سامۋيلدىڭ 2-جازباسى 19:1—43
-
ٴداۋىتتىڭ ابەسسالومدى جوقتاۋى (1—4)
-
جوعابتىڭ ٴداۋىتتى تۇزەتۋى (5—8ا)
-
ٴداۋىتتىڭ يەرۋساليمگە ورالۋى (8ٵ — 15)
-
شيمەيدىڭ كەشىرىم سۇراۋى (16—23)
-
مەپىبوشەتتىڭ كىناسى جوق ەكەنىن ايتۋى (24—30)
-
بارزيلايعا كورسەتىلگەن قۇرمەت (31—40)
-
يسرايل رۋلارىنىڭ داۋلاسۋى (41—43)
19 ٴبىراز ۋاقىت وتكەندە جوعابقا «پاتشا كوز جاسىن توگىپ، ابەسسالومدى جوقتاپ جاتىر» دەگەن حابار جەتتى+.
2 حالىق ٴداۋىتتىڭ ولگەن ۇلىن جوقتاپ قايعىرىپ جاتقانىن ەستىگەندە، جەڭىس كۇنى قارالى كۇنگە اينالدى.
3 جۇرت سوعىس الاڭىنان قاشىپ ماسقارا بولعان ساربازدارداي، قالاعا ۇرلانىپ كىرە باستادى+.
4 پاتشا بولسا بەتىن جاۋىپ الىپ: «ۇلىم، ابەسسالوم! ابەسسالوم، ۇلىم-اي، ۇلىم!»— دەپ داۋىستاپ جىلاۋمەن بولدى+.
5 سوندا جوعاب پاتشانىڭ ۇيىنە كەلىپ، بىلاي دەدى: «بۇگىن سەن ٶزىڭنىڭ دە، ۇل-قىزدارىڭنىڭ دا+، ايەلدەرىڭ مەن كانيزاكتارىڭنىڭ دا+ جانىن امان الىپ قالعان بارلىق قىزمەتشىلەرىڭدى قارابەت قىلدىڭ.
6 سەن ٶزىڭدى جەك كورەتىندەردى جاقسى كورىپ، جاقسى كورەتىندەردى جەك كورەسىڭ. بۇگىن باسشىلارىڭ مەن قىزمەتشىلەرىڭنىڭ ٶزىڭ ٷشىن تۇككە تۇرعىسىز ەكەنىن كورسەتتىڭ. ساعان ابەسسالوم امان قالىپ، ٴبارىمىزدىڭ قىرىلىپ قالعانىمىز ارتىق ەدى! بۇگىن سوعان كوزىم جەتتى.
7 ال ەندى تۇر دا، سىرتقا شىعىپ، قىزمەتشىلەرىڭنىڭ رۋحىن كوتەر. ەحوبانىڭ اتىمەن انت ەتەمىن: ولاي ەتپەسەڭ، بۇگىن تۇندە قاسىڭدا ەشكىم قالمايدى. سوندا بۇل بالالىق شاعىڭنان وسى كۇنگە دەيىن كورگەن ازاپتارىڭنىڭ ەڭ اۋىرى بولماق!»
8 سوندا پاتشا ورنىنان تۇرىپ، قالا قاقپاسىنىڭ الدىنا بارىپ وتىردى. جۇرتقا «پاتشا قاقپا الدىندا وتىر» دەگەن حابار جەتكەندە، بارلىعى ونىڭ الدىنا كەلدى.
ال ابەسسالومنىڭ جاعىنا شىققان يسرايلدىكتەر ٷيدى-ۇيىنە قاشىپ كەتكەن ەدى+.
9 يسرايلدىڭ كۇللى رۋىنىڭ ادامدارى ٶزارا ايتىسىپ، بىلاي دەسىپ جاتتى: «پاتشامىز ٴبىزدى جاۋلارىمىزدان قۇتقارىپ+، فىلىستىرلەردىڭ ەزگىسىنەن ازات ەتكەن ەدى. ٴبىراق ەندى ابەسسالومنان باسساۋعالاپ، ەلدەن قاشىپ كەتتى+.
