بيلەر 11:1—40
11 عالاقاتتىق ەفتا+ جاۋجۇرەك ادام بولاتىن. ونىڭ شەشەسى جەزوكشە ايەل، ال اكەسى عالاقات ەدى.
2 ٴبىراق عالاقاتتىڭ ٶز ايەلى دە وعان بىرنەشە ۇل تۋىپ بەردى. ولار ەرجەتكەندە ەفتاعا: «سەن باسقا ايەلدىڭ بالاسىسىڭ، سوندىقتان اكەمىزدىڭ ۇيىنەن مۇرا المايسىڭ»،— دەپ، ونى قۋىپ جىبەردى.
3 سوندىقتان ول باۋىرلارىنان قاشىپ، توب جەرىنە بارىپ قونىس تەپتى. ونىڭ قاسىنا ەرىككەن ادامدار جينالىپ، ولار جاۋدىڭ جەرىنە شاپقىنشىلىق جاساپ ٴجۇردى.
4 ٴبىراز ۋاقىت وتكەندە امموندىقتار يسرايلدىكتەرگە قارسى سوعىس باستادى+.
5 امموندىقتار جورىققا اتتانعاندا، عالاقات اقساقالدارى ەفتانى قايتارۋ ٷشىن دەرەۋ توب جەرىنە كەلدى.
6 ولار ەفتاعا: «بىزبەن ٴجۇرىپ، قولباسشىمىز بول، امموندىقتارمەن شايقاسايىق»،— دەدى.
7 ٴبىراق ول عالاقات اقساقالدارىنا: «مەنى جەك كورىپ، اكەمنىڭ ۇيىنەن قۋىپ جىبەرگەن وزدەرىڭ ەمەس پە ەدىڭدەر+؟ باستارىڭا كۇن تۋعاندا، نەمەنەگە ماعان كەلدىڭدەر؟»— دەدى.
8 ولاردىڭ جاۋابى مىناۋ بولدى: «بۇنىڭ راس، ٴبىراق قازىر بىزبەن بىرگە بارىپ، امموندىقتارمەن شايقاسساڭ، كۇللى عالاقات تۇرعىندارىنىڭ باسشىسى بولاسىڭ+».
9 سوندا ەفتا: «امموندىقتارمەن شايقاسۋ ٷشىن مەنى قايتارساڭدار، ٵرى ەحوبا ولاردى اياعىما جىعىپ بەرسە، مەن باسشىلارىڭ بولامىن!»— دەدى.
10 عالاقات اقساقالدارى: «ايتقانىڭدى ورىنداماساق، كۋامىز بەن تورەشىمىز ەحوبا بولسىن»،— دەپ جاۋاپ بەردى.
11 سودان ەفتا عالاقات اقساقالدارىنا ەرىپ باردى دا، جۇرت ونى وزدەرىنە باسشى ٵرى قولباسشى ەتىپ قويدى. ەفتا بولسا الگى سوزدەرىنىڭ ٴبارىن ميسپادا+ ەحوبانىڭ الدىندا قايتالادى.
12 سوسىن ول امموندىقتاردىڭ+ پاتشاسىنا حابارشىلار جىبەرىپ: «جەرىمە باسا-كوكتەپ كىرىپ، سوعىساتىنداي مەندە نەڭ بار؟»— دەدى.
13 امموندىقتاردىڭ پاتشاسى ونىڭ حابارشىلارىنا: «مىسىردان شىققان سوڭ، يسرايلدىكتەر مەنىڭ ارنوننان+ يابوك پەن يوردانعا دەيىنگى+ جەرىمدى تارتىپ العان+. سونى تىنىشتىقپەن وزىمە قايتار»،— دەگەندى ايتتى.
14 ٴبىراق ەفتا تاعى دا حابارشىلارىن جىبەرىپ،
15 مىنانى ايتقىزدى: «ەفتا مىنانى ايت دەپ جىبەردى: —يسرايلدىكتەر موابتىقتاردىڭ دا، امموندىقتاردىڭ دا جەرىن تارتىپ العان ەمەس+.
