جوحان 21:1—25
21 بۇدان كەيىن يسا تيبەريا تەڭىزىنىڭ جاعالاۋىندا شاكىرتتەرىنە تاعى كورىندى. بۇل بىلاي بولعان ەدى:
2 شيمون پەتىر، توما (ول ەگىز دەپ تە اتالاتىن)+، عاليلەياداعى قانا قالاسىنان شىققان ناتانايىل+، زەبەدەي ۇلدارى+ جانە يسانىڭ تاعى ەكى شاكىرتى بىرگە بولدى.
3 سوندا شيمون پەتىر: «مەن بالىق اۋلاۋعا بارا جاتىرمىن»،— دەدى. وزگەلەرى: «ٴبىز سەنىمەن بارامىز»،— دەدى دە، ٴبارى بارىپ، قايىققا وتىردى، ٴبىراق سول ٴتۇنى تۇك ۇستاعان جوق+.
4 ال تاڭ اتا جاعادا يسا تۇردى، ٴبىراق شاكىرتتەرى ونى تانىمادى+.
5 يسا ولاردان: «بالالار، جەيتىن بىردەڭەلەرىڭ* بار ما؟»— دەپ سۇرادى. ولار: «جوق!»— دەپ جاۋاپ بەردى.
6 ول: «اۋدى قايىقتىڭ وڭ جاعىنا سالىڭدار، سوندا ۇستايسىڭدار»،— دەدى. ولار اۋ سالعان سوڭ، تۇسكەن بالىقتىڭ كوپتىگىنەن ونى تارتىپ شىعارا المادى+.
7 سول كەزدە يسانىڭ جاقسى كورەتىن شاكىرتى+ پەتىرگە: «بۇل — يەمىز عوي!»— دەدى. «يەمىز عوي!» دەگەندى ەستىگەندە، جارتىلاي جالاڭاش جۇرگەن شيمون پەتىر كيىمىن ۇستىنە ىلە سالا، سۋعا سەكىردى.
8 ال قالعان شاكىرتتەر بالىققا تولى اۋدى سۇيرەتىپ، كىشكەنتاي قايىقپەن ٴجۇزىپ كەلدى. ولار جاعادان الىس ەمەس، 90 مەتردەي* جەردە ەدى.
9 جاعاعا شىققان ولار شوقتى، ونىڭ ۇستىندە جاتقان بالىقتى كوردى. سول جەردە نان دا بار ەكەن.
10 يسا: «قازىر ۇستاعان بالىقتارىڭنان اكەلىڭدەر»،— دەدى.
11 شيمون پەتىر ۇلكەن-ۇلكەن بالىققا تولى اۋدى جاعاعا شىعاردى، وندا 153 بالىق بار ەكەن. بالىق سونشا كوپ بولسا دا، اۋ جىرتىلماپتى.
12 يسا ولارعا: «كەلىڭدەر، تاڭعى استارىڭدى جەپ الىڭدار»،— دەدى. شاكىرتتەردىڭ ەشقايسىسىنىڭ ودان «كىمسىڭ؟» دەپ سۇراۋعا باتىلى بارمادى، سەبەبى يەلەرى ەكەنىن ٴبىلدى.
13 يسا كەلىپ، ناندى الىپ، ۇلەستىردى، بالىقتان دا بەردى.
14 بۇل ونىڭ ولىمنەن قايتا تىرىلگەلى شاكىرتتەرىنە ٷشىنشى رەت+ كورىنۋى ەدى.
15 ولار تاماقتانىپ بولعان سوڭ، يسا شيمون پەتىردەن: «جوحان ۇلى شيمون، مەنى مىنالارعا* قاراعاندا كوبىرەك جاقسى كورەسىڭ* بە؟»— دەپ سۇرادى. ول: «ٴيا، يەم، ٴسىزدى جاقسى كورەتىنىمدى* بىلەسىز عوي»،— دەپ جاۋاپ بەردى. سوندا يسا: «وندا توقتى-قوزىلارىما ازىعىن بەر»+،— دەدى.