10 ال وزىمىزگە پاتشا ەتىپ تاعايىنداعان ابەسسالوم+ بولسا شايقاستا قازا تاپتى+. ەندەشە پاتشامىزدى قايتارماي، نەگە قول قۋسىرىپ وتىرمىز؟»
11 ٴداۋىت پاتشا ٴدىني قىزمەتكەرلەر سادىق+ پەن ٵبياتارعا+ مىناداي حابار جىبەردى: «ياھۋدا اقساقالدارىنا+ بىلاي دەڭدەر: «نەگە پاتشانى ۇيىنە قايتارۋدى كەشەۋىلدەتىپ جاتىرسىزدار؟ كۇللى يسرايل اراسىندا بۇل جايلى ايتىلىپ جاتقان اڭگىمە پاتشا مەن ونىڭ ٷي ىشىندەگىلەرىنە دە جەتتى.
12 سىزدەر مەنىڭ باۋىرلارىم، قانداستارىم* ەمەسسىزدەر مە؟! ەندەشە نەگە پاتشانى كەرى قايتارماي، كەشەۋىلدەتىپ وتىرسىزدار؟»
13 ال عاماساعا+ مىنانى ايتىڭدار: «سەن مەنىڭ باۋىرىمسىڭ* عوي. جوعابتىڭ ورنىنا سەنى بۇگىننەن باستاپ قولباسشى ەتىپ قويماسام، قۇداي مەنى جازالاعان ۇستىنە جازالاسىن+!»
14 وسى سوزدەرىمەن ٴداۋىت كۇللى ياھۋدالىقتاردىڭ جۇرەگىن جاۋلاپ الدى. سوندا جۇرت پاتشاعا «ٶزىڭىز دە، كۇللى قىزمەتشىلەرىڭىز دە قالاعا ورالىڭىزدار» دەگەن حابار جولدادى.
15 سودان پاتشا جولعا شىعىپ، يوردانعا كەلىپ جەتتى. ال ياھۋدالىقتار ونى كۇتىپ الىپ، وزەننەن وتكىزۋ ٷشىن عىلعالعا+ جينالدى.
16 باحۋريمدە تۇراتىن بەنياميندىك گەرا ۇلى شيمەي+ دە اسىعا جولعا شىعىپ، ياھۋدالىقتارمەن بىرگە پاتشانى قارسى الۋ ٷشىن تومەن ٴتۇستى.
17 وعان 1000 بەنياميندىك كىسى ەرىپ كەلدى. ساۋلدىڭ ۇيىندە قىزمەتشى بولعان سيبا+ دا 15 ۇلى مەن 20 قىزمەتشىسىن الىپ، شيمەيمەن بىرگە يوردانعا پاتشادان بۇرىن جەتتى.
18 ول* پاتشانىڭ ٷي ٸشىن وزەننەن وتكىزىپ، ونىڭ بارلىق قالاۋىن ورىنداۋ ٷشىن وتكەلدەن ٶتتى. ال گەرا ۇلى شيمەي بولسا پاتشا يورداننان وتكەلى جاتقاندا، الدىنا جىعىلا كەتىپ،
19 بىلاي دەدى: «پاتشا اعزام كىنامدى موينىما ارتا كورمەسىن. تاقسىر يەم يەرۋساليمنەن كەتىپ بارا جاتقان كۇنى قىزمەتشىسىنىڭ جاساعان جاماندىعىن ەسىنە تۇسىرە كورمەسىن+. پاتشا ونى كوڭىلىنە الماسا ەكەن.
20 قىزمەتشىڭىز كۇنا جاساعانىن ٶزى دە بىلەدى. سوندىقتان بۇگىن پاتشا يەمدى قارسى الۋ ٷشىن بۇكىل ٴجۇسىپ اۋلەتىنىڭ ىشىنەن ٴبىرىنشى بولىپ كەلىپ وتىرمىن».
21 سول كەزدە سارۇيانىڭ ۇلى+ ٵبىساي+: «ەحوبا مايلاعان پاتشانى قارعاعانى ٷشىن شيمەيدى ٶلتىرۋ كەرەك ەمەس پە؟!»+— دەدى.
22 ٴبىراق ٴداۋىت: «سارۇيانىڭ ۇلدارى، نەگە مەنىڭ شارۋاما ارالاسىپ+، ماعان قارسى شىعاسىڭدار؟ بۇگىن يسرايلدە كىسى ولتىرەتىن كۇن بە؟ مەن بۇگىن يسرايلگە قايتادان پاتشا بولدىم ەمەس پە؟!»— دەدى.
23 سوسىن شيمەيگە: «سەن ولمەيسىڭ!»— دەپ انت ەتتى+.
24 پاتشانى قارسى الۋعا ساۋلدىڭ نەمەرەسى مەپىبوشەت+ تە كەلدى. ول پاتشا كەتكەن كۇننەن باستاپ، امان-ەسەن قايتىپ كەلگەنگە دەيىن ساقال-مۇرتىنا قارامادى، اياعىن دا، كيىمىن دە جۋماعان ەدى.
25 مەپىبوشەت يەرۋساليمگە* پاتشانىڭ الدىنا كەلگەندە، پاتشا ودان: «مەپىبوشەت، نەگە مەنىمەن بىرگە كەتپەدىڭ؟»— دەپ سۇرادى.
26 ول بىلاي دەپ جاۋاپ بەردى: «تاقسىر يەم، قىزمەتشىڭىزدىڭ اياعى مايىپ بولىپ قالعانىن بىلەسىز عوي+. مەن قىزمەتشىم سيباعا+ «ەسەگىمدى ەرتتەپ اكەل، پاتشاما ىلەسىپ بارايىن» دەگەن ەدىم، ٴبىراق ول مەنى الداپ كەتتى.
27 ال پاتشا اعزامنىڭ الدىندا ماعان جالا جاۋىپتى+. ٴبىراق پاتشا يەم شىنايى قۇدايدىڭ پەرىشتەسى سياقتى، سوندىقتان نە ىستەسە دە ٶز ەركى.
28 سەبەبى اكەمنىڭ اۋلەتى پاتشا يەمنىڭ الدىندا ولىمنەن باسقاعا لايىق ەمەس ەدى. ٴبىراق پاتشام ماعان ٶز داستارقانىنان ورىن بەردى+. ولاي بولسا، الدىڭىزدا بىردەڭە تالاپ ەتۋگە قۇقىم بار ما؟!»
29 الايدا پاتشا: «بۇل اڭگىمەنى دوعارايىق. مەنىڭ كەسىمىم مىناۋ: سيبا ەكەۋىڭ تاناپتى ٴبولىپ الاسىڭدار+!»— دەدى.
30 مەپىبوشەت: «ول ٴبارىن دە وزىنە الا بەرسىن، پاتشا يەم ۇيىنە امان-ەسەن ورالدى عوي»،— دەپ جاۋاپ بەردى.
31 عالاقاتتىق بارزيلاي+ دا پاتشانى يوردانعا دەيىن شىعارىپ سالۋعا روگەليمنەن ىلديلاپ كەلدى.
32 ول 80 جاسقا كەلگەن قارت كىسى ەدى. پاتشا ماحانايمدە جۇرگەن كەزدە، بارزيلاي ونى اس-سۋمەن قامتاماسىز ەتىپ تۇردى+، ويتكەنى ول اسا داۋلەتتى بولاتىن.
33 پاتشا وعان: «مەنىمەن بىرگە ٴجۇرىڭىز. ٴسىزدى يەرۋساليمدە ٶز قاراماعىما الىپ، اس-سۋمەن قامتاماسىز ەتىپ وتىرايىن»+،— دەدى.