16 ولار مىسىردان شىققان سوڭ، قىزىل تەڭىزگە دەيىن ٴشول دالانى كەزىپ ٴجۇردى دە+، قادەشكە كەلدى+.
17 بۇدان كەيىن ەدوم+ پاتشاسىنا حابارشىلار جىبەرىپ: «ٴسىزدىڭ جەرىڭىز ارقىلى وتەيىكشى»،— دەپ ٶتىندى، ٴبىراق ول بۇعان قۇلاق اسپادى. مواب+ پاتشاسىنا دا حابارشىلار جىبەرگەن ەدى، ول دا كەلىسپەدى، سوندىقتان ولار قادەشتە+ تۇراقتاپ قالدى.
18 سوسىن ٴشول ارقىلى ەدوم+ مەن مواب جەرىن اينالىپ ٶتتى. ولار موابتىڭ شىعىسىنا قاراي بەتتەدى دە+، ارنون ايماعىنا كەلىپ، سوندا قوس تىكتى. ولار مواب جەرىنە اياق باسپادى، ويتكەنى ارنون موابتىڭ شەگاراسى بولاتىن+.
19 بۇدان كەيىن يسرايلدىكتەر حەشبوندا بيلىك ەتكەن امورلىقتاردىڭ پاتشاسى سيحونعا حابارشىلار جىبەرىپ: «ٶز جەرىمىزگە جەتۋ ٷشىن، ٴسىزدىڭ جەرىڭىز ارقىلى وتۋگە رۇقسات ەتىڭىزشى»،— دەپ ٶتىندى+.
20 سيحون ولارعا سەنبەگەندىكتەن جەرىنەن وتكىزبەدى. قايتا، كۇللى حالقىن جيناپ، ياحاستا قوس تىكتى دە، ولارمەن سوعىستى+.
21 سوندا يسرايلدىڭ قۇدايى ەحوبا سيحون مەن ونىڭ كۇللى حالقىن يسرايلدىكتەردىڭ اياعىنا جىعىپ بەردى. ولار جاۋلارىن قىرىپ سالىپ، امورلىقتار تۇراتىن سول جەردى تۇگەل جاۋلاپ الدى+.
22 وسىلايشا ارنوننان يابوككە، سونداي-اق ٴشول دالادان يوردانعا دەيىنگى امورلىقتاردىڭ كۇللى جەرىن يەلەندى+.
23 يسرايلدىڭ قۇدايى ەحوبانىڭ ٶزى امورلىقتاردى حالقىنىڭ الدىندا قۋىپ تاستادى+، ەندى سول يسرايلدىكتەردى سەن قۋىپ تاستاماقسىڭ با؟
24 سەن قۇدايىڭ حاموس+ كىمنىڭ جەرىن بەرسە، سول جەردى يەمدەنەسىڭ عوي. ٴبىز دە قۇدايىمىز ەحوبا كىمنىڭ جەرىن بەرسە، سول جەردى يەمدەنەمىز+.
25 مواب پاتشاسى سيپور ۇلى بالاقتان+ سەنىڭ قاي جەرىڭ ارتىق؟! ول يسرايلمەن تالاسقان دا، سوعىسقان دا جوق ەدى.
26 يسرايل 300 جىل بويى حەشبون مەن اروگەردى جانە ولاردىڭ قاراماعىنداعى قالالاردى+، سونداي-اق ارنوننىڭ جاعالاۋىنداعى قالالاردىڭ ٴبارىن مەكەن ەتتى. سول كەزدە وسى جەرلەردى نەگە تارتىپ المادىڭ+؟
27 مەن ساعان قارسى ەش كۇنا جاساعان جوقپىن. ماعان سوعىس اشقانىڭ دۇرىس ەمەس. ەحوبا — تورەشى+، يسرايلدىكتەر مەن امموندىقتارعا بۇگىن ونىڭ ٶزى تورەلىك ەتسىن».
