بيلەر 9:1—57
9 ۋاقىت وتە كەلە ەرۋباعالدىڭ ۇلى ابۋمالىك+ شەشەسىنىڭ سيحەمدەگى اعا-ىنىلەرىنە بارىپ، ولارعا جانە بۇكىل ناعاشى جۇرتىنا بىلاي دەدى:
2 «سيحەمنىڭ بارلىق باسشىلارىنا* مىنانى ايتىڭدارشى: —سەندەرگە ەرۋباعالدىڭ+ 70 بالاسىنىڭ بيلىك ەتكەنى جاقسى ما، الدە بىرەۋىنىڭ بە؟ قانداستارىڭ* ەكەنىمدى ۇمىتپاڭدار»،— دەدى.
3 ناعاشى اعا-ىنىلەرى ونىڭ سوزدەرىن سيحەمنىڭ باسشىلارىنا جەتكىزگەندە، ولار: «ول ٴبىزدىڭ باۋىرىمىز عوي»،— دەسىپ، ابۋمالىككە بۇيرەكتەرى بۇرا باستادى.
4 ولار ابۋمالىككە باعال-بەريتتىڭ+ عيباداتحاناسىنان 70 كۇمىس اقشا الىپ بەردى. ول بولسا بۇل اقشاعا شاشباۋىن كوتەرىپ جۇرەتىن ەرىككەن، ورەسكەل كىسىلەردى جالدادى.
5 سوسىن اكەسىنىڭ وفراداعى+ ۇيىنە بارىپ، تۋعان باۋىرلارىن، ەرۋباعالدىڭ 70 ۇلىن، ٴبىر تاستىڭ ۇستىندە ٶلتىردى+. ەرۋباعالدىڭ كەنجەسى جوتام عانا تىعىلىپ قالىپ، امان قالدى.
6 بۇدان كەيىن سيحەمنىڭ بارلىق باسشىلارى مەن بەت-ميللونىڭ كۇللى تۇرعىندارى ۇلكەن اعاشتىڭ، سيحەمدەگى باعانانىڭ جانىنا جينالىپ، سول جەردە ابۋمالىكتى پاتشا+ ەتىپ تاعايىندادى.
7 جوتامعا بۇل تۋرالى حابار جەتكەندە، ول دەرەۋ گاريزيم+ تاۋىنىڭ باسىنا شىعىپ، بىلاي دەپ ايعايلادى: «سيحەم باسشىلارى، ماعان قۇلاق اسىڭدار، سوندا قۇداي سەندەرگە قۇلاق اسادى!
8 بىردە اعاشتار وزدەرىنە پاتشا تاعايىنداماق بولىپ، ٴزايتۇن اعاشىنا: —ٴبىزدىڭ پاتشامىز بول!— دەپتى+.
9 ٴبىراق ول: —قۇداي مەن ادامداردى ماداقتاۋعا ارنالعان مايىمدى تاستاپ، باسقا اعاشتاردىڭ ۇستىنەن شايقالىپ قايتەمىن؟— دەيدى.
10 سوندا اعاشتار ٸنجىر اعاشىنا: —وندا سەن ٴبىزدىڭ پاتشامىز بول،— دەپتى.
11 ٸنجىر بولسا: —ٴتاتتى جەمىستەرىمدى تاستاپ، باسقا اعاشتاردىڭ ۇستىنەن شايقالىپ نەم بار؟— دەپتى.
12 بۇدان كەيىن ولار ٴجۇزىم بۇتاسىنا: —ٴبىزدىڭ پاتشامىز بول،— دەگەندە،
13 ول: —قۇدايدى دا، ادامداردى دا قۋانتاتىن جاس شارابىمدى تاستاپ، اعاشتاردىڭ ۇستىنەن شايقالىپ نە قىلامىن؟— دەپ جاۋاپ بەرىپتى.
14 اقىرىندا اعاشتار تىكەندى بۇتاعا: —ٴبىزدىڭ پاتشامىز سەن بول،— دەيدى+.
15 سوندا تىكەندى بۇتا: —مەنى شىنىمەن وزدەرىڭە پاتشا ەتىپ تاعايىنداعىلارىڭ كەلسە، ساياما كەلىپ پانالاڭدار. ال ولاي ەتپەسەڭدەر، تىكەندى بۇتادان وت شىعىپ، ليۆاننىڭ قاراعايلارىن جالماپ قويسىن!— دەيدى.
16 سەندەر ابۋمالىكتى پاتشا+ ەتكەندە، مۇنى شىن كوڭىلدەن، يگى نيەتپەن ىستەدىڭدەر مە؟ ەرۋباعال مەن ونىڭ ٷي ىشىنە ىزگىلىك جاساپ، جاقسىلىعىنىڭ قارىمتاسىن قايتاردىڭدار ما؟
17 اكەم سەندەردى مادياننىڭ قولىنان امان الىپ قالۋ ٷشىن باسىن قاتەرگە تىگىپ شايقاسقان ەدى+.
18 سەندەر بولساڭدار اكەمنىڭ ٷي ىشىنە قارسى شىعىپ، ونىڭ ۇلدارىن، 70 ٸنىڭ ٴبارىن، ٴبىر تاستىڭ ۇستىندە ولتىردىڭدەر+. ال كۇڭىنەن تۋعان+ ابۋمالىكتى باۋىرلارىڭ بولعانى ٷشىن، سيحەم باسشىلارىنىڭ ۇستىنەن پاتشا ەتتىڭدەر.
19 سونىمەن، ەرۋباعال مەن ونىڭ ٷي ىشىنە ىستەگەندەرىڭ شىن كوڭىلدەن، يگى نيەتپەن جاسالعان بولسا، ابۋمالىك ٷشىن قۋانىڭدار، ول دا سەندەر ٷشىن قۋانسىن.
20 ال ەگەر ولاي بولماسا، ابۋمالىكتەن وت شىعىپ، سيحەمنىڭ باسشىلارى مەن بەت-ميللونى+ جالماپ قويسىن. سيحەمنىڭ باسشىلارى مەن بەت-ميللودان شىققان وت بولسا ابۋمالىكتى جالماسىن+».
21 وسىنى ايتقاننان كەيىن جوتام+ اعاسى ابۋمالىكتەن باسساۋعالاپ، بەگەرگە بارىپ قونىس تەپتى.
22 ال ابۋمالىك يسرايلدە ٷش جىل بيلىك ەتتى*.
23 ٴبىراق قۇداي ابۋمالىك پەن سيحەم باسشىلارىنىڭ اراسىندا الاۋىزدىق تۋۋىنا جول بەرىپ، سيحەم باسشىلارى وعان وپاسىزدىق جاسادى.
24 قۇداي مۇنى ەرۋباعالدىڭ 70 ۇلىنا جاساعان زۇلىمدىعى ٷشىن ابۋمالىكتەن كەك الىنسىن دەپ، سونداي-اق باۋىرلارىنىڭ توگىلگەن قانى ابۋمالىكتىڭ جانە سولاردى ولتىرۋگە قولعابىس ەتكەن سيحەم باسشىلارىنىڭ موينىندا بولسىن دەپ ىستەدى+.
25 ٴسۇيتىپ، سيحەم باسشىلارى ابۋمالىككە تۇتقيىلدان تييۋ ٷشىن، قىر باستارىنا تورۋىلعا ادامدار قويدى. ولار سول جولمەن وتكەندەردىڭ ٴبارىن تونايتىن. بۇل جايلى حابار ابۋمالىكتىڭ قۇلاعىنا جەتتى.
26 بۇدان كەيىن ەبەد ۇلى گاعال مەن ونىڭ باۋىرلارى سيحەمگە كوشىپ كەلدى+. سيحەم باسشىلارى سوعان سەنىم ارتا باستادى.
27 ولار تاناپقا بارىپ، جۇزىمدەرىن جيناپ، شىرىنىن سىعىپ، توي-دۋمان قۇردى. سوسىن قۇدايلارىنىڭ عيباداتحاناسىنا+ بارىپ ٸشىپ-جەپ، ابۋمالىكتى قارعاپ-سىلەدى.
