ٴ‌بىزدىڭ ۇيىمىمىز جىل سايىن كيەلى كىتاپ پەن باسقا دا ادەبيەتتەردىڭ ميلليونداعان داناسىن باسىپ شىعارىپ،‏ تەگىن تاراتادى.‏ سونداي-‏اق پاتشالىق سارايلارى مەن بەتەل عيماراتتارىن سوعادى ٵرى ولاردى جوندەپ تۇرادى.‏ بۇعان قوسا،‏ مىڭداعان بەتەلدىك پەن ميسسيونەردىڭ قاجەتتىلىگىن قامتاماسىز ەتەدى جانە اپاتتان زارداپ شەككەندەرگە كومەك كورسەتەدى.‏ بالكىم،‏ ٴ‌سىز:‏ «بۇنىڭ ٴ‌بارى قالاي قارجىلاندىرىلادى؟‏»—‏ دەپ،‏ تاڭعالاتىن شىعارسىز.‏

ٴ‌بىز اقشا،‏ جارنا نە تابىستىڭ وننان ٴ‌بىر بولىگىن جينامايمىز.‏ ۋاعىز ٸسىن قولداۋ ٷشىن كوپ قارجى قاجەت بولعانمەن،‏ ٴ‌بىز بۇل ٷشىن وزگەلەردەن اقشا سۇرامايمىز.‏ وسىدان ٴ‌جۇز جىلدان اسا ۋاقىت بۇرىن شىققان «كۇزەت مۇناراسىنىڭ» ەكىنشى سانىندا ٴ‌بىزدىڭ ەحوباعا ارقا سۇيەيتىنىمىز جانە «ەشقاشان ادام بالاسىنان جالىنىپ اقشا سۇرامايتىنىمىز» ايتىلعان ەدى.‏ وسى كۇنگە دەيىن بۇل سولاي بولىپ كەلەدى دە!‏ (‏ماتاي 10:‏8‏)‏.‏

ٴ‌بىزدىڭ ٸسىمىز ەرىكتى ساداقانىڭ ارقاسىندا اتقارىلادى.‏ كوپ ادام ٴ‌بىزدىڭ كيەلى كىتاپتىق اعارتۋ ٸسىمىزدى باعالايدى ٵرى سول ٷشىن دايارلىقپەن ساداقا بەرەدى.‏ كۋاگەرلەردىڭ وزدەرى دە قۇداي ەركىن دۇنيەجۇزى بويىنشا اتقارۋ ٷشىن ۋاقىتتارىن،‏ كۇشتەرىن،‏ قاراجاتتارى مەن باسقا دا نارسەلەرىن زور قۋانىشپەن جۇمسايدى (‏شەجىرەلەر 1-‏جازبا 29:‏9‏)‏.‏ پاتشالىق سارايىندا جانە كونگرەستەردە ساداقا سالۋعا ارنالعان جاشىكتەر بولادى.‏ ەرىكتى ساداقا بەرگىسى كەلەتىندەر اقشالارىن سوعان سالادى.‏ يا بولماسا ٴ‌بىزدىڭ رەسمي تور بەكەتىمىز jw.org ارقىلى ساداقا جاساۋعا بولادى.‏ ساداقا بەرۋشىلەردىڭ كوبىسى باي ەمەس.‏ ولاردىڭ سالعان ازىن-‏اۋلاق اقشاسىن كەزىندە يسانىڭ ماقتاۋىنا يە بولعان بەيشارا جەسىر ايەلدىڭ ساداقاسىمەن سالىستىرۋعا بولادى.‏ ول ايەل عيباداتحانانىڭ قازىنا ىدىسىنا ەكى-‏اق تيىن سالعان ەدى (‏لۇقا 21:‏1—‏4‏)‏.‏ راسىندا دا،‏ ٵر ادام «جۇرەك شەشىمىنە قاراي» «قولدا بار قاراجاتىنان» جۇيەلى تۇردە ساداقا بەرىپ تۇرا الادى (‏قورىنتتىقتارعا 1-‏حات 16:‏2؛‏ قورىنتتىقتارعا 2-‏حات 9:‏7‏)‏.‏

ەحوبانى «قۇندى نارسەلەرىمەن» قۇرمەتتەگىسى كەلەتىندەردى ول ٵرى قاراي دا سولاي ەتە بەرۋگە تالپىندىراتىنىنا سەنىمدىمىز.‏ وسىنىڭ ارقاسىندا پاتشالىق ٸسى العا باسىپ،‏ ەحوبانىڭ ەركى جەر بەتىندە تولىق ورىندالماق (‏ناقىل سوزدەر 3:‏9‏)‏.‏

• ٴ‌بىزدىڭ ۇيىمىمىز وزگە دىندەردەن نەسىمەن ەرەكشەلەنەدى؟‏

• ەرىكتى ساداقا نەندەي نارسەلەرگە جۇمسالادى؟‏