بيلەر 12:1—15
12 بۇدان كەيىن ەفرەم رۋىنىڭ ادامدارى جينالىپ، سافونعا* ٶتىپ، ەفتاعا كەلدى دە: «امموندىقتارمەن سوعىسۋعا ٴبىزدى نەگە شاقىرمادىڭ+؟ وسىلاي ەتكەنىڭ ٷشىن سەنى ۇيىڭمەن قوسا ورتەپ جىبەرەمىز!»— دەدى.
2 ەفتا ولارعا بىلاي دەدى: «امموندىقتار — مەنىڭ دە، حالقىمنىڭ دا اتا جاۋى. كومەككە شاقىرعانىمدا، مەنى ولاردىڭ قولىنان قۇتقارمادىڭدار.
3 سەندەردىڭ قۇتقارمايتىندارىڭدى بىلگەن سوڭ، باسىمدى قاتەرگە تىگە وتىرىپ، امموندىقتارمەن شايقاسۋعا بەل بايلادىم+. ەحوبا ولاردى اياعىما جىعىپ بەردى. ەندى نەمەنەگە مەنىمەن سوعىسۋعا كەلىپ تۇرسىڭدار؟»
4 سوندا ەفتا بارلىق عالاقاتتىقتاردى+ جيناپ، ەفرەممەن شايقاسا كەتتى. ەفرەمدىكتەردىڭ: «ەفرەم مەن ماناسانىڭ جەرىندە تۇرىپ جاتقان عالاقاتتىقتار! سەندەر بار بولعانى ەفرەم رۋىنىڭ قاشقىنىسىڭدار!»— دەگەنى ٷشىن عالاقاتتىقتار ولاردى جاپپاي قىردى.
5 ولار ەفرەمدىكتەردىڭ الدىن وراپ، يوردان وتكەلدەرىن باسىپ الدى+. قاشىپ بارا جاتقان ەفرەمدىكتەردىڭ بىرەۋى كەلىپ: «ارعى بەتكە وتەيىنشى،— دەسە، عالاقاتتىقتار ودان: —سەن ەفرەمدىكسىڭ بە؟»— دەپ سۇرايتىن. ول: «جوق»،— دەپ جاۋاپ بەرەتىن.
6 ال عالاقاتتىقتار: «كانە، «شيببولەت» دەشى»،— دەيتىن. الگىنىڭ ٴتىلى كەلمەي «سيببولەت» دەسە، ونى ۇستاپ الىپ، يوردان وتكەلىنىڭ ماڭىندا ٶلتىرىپ تاستايتىن. وسىلايشا وسى شايقاستا 42000 ەفرەمدىك قازا بولدى.
7 عالاقاتتىق ەفتا يسرايلدە التى جىل بي بولعان سوڭ، دۇنيە سالدى. ونىڭ سۇيەگى عالاقاتتاعى تۋعان قالاسىنا قويىلدى.
8 ودان كەيىن يسرايلدىڭ ٴبيى بەتلەحەمدىك يبزان بولدى+.
9 يبزاننىڭ 30 ۇلى، 30 قىزى بار ەدى. ول قىزدارىن ٶز اۋلەتىنەن تىس جاققا ۇزاتىپ، ۇلدارىنا باسقا اۋلەتتەن 30 قىز الىپ بەردى. يبزان يسرايلدە جەتى جىل بي بولدى.
10 ول قايتىس بولىپ، بەتلەحەمدە جەرلەندى.
11 يبزاننان كەيىن زابۋلوندىق ەلون شىعىپ، يسرايلدە ون جىل بي بولدى.
12 زابۋلوندىق ەلون دۇنيە سالعاننان كەيىن، سۇيەگى زابۋلون جەرىندەگى ايالونعا قويىلدى.
13 ەلوننان كەيىن يسرايلدە پيراتوندىق حەلەل ۇلى ابدون بي بولدى.
14 ونىڭ 70 ەسەككە ٴمىنىپ جۇرەتىن 40 ۇلى، 30 نەمەرەسى بار ەدى. ول يسرايلدە سەگىز جىل بي بولدى.
15 بۇدان كەيىن ول كوز جۇمىپ، پيراتوندا، امالەكتىكتەردىڭ+ تاۋىنداعى ەفرەم جەرىندە جەرلەندى.
سىلتەمەلەر
^ مۇمكىن: «سولتۇستىككە».