28 امموندىقتاردىڭ پاتشاسى ەفتا ايتىپ جىبەرگەن سوزدەرگە قۇلاق اسپادى.
29 سوندا ەفتاعا ەحوبانىڭ رۋحى قونىپ+، ول عالاقات پەن ماناسا جەرى ارقىلى ٶتىپ، عالاقاتتاعى ميسپاعا كەلدى+. سول جەردەن امموندىقتارعا قاراي اتتاندى.
30 سوسىن ول ەحوباعا بىلاي دەپ انت بەردى+: «ەگەر امموندىقتاردى اياعىما جىعىپ بەرسەڭ،
31 ۇيىمە جەڭىسپەن ورالعانىمدا، مەنى قارسى الۋ ٷشىن ەسىگىمنەن ٴبىرىنشى بولىپ كىم شىقسا، سول ەحوبانىكى بولماق+. سونى تۇگەل ورتەلەتىن قۇرباندىق رەتىندە بەرەمىن+».
32 سونىمەن، ەفتا امموندىقتارمەن سوعىستى، ال ەحوبا ولاردى اياعىنا جىعىپ بەردى.
33 ەفتا امموندىقتاردى اروگەردەن ميننيتكە دەيىن جامساتىپ، 20 قالاسىن باسىپ الدى. سودان ولاردى ابەل-كەراميمگە دەيىن قىرىپ، وتە كوپ ادام جەر قۇشتى. وسىلاي امموندىقتار يسرايلدىكتەرگە باعىنىشتى بولدى.
34 اقىرىندا ەفتا ميسپاداعى+ ۇيىنە كەلگەندە، الدىنان داڭعىرا قاعىپ، بي بيلەپ قىزى شىقتى! ول ەفتانىڭ جالعىز پەرزەنتى ەدى: ودان باسقا ۇلى دا، قىزى دا جوق بولاتىن.
35 مۇنى كورگەندە، ەفتا كيىمىنىڭ ٶڭىرىن جىرتىپ: «اتتەگەن-اي، قىزىم! جۇرەگىمدى جارالادىڭ-اۋ! مەن ۇيدەن الاستاتاتىن ادام سەن بولدىڭ عوي! ەحوباعا بەرگەن انتىم بار ەدى، ەندى ٴسوزىمدى قايتىپ الا المايمىن+»،— دەدى.
36 ٴبىراق قىزى وعان: «اكە، ەحوباعا بەرگەن انتىڭىز بولسا، سوزىڭىزدەن تايماڭىز+. ويتكەنى ەحوبا ٴسىز ٷشىن جاۋىڭىز امموندىقتاردان ٶش الدى عوي»،— دەپ جاۋاپ بەردى.
37 سوسىن بىلاي دەپ ٴسوزىن جالعادى: «سىزدەن سۇرانارىم — مەنى ەكى ايعا قۇربىلارىممەن تاۋعا جىبەرسەڭىز ەكەن. پاك كۇيىمدە قالاتىنىم ٷشىن*، قۇربىلارىممەن بىرگە سول جەرگە بارىپ جىلايىن».
38 اكەسى: «بارا عوي،»— دەپ، ونى ەكى ايعا جىبەردى. سودان ول قۇربىلارىمەن تاۋعا بارىپ، پاك كۇيىندە قالاتىنى ٷشىن سول جەردە جىلادى.
39 ەكى ايدان كەيىن ۇيىنە ورالعاندا، اكەسى قىزى جايلى بەرگەن انتىن ورىندادى+. ٴسۇيتىپ، ول ەشقاشان ەركەكپەن جاقىنداسقان جوق. ال يسرايل ەلىندە مىناداي ٴداستۇر قالىپتاستى:
40 جىل سايىن يسرايل قىزدارى عالاقاتتىق ەفتانىڭ قىزىن ماقتاۋعا بارىپ، جىلىنا ٴتورت كۇن ونىڭ قاسىندا بولاتىن.
سىلتەمەلەر
^ نەمەسە «ەشقاشان تۇرمىس قۇرمايتىنىم ٷشىن».