34 ٴبىراق ول مىنانى ايتتى: «ازعانا عۇمىرىم قالعاندا، پاتشامەن يەرۋساليمگە بارىپ قايتەمىن؟
35 جاسىم بولسا 80 گە كەلىپ قالدى+. جاعىمدى مەن جاعىمسىزدى دا، انشىلەردىڭ+ داۋسىن دا ايىرۋدان قالعانمىن. ٸشىپ-جەگەن استىڭ دا ٴدامىن سەزبەيمىن. سوندىقتان پاتشا يەمە اۋىرتپالىق بولماي-اق قويايىن.
36 قىزمەتشىڭە پاتشانى يوردانعا دەيىن شىعارىپ سالعانىنىڭ ٶزى دە جەتكىلىكتى. نەگە پاتشام سول ٷشىن ماعان وسىنشاما سي كورسەتۋ كەرەك؟
37 قىزمەتشىڭە كەرى قايتۋعا رۇقسات ەتە كور: اكە-شەشەمنىڭ قابىرىنەن الىستاماي، ٶز قالاما بارىپ ولەيىن+. ال مىناۋ — قىزمەتشىڭ كيمحام+. تاقسىر يەممەن ارعى بەتكە سول ٶتسىن. وعان نە ىستەيمىن دەسەڭ، ٶز ەركىڭ».
38 پاتشا بۇعان: «جارايدى، مەنىمەن كيمحام ٶتسىن. وعان ٴسىز دۇرىس دەپ تاپقاندى ىستەيىن. نە قالاساڭىز، ٴبارىن ورىندايمىن»،— دەدى.
39 سودان كۇللى جۇرت يورداننان وتە باستادى. پاتشا وزەننەن وتەردە، بارزيلايدىڭ بەتىنەن ٴسۇيىپ+، باتاسىن بەردى دە، ول ۇيىنە قايتىپ كەتتى.
40 پاتشا وزەننەن ٶتىپ، عىلعالعا+ بەت العاندا، كيمحام دا بىرگە ٶتتى. سونداي-اق ونىڭ قاسىندا كۇللى ياھۋدالىقتار جانە يسرايلدىكتەردىڭ جارتىسى بولدى+.
41 سوندا بارلىق يسرايلدىكتەر پاتشاعا كەلىپ: «نەگە باۋىرلارىمىز ياھۋدالىقتار ٴسىزدى ۇرلاپ اكەتىپ، پاتشامىزدى، ٷي ٸشى مەن بارلىق ادامدارىن يورداننان وزدەرى وتكىزدى؟»— دەپ نارازىلىق ٴبىلدىردى+.
42 بۇعان ياھۋدالىقتار: «ويتكەنى پاتشا — ٴبىزدىڭ ەت جاقىن تۋىسىمىز+. مۇنىڭ نەسىنە اشۋلاناسىڭدار؟ الدە ونىڭ بىردەڭەسىن جەپ قويدى نە ودان سيلىق الدى دەيسىڭدەر مە؟»— دەپ جاۋاپ بەردى.
43 سوندا يسرايلدىكتەر مىنانى ايتتى: «ٴبىز پاتشالىقتىڭ ون بولىگىن قۇرايمىز، سوندىقتان داۋىتكە قاتىستى قۇقىمىز سەندەردىكىنەن ون ەسە كوپ. ەندەشە نەگە ٴبىزدى مەنسىنبەدىڭدەر؟ پاتشانى كەرى قايتارۋ ٴبىزدىڭ جولىمىز ەدى عوي؟» الايدا ولارعا قاراعاندا، ياھۋدالىقتار قاتتى-قاتتى سويلەدى.
سىلتەمەلەر
^ سوزبە-ٴسوز «سۇيەگىم مەن ەتىم».
^ سوزبە-ٴسوز «سۇيەگىم مەن ەتىمسىڭ».
^ مۇمكىن: «ولار».
^ مۇمكىن: «يەرۋساليمنەن».