سامۋيلدىڭ 1-جازباسى 10:1—27
10 بۇدان كەيىن سامۋيل ماي قۇيىلعان قۇتىسىن الىپ، ساۋلدىڭ باسىنا ماي قۇيدى+. سوسىن بەتىنەن ٴسۇيدى دە، مىنانى ايتتى: «ەحوبا سەنى مايلاپ، مەنشىكتى حالقىنا+ باسشى ەتىپ تاعايىندادى+.
2 بۇگىن مەنىڭ قاسىمنان كەتكەن سوڭ، بەنيامين جەرىنە جەتىپ، سەلساقتاعى راحيلانىڭ قابىرىنە جاقىنداعاندا+، ەكى كىسىنى كەزدەستىرەسىڭ. ولار ساعان: —سەن ىزدەپ جۇرگەن ەسەكتەر تابىلدى. ەندى اكەڭ ولاردى قويىپ+، ۇلىما نە بولدى ەكەن دەپ، سەنى ۋايىمداپ وتىر،— دەيدى.
3 ٵرى قاراي ٴجۇرىپ، تابورداعى الىپ اعاشقا جەتكەنىڭدە، الدىڭنان قۇدايعا عيبادات ەتۋ ٷشىن بەتەلگە+ بارا جاتقان ٷش كىسى شىعادى. ولاردىڭ ٴبىرى ٷش لاق، ەكىنشىسى ٷش كۇلشە، ال ٷشىنشىسى ۇلكەن قۇمىرامەن شاراپ كوتەرىپ بارا جاتادى.
4 ولار سەنەن حال-جاعداي سۇرايدى دا، ەكى كۇلشە بەرەدى، بەرگەندەرىنەن باس تارتپا.
5 بۇدان كەيىن فىلىستىرلەردىڭ قاراۋىل توبى ورنالاسقان شىنايى قۇدايدىڭ قىرىنا كەلەسىڭ. قالاعا تاياعاندا، عيبادات ەتەتىن توبەدەن ٴتۇسىپ كەلە جاتقان ٴبىر توپ پايعامبارعا كەزىگەسىڭ. ولار پايعامبارلىق ەتىپ* كەلە جاتادى، ال الدىندا ىشەكتى اسپاپتا، داڭعىرا، سىبىزعى مەن ارفادا ويناپ كەلە جاتقان ادامدار بولادى.
6 سول كەزدە ەحوبانىڭ رۋحى ساعان كۇش دارىتىپ+، سولارمەن بىرگە پايعامبارلىق ەتە باستايسىڭ. سەن وزگەرىپ، باسقا ادام بولىپ كەتەسىڭ+.
7 وسى بەلگىلەر تۇگەل ورىندالعاندا، قولىڭنان كەلگەننىڭ ٴبارىن ىستە. سەبەبى شىنايى قۇداي ساعان جار بولادى.
8 سوسىن مەنەن بۇرىن عىلعالعا+ بار. ارتىڭنان ٶزىم دە كەلىپ، تۇگەل ورتەلەتىن جانە تاتۋلىق قۇرباندىقتارىن شالامىن. مەن كەلگەنشە جەتى كۇن كۇت، بۇدان كەيىن نە ىستەۋىڭ كەرەك ەكەنىن سوندا ايتامىن».
9 ساۋل بۇرىلىپ، ٴسامۋيلدىڭ قاسىنان كەتە بەرگەنى سول-اق ەكەن، قۇداي ونىڭ بولمىسىن وزگەرتىپ، باسقا ادام ەتىپ جىبەردى. سامۋيل ايتقان بەلگىلەر سول كۇنى تۇگەلدەي ورىندالدى.
10 ساۋل قىزمەتشىسى ەكەۋى قىرعا بارا جاتقاندا، ٴبىر توپ پايعامباردى كەزىكتىردى. سول ساتتە ساۋلعا قۇداي رۋحى كۇش دارىتىپ+، سولارمەن بىرگە پايعامبارلىق ەتە باستادى+.
11 ساۋلدى بۇرىننان تانيتىندار مۇنى كورگەندە: «قيشتىڭ ۇلىنا نە بولعان؟ ول دا پايعامبار بولىپ كەتكەن بە؟»— دەستى.
12 سوندا سول جەردەگىلەردىڭ ٴبىرى: «ال قالعان پايعامبارلاردىڭ اكەلەرى كىم سوندا؟!»— دەپ سۇرادى. وسىلايشا «ساۋل دا پايعامبار بولىپ كەتكەن بە؟» دەگەن سوزدەر ماتەلگە اينالدى+.
