سامۋيلدىڭ 1-جازباسى 12:1—25
12 اقىرىندا، سامۋيل كۇللى يسرايلگە بىلاي دەدى: «مەن ايتقاندارىڭنىڭ بارىنە قۇلاق اسىپ، سەندەرگە پاتشا تاعايىنداپ بەردىم+.
2 ەندى، مىنە، باسشىلىق ەتەتىن پاتشالارىڭ الدارىڭدا تۇر+. ال مەن قارتايدىم، باسىمدى قىراۋ شالدى. ۇلدارىم بولسا ارالارىڭدا ٴجۇر+. مەن جاستايىمنان قۇدايعا قىزمەت ەتىپ، سەندەردى باسقارىپ كەلدىم+.
3 مىنەكي، الدارىڭدا تۇرمىن، ماعان قارسى ايتار كۋالىكتەرىڭ بولسا، ەحوبا مەن ونىڭ مايلانعانىنىڭ+ الدىندا ايتىڭدار: كىمنىڭ وگىزىن نە ەسەگىن الدىم+؟ قايسىسىڭدى الداپ، قايسىسىڭا ٴجابىر كورسەتتىم؟ شىندىقتى بۇرمالاۋ ٷشىن قايسىسىڭنان پارا الدىم+؟ سولاي ەتكەن بولسام، ٴبارىن قايتارىپ بەرەيىن+».
4 ولار: «ەشقايسىسىمىزدى الداعان دا، جابىرلەگەن دە جوقسىز. ەشكىمنەن پارا دا العان ەمەسسىز»،— دەپ جاۋاپ بەردى.
5 سوندا سامۋيل: «ماعان تاعار ايىپتارىڭ جوق ەكەنىنە بۇگىن ەحوبا مەن ونىڭ مايلانعانى كۋا بولسىن»،— دەدى. حالىق: «ٴيا، كۋا بولسىن»،— دەپ جاۋاپ بەردى.
6 سامۋيل ٴسوزىن جالعاپ بىلاي دەدى: «بۇعان كۋا — مۇسا مەن حاروندى جىبەرىپ، اتا-بابالارىڭدى مىسىردان الىپ شىققان ەحوبا+.
7 تاعى دا كىدىرە تۇرىڭدار، ەحوبانىڭ وزدەرىڭە جانە اتا-بابالارىڭا جاساعان بارلىق ٵدىل ىستەرىن ايتىپ، ەحوبانى قورعاپ سويلەيىن.
8 جاقىپ مىسىرعا كوشكەننەن كەيىن+، اتا-بابالارىڭ ەحوباعا جالبارىنىپ كومەك سۇرادى+. سوندا ەحوبا مۇسا مەن حاروندى جىبەردى+. ولار اتا-بابالارىڭدى مىسىردان الىپ شىعىپ، بابالارىڭ وسى جەرگە قونىستاندى+.
9 ٴبىراق ولار قۇدايلارى ەحوبانى ۇمىتىپ كەتتى. سوندىقتان ول حالقىن حاسور پاتشاسىنىڭ قولباسى سيسارانىڭ+، فىلىستىرلەردىڭ+ جانە مواب پاتشاسىنىڭ+ قولىنا بەردى+. ولار بولسا اتا-بابالارىڭمەن سوعىستى.
10 سوندا بابالارىڭ ەحوبادان كومەك سۇراپ+: —ٴبىز كۇنا جاسادىق+. باعالدار مەن اشتار مۇسىندەرىنە تابىنىپ، ەحوبادان باس تارتتىق+. ەندى ٴبىزدى جاۋ قولىنان قۇتقارا كور، وزىڭە قىزمەت ەتەيىك،— دەپ جالبارىندى.
11 ەحوبا بولسا سەندەر قاۋىپسىز ٶمىر ٴسۇرسىن دەپ، ەرۋباعالدى+، بەدان، ەفتا+ جانە ٴسامۋيلدى+ جىبەرىپ، اينالا قورشاعان بارلىق جاۋلارىڭنان قۇتقاردى+.
12 ٴبىراق امموندىقتاردىڭ پاتشاسى ناحاش+ سەندەرگە قارسى شىققاندا، پاتشالارىڭ ەحوبانىڭ ٶزى بولسا دا+، «جوق، ٴبىزدى پاتشا بيلەسىن!»+ دەپ تابان تىرەسىپ تۇرىپ الدىڭدار.
13 ال ەندى، وزدەرىڭ قالاپ، سۇراپ العان پاتشالارىڭ بار. مىنە، ەحوبا سەندەرگە پاتشا تاعايىندادى+.
14 ەگەر ەحوبادان قورقىپ+، وعان قىزمەت ەتسەڭدەر+، سوزىنە قۇلاق اسىپ+، ەحوبانىڭ نۇسقاۋلارىنا قارسى شىقپاساڭدار، وزدەرىڭ دە، بيلىك ەتىپ وتىرعان پاتشالارىڭ دا قۇدايلارىڭ ەحوبانىڭ جولىنان تايماساڭدار، بۇلارىڭ جاقسى.
15 ال ەگەر ەحوباعا قۇلاق اسپاي، ەحوبانىڭ نۇسقاۋلارىنا قارسى شىقساڭدار، ەحوبا وزدەرىڭدى دە، اكەلەرىڭدى دە جازالايدى+.
16 ەندى وسى جەردە تۇرىپ، ەحوبانىڭ كەرەمەت ٸسىنىڭ كۋاسى بولىڭدار.
17 قازىر وراق كەزى ەمەس پە؟ ٴبىراق مەن ەحوبادان كۇن كۇركىرەتىپ، جاڭبىر جاۋعىزۋىن سۇرايمىن. سوندا وزدەرىڭە پاتشا سۇراعاندارىڭ ەحوبا ٷشىن بارىپ تۇرعان زۇلىمدىق بولعانىنا كوز جەتكىزەسىڭدەر+».
18 وسىدان كەيىن سامۋيل ەحوباعا سيىنعاندا، ەحوبا كۇن كۇركىرەتىپ، جاڭبىر جاۋعىزدى. مۇنى كورگەن حالىق ەحوبا مەن سامۋيلدەن قاتتى قورىقتى.
19 ولار سامۋيلگە ٶتىنىش جاساپ: «قىزمەتشىلەرىڭىز ٷشىن قۇدايىڭىز ەحوباعا دۇعا ەتە كورىڭىز+، سەبەبى ٴبىز ولگىمىز كەلمەيدى. وزىمىزگە پاتشا سۇراپ، كۇنالارىمىزعا تاعى ٴبىر زۇلىمدىق قوستىق قوي!»— دەدى.
20 سوندا ول حالىققا بىلاي دەپ جاۋاپ بەردى: «قورىقپاڭدار! زۇلىمدىق جاساعاندارىڭ راس، تەك بۇدان بىلاي ەحوبانىڭ جولىنان اۋىتقىماي+، ەحوباعا بار جۇرەكتەرىڭمەن قىزمەت ەتەتىن بولىڭدار+.
21 ەش پايدا اكەلمەيتىن+، قۇتقارا دا المايتىن جالعان تاڭىرلەردىڭ سوڭىنان ەرىپ كەتپەڭدەر+، ويتكەنى بۇلارىڭ بوس اۋرەشىلىك بولادى.
22 ەحوبا ۇلى ەسىمى ٷشىن+ حالقىن تاستامايدى+، سەبەبى ەحوبا سەندەردى ٶز حالقى ەتۋدى شەشكەن+.
23 ال مەن سەندەر ٷشىن دۇعا ەتۋدى قويىپ، ەحوباعا قارسى كۇنا جاساۋدان اۋلاقپىن. قايتا، سەندەرگە ىزگى ٵرى تۋرا جولدى كورسەتۋدەن تالمايمىن.
24 تەك ەحوبادان قورقىپ+، وعان بار جۇرەكتەرىڭمەن، ادال قىزمەت ەتىڭدەر. ونىڭ سەندەر ٷشىن جاساعان ۇلى ىستەرىن ۇمىتپاڭدار+.
25 ال قايتپاي زۇلىمدىق جاساي بەرسەڭدەر، پاتشالارىڭمەن قوسا قۇرىپ كەتەسىڭدەر+».
