16 تاراۋ
ومىردە ەڭ ماڭىزدى نە؟
بىردە يساعا ٴبىر كىسى جولىقتى. ول يسانىڭ وتە دانا ەكەنىن بىلەتىن، سوندىقتان وعان: «ۇستاز، دۇنيە-مۇلكىن مەنىمەن ٴبولىسسىن دەپ اعاما ايتىڭىزشى»،— دەگەن ٶتىنىش ايتادى. ويتكەنى ول اعاسىنىڭ مۇلكىن الۋعا قاقىم بار دەپ ويلادى.
ەگەر سەن يسانىڭ ورنىندا بولساڭ، سول كىسىگە نە دەر ەدىڭ؟ ~ يسا ونىڭ ماڭىزدى ٴبىر جايتتى تۇسىنبەي تۇرعانىن بايقادى. نەگىزىندە، ول اعاسىنىڭ مۇلكىنە مۇقتاج ەمەس ەدى. ول ومىردە نەنىڭ ەڭ ماڭىزدى ەكەنىن تۇسىنبەگەن بولاتىن.
ومىردە ەڭ ماڭىزدىسى نە بولۋ كەرەكتىگى جايلى ويلانىپ كورەيىك. سەن ٷشىن نە ماڭىزدى بولۋ كەرەك؟ ويىنشىقتارىڭ، جاڭا كيىمدەرىڭ نەمەسە باسقا زاتتارىڭ با؟ ~ جوق، بۇدان الدەقايدا ماڭىزدى بىردەڭە بار. يسا الگى كىسىگە سونى تۇسىندىرگىسى كەلىپ، قۇدايدى ۇمىتقان ٴبىر كىسى تۋرالى وقيعا ايتىپ بەردى. ساعان سونى ايتىپ بەرەيىن بە؟ ~
ول كىسى وتە باي بولىپتى. يەلىگىندە جەرى مەن قامبالارى بار ەكەن. ٴبىر جىلى ەككەن ەگىنىنىڭ مول شىققانى سونشا — ونى ساقتايتىن قامبالاردا ورىن قالماپتى. سوندا ول نە ىستەدى؟ ويلانا كەلە، ول: «قامبالارىمدى بۇزىپ، ۇلكەندەۋ ەتىپ سوعايىن، ٴسۇيتىپ، بار استىعىم مەن دۇنيەمدى سوندا جينايىن»،— دەگەن شەشىمگە كەلدى.
باي كىسى وسى شەشىمىن دۇرىس دەپ ويلاپ، بايلىعىن ساقتاۋدىڭ
جاقسى جولىن تاۋىپ كەتكەنىنە قۋاندى. وزىنە ريزا بولعان ول: «كوپ جىلعا جەتەتىن مول قورىم بار. ەندى دەمالىپ، ٸشىپ-جەپ، كوڭىل كوتەرەيىن»،— دەدى. ٴبىراق ونىڭ بۇل ويىندا ٴبىر قاتەلىك بار ەدى. سەنىڭشە، بۇل قانداي قاتەلىك؟ ~ ول تەك ٶزىن جانە ٶز راقاتىن ويلادى. ال قۇدايدى مۇلدەم ۇمىتىپ كەتكەن ەدى.سوندا قۇداي باي كىسىگە: «ەي، اقىلسىز پەندە، بۇگىن تۇندە ٶمىرىڭ الىنادى. سوندا جيعان-تەرگەنىڭ كىمگە قالادى؟»— دەدى. شىنىندا دا، باي كىسى ٶلىپ قالسا، دۇنيە-مۇلكىنىڭ پايداسىن كورە الار ما ەدى؟ ~ ارينە، جوق، ونىسى باسقا بىرەۋگە قالار ەدى. سوندىقتان يسا: «ٶزى ٷشىن بايلىق جيناپ، ٴبىراق قۇدايدىڭ كوز الدىندا باي بولماعان ادامنىڭ اقىرى وسىنداي بولادى»،— دەدى (لۇقا 12:13—21).
سەن وسى كىسى سياقتى بولعىڭ كەلمەيدى عوي، سولاي ەمەس پە؟ ~ ونىڭ باستى ماقساتى بايلىق جيناۋ بولاتىن. بۇل دۇرىس ەمەس ەدى. ويتكەنى «قۇدايدىڭ كوز الدىندا باي بولۋدىڭ» ورنىنا، ول ۇنەمى دۇنيە-مۇلىك جيناۋدى ويلايتىن.
بۇگىندە كوپ ادام وسى باي كىسىگە ۇقسايدى. ولار وزدەرىندەگى باردى از كورىپ، تاعى جيناي بەرسەم دەيدى. ٴبىراق بۇل دۇرىس ەمەس. ايتشى، سەنىڭ ويىنشىقتارىڭ بار ما؟ ~ قانداي ويىنشىقتارىڭ بار؟ ~ ەگەر سەندە جوق قۋىرشاقپەن نە دوپپەن دوسىڭنىڭ ويناپ جۇرگەنىن كورسەڭ، اتا-اناڭا: «ماعان دا ٴدال سونداي ويىنشىق اپەر»،— دەپ تۇرىپ العانىڭ دۇرىس بولا ما؟ ~
كەيدە ساعان ويىنشىعىڭنان ارتىق ەشتەڭە جوق بولىپ كورىنۋى مۇمكىن. ٴبىراق ۇنەمى سولاي بولا بەرە مە؟ ~ ۋاقىت وتە كەلە ويىنشىق ەسكىرەدى، ٴتىپتى سىنادى. ٴسۇيتىپ، سەنىڭ ونىمەن ويناعىڭ كەلمەي قالادى. الايدا ويىنشىقتاردان الدەقايدا باعالى نارسە بار. ونىڭ نە ەكەنىن بىلەسىڭ بە؟ ~
بۇل — سەنىڭ ٶمىرىڭ. ٶمىر بارىنەن دە باعالى، ونسىز سەن ەشتەڭە ىستەي المايسىڭ. ۇزاق ٶمىر ٴسۇرۋىڭ قۇدايدى تىڭداپ جۇرگەنىڭە بايلانىستى، سولاي ەمەس پە؟ ~ سوندىقتان قۇدايدى ۇمىتقان اقىماق باي كىسى سياقتى بولما.