13 ساۋل پايعامبارلىق ەتىپ بولعان سوڭ، عيبادات ەتەتىن توبەگە كەلدى.
14 كەيىنىرەك اكەسىنىڭ باۋىرى ساۋل مەن قىزمەتشىسىنەن: «قايدا بارىپ كەلدىڭدەر؟»— دەپ سۇرادى. ساۋل: «ەسەكتەردى ىزدەدىك+، تابا الماعان سوڭ، سامۋيلگە باردىق»،— دەدى.
15 اعاسى: «ول سەندەرگە نە ايتتى؟— دەگەندە،
16 ساۋل: —ەسەكتەردىڭ تابىلىپ قويعانىن ايتتى»،— دەپ جاۋاپ بەردى. ال پاتشا بولاتىنىنا قاتىستى ايتقاندارىن جاسىرىپ قالدى.
17 سامۋيل كۇللى حالىقتى ميسپاعا+ ەحوبانىڭ الدىنا شاقىرىپ،
18 بىلاي دەدى: «يسرايلدىڭ قۇدايى ەحوبا مىنانى ايتادى: —يسرايلدى مىسىردان الىپ شىعىپ، سەندەردى پەرعاۋىننىڭ ەزگىسىنەن قۇتقارعان+، سونداي-اق باسقا دا پاتشالاردىڭ ۋىسىنان الىپ شىققان مەن ەدىم.
19 ٴبىراق بۇگىن سەندەر قيىندىق پەن ازاپ اتاۋلىدان وزدەرىڭدى قۇتقارعان قۇدايلارىڭنان باس تارتىپ+، «بىزگە پاتشا تاعايىنداپ بەر!» دەپ وتىرسىڭدار. ەندەشە رۋ-رۋ، اۋلەت-اۋلەتتەرىڭمەن* ەحوبانىڭ الدىنا كەلىپ تۇرىڭدار».
20 يسرايل رۋلارىنىڭ ٴبارى جاقىنداپ كەلگەندە+، بەنيامين رۋى تاڭدالدى+.
21 بەنيامين رۋى اۋلەت-اۋلەتىمەن جاقىنداعاندا، ماتري اۋلەتى، ال اقىرىندا سول اۋلەتتەن قيش ۇلى ساۋل تاڭدالدى+. ولار ساۋلدى ىزدەپ ەدى، ارالارىندا جوق بولىپ شىقتى.
22 سوندا جۇرت ەحوباعا جۇگىنىپ: «ول جىگىت مۇندا كەلمەدى مە؟»— دەپ سۇرادى+. ەحوبا: «كەلدى، جۇك اراسىندا جاسىرىنىپ وتىر»،— دەپ جاۋاپ بەردى.
23 ولار جۇگىرىپ بارىپ، ونى الىپ كەلدى. ساۋل ارالارىنا كەلگەندە، سونداعىلاردىڭ ٴبارى ونىڭ يىعىنان عانا كەلىپ تۇردى+.
24 سامۋيل: «ەحوبا تاڭداعان ادامدى كوردىڭدەر مە+؟! وعان تەڭ كەلەر ەشكىم جوق!»— دەدى. سوندا كۇللى حالىق: «پاتشامىز جاساسىن!»— دەپ ايعاي سالدى.
25 سامۋيل بولسا حالىققا پاتشانىڭ قۇقىقتارىن ايتىپ بەردى+. سوسىن ولاردى كىتاپقا جازىپ، ەحوبانىڭ الدىنا اپارىپ ساقتاپ قويدى. بۇدان كەيىن جۇرتتى ٷيدى-ۇيلەرىنە تاراتىپ جىبەردى.
26 ساۋل دا گيبەياداعى ۇيىنە قايتتى. ەحوبا بىرنەشە جاۋجۇرەك جىگىتتىڭ جۇرەگىنە اسەر ەتىپ، ولاردى ساۋلعا ىلەستىردى.
27 ٴبىراق كەيبىر وڭباعاندار ونى مەنسىنبەي: «ٴبىزدى قۇتقاراتىن مىناۋ ما؟!»— دەپ+، وعان ەشقانداي سيلىق ۇسىنبادى+. ساۋل بولسا بۇعان ٴلام-ميم دەمەدى.
سىلتەمەلەر
^ بۇل جەردە «پايعامبارلىق ەتۋ» دەپ اۋدارىلعان ٴسوز ەرەكشە كۇيگە ٴتۇسىپ، ەرەكشە سەزىممەن قۇدايدى ماداقتاۋعا نۇسقاسا كەرەك.
^ نەمەسە «مىڭداعان ادامنان تۇراتىن توپتارىڭمەن».