28 سوندا ەبەد ۇلى گاعال بىلاي دەدى: «ٴبىز قىزمەت ەتەتىندەي ابۋمالىك كىم، سيحەم كىم؟ ول ەرۋباعالدىڭ+ ۇلى، ال زەبۋل ونىڭ كومەكشىسى ەمەس پە؟ ودان دا سيحەمنىڭ اكەسى حاموردىڭ ۇلدارىنا قىزمەت ەتىڭدەر. ابۋمالىككە قىزمەت ەتىپ نەمىز بار؟
29 مىنا حالىق ماعان ەرسە عوي، ابۋمالىكتى ورنىنان ٴتۇسىرىپ تاستار ەدىم». سوسىن ول ابۋمالىكتى كەلەكە ەتىپ: «قول جيناپ، مەنىمەن شايقاسۋعا شىقسىن!»— دەدى.
30 زەبۋل ەبەد ۇلى گاعالدىڭ وسى سوزدەرىن ەستىگەندە، بويىن اشۋ كەرنەدى.
31 ول جاسىرىن تۇردە ابۋمالىككە شابارماندار جىبەرىپ: «باۋىرلارىمەن سيحەمگە كەلگەن ەبەد ۇلى گاعال قالا تۇرعىندارىن جيناپ، ساعان قارسى قويماقشى.
32 سوندىقتان تۇندە قاسىڭداعى ادامدارىڭمەن جولعا شىق تا، دالادا تورۋىلداپ جات.
33 تاڭەرتەڭ، كۇن شىعا سالا تۇرىپ، قالاعا لاپ قوي. ال گاعال مەن قاسىنداعىلار قارسى اتتانعاندا، جەڭىسكە جەتۋ ٷشىن قولىڭنان كەلگەننىڭ ٴبارىن ىستە»،— دەپ حابارلادى.
34 سودان ابۋمالىك قاسىنداعى بار ادامدارىمەن تۇندە تۇرىپ، سيحەمگە شابۋىلداۋ ٷشىن ٴتورت توپقا ٴبولىنىپ، تورۋىلداپ جاتتى.
35 ەبەد ۇلى گاعال قالا قاقپاسىنىڭ الدىنا بارىپ تۇردى. سول كەزدە ابۋمالىك پەن قاسىنداعىلار تورۋىلداپ جاتقان جەرلەرىنەن شىقتى.
36 گاعال ولاردى كورگەندە، زەبۋلعا: «قاراشى، قىر باستارىنان ادامدار ٴتۇسىپ كەلە جاتىر»،— دەدى. ال زەبۋل: «قىرلاردىڭ كولەڭكەسىن ادامدارعا ۇقساتىپ تۇرسىڭ عوي»،— دەپ جاۋاپ بەردى.
37 ٴبىرازدان سوڭ گاعال تاعى دا: «قاراشى، جەرىمىزدىڭ ورتاسىنداعى قىردان ادامدار ٴتۇسىپ كەلە جاتىر، تاعى ٴبىر توپ مەعونەنيم دەگەن ۇلكەن اعاشتىڭ تۇسىنان كەلە جاتىر»،— دەدى.
38 سوندا زەبۋل وعان مىنانى ايتتى: «ٴبىز قىزمەت ەتەتىندەي ابۋمالىك كىم سونشا+؟» دەگەنىڭ قايدا؟ بۇل ٶزىڭ مەنسىنبەگەن ادامدار عوي. ال ەندى بارىپ، سولارمەن شايقاس!»
39 گاعال سيحەم باسشىلارىن باستاپ الىپ شىعىپ، ابۋمالىكپەن شايقاستى.
40 ٴبىراق ابۋمالىك گاعالدىڭ سوڭىنا ٴتۇستى دە، ول قاشا جونەلدى. كوپ ادام قىرىلىپ، قالا قاقپاسىنا دەيىن ولىكتەر سۇلاپ جاتتى.
41 ابۋمالىك ارۋماحقا ورالىپ، سوندا قالدى. ال زەبۋل+ گاعالدى، باۋىرلارىمەن قوسا، سيحەمنەن قۋىپ جىبەردى.
42 كەلەسى كۇنى جۇرت قالادان دالاعا شىعا باستادى. بۇل تۋرالى ابۋمالىككە حابار جەتكەندە،
43 ول ادامدارىن جيناپ، ٷش توپقا ٴبولدى دە، دالادا تورۋىلداپ جاتتى. جۇرت قالادان شىعا باستاعاندا، لاپ قويىپ، ولاردى قىرىپ تاستادى.
