەر ەتتى؟ ~ ەحوبا قۋاندى، سوندىقتان دا شايتانعا: «كوردىڭ بە، ٵيۇپ مەنى جاقسى كورگەندىكتەن قىزمەت ەتىپ ٴجۇر»،— دەي الدى. ايۇپكە ۇقساپ، سەن دە شايتاننىڭ وتىرىكشى ەكەنىن دالەلدەگىڭ كەلە مە؟ ~ بارلىق ادامدى قۇدايدان الاستاتامىن دەگەن شايتاننىڭ ٴسوزىن جوققا شىعارۋ — زور مارتەبە. بۇل يسا ٷشىن دە مارتەبە بولعان.
ۇلى ۇستاز ەشقاشان شايتاننىڭ ىقپالىنا بەرىلىپ، جامان نارسە ىستەگەن ەمەس. يسانىڭ ادالدىعىن كورىپ، اكەسى قالاي باقىتتى بولدى دەسەڭشى! ەحوبا يسانى كورسەتىپ، شايتانعا بىلاي دەي الدى: «مەنىڭ ۇلىما قاراشى! ول مەنى جاقسى كورگەندىكتەن سوڭىنا دەيىن ادالدىعىن ساقتادى!» كوردىڭ بە، يسا اكەسىنىڭ جۇرەگىن قاتتى قۋانتقان. اكەسىنە وسىنداي قۋانىش سيلاۋ ٷشىن، ۇلى ٴتىپتى بورەنەدەگى ازاپتى ولىمگە توزگەن (ەۆرەيلەرگە 12:2).
سەن دە ۇلى ۇستازىمىز سياقتى، ەحوبانى قۋانتقىڭ كەلە مە؟ ~ وندا ەحوباعا نە ۇنايتىنىن ٴبىلىپ، سونى ىستەي بەر. سوندا ەحوبا ساعان قاراپ قۋاناتىن بولادى!
ەحوبانى قۋانتۋ ٷشىن يسانىڭ نە ىستەگەنى جانە ٴبىزدىڭ نە ىستەي الاتىنىمىز جايلى وقىپ كورەيىك: ناقىل سوزدەر 23:22—25؛ جوحان 5:30؛ 6:38؛ 8:28 جانە جوحاننىڭ 2-حاتى 4.
قىزىقتى بولار مالىمەتتەر
ەحوبانىڭ دوسى بول
ەحوبانى تىڭدا
كەز كەلگەن ويىنشىقپەن ويناۋعا بولا ما؟ وسى مۋلتفيلمدە اياننىڭ قالاي ەحوبانىڭ دوسى بولعانىن كور.