16 سوسىن ەكىنشى رەت: «جوحان ۇلى شيمون، مەنى جاقسى كورەسىڭ* بە؟»— دەپ سۇرادى. پەتىر: «ٴيا، يەم، ٴسىزدى جاقسى كورەتىنىمدى* بىلەسىز عوي»،— دەدى. يسا: «قوزىلارىمدى باق»+،— دەپ تاپسىردى.
17 ول ٷشىنشى رەت: «جوحان ۇلى شيمون، مەنى جاقسى كورەسىڭ* بە؟»— دەپ سۇرادى. «مەنى جاقسى كورەسىڭ بە؟» دەپ ٷشىنشى رەت سۇراعاندىقتان، پەتىر مۇڭايىپ: «يەم، ٴسىز ٴبارىن بىلەسىز، ٴسىزدى جاقسى كورەتىنىمدى* دە بىلەسىز»،— دەدى. يسا مىنانى ايتتى: «قوزىلارىما ازىعىن بەر+.
18 ساعان ناعىز شىندىقتى ايتامىن، جاس كەزىڭدە ٶزىڭ كيىنىپ، قالاعان جاعىڭا باردىڭ. ال قارتايعاندا قولىڭدى سوزىپ تۇراسىڭ، سەنى باسقا بىرەۋ كيىندىرىپ، بارعىڭ كەلمەگەن جاققا الىپ كەتەدى».
19 ول مۇنى پەتىردىڭ قانداي ولىممەن قۇدايدى داڭقتايتىنىن ٴبىلدىرۋ ٷشىن ايتتى. وسىدان كەيىن وعان: «بۇدان بىلاي دا سوڭىمنان ەرىپ ٴجۇر»+،— دەدى.
20 پەتىر بۇرىلدى دا، يسانىڭ جاقسى كورەتىن شاكىرتى+ ىلەسىپ كەلە جاتقانىن كوردى. ول كەشكى اس كەزىندە داستارقان باسىندا يسانىڭ توسىنە باسىن تاقاپ «يەم، سىزگە وپاسىزدىق جاسايتىن كىم؟» دەپ سۇراعان شاكىرت ەدى.
21 پەتىر ونى كورگەندە، يساعا: «يەم، ال مىناۋ شە؟»— دەدى.
22 يسا: «مەن كەلگەنشە، ونىڭ وسىندا بولعانىن قالاسام، سولاي بولادى، ونى قايتەسىڭ؟ ال سەن سوڭىمنان ەرىپ جۇرە بەر»،— دەپ جاۋاپ بەردى.
23 سوندىقتان باۋىرلاستار اراسىندا «سول شاكىرت ولمەيدى» دەگەن ٴسوز تارادى. ٴبىراق يسا پەتىرگە ونىڭ ولمەيتىنىن ايتقان جوق، جاي عانا «مەن كەلگەنشە، ونىڭ وسىندا بولعانىن قالاسام، سولاي بولادى، ونى قايتەسىڭ؟» دەگەن بولاتىن.
24 وسىلار تۋرالى كۋالىك ەتكەن ٵرى جازعان — سول شاكىرت+. ٴبىز ونىڭ كۋالىگىنىڭ شىنايى ەكەنىن بىلەمىز.
25 يسا بۇدان دا باسقا كوپ ىستەر جاسادى. ولار ەگجەي-تەگجەيلى جازىلسا، مەنىڭشە، جازىلعان شيىرشىقتار بۇكىل دۇنيەگە سيماس ەدى+.
سىلتەمەلەر
^ نەمەسە «بالىقتارىڭ».
^ سوزبە-ٴسوز «شامامەن 200 شىنتاق». B14 قوسىمشاسىن قاراڭىز.
^ يسا مۇندا بالىق اۋلاۋ كاسىبىنە قاتىستى نارسەلەردى ايتىپ تۇرسا كەرەك.
^ گرەكشە «فيليا».
^ گرەكشە «اگاپي».
^ گرەكشە «اگاپي».
^ گرەكشە «فيليا».
^ گرەكشە «فيليا».
^ گرەكشە «فيليا».
