رۋت 2:1—23
2 ناعيمانىڭ كۇيەۋى ەليمەلەكتىڭ باعوز+ دەگەن اتالاس تۋىسى بار ەدى. ول اسا داۋلەتتى كىسى بولاتىن.
2 بىردە موابتىق رۋت ناعيماعا: «رۇقسات ەتسەڭىز، مەن ەگىندىككە بارايىن. بالكىم، ماعان بىرەۋدىڭ مەيىرى تۇسەر، سونىڭ ارتىنان ٴجۇرىپ ماساق تەرەيىن»+،— دەدى. ەنەسى: «بارا عوي، قىزىم»،— دەپ رۇقسات بەردى.
3 رۋت ٴبىر ەگىندىككە بارىپ، وراقشىلاردىڭ سوڭىنان ٴجۇرىپ، ماساق تەرە باستادى. ٴسۇيتىپ ٴجۇرىپ، اڭداماي ەليمەلەكتىڭ+ اتالاس تۋىسى باعوزدىڭ+ ەگىستىگىنە ٴتۇسىپ كەتتى.
4 سول كەزدە بەتلەحەمنەن باعوز كەلىپ، وراقشىلارعا: «ەحوبا جار بولسىن!»— دەدى. ال ولار: «ەحوبا ٴسىزدى دە جارىلقاسىن!»— دەپ جاۋاپ بەردى.
5 سوسىن باعوز وراقشىلاردىڭ ۇستىنەن قارايتىن جىگىتتەن: «مىناۋ كىمنىڭ كەلىنشەگى؟»— دەپ سۇرادى.
6 ول: «بۇل — مواب ەلىنەن ناعيماعا ەرىپ كەلگەن+ موابتىق جاس كەلىنشەك+.
7 ول وراقشىلاردىڭ ارتىنان ٴجۇرىپ، قالىپ كەتكەن ماساقتاردى* تەرۋگە رۇقسات سۇراعان ەدى+. تاڭەرتەڭنەن بەرى تىنىم تاپقان جوق، كۇركەگە كەلىپ وتىرعانى وسى»،— دەپ جاۋاپ قاتتى.
8 سوسىن باعوز رۋتقا بىلاي دەدى: «قىزىم، سوزىمە قۇلاق سال، باسقا ەگىندىككە بارماي-اق، مەنىڭ جۇمىسشى قىزدارىمنىڭ قاسىندا ٴجۇرىپ، ماساقتى وسى جەردەن تەرە بەر+.
9 ولاردان كوز جازبا، قاي ەگىندىككە بارسا، سەن دە ارتتارىنان ىلەسىپ وتىر. جۇمىسشى جىگىتتەرگە ساعان تيىسپەسىن دەپ بۇيىردىم. ولار قۇمىرالارعا سۋ قۇيىپ قويعان، شولدەگەندە سودان ٸش».
10 سوندا رۋت تىزەرلەي كەتىپ، ونىڭ الدىنا جىعىلىپ: «ماعان مەيىر-شاپاعاتىڭىزدى تۇسىرەتىندەي، مەن كىم ەدىم؟ مەن بار-جوعى جاتجەرلىكپىن عوي»+،— دەدى.
11 ال باعوز بىلاي دەدى: «كۇيەۋىڭ ولگەننەن كەيىن، ەنەڭە جاساعان بارلىق جاقسىلىعىڭدى ەستىدىم. اكە-شەشەڭدى جانە ەل-جۇرتىڭدى تاستاپ، بەيتانىس حالىقتىڭ اراسىنا كەلگەن ەكەنسىڭ+.
12 جاساعان جاقسىلىقتارىڭ ٷشىن ەحوبا ساعان باتاسىن توكسىن+! يسرايلدىڭ قۇدايى ەحوبا قاناتىنىڭ استىنان پانا ىزدەگەن ساعان قارىمتاڭدى تولىعىمەن قايتارسىن+!»
13 رۋت وعان: «مىرزام، بۇدان بىلاي دا ماعان وڭ كوزبەن قاراساڭىز ەكەن. بىردە-ٴبىر كۇڭىڭىزگە تاتىماسام دا، جىلى سوزبەن كۇڭىڭىزدىڭ كوڭىلىن ورنىقتىردىڭىز»،— دەدى.
14 تۇسكى تاماق كەزىندە باعوز رۋتقا: «مۇندا كەل، ناننان الىپ، قىشقىل شاراپقا باتىرىپ جە»،— دەدى. ول وراقشىلاردىڭ جانىنا كەلىپ وتىردى. باعوز وعان قۋىرىلعان داننەن بەردى. رۋت تويعانىنشا جەدى، ٴتىپتى ارتىلىپ قالدى.
15 سوسىن ول ورنىنان تۇرىپ، ماساق* تەرۋگە كىرىستى+. باعوز قىزمەتشى جىگىتتەرىنە بۇيرىق بەرىپ: «ورىلعان استىقتىڭ اراسىندا دا ماساق تەرىپ جۇرە بەرسىن، وعان تيىسپەڭدەر+.
16 بايلانعان باۋدان دا ماساق قالدىرىپ وتىرىڭدار، تەرىپ السىن. ەشكىم وعان تيىم سالماسىن»،— دەدى.
17 رۋت كەشكە دەيىن تاناپتا ماساق تەردى+. سوڭىنان، جيناعان استىعىن باستىرعاندا، شامامەن ٴبىر ەفا* ارپا شىقتى.
18 ول ارپانى قالاعا الىپ بارىپ، ەنەسىنە كورسەتتى. كەيىن وعان تۇسكى اسىنان ارتىلىپ قالعان تاماعىن دا بەردى+.
19 سوندا ەنەسى: «بۇگىن قاي جەردە ماساق تەرىپ، قايدا جۇمىس ىستەدىڭ؟ ساعان مەيىرىن تۇسىرگەن ادام جارىلقانسىن+!»— دەدى. رۋت: «بۇگىن باعوز دەگەن كىسىنىڭ جەرىندە ماساق تەردىم»،— دەپ، كىمنىڭ تانابىندا جۇمىس ىستەگەنىن ايتىپ بەردى.
20 ناعيما مۇنى ەستىگەندە، كەلىنىنە: «تىرىگە دە، ولىگە دە مەيىرىمىن* اياماعان ەحوبا سول كىسىگە باتاسىن توكسىن+!— دەدى دە، بىلاي دەپ قوستى: —ول ٴبىزدىڭ جاقىنىمىز+ ٵرى تۋىسقاندىق مىندەتتى* الاتىنداردىڭ ٴبىرى بولىپ تابىلادى+».
21 سوندا موابتىق رۋت بىلاي دەدى: «ول كىسى ماعان: —ەگىنىم جينالىپ بىتكەنشە، جۇمىسشىلارىمنىڭ جانىندا ٴجۇر،— دەپ تە ايتتى»+.
22 ناعيما كەلىنىنە: «قىزىم، سول ادامنىڭ قىزمەتشى قىزدارىمەن جۇرەتىنىڭ جاقسى بولدى، ايتپەسە باسقا تاناپتا بىرەۋلەر سەنىڭ مازاڭدى الىپ جۇرەر»،— دەدى.
23 ارپا مەن بيداي وراعى بىتكەنشە+، رۋت باعوزدىڭ قىزمەتشى قىزدارىنىڭ قاسىندا ماساق تەرىپ ٴجۇردى. وسىلاي ول ەنەسىنىڭ قولىندا تۇرىپ جاتتى+.
سىلتەمەلەر
^ مۇمكىن: «باۋلاردىڭ اراسىنداعى ماساقتى».
^ مۇمكىن: «باۋلاردىڭ اراسىنداعى ماساقتى».
^ شامامەن 22 ليتر. B14 قوسىمشاسىن قاراڭىز.
^ نەمەسە «اينىماس سۇيىسپەنشىلىك».
^ تۇسىندىرمەنى قاراڭىز.