الگى باي كىسىگە ۇقساپ، اقىماقتىقتى بالالار عانا جاسامايدى، ۇلكەندەر دە جاساۋى مۇمكىن. ولاردىڭ كەيبىرەۋى
وزدەرىندە باردى قاناعات ەتپەي، كوپ نارسە العىسى كەلىپ جاتادى. كۇندەلىكتى تاماعى، كيەتىن كيىمى جانە تۇراتىن ٷيى بولسا دا، ولار بۇدان دا كوپ كيىم العىسى، ۇلكەنىرەك ۇيدە تۇرعىسى كەلەدى. مۇنىڭ بارىنە اقشا كەرەك. ال اقشا تابۋ ٷشىن كوپ جۇمىس ىستەۋ كەرەك. اقشاسى كوپ بولعان سايىن، ولار ودان دا كوپ تابۋعا تىرىسادى.كەيبىر ۇلكەن ادامدار اقشا تابۋ ٷشىن وتە كوپ جۇمىس ىستەيدى. مۇنىڭ كەسىرىنەن وتباسىنا ۋاقىتى جەتپەي جاتادى. ٴتىپتى قۇداي جايلى ويلاۋعا دا قولى تيمەيدى. قالاي ويلايسىڭ، تاپقان اقشاسى ولاردىڭ ٶمىرىن ساقتاي الا ما؟ ~ جوق. ولگەن سوڭ اقشاسىن جۇمساي الا ما؟ ~ جوق. ويتكەنى ولگەندەر ەشتەڭە ىستەي المايدى (ەككلەسياست 9:5، 10).
سوندا اقشانىڭ بولعانى جامان با؟ ~ جوق، ولاي ەمەس. اقشاعا ٴبىز تاماق جانە كيىم ساتىپ الامىز. كيەلى كىتاپتا اقشانىڭ قورعانىش بەرەتىنى ايتىلعان (ەككلەسياست 7:12). الايدا اقشانى جاقسى كورسەك، ۇلكەن قيىندىقتارعا تاپ بولامىز. سونداي-اق قۇدايدىڭ كوز الدىندا باي بولماي، ٶز راقاتى ٷشىن دۇنيە-مۇلىك جيناعان اقىماق باي كىسىگە ۇقساپ كەتەمىز.
قۇدايدىڭ كوز الدىندا باي بولۋ دەگەن نەنى بىلدىرەدى؟ ~ بۇل ومىرىمىزدە قۇدايدى ٴبىرىنشى ورىنعا قويۋدى بىلدىرەدى. كەيبىرەۋلەر قۇدايعا سەنەمىز، بىزگە سول دا جەتەدى دەپ ويلايدى. ٴبىراق ولار شىنىمەن قۇدايدىڭ كوز الدىندا باي ما؟ ~ جوق، ولار قۇدايدى ۇمىتقان باي كىسىگە ۇقسايدى.
يسا كوكتەگى اكەسىن ەش ۇمىتقان ەمەس. ول كوپ اقشا تابۋعا تىرىسپاعان، دۇنيە-مۇلىك تە جيناماعان. ويتكەنى ومىردە شىنىمەن نەنىڭ ماڭىزدى ەكەنىن جاقسى بىلگەن. مۇنىڭ نە ەكەنىن سەن بىلەسىڭ بە؟ ~ بۇل — قۇدايدىڭ كوز الدىندا باي بولۋ.
قۇدايدىڭ كوز الدىندا باي بولۋ ٷشىن نە ىستەۋىمىز كەرەك، ايتشى؟ ~ قۇدايعا ۇنايتىن نارسەلەردى ىستەۋىمىز كەرەك. يسا: «مەن ارقاشان وعان ۇنايتىندى ىستەيمىن»،— دەگەن (جوحان ). قۇدايعا ۇنايتىن نارسەلەردى ىستەسەك، ول قۋانادى. سەنىڭ نە ىستەگەنىڭ قۇدايعا ۇنايدى؟ ~ دۇرىس، كيەلى كىتاپ وقىعانىڭ، قاۋىم كەزدەسۋلەرىنە بارعانىڭ، دۇعا ەتكەنىڭ جانە قۇداي تۋرالى ادامدارعا ايتقانىڭ ۇنايدى. بۇلاردىڭ ٴبارى — ومىردەگى ەڭ ماڭىزدى نارسەلەر. 8:29
يسا قۇدايدىڭ كوز الدىندا باي بولعاندىقتان، ەحوبا ونىڭ قامىن ويلاعان جانە وعان ماڭگى ٶمىر سيلاعان. يساعا ۇقسايتىن بولساق، ەحوبا ٴبىزدى دە جاقسى كورىپ، قامىمىزدى ويلايتىن بولادى. سونىمەن، يساعا ەلىكتەيىك. ال قۇدايدى ۇمىتقان باي كىسىگە ەشقاشان ۇقسامايىق.
كەلەسى تارماقتار دۇنيە-مۇلىككە قاتىستى دۇرىس كوزقاراس ساقتاۋعا كومەكتەسەدى: ناقىل سوزدەر 23:4؛ 28:20؛ تىموتەگە 1-حات 6:6—10 جانە ەۆرەيلەرگە 13:5.