44 ابۋمالىك قاسىنداعى توپتارىمەن قالا قاقپاسىنىڭ الدىنا بارىپ تۇردى، ال قالعان ەكى توپ دالاداعى جۇرتقا شابۋىلداپ، سولاردى قىردى.
45 ابۋمالىك قالا تۇرعىندارىمەن كۇنى بويى شايقاسىپ، ونى باسىپ الدى دا، حالقىن ٶلتىردى. قالانىڭ ٶزىن قيراتىپ+، تۇز شاشىپ تاستادى.
46 مۇنى سيحەم مۇناراسىندا تۇراتىندار ەستىگەندە، دەرەۋ ەل-بەريت+ عيباداتحاناسىنىڭ باسساۋعالايتىن جەرىنە كىرىپ الدى.
47 ابۋمالىككە سيحەم مۇناراسىندا تۇراتىنداردىڭ ٴبارى ٴبىر جەرگە جينالىپ الدى دەگەن حابار جەتتى.
48 سوندا ول قاسىنداعى ادامدارىمەن سالمون تاۋىنا شىقتى. ابۋمالىك قولىنا بالتا الىپ، اعاشتاردان بۇتاقتار كەسىپ الدى دا، يىعىنا سالىپ تۇرىپ: «مەنىڭ نە ىستەگەنىمدى كوردىڭدەر عوي، دەرەۋ سەندەر دە سولاي ەتىڭدەر!»— دەدى.
49 سوندا ولاردىڭ ٴبارى بۇتاق كەسىپ الدى دا، ابۋمالىككە ەردى. سوسىن بۇتاقتاردى جۇرت باسساۋعالاعان جەرگە اپارىپ، اينالاسىنا ٷيدى دە، ٶرت قويدى. وسىلاي سيحەم مۇناراسىنداعىلاردىڭ ٴبارى، مىڭ شاقتى ەركەك پەن ايەل ورتەنىپ كەتتى.
50 بۇدان كەيىن ابۋمالىك تەبەسكە اتتانىپ، سوندا قوس تىكتى دە، قالانى جاۋلاپ الدى.
51 قالانىڭ ورتاسىندا مىقتى مۇنارا بار ەدى. قالاداعى كۇللى ەركەكتەر مەن ايەلدەر جانە بارلىق باسشىلارى سوندا قاشتى. ولار مۇنارانىڭ ەسىگىن بەكىتىپ، توبەسىنە شىعىپ الدى.
52 ابۋمالىك مۇناراعا بەتتەپ، وعان شابۋىلدادى. ول مۇنارانى ورتەپ جىبەرۋ ٷشىن كىرەبەرىسىنە تايادى.
53 سول كەزدە ٴبىر ايەل ابۋمالىكتىڭ باسىنا ديىرمەن تاسىن تاستاپ جىبەردى دە، ونىڭ باسسۇيەگى جارىلىپ كەتتى+.
54 سوندا ول دەرەۋ قارۋىن كوتەرىپ جۇرەتىن قىزمەتشىسىن شاقىرىپ: «سەمسەرىڭدى ال دا، مەنى ٶلتىر، ايتپەسە جۇرت مەن تۋرالى «ايەلدىڭ قولىنان قازا بولدى» دەپ جۇرەر»،— دەدى. قىزمەتشىسى سەمسەرىن سۇعىپ الىپ، ونى ٶلتىرىپ تاستادى.
55 يسرايلدىكتەر ونىڭ ولگەنىن كورىپ، ٴارقايسىسى ٶز ۇيىنە قايتىپ كەتتى.
56 وسىلاي قۇداي ابۋمالىكتىڭ 70 باۋىرىن ٶلتىرىپ، اكەسىنە جاساعان زۇلىمدىعىنىڭ ەسەسىن قايتاردى+.
57 سونداي-اق سيحەم تۇرعىندارىنىڭ دا زۇلىمدىقتارىن ٶز باستارىنا كەلتىردى. وسىلاي ەرۋباعالدىڭ+ ۇلى جوتامنىڭ+ ايتقان قارعىسى ورىندالدى.
سىلتەمەلەر
^ مۇمكىن: «جەر يەلەرىنە».
^ سوزبە-ٴسوز «سۇيەكتەرىڭ مەن ەتتەرىڭ».
^ نەمەسە «بەكزاداسىماق بولدى».
