بيلەر 8:1—35
8 سوندا وعان ەفرەمدىكتەر كەلىپ: «بۇل نە قىلعانىڭ؟ مادياندىقتارمەن سوعىسۋعا ٴبىزدى نەگە شاقىرمادىڭ+؟»— دەپ، قاتتى داۋلاستى+.
2 ٴبىراق گەدەون ولارعا مىنانى ايتتى: «سەندەرمەن سالىستىرعاندا مەنىڭ ىستەگەنىم تۇك تە ەمەس قوي! ابيەزەردىڭ+ ناۋقاندا جيناعان جۇزىمىنەن ونىڭ ارتىنان ەفرەمنىڭ+ تەرىپ العانى الدەقايدا ارتىق ەمەس پە؟
3 مادياننىڭ قوس بەكزاداسى وريب پەن ٴزيپتى+ قۇداي سەندەردىڭ قولدارىڭا بەردى. سەندەردىكىمەن سالىستىرعاندا مەنىڭ ىستەگەنىم تۇك ەمەس قوي!» گەدەوننىڭ وسى سوزدەرىنەن كەيىن، ولاردىڭ اشۋى باسىلدى.
4 بۇدان كەيىن گەدەون قاسىنداعى 300 اداممەن يوردانعا كەلىپ، ودان ٶتتى. ولار شارشاعاندارىنا قاراماي، جاۋلارىن قۋا بەردى.
5 سوسىن گەدەون سۋقوت تۇرعىندارىنا: «ٴبىز ماديان پاتشالارى زەبەي مەن سالماندى قۋىپ كەلەمىز. ماعان ەرگەن جىگىتتەر شارشادى، بىزگە نان بەرىڭدەرشى»،— دەدى.
6 ٴبىراق سۋقوت بەكزادالارى: «اسكەرىڭە نان بەرەتىندەي، زەبەي مەن سالماندى قولعا ٴتۇسىرىپ قويعان با ەدىڭ؟»— دەدى.
7 گەدەوننىڭ جاۋابى مىناۋ بولدى: «وسىدان قاراپ تۇرىڭدار، ەحوبا زەبەي مەن سالماندى ۋىسىما سالىپ بەرگەندە، مەن سەندەردى شولدە وسەتىن تىكەندەرمەن، تىكەندى بۇتالارمەن سابايمىن+».
8 سودان ول پەنۋەلگە بارىپ، ونىڭ تۇرعىندارىنان دا نان بەرۋدى ٶتىندى. ٴبىراق ولار دا سۋقوت تۇرعىندارى ىسپەتتى جاۋاپ بەردى.
9 سوندىقتان گەدەون ولارعا: «جەڭىسپەن ورالعانىمدا، مىنا مۇنارالارىڭدى تاس-تالقان ەتەمىن+»،— دەدى.
10 زەبەي مەن سالمان 15 مىڭداي ساربازىمەن كاركوردا ەدى. سەمسەر ۇستاعان 120000 ساربازى جەر قۇشقاننان كەيىن شىعىس تۇرعىندارىنىڭ قالعان بار اسكەرى+ وسى بولاتىن.
11 گەدەون بولسا نوباح پەن جوحپەحانىڭ+ شىعىسىنان وتەتىن كوشپەندىلەردىڭ جولىن بويلاي وتىرىپ، جاۋ قوسىنا قاپىلىستا تاپ بەردى.
12 زەبەي مەن سالمان قاشا جونەلگەندە، گەدەون بىردەن سوڭدارىنا ٴتۇسىپ، مادياندىقتاردىڭ سول ەكى پاتشاسىن ۇستاپ الدى. وسىلايشا بۇكىل قوستى دۇربەلەڭگە ٴتۇسىردى.
13 جوعاش ۇلى گەدەون جورىقتان حارەسكە كوتەرىلەتىن جولمەن قايتتى.
14 جول-جونەكەي سۋقوتتىق ٴبىر جىگىتتى ۇستاپ الىپ، ودان ٴبارىن سۇراستىرىپ الدى. جىگىت وعان سۋقوتتىڭ بەكزادالارى مەن اقساقالدارىنىڭ، 77 ادامنىڭ، ٴتىزىمىن جازىپ بەردى.
15 سودان گەدەون سۋقوت تۇرعىندارىنا بارىپ: «مىنە، سەندەرگە زەبەي مەن سالمان. وسى ەكەۋى ٷشىن مەنى مازاق قىلىپ: —شارشاعان اسكەرىڭە نان بەرەتىندەي، زەبەي مەن سالماندى قولعا ٴتۇسىرىپ قويعان با ەدىڭ؟— دەپ ەدىڭدەر عوي!»— دەدى+.
16 سوسىن شولدە وسەتىن تىكەندەرمەن، تىكەندى بۇتالارمەن قالا اقساقالدارىن جازالادى+.
17 پەنۋەل+ مۇناراسىن بولسا تاس-تالقان ەتتى، ال قالا تۇرعىندارىن ٶلتىرىپ تاستادى.
18 گەدەون زەبەي مەن سالماننان: «تابوردا ولتىرگەن ادامدارىڭ قانداي ەدى؟»— دەپ سۇرادى. ولار: «ٴارقايسىسى سەن سياقتى، پاتشا ۇلىنا ۇقسايتىن»،— دەگەندە،
19 ول: «ولار مەنىڭ ٴبىر انادان تۋعان باۋىرلارىم ەدى. سولاردى امان الىپ قالعاندارىڭدا، ٴتىرى قۇداي ەحوبانىڭ الدىندا شىن ايتامىن*، سەندەردى ولتىرمەس ەدىم»،— دەپ جاۋاپ بەردى.
