شەجىرەلەر 2-جازبا 24:1—27
24 جوعاس پاتشا بولعاندا جەتى جاستا ەدى+. ول يەرۋساليمدە 40 جىل بيلىك قۇردى. ونىڭ اناسى بەر-شەبالىق سيبيا بولاتىن+.
2 ٴدىني قىزمەتكەر ەحودايدىڭ كوزى تىرىسىندە جوعاس ەحوبانىڭ الدىندا ۇنامدى ارەكەت ەتىپ ٴجۇردى+.
3 ەحوداي وعان ەكى ايەل الىپ بەردى. ايەلدەرى جوعاسقا ۇل-قىزدار تۋىپ بەردى.
4 ٴبىراز ۋاقىت وتە جوعاستىڭ جۇرەگىندە ەحوبانىڭ ٷيىن جوندەۋگە دەگەن ىقىلاس پايدا بولدى+.
5 سودان ول ٴدىني قىزمەتكەرلەر مەن لەۋىلىكتەردى جيناپ الىپ: «جىل سايىن ياھۋدا ەلىنىڭ قالالارىن ارالاپ، قۇدايلارىڭنىڭ ٷيىن جوندەۋ ٷشىن بۇكىل يسرايلدەن اقشا جيناڭدار+. تەزدەتىپ ىسكە كىرىسىڭدەر»،— دەپ تاپسىردى. ٴبىراق ولار ەش اسىقپادى+.
6 سوندىقتان پاتشا جوعارعى ٴدىني قىزمەتكەر ەحودايدى شاقىرىپ الىپ بىلاي دەدى+: «نەگە ٴسىز لەۋىلىكتەردەن ياھۋدا مەن يەرۋساليم حالقىنان قاسيەتتى سالىق جيناۋدى تالاپ ەتپەيسىز؟ كەزىندە ەحوبانىڭ قىزمەتشىسى مۇسا كۋالىك ساندىعى تۇرعان شاتىرعا+ ارناپ يسرايل قاۋىمىنان قاسيەتتى سالىق جيناۋدى تاپسىرعان ەدى عوي+.
7 الگى زۇلىم ايەل اتاليانىڭ+ ۇلدارى شىنايى قۇدايدىڭ ۇيىنە بۇزىپ كىرىپ، ەحوبانىڭ ۇيىندەگى+ كيەلى زاتتاردىڭ ٴبارىن ۇرلاپ اكەتىپ، باعالدارعا تابىنۋ ٷشىن قولدانعان جوق پا ەدى؟!»
8 سوندا ولار پاتشانىڭ بۇيىرۋىمەن جاشىك+ جاساپ، ونى ەحوبانىڭ ٷيىنىڭ قاقپاسىنىڭ سىرتىنا قويدى+.
9 بۇدان كەيىن كۇللى ياھۋدا ەلى مەن يەرۋساليم قالاسىندا ەحوباعا ارناپ قاسيەتتى سالىق+ تولەۋگە قاتىستى جارلىق شىقتى. بۇل سالىقتى كەزىندە شىنايى قۇدايدىڭ قىزمەتشىسى مۇسا ٴشول دالادا جۇرگەن يسرايل حالقى ٷشىن بەكىتكەن ەدى.
10 بۇعان بارلىق بەكزادالار دا، جۇرت تا قۋاندى+. ولار جاشىك تولعانشا، اكەلگەن ساداقالارىن سالا بەردى*.
11 لەۋىلىكتەر ٶز ۋاقىتىندا جاشىكتى پاتشاعا تابىستايتىن. ولار اقشانىڭ جينالىپ قالعانىن كورگەندە، پاتشانىڭ حاتشىسى مەن جوعارعى ٴدىني قىزمەتكەردىڭ كومەكشىسى كەلىپ، جاشىكتى بوساتىپ+، قايتادان ورنىنا اپارىپ قوياتىن. ولار كۇن سايىن وسىلاي ەتەتىن. وسىلاي كوپ اقشا جينالدى.
12 سوسىن پاتشا مەن ەحوداي اقشانى ەحوبانىڭ ۇيىندەگى جوندەۋ جۇمىستارىنىڭ باقىلاۋشىلارىنا بەرەتىن. ولار بولسا ەحوبانىڭ ۇيىندە جوندەۋ جۇمىستارىن جۇرگىزەتىن تاس قاشاۋشىلار مەن شەبەرلەر جالدايتىن+. سونداي-اق باقىلاۋشىلار ەحوبانىڭ ۇيىندەگى جوندەۋ ىسىنە تەمىر جانە مىس ۇستالارىن دا جالدايتىن.
13 وسىلاي جوندەۋ جۇمىستارىنىڭ باقىلاۋشىلارى ىسكە كىرىسىپ، جۇمىس العا باستى. ولار شىنايى قۇدايدىڭ ٷيىن بەكىتىپ، بۇرىنعى قالپىنا كەلتىردى.
14 جوندەۋ جۇمىستارى اياقتالعان سوڭ، ولار قالعان اقشانى پاتشا مەن ەحودايعا اكەلىپ بەردى. ول ەكەۋى بۇل اقشانى ەحوبانىڭ ۇيىندەگى قىزمەت كەزىندە، ياعني قۇرباندىق شالىنعاندا، قولدانىلاتىن بۇيىمدار جاساۋعا، سونداي-اق توستاعاندار، باسقا دا التىن-كۇمىس بۇيىمدار جاساۋعا جۇمسادى+. ەحودايدىڭ كوزى تىرىسىندە ەحوبانىڭ ۇيىندە ۇزبەي تۇگەل ورتەلەتىن قۇرباندىق شالىنىپ تۇردى+.
