شەجىرەلەر 2-جازبا 29:1—36
29 ەزەكيا+ 25 جاسىندا پاتشا بولىپ، يەرۋساليمدە 29 جىل بيلىك ەتتى. ونىڭ اناسى زاكاريانىڭ قىزى ٵبياح بولاتىن+.
2 ەزەكيا تاپ ارعى اتاسى ٴداۋىت سياقتى، ەحوبانىڭ الدىندا+ ۇنامدى ىستەر ىستەدى+.
3 بيلىك قۇرۋىنىڭ ٴبىرىنشى جىلىنىڭ ٴبىرىنشى ايىندا ول ەحوبانىڭ ٷيىنىڭ ەسىكتەرىن اشىپ، ولاردى جوندەدى+.
4 بۇدان كەيىن ٴدىني قىزمەتكەرلەر مەن لەۋىلىكتەردى شاقىرتىپ الىپ، ولاردى ٷيدىڭ شىعىس جاعىنداعى الاڭعا جينادى.
5 پاتشا ولارعا بىلاي دەدى: «لەۋىلىكتەر، سوزىمە قۇلاق سالىڭدار! ٴبارىڭ تازارۋ راسىمىنەن وتىڭدەر*+، اتا-بابالارىڭنىڭ قۇدايى ەحوبانىڭ ٷيىن دە كيەلى ەتىڭدەر. سوسىن كيەلى ورىننان ارام نارسەنىڭ ٴبارىن شىعارىپ تاستاڭدار+!
6 ٴبىزدىڭ اكەلەرىمىز وپاسىزدىق جاسادى، قۇدايىمىز ەحوباعا ۇنامسىز ىستەر ىستەدى+. ولار ونى تاستاپ كەتتى، ەحوبانىڭ كيەلى شاتىرىنان جۇزدەرىن بۇرىپ، قۇدايلارىنان تەرىس اينالدى+.
7 ولار كيەلى ٷيدىڭ كىرەبەرىسىنىڭ ەسىكتەرىن+ بەكىتىپ تاستادى، شامدار+ دا ٴسوندىرىلدى. عيباداتحانادا يسرايلدىڭ قۇدايىنا ارناپ حوش ٴيىستى زاتتار تۇتەتىپ+، تۇگەل ورتەلەتىن قۇرباندىقتار+ شالۋدى دا دوعاردى.
8 سوندىقتان ياھۋدا مەن يەرۋساليم ەحوبانىڭ قاھارىنا ۇشىرادى+. وزدەرىڭ كورىپ تۇرعانداي، قۇداي ولاردى كورگەن ادام ۇرەيى ۇشىپ، اڭتارىلا ىسقىراتىنداي قورقىنىشتى كۇيگە ٴتۇسىردى+.
9 قاراڭدارشى، اتا-بابالارىمىز سەمسەردەن قازا بولدى+، ال ۇل-قىزدارىمىز بەن ايەلدەرىمىز تۇتقىنعا ايدالدى+.
10 ال ەندى يسرايلدىڭ قۇدايى ەحوبانىڭ لاۋلاعان قاھارىن باسۋ ٷشىن، مەن ونىمەن كەلىسىم جاساسۋدى بار جۇرەگىممەن قالاپ وتىرمىن+.
11 بالالارىم، قازىر نەمقۇرايدى بولاتىن كەز ەمەس. ەحوبا سەندەردى الدىندا تۇرىپ، وزىنە قىزمەت ەتىپ+، قۇرباندىق ٴتۇتىنىن تۇتەتۋلەرىڭ ٷشىن تاڭداپ الدى ەمەس پە+؟!»
12 سوندا مىنا لەۋىلىكتەر مىندەتتەرىن اتقارۋعا كىرىستى: قاحاتتىقتاردان+ عاماساي ۇلى ماحات پەن ازارياح ۇلى جوەل؛ مەراريلىكتەردەن+ ٵبدي ۇلى قيش پەن ەحالەلەل ۇلى ازارياح؛ گەرشوندىقتاردان+ زيمما ۇلى جوۋاح پەن جوۋاح ۇلى ەدەم؛
13 ەلساپان ