سامۋيلدىڭ 2-جازباسى 7:1—29
7 پاتشا ٶز ۇيىندە تۇرىپ جاتتى+. ەحوبا وعان اينالاسىنداعى بارلىق جاۋلارىنان تىنىشتىق سيلادى.
2 بىردە پاتشا ناتان پايعامبارعا+: «مەن قاراعايدان سوعىلعان ۇيدە تۇرىپ جاتىرمىن+، ال شىنايى قۇدايدىڭ كەلىسىم ساندىعى بولسا شاتىردا تۇر+»،— دەدى.
3 ناتان: «كوڭىلىڭ قالاعانىن ىستە، ەحوبا ساعان جار»،— دەپ جاۋاپ بەردى+.
4 ٴبىراق سول ٴتۇنى ەحوبا ناتانعا مىنانى ايتتى:
5 «بار دا، قىزمەتشىم داۋىتكە بىلاي دە: — ەحوبانىڭ ساعان ايتارى مىناۋ: «سەن ماعان تۇراتىن ٷي سالماقسىڭ با+؟
6 يسرايل حالقىن مىسىردان الىپ شىققالى بەرى مەن ۇيدە ەمەس+، شاتىردا تۇرىپ+، كۇنى بۇگىنگە دەيىن كوشىپ-قونىپ ٴجۇرمىن.
7 يسرايلدىڭ اراسىندا جۇرگەنىمدە، حالقىمدى باقسىن دەپ ٶزىم تاعايىنداعان يسرايل رۋلارىنىڭ بىردە-ٴبىر باسشىسىنا «نەگە ماعان قاراعايدان ٷي سالىپ بەرمەيسىڭدەر؟» دەگەن ەمەسپىن».
8 قىزمەتشىم داۋىتكە تاعى بىلاي دە: «اسكەرباسى ەحوبا مىنانى ايتادى: — حالقىم يسرايلگە باسشى بولۋىڭ ٷشىن+، مەن سەنى ورىستە مال باعىپ جۇرگەن جەرىڭنەن تاڭداپ الدىم+.
9 قايدا بارساڭ دا، ساعان جار بولىپ+، الدىڭنان بارلىق جاۋلارىڭدى قۇرتىپ وتىرامىن+. سەنىڭ اتىڭدى شىعارىپ+، جەر بەتىندەگى ۇلى ادامدار ىسپەتتى داڭقتى قىلامىن.
10 مەن حالقىم يسرايلگە جەر ٴبولىپ، سوندا قونىستاندىرامىن دا، ولار سول جەردە تۇراتىن بولادى. ەشكىم ولاردى مازالامايدى. زۇلىمدار بۇرىنعىداي قىسىم كورسەتپەيدى+.
11 مەن حالقىم يسرايلگە بيلەر تاعايىنداعان كەزدەن باستاپ+ ولار قىسىم كورسەتىپ كەلدى. ال ەندى مەن ساعان بارلىق جاۋلارىڭنان تىنىشتىق سيلايمىن+.
ەحوبا ساعان تاعى مىنانى ايتادى: — مەن، ەحوبا، سەنىڭ اۋلەتىڭدى پاتشا اۋلەتى ەتەمىن+.
12 كۇندەرىڭ تاۋسىلىپ+، اتا-بابالارىڭا قوسىلعانىڭدا، ارتىڭنان ٴبىر ۇرپاعىڭدى، ٶز ۇلىڭدى تاعايىنداپ، ونىڭ پاتشالىق بيلىگىن نىعايتامىن+.
13 مەنىڭ ەسىمىمدى داڭققا بولەيتىن ٷيدى سول سالادى+. مەن ونىڭ پاتشالىق تاعىن بەرىك ەتىپ، ماڭگىگە ورنىقتىرامىن+.
14 مەن ونىڭ اكەسى، ال ول مەنىڭ ۇلىم بولادى+. جاماندىق جاساسا، ونى ادامداردىڭ تاياعىمەن جونگە سالىپ، ادام بالاسىنىڭ* دۇرەسىمەن جازالايمىن+.
15 ساعان دەيىنگى ساۋلدى اينىماس سۇيىسپەنشىلىگىمنەن ايىردىم+، ال ونى ەشقاشان ايىرمايمىن.
16 سەنىڭ ٷيىڭ مەن پاتشالىعىڭا ەشقاشان قاۋىپ تونبەيدى. تاعىڭ ماڭگى باقي بەرىك تۇرادى+».
17 ناتان ەستىگەن سوزدەرى مەن العان ايانىن داۋىتكە تۇگەل ايتىپ بەردى+.
18 سوندا ٴداۋىت پاتشا ەحوبانىڭ الدىنا بارىپ وتىردى دا، بىلاي دەدى: «ۋا، الەمنىڭ ٵمىرشىسى ەحوبا! مەن ٷشىن وسىنىڭ ٴبارىن ىستەيتىندەي، اۋلەتىم كىم، مەن كىممىن+؟
19 الەمنىڭ ٵمىرشىسى ەحوبا، سەن بۇلاردى از كورىپ، قۇلىڭنىڭ اۋلەتىنىڭ سوناۋ بولاشاعىن دا ايتىپ بەردىڭ. ۋا، الەمنىڭ ٵمىرشىسى ەحوبا، بۇل — سەنىڭ ادامزاتقا بەرگەن نۇسقاۋىڭ.
20 بۇعان قىزمەتشىڭ ٴداۋىتتىڭ الىپ-قوسارى بار ما؟ الەمنىڭ ٵمىرشىسى ەحوبا، سەن مەنى جاقسى بىلەسىڭ عوي+.
21 وسى ۇلى ىستەردىڭ بارلىعىن ۋادەڭ مەن ەركىڭە ساي جۇزەگە اسىرىپ، قۇلىڭا ٴبىلدىردىڭ+.
22 مىنە، سوندىقتان، ۋا، الەمنىڭ ٵمىرشىسى ەحوبا، سەن شىنىمەن دە ۇلىسىڭ+. ساعان تەڭ كەلەر ەشكىم جوق+، وزگە قۇداي دا جوق+. ەستىگەندەرىمىزدىڭ ٴبارى وسىنى دالەلدەپ وتىر.
23 جەر بەتىندە سەنىڭ حالقىڭ يسرايل سياقتى وزگە حالىق بار ما+؟! ۋا، قۇداي، سەن ونى مەنشىكتى حالقىڭ ەتۋ ٷشىن قۇنىن وتەۋگە بارىپ+، ۇلى دا ايبىندى ىستەرىڭ ارقىلى+ ەسىمىڭنىڭ داڭقىن ارتتىردىڭ+. ٶزىڭ مىسىردان قۇنىن وتەپ العان حالقىڭ ٷشىن وزگە حالىقتار مەن ولاردىڭ تاڭىرلەرىن قۋىپ تاستادىڭ.
24 يسرايلدى ماڭگىلىككە مەنشىكتى حالقىڭ ەتتىڭ+. ۋا، ەحوبا، سەن ولاردىڭ قۇدايى بولدىڭ+.
25 ال ەندى، قۇدايىم ەحوبا، قۇلىڭ مەن ونىڭ اۋلەتىنە قاتىستى ايتقان ۋادەڭدى ماڭگىلىككە بەكىتشى. بەرگەن ۋادەڭدى تاپ ٶزىڭ ايتقانداي جۇزەگە اسىرا كور+.
26 سەنىڭ ەسىمىڭ ماڭگى اسقاقتاي بەرسىن+! حالىقتار «يسرايلدىڭ قۇدايى — اسكەرباسى ەحوبا!» دەيتىندەي بولسىن. قۇلىڭ ٴداۋىتتىڭ اۋلەتى دە الدىڭدا نىق تۇرسىن+.
27 ۋا، يسرايلدىڭ قۇدايى اسكەرباسى ەحوبا، «سەنىڭ اۋلەتىڭدى پاتشا اۋلەتى ەتەمىن» دەپ اشىق ٴبىلدىردىڭ+. سول سەبەپتى دە قۇلىڭنىڭ وسىلاي دۇعا ەتۋگە باتىلى بارىپ وتىر.
28 الەمنىڭ ٵمىرشىسى ەحوبا، سەن شىنايى قۇدايسىڭ، سوزدەرىڭ دە شىنايى*+. سەن قۇلىڭا وسى يگىلىكتەردى ورىنداۋدى ۋادە ەتتىڭ.
29 ال ەندى قۇلىڭنىڭ اۋلەتى الدىڭدا ماڭگى تۇرۋ ٷشىن باتاڭدى بەرە كور+. سەبەبى سەن، ۋا، الەمنىڭ ٵمىرشىسى ەحوبا، ۋادە ەتتىڭ، ٵرى قۇلىڭنىڭ اۋلەتىن ماڭگى باقي جارىلقاي بەرگەيسىڭ+».