سامۋيلدىڭ 2-جازباسى 6:1—23
6 ٴداۋىت يسرايلدىڭ تاڭداۋلى جاساقتارىن، 30000 ەر ادامدى، قايتادان قاسىنا جيناپ الىپ،
2 قۇدايدىڭ كەلىسىم ساندىعىن اكەلۋ ٷشىن بارلىعى باعالا-ياھۋداعا اتتاندى+. جۇرت ساندىق قويىلعان جەرگە بارىپ، كەرۋبتەردىڭ ۇستىندە* وتىراتىن+ اسكەرباسى ەحوبانىڭ+ اتىن اتاپ جالبارىناتىن.
3 ٴداۋىت پەن قاسىنداعىلار قۇدايدىڭ كەلىسىم ساندىعىن جاڭا ارباعا سالىپ+، ٵبيناداپتىڭ توبە باسىندا تۇرعان ۇيىنەن الىپ شىقتى+. اربانى ٵبيناداپتىڭ ۇزاح جانە احيو دەگەن ەكى ۇلى باستاپ ٴجۇردى.
4 وسىلاي ولار ٵبيناداپتىڭ توبە باسىندا تۇرعان ۇيىنەن قۇدايدىڭ كەلىسىم ساندىعىن الىپ شىقتى. احيو ساندىقتىڭ الدىندا كەلە جاتتى.
5 ٴداۋىت پەن بۇكىل يسرايلدىكتەر ارشادان جاسالعان ٴتۇرلى اسپاپتاردا ويناپ، ارفا جانە باسقا دا ىشەكتى اسپاپتار تارتىپ+، داڭعىرا+ مەن جەز تاباقشالار قاعىپ+، اساتاياق سىلكىپ، ەحوبانىڭ الدىندا ٵن سالىپ، بي بيلەپ كەلە جاتتى.
6 ولار ناحون قىرمانىنا جەتكەندە، بۇقالار ارباداعى كەلىسىم ساندىعىن قۇلاتا جازداعاندىقتان، ۇزاح قولىن سوزىپ، ساندىقتى ۇستاي الدى+.
7 ۇزاحتىڭ وسىنداي ارەكەتكە ٴداتى بارعانىنا+ ەحوبانىڭ قاھارى لاۋلاپ، ونى جازالادى+. ول سول بويدا شىنايى قۇدايدىڭ كەلىسىم ساندىعىنىڭ قاسىندا ٴتىل تارتپاي كەتتى.
8 ٴداۋىت ەحوبانىڭ ۇزاحقا قاھارىن توككەنىنە اشۋلاندى*. سوندىقتان بۇل جەر ٵلى كۇنگە دەيىن پارەس-ۇزاح* دەپ اتالادى.
9 ٴداۋىت سول كۇنى ەحوبادان قورقىپ+: «مەن تۇراتىن جەرگە ەحوبانىڭ كەلىسىم ساندىعى قالاي اكەلىنبەك؟»— دەدى+.
10 وسىلايشا ەحوبانىڭ كەلىسىم ساندىعىن ٶزى تۇرىپ جاتقان ٴداۋىتتىڭ قالاسىنا+ اكەلگىسى كەلمەي، عاتتىق عابيت-ەدومنىڭ ۇيىنە اپارعىزدى+.
11 ەحوبانىڭ كەلىسىم ساندىعى سول ۇيدە ٷش اي تۇردى. ەحوبا عابيت-ەدوم مەن ونىڭ بۇكىل ٷي ٸشىن جارىلقاپ وتىردى+.
12 ٴداۋىت پاتشاعا «شىنايى قۇدايدىڭ كەلىسىم ساندىعىنىڭ ارقاسىندا عابيت-ەدومنىڭ بۇكىل ٷي ٸشى مەن يەلىگى ەحوبانىڭ باتاسىنا كەنەلدى» دەگەن حابار جەتتى. سوندا ول شىنايى قۇدايدىڭ كەلىسىم ساندىعىن عابيت-ەدومنىڭ ۇيىنەن زور قۋانىشپەن ٴداۋىتتىڭ قالاسىنا اكەلمەك بولىپ جولعا شىقتى+.
13 ەحوبانىڭ كەلىسىم ساندىعىن كوتەرىپ كەلە جاتقاندار+ التى قادام جاساعاندا، ٴداۋىت ٴبىر بۇقا مەن ٴبىر بورداقى مالدى قۇرباندىققا شالدى.
14 ٴداۋىت ۇستىنە زىعىر ەفود كيىپ، ەحوبانىڭ الدىندا بارىن سالىپ بيلەپ ٴجۇردى+.
15 وسىلاي بۇكىل يسرايل ٷيى پاتشامەن بىرگە شاتتانا داۋىستاپ+، كەرنەيلەتىپ+ ەحوبانىڭ كەلىسىم ساندىعىن+ اكەلە جاتتى.
16 ەحوبانىڭ كەلىسىم ساندىعى ٴداۋىتتىڭ قالاسىنا كىرگەندە، ساۋلدىڭ قىزى ميحال+ تەرەزەدەن قاراپ تۇرعان ەدى. ول ەحوبانىڭ الدىندا ٴداۋىت پاتشانىڭ سەكىرىپ، بيلەپ جۇرگەنىن كورىپ، ونى ىشتەي كەمسىتتى+.
17 ٴداۋىت ەحوبانىڭ كەلىسىم ساندىعىن ارنايى جاساتقان شاتىرعا قويدىردى+. سودان سوڭ ەحوبانىڭ الدىندا تۇگەل ورتەلەتىن+ جانە تاتۋلىق قۇرباندىقتارىن+ ۇسىندى+.
18 قۇرباندىق شالىپ بىتكەن سوڭ، حالىققا اسكەرباسى ەحوبانىڭ اتىمەن باتاسىن بەردى.
19 ول جينالعان بۇكىل حالىققا، قالىڭ يسرايل جۇرتىنا، ەركەك-ايەل دەمەي ٵرقايسىسىنا، ٴبىر-ٴبىر تەسىك كۇلشەدەن جانە كەپتىرىلگەن قۇرما كۇلشە مەن مەيىز كۇلشەدەن بەردى. سودان كەيىن جۇرت ٷيدى-ۇيىنە تاراستى.
20 ٴداۋىت ٶز ۇيىندەگىلەرگە باتاسىن بەرۋگە كەلگەندە، الدىنان ساۋلدىڭ قىزى ميحال+ شىعىپ: «بۇگىن يسرايل پاتشاسى تۋرا ٴبىر اقىماقتار سياقتى، قىزمەتكەرلەرىنىڭ كۇڭدەرىنىڭ الدىندا جالاڭاش ٴجۇرىپ، زور داڭققا بولەندى عوي!»— دەدى+.
21 ٴداۋىتتىڭ جاۋابى مىناۋ بولدى: «قۋانسام، ەحوبا قۇدايدىڭ الدىندا قۋاندىم. ەحوبا مەنى اكەڭ مەن ونىڭ اۋلەتىنىڭ ورنىنا ٶز حالقى يسرايلگە باسشى ەتىپ قويدى+. سوندىقتان ەحوبانىڭ الدىندا قۋانىپ،
22 بۇرىنعىدان دا كىشىرەيەمىن، ٴتىپتى ٶز كوز الدىمدا تومەن بولامىن. ٴبىراق ٶزىڭ ايتىپ تۇرعان كۇڭدەر ارقىلى داڭقىم ارتادى».
23 ساۋلدىڭ قىزى ميحال+ ولە-ولگەنشە قۇرساق كوتەرمەدى.
سىلتەمەلەر
^ مۇمكىن: «اراسىندا».
^ نەمەسە «ۇنجىرعاسى ٴتۇستى».
^ ماعىناسى «ۇزاحقا توگىلگەن قاھار».