15 ەحوداي ەگدە تارتىپ، قاناعاتتاندىرارلىق ٶمىر كەشىپ، 130 جاسىندا كوز جۇمدى.
16 يسرايل حالقىنا جانە شىنايى قۇداي مەن ونىڭ ۇيىنە قاتىستى جاساعان ىزگىلىگى ٷشىن+، ەحودايدىڭ سۇيەگى ٴداۋىتتىڭ قالاسىنداعى پاتشالار قابىرىنىڭ بىرىنە قويىلدى+.
17 ەحوداي ولگەن سوڭ، پاتشاعا ياھۋدا بەكزادالارى كەلىپ، ٴيىلىپ تاعزىم ەتتى، پاتشا ولارعا قۇلاق استى.
18 سودان حالىق اتا-بابالارىنىڭ قۇدايى ەحوبانىڭ ٷيىن تاستاپ، قاسيەتتى باعانالار* مەن پۇتتارعا تابىنا باستادى. وسى كۇنالارى ٷشىن ياھۋدا مەن يەرۋساليم حالقىنا قۇدايدىڭ قاھارى قاينادى.
19 ەحوبا ولاردى وزىنە قايتارۋ ٷشىن پايعامبارلارىن جىبەرىپ وتىردى. پايعامبارلار تالاي رەت ەسكەرتكەنىمەن، ولار قۇلاق اسۋدان باس تارتتى+.
20 ەحوداي ۇلى+ زاكارياعا قۇداي رۋحى قونىپ، ول حالىقتىڭ الدىندا تۇرىپ: «شىنايى قۇداي مىنانى ايتادى: —نەگە سەندەر ەحوبانىڭ وسيەتتەرىن اياقاستى ەتەسىڭدەر؟ بۇدان ىستەرىڭ العا باسپايدى. سەندەر ەحوبادان باس تارتتىڭدار، ەندى ول دا سەندەردەن باس تارتادى»+،— دەدى.
21 ٴبىراق ولار زاكارياعا قارسى ٴسوز بايلاسىپ+، پاتشانىڭ بۇيىرۋىمەن ونى ەحوبانىڭ ٷيىنىڭ اۋلاسىندا تاسپەن اتقىلاپ ٶلتىردى+.
22 وسىلاي جوعاس پاتشا ونىڭ اكەسى ەحودايدىڭ وزىنە تانىتقان اينىماس سۇيىسپەنشىلىگىن ۇمىتىپ، ونىڭ ۇلىن ٶلتىرتتى. زاكاريا بولسا ولەر الدىندا: «ەحوبا ىستەگەن ىستەرىڭ ٷشىن جاۋاپقا تارتسىن+!»— دەدى.
23 جىلدىڭ باسىندا سيريا اسكەرى جوعاسقا قارسى اتتانىپ، ياھۋدا ەلى مەن يەرۋساليمگە باسىپ كىردى+. ولار ەلدەگى بەكزادالاردىڭ+ ٴبارىن ٶلتىرىپ تاستادى، ال توناپ العان ولجانى داماسك پاتشاسىنا جىبەردى.
24 حالىق اتا-بابالارىنىڭ قۇدايى ەحوبانى تاستاپ كەتكەندىكتەن، سيريالىقتار ەلدى جاۋلاپ الۋعا از اسكەرمەن كەلسە دە، ەحوبا ياھۋدانىڭ قالىڭ اسكەرىن ولاردىڭ ۋىسىنا سالىپ بەردى+. وسىلاي سيريالىقتار جوعاسقا شىعارىلعان ۇكىمدى جۇزەگە اسىردى.
25 ولار كەتكەندە، پاتشا قاتتى جارالى بولىپ جاتتى*. سوندا ٴدىني قىزمەتكەر ەحودايدىڭ ۇلدارىنىڭ*+ قانىن توككەنى ٷشىن، جوعاستىڭ ٶز قىزمەتشىلەرى وعان قارسى ٴسوز بايلاسىپ، توسەكتە جاتقان جەرىندە ٶلتىرىپ كەتتى+. پاتشانىڭ دەنەسىن ولار ٴداۋىتتىڭ قالاسىندا جەرلەدى+، ٴبىراق پاتشالار قابىرىنە قويمادى+.
26 وعان قارسى ٴسوز بايلاسقاندار+ امموندىق ايەل شيماتتىڭ ۇلى زاباد جانە موابتىق ايەل ٴشيمريتتىڭ ۇلى ەحوزاباد ەدى.
27 جوعاستىڭ ۇلدارى جانە وعان قارسى ايتىلعان ۇكىمدەر+ جايلى، سونداي-اق ونىڭ شىنايى قۇدايدىڭ ٷيىن قالاي جوندەگەنى+ تۋرالى پاتشالار تۋرالى جازبالاردا باياندالعان. جوعاستان كەيىن ونىڭ ۇلى امازياح پاتشا بولدى.
سىلتەمەلەر
^ مۇمكىن: «ولاردىڭ ٴبارى اكەلگەن اقشالارىن سالىپ بولعانشا، ساداقا جاسالا بەردى».
^ تۇسىندىرمەدەگى «قاسيەتتى اعاش باعانانى» قاراڭىز.
^ نەمەسە «كوپ دەرتكە شالدىعىپ، اۋىرىپ جاتتى».
^ نەمەسە «ۇلىنىڭ». كوپتىك جالعاۋ زاكاريانىڭ مارتەبەسى جوعارى بولعانىن كورسەتۋ ٷشىن قولدانىلعان بولسا كەرەك.
