سامۋيلدىڭ 2-جازباسى 2:1—32
2 بۇدان كەيىن ٴداۋىت ەحوبادان باسشىلىق سۇراپ+: «ياھۋدانىڭ قالالارىنىڭ بىرىنە كوتەرىلەيىن بە؟»— دەدى. ەحوبا: «ٴيا، كوتەرىل»،— دەپ جاۋاپ بەردى. ٴداۋىت قايتادان: «قاي قالاسىنا؟»— دەپ سۇراپ ەدى، «حەبرونعا»+ دەگەن جاۋاپ الدى.
2 ٴسۇيتىپ، ٴداۋىت ەكى ايەلىن، ەزرەحەلدىك احينوعام+ مەن كارميلدىك نابالدىڭ جەسىرى ابيگەلدى+ الىپ، سوندا ورلەدى.
3 قاسىنداعى ادامدارىن+ دا وتباسىلارىمەن بىرگە الىپ كەتتى. ولار حەبروننىڭ اينالاسىنداعى قالالارعا قونىستاندى.
4 سوندا ياھۋدا رۋىنىڭ ادامدارى كەلىپ، ٴداۋىتتى ياھۋدا ٷيىنىڭ پاتشاسى ەتىپ تاعايىندادى+.
داۋىتكە يابەس-عالاقات تۇرعىندارىنىڭ ساۋل پاتشانىڭ دەنەسىن كومگەنى تۋرالى حابار جەتتى.
5 سوندىقتان ول يابەس-عالاقات تۇرعىندارىنا حابارشىلارىن جىبەرىپ، مىنانى ايتتى: «يەلەرىڭ ساۋلعا اينىماس سۇيىسپەنشىلىك تانىتىپ، سۇيەگىن جەرلەپسىڭدەر+. سول ٷشىن ەحوبا سەندەردى جارىلقاسىن.
6 ەحوبا اينىماس سۇيىسپەنشىلىك كورسەتىپ، ادالدىق تانىتسىن. مەن دە وسى ىستەرىڭ ٷشىن سەندەرگە جاقسىلىق جاسايمىن+.
7 ەندى بەرىك ٵرى باتىل بولىڭدار، سەبەبى يەلەرىڭ ساۋل قايتىس بولدى. ال مەنى ياھۋدا ٷيى وزدەرىنە پاتشا ەتىپ تاعايىندادى».
8 ٴبىراق ساۋلدىڭ قولباسشىسى نەر ۇلى ابىنەر+ ونىڭ يشبوشەت+ دەگەن ۇلىن الىپ، ماحانايمگە+ كەلدى.
9 سول جەردە ونى عالاقاتتىقتاردىڭ+، اشۋرلىقتار مەن ەزرەحەلدىكتەردىڭ+ جانە ەفرەم+ مەن بەنيامين رۋىنىڭ ۇستىنەن، ياعني كۇللى يسرايلدىڭ ۇستىنەن، پاتشا ەتىپ قويدى.
10 ساۋلدىڭ ۇلى يشبوشەت يسرايل پاتشاسى بولىپ تاعايىندالعاندا 40 جاستا ەدى، ول ەكى جىل پاتشالىق قۇردى. ال ٴداۋىتتى ياھۋدا رۋى عانا قولدادى+.
11 ٴداۋىت حەبروندا ياھۋدا رۋىنىڭ ۇستىنەن جەتى جىل التى اي بيلىك ەتتى+.
12 بىردە نەر ۇلى ابىنەر مەن ساۋل ۇلى يشبوشەتتىڭ قىزمەتشىلەرى ماحانايمنەن+ گيبەونعا+ كەلدى.
13 سارۇيانىڭ ۇلى+ جوعاب+ پەن ٴداۋىتتىڭ قىزمەتشىلەرى دە سوندا كەلىپ، ولاردى گيبەونداعى حاۋىزدىڭ بويىندا كەزدەستىردى. ٴبىر توپ حاۋىزدىڭ بەرگى جاعىنا، ەكىنشىسى ارعى جاعىنا ورنالاستى.
14 ٴبىر ۋاقىتتا ابىنەر جوعابقا: «جىگىتتەر ٴبىزدىڭ الدىمىزدا كۇش سىناسۋعا شىقسىن»،— دەدى. ول: «جارايدى، شىقسىن»،— دەدى.
15 ٴسۇيتىپ، بەنيامين رۋى مەن ساۋل ۇلى يشبوشەتتىڭ جاعىنان 12 جىگىت تاڭدالدى، ٴداۋىتتىڭ قىزمەتشىلەرىنىڭ اراسىنان دا 12 جىگىت شىقتى.
16 ولار ٴبىر-ٴبىرىنىڭ باسىنان شاپ بەرىپ ۇستادى دا، بۇيىرلەرىنە سەمسەرلەرىن سۇعىپ الىپ، سول كۇيى جەرگە قۇلادى. سودان بەرى گيبەونداعى بۇل جەر حەلكات-حاسۋريم* دەپ اتالىپ كەتتى.
17 سول كۇنى قيان-كەسكى شايقاس بولىپ، ٴداۋىتتىڭ قىزمەتشىلەرى ابىنەر مەن يسرايلدىكتەردى تاس-تالقان ەتتى.
18 سارۇيانىڭ جوعاب+، ٵبىساي+ مەن اساحەل+ دەگەن ٷش ۇلى+ سول جەردە ەدى. اساحەل كيىكتەي جۇيرىك بولاتىن.
19 ول ابىنەردىڭ سوڭىنا ٴتۇسىپ، وڭعا دا، سولعا دا بۇرىلماي، وكشەلەي قۋىپ كەلە جاتتى.
20 ٴبىر ۋاقىتتا ابىنەر ارتىنا قاراپ: «اساحەل، بۇل سەنسىڭ بە؟— دەپ ەدى، ول: — ٴيا، مەنمىن»،— دەدى.
21 سوندا ول: «وڭعا نە سولعا بۇرىل دا، ٴبىر جىگىتتى ۇستاپ الىپ، سونىڭ قارۋ-جاراعىن ولجالا»،— دەدى. ٴبىراق اساحەل ودان قالعىسى كەلمەدى.
22 ابىنەر وعان قايتادان: «مەنى قۋۋدى قوي دەيمىن، ايتپەسە مەرت بولاسىڭ. سوندا اعاڭ جوعابتىڭ بەتىنە قالاي قارايمىن؟»— دەدى.
23 اساحەل قۇلاق اسپاعان سوڭ، ابىنەر سۇڭگىسىنىڭ ارتقى ۇشىن ونىڭ ىشىنە سۇعىپ الىپ+، ارقاسىنان ٴبىر-اق شىعاردى. اساحەل سول جەردە سۇلاپ ٴتۇسىپ، ٴتىل تارتپاي كەتتى. ونىڭ جانىنا كەلگەندەردىڭ ٴبارى توقتاپ قالىپ جاتتى.
24 جوعاب پەن ٵبىساي ابىنەردى قۋا جونەلدى. كۇن ۇياسىنا وتىرىپ قالعاندا ولار گيبەوننىڭ ماڭىنداعى ٴشول دالاعا اپارار جولداعى گياعا قارسى جاتقان اماح توبەسىنە جەتتى.
25 بەنياميندىكتەر ابىنەردىڭ اينالاسىنا جينالىپ، ٴبىر توبە باسىنا توپتالدى.
26 ابىنەر جوعابقا بىلاي دەپ ايعايلادى: «سەمسەر قانعا تويۋشى ما ەدى؟! مۇنىڭ ارتى ناسىرعا شابارىن بىلەسىڭ عوي! جىگىتتەرىڭە ٶز باۋىرلارىن قۋۋدى قاشان دوعارتاسىڭ؟»
27 بۇعان جوعاب: «ٴتىرى قۇدايدىڭ الدىندا شىن ايتامىن*، سەن وسىلاي دەمەگەندە، جىگىتتەرىم ٶز باۋىرلارىن تاڭ اتقانشا قۋا بەرەر ەدى»،— دەدى.
28 سوسىن ول كەرنەيلەتىپ، ادامدارىن توقتاتتى. وسىدان كەيىن ونىڭ جىگىتتەرى يسرايلدىكتەردى قۋۋدى دا، شايقاسۋدى دا دوعاردى.
29 ابىنەر ادامدارىمەن بىرگە ٴتۇنى بويى ارابا+ ارقىلى ٴجۇرىپ وتىرىپ، يوردانعا كەلدى. سوسىن ونى كەسىپ ٶتتى دە، سايدى بويلاي وتىرىپ، اقىرىندا ماحانايمگە جەتتى+.
30 جوعاب بولسا ابىنەردى قۋۋىن قويىپ، ادامدارىن جينادى. ٴداۋىتتىڭ قىزمەتشىلەرىنەن، اساحەلدى قوسپاعاندا، 19 ادام جوق بولىپ شىقتى.
31 ال ٴداۋىتتىڭ جىگىتتەرى بەنياميندىكتەر مەن ابىنەر ساربازدارىنىڭ 360 ىن مەرت قىلعان ەدى.
32 جوعاب جىگىتتەرىمەن بىرگە اساحەلدىڭ+ سۇيەگىن اكەسىنىڭ بەتلەحەمدەگى+ قابىرىنە اپارىپ قويدى. بۇدان كەيىن ولار ٴتۇنى بويى ٴجۇرىپ وتىرىپ، كۇن كوتەرىلە حەبرونعا+ جەتتى.
سىلتەمەلەر
^ ماعىناسى «شاقپاقتاستان جاسالعان پىشاقتار دالاسى».
^ نەمەسە «شىنايى قۇدايدىڭ ٴتىرى ەكەنىندەي حاق ٴسوزىم».