20 سوسىن تۇڭعىشى ەتەرگە: «ورنىڭنان تۇر دا، مىنالاردى ٶلتىر!»— دەدى. ٴبىراق جىگىت سەمسەرىن قىنابىنان سۋىرمادى. ول ٵلى بالاڭ جىگىت بولعاندىقتان قورىقتى.
21 سوندا زەبەي مەن سالمان گەدەونعا: «ٴبىزدى ٶزىڭ ٶلتىر، سەبەبى ادامنىڭ كۇشى وزىنە ساي بولادى»،— دەدى. سودان ول الگى ەكەۋىن ٶلتىردى دە+، تۇيەلەرىنىڭ موينىنداعى اشەكەيلەرىن* شەشىپ الدى.
22 كەيىنىرەك يسرايلدىكتەر گەدەونعا: «سەن ٴبىزدى مادياندىقتاردان امان الىپ قالدىڭ، ەندى ٶزىڭ جانە ۇلىڭ، سونداي-اق نەمەرەڭ بىزگە بيلىك ەتسىن»،— دەدى+.
23 ٴبىراق ول: «سەندەرگە مەن نە ۇلىم ەمەس، ەحوبا بيلىك ەتەدى+»،— دەپ جاۋاپ بەردى.
24 سوسىن ٴسوزىن جالعاپ بىلاي دەدى: «سەندەردەن وتىنەرىم — ٴارقايسىسىڭ تۇسكەن ولجادان مۇرىنعا تاعاتىن ٴبىر-ٴبىر سىرعادان بەرىڭدەر». (جەڭىلگەندەر مۇرىندارىنا التىن سىرعا تاعاتىن، ويتكەنى ولار ىسماعۇلدىق+ ەدى).
25 سوندا ولار: «ارينە بەرەمىز»،— دەدى دە، جەرگە شاپان توسەپ، ۇستىنە ٴارقايسىسى ٶز ولجاسىنان مۇرىنعا تاعاتىن ٴبىر-ٴبىر سىرعادان تاستادى.
26 اشەكەيلەر* مەن سىرعالاردى، ماديان پاتشالارى كيەتىن كۇلگىن ٴتۇستى جۇننەن جاسالعان كيىم-كەشەكتى جانە تۇيەلەرگە تاعىلعان اشەكەيلەردى ەسەپتەمەگەندە، گەدەون سۇراپ العان مۇرىنعا تاعاتىن التىن سىرعالاردىڭ سالماعى 1700 شەكەل* بولدى+.
27 گەدەون ودان ەفود*+ جاساپ، ونى ٶزىنىڭ قالاسى وفراعا+ قويدى. ال بۇكىل يسرايل سوعان تابىنۋعا بارىپ، ازعىندىق جاسايتىن بولدى+. گەدەون مەن ونىڭ ٷي ٸشى ٷشىن ول تۇزاققا اينالدى+.
28 ماديان+ ەلى يسرايلدىكتەرگە باعىنىشتى بولىپ، سودان قايتىپ باس كوتەرمەدى. گەدەوننىڭ زامانىندا بۇل جەر 40 جىل سوعىستان تىنىم تاپتى+.
29 جوعاش ۇلى ەرۋباعال+ ٶز ۇيىنە ورالىپ، سوندا ٶمىر ٴسۇردى.
30 گەدەوننىڭ 70 ۇلى بولدى، سەبەبى ونىڭ ايەلدەرى كوپ ەدى.
31 سيحەمدە تۇراتىن كانيزاگى دا وعان ۇل تۋىپ بەردى. اكەسى وعان ابۋمالىك+ دەگەن ات قويدى.
32 جوعاش ۇلى گەدەون ۇزاق عۇمىر كەشىپ، ومىردەن ٶتتى. ونىڭ ٴمايىتى ابيەزەر+ ۇرپاقتارىنىڭ يەلىگىندەگى وفرادا ورنالاسقان جوعاشتىڭ قابىرىنە قويىلدى.
33 گەدەون قايتىس بولا سالىسىمەن، يسرايلدىكتەر قايتادان باعالدارعا تابىنىپ، ازعىندىق جاساي باستادى+. ولار وزدەرىنە باعال-بەريتتى قۇداي ەتىپ بەكىتتى+.
34 ال وزدەرىن اينالاسىنداعى كۇللى جاۋلارىنان قۇتقارعان قۇدايلارى ەحوبانى ەستەرىنە المادى+.
35 ەرۋباعالدىڭ، ياعني گەدەوننىڭ، ىستەگەن بار جاقسىلىعىنا قاراماستان، ونىڭ ٷي ىشىنە دە اينىماس سۇيىسپەنشىلىك تانىتپادى+.
سىلتەمەلەر
^ نەمەسە «ەحوبانىڭ ٴتىرى ەكەنىندەي حاق ٴسوزىم».
^ مۇندا نوبايى جارتى نە تولىق اي ىسپەتتى ەتىپ جاسالعان اشەكەي جونىندە ايتىلعان.
^ مۇندا نوبايى جارتى نە تولىق اي ىسپەتتى ەتىپ جاسالعان اشەكەي جونىندە ايتىلعان.
^ 1 شەكەل 4.11 گرامعا تەڭ. B14 قوسىمشاسىن قاراڭىز.
^ تۇسىندىرمەنى قاراڭىز.