سامۋيلدىڭ 1-جازباسى 8:1—22
8 سامۋيل قارتايعاندا ۇلدارىن يسرايلگە بي ەتىپ تاعايىندادى.
2 ونىڭ تۇڭعىش ۇلى جوەل مەن كىشى ۇلى ٵبياح+ بەر-شەبادا تورەلىك ەتەتىن.
3 الايدا ولار ٴسامۋيلدىڭ جولىمەن جۇرمەيتىن. قايتا، پايداكۇنەمدىككە بەرىلىپ+، پارا الىپ+، شىندىقتى بۇرمالاپ ۇكىم شىعاراتىن+.
4 ٴبىراز ۋاقىت وتە يسرايل اقساقالدارى جينالىپ، راماققا كەلدى دە، سامۋيلگە:
5 «ٶزىڭ قارتايدىڭ، ال ۇلدارىڭ بولسا سەنىڭ جولىڭمەن جۇرمەيدى. سوندىقتان باسقا حالىقتاردىكىندەي پاتشا تاعايىنداپ بەر، بيلىكتى بىزگە سول ايتسىن+»،— دەدى.
6 ولاردىڭ «بىزگە بيلىكتى پاتشا ايتسىن» دەگەندەرى سامۋيلگە ۇناماي، ول ەحوباعا دۇعا ەتتى.
7 ەحوبا بىلاي دەپ جاۋاپ بەردى: «جۇرتتىڭ ايتقاندارىن تۇگەل ورىندا. ويتكەنى ولار سەنەن ەمەس، وزدەرىنە پاتشا بولعانىمدى قالاماي، مەنەن باس تارتىپ وتىر+.
8 مىسىردان الىپ شىققانىمدا ولار نە ىستەسە، قازىر دە ٴدال سونى ىستەدى. ولار مەنەن تەرىس اينالىپ+، بوتەن قۇدايلارعا تابىنۋلارىن قويار ەمەس+. ماعان ىستەگەندەرىن ەندى ساعان دا ىستەپ وتىر.
9 ولاردىڭ تىلەگىن ورىندا، ٴبىراق مۇنىڭ ارتى قانداي بولاتىنىن مىقتاپ ەسكەرت. وزدەرىنە بيلىك ەتەتىن پاتشانىڭ قۇقىقتارىن دا ايتىپ بەر».
10 سامۋيل وزدەرىنە پاتشا سۇراعان جۇرتقا ەحوبانىڭ سوزدەرىن تۇگەل جەتكىزدى.
11 ول بىلاي دەدى: «سەندەرگە بيلىك ەتەتىن پاتشا مىناداي تالاپتار قويۋعا قۇقىلى+: ول ۇلدارىڭدى الىپ+، ٴبىرىن ارباكەش ەتەدى+، ٴبىرىن اتتى اسكەرىنە قوسادى+؛ باسقا بىرەۋلەرىن سوعىس اربالارىنىڭ الدىندا جۇگىرتىپ قويادى؛
12 كەيبىرەۋلەرىن مىڭباسى+ مەن ەلۋباسى+ ەتىپ تاعايىندايدى؛ وزگە بىرەۋلەرىنە جەر جىرتقىزىپ+، ەگىن ورعىزادى+، قارۋ-جاراق جانە اربالارىنىڭ جابدىقتارىن جاساتادى+.
13 ال قىزدارىڭدى جاقپاماي* جاساتۋعا، تاماق پەن نان پىسىرتۋگە+ الىپ كەتەدى.
14 ەڭ جاقسى تاناپتارىڭدى، جۇزىمدىكتەرىڭ مەن ٴزايتۇن باقتارىڭدى الىپ+، ٶز قىزمەتشىلەرىنە بەرەدى.
15 ەگىندىكتەرىڭ مەن جۇزىمدىكتەرىڭنەن تۇسكەن ٶنىمنىڭ وننان ٴبىر بولىگى ساراي قىزمەتكەرلەرى مەن قىزمەتشىلەرىنىڭ ەنشىسىنە تيەدى.
16 قۇل-كۇڭدەرىڭدى، ەڭ جاقسى ٸرى قارالارىڭ مەن ەسەكتەرىڭدى الىپ، ٶز جۇمىسىنا سالادى+.
17 ۇساق مالدارىڭنىڭ وننان ٴبىر بولىگىن يەمدەنىپ وتىرادى+، ال وزدەرىڭ وعان قىزمەتشى بولاسىڭدار.
18 سوندا وزدەرىڭ تىلەپ العان پاتشادان قۇتقارۋىن سۇراپ جالبارىناتىن كۇن تۋادى+، ٴبىراق ەحوبا سەندەرگە جاۋاپ بەرمەيدى».
19 الايدا حالىق ٴسامۋيلدى تىڭداعىسى كەلمەي: «جوق، بىزگە پاتشا كەرەك!
20 سوندا ٴبىز دە باسقا حالىقتار سياقتى بولامىز: پاتشامىز بىزگە بيلىك ايتادى، الدىمىزدا باستاپ جۇرەدى، جاۋلارىمىزبەن سوعىسادى»،— دەدى.
21 سامۋيل جۇرتتى تىڭداعان سوڭ، ەستىگەندەرىن ەحوباعا ايتىپ بەردى.
22 ەحوبا وعان: «ايتقاندارىن ورىنداپ، ولارعا پاتشا تاعايىنداپ بەر»+،— دەدى. سوندا سامۋيل: «ٶز قالالارىڭا بارىڭدار»،— دەپ حالىقتى تاراتىپ جىبەردى.
سىلتەمەلەر
^ نەمەسە «ٴيىسماي».
