زاكاريا 4:1—14
4 مەنىمەن سويلەسكەن پەرىشتە قايتىپ كەلىپ، ۇيىقتاپ جاتقان ادامدى وياتقانداي مەنى وياتتى.
2 ٴسۇيتىپ، مەنەن: «نە كورىپ تۇرسىڭ؟»— دەپ سۇرادى. مەن وعان: «تۇگەلدەي التىننان جاسالعان، جوعارعى جاعىندا توستاعانى بار شامدالدى+ كورىپ تۇرمىن. ونىڭ ۇستىندە جەتى شام بار ەكەن+، ٴيا، جەتى شام جانە جەتەۋىندە جەتى تۇتىكشە بار.
3 شامدالدىڭ جانىندا ەكى ٴزايتۇن اعاشى تۇر+: ٴبىرى توستاعاننىڭ وڭ جاعىندا، ەكىنشىسى سول جاعىندا»،— دەدىم.
4 سوسىن وزىممەن سويلەسىپ تۇرعان پەرىشتەدەن: «يەم، بۇلار نەنى بىلدىرەدى؟»— دەپ سۇرادىم.
5 پەرىشتە: «بۇلار نەنى بىلدىرەتىنىن بىلمەيسىڭ بە؟»— دەدى. مەن: «جوق، يەم»،— دەپ جاۋاپ بەردىم.
6 سوندا ول ماعان بىلاي دەدى: «ەحوبانىڭ زوروبابەلگە ايتقان ٴسوزى مىناۋ: —مۇنىڭ ٴبارى اسكەر قۋاتىمەن دە، كۇشپەن دە ەمەس+، مەنىڭ رۋحىممەن جۇزەگە اسادى+،— دەيدى اسكەرباسى ەحوبا.
7 مىنا زاڭعار تاۋ نە ٶزى؟ زوروبابەلگە+ كەدەرگى بولعان زاڭعار تاۋ جازىقتاي تەگىستەلەدى+. ول عيباداتحانانىڭ توبەسىنە قويىلاتىن تاستى الىپ شىعادى، سوندا «قانداي كەرەمەت! قانداي كەرەمەت!» دەپ ايعايلاعان داۋىستار ەستىلەدى».
8 ەحوبا ماعان تاعى دا ٴسوزىن ارناپ بىلاي دەدى:
9 «مىنا ٷيدىڭ ىرگەتاسىن زوروبابەل ٶز قولىمەن قالادى+، ەندى سول قۇرىلىستى ٶز قولىمەن اياقتايدى+. (مەنى سەندەرگە اسكەرباسى ەحوبا جىبەرگەنىن بىلەتىن بولاسىڭدار.)
10 قۇرىلىستىڭ قاراپايىم باستاماسىن* مەنسىنبەيتىندەر بار ما+؟ حالىق زوروبابەلدىڭ قولىنداعى تىكتەۋىشتى كورىپ، قۋانادى. مۇنى جەتى كوز دە كورەدى. بۇل جەتى كوز — كۇللى جەر بەتىن كورىپ تۇراتىن ەحوبانىڭ كوزدەرى+».
11 بۇدان كەيىن پەرىشتەدەن: «شامدالدىڭ وڭ جانە سول جاعىندا تۇرعان ەكى ٴزايتۇن اعاشى نەنى بىلدىرەدى؟»+— دەپ سۇرادىم.
12 سوسىن تاعى دا: «ەكى تۇتىكپەن التىن سۇيىقتىق اعىزىپ جاتقان ٴزايتۇن اعاشتارىنىڭ ەكى بۇتاعى* نەنى بىلدىرەدى؟»— دەپ سۇرادىم.
13 ول ماعان: «بۇلار نەنى بىلدىرەتىنىن بىلمەيسىڭ بە؟»— دەدى. مەن: «جوق، يەم»،— دەپ جاۋاپ بەردىم.
14 «بۇلار بۇكىل جەردىڭ يەسىنىڭ جانىندا تۇرعان ەكى مايلانعاندى* بىلدىرەدى+»،— دەدى ول.
سىلتەمەلەر
^ نەمەسە «كىشىگىرىم جايتتاردى».
^ ياعني جەمىسى مول ەكى بۇتاعى.
^ تۇسىندىرمەنى قاراڭىز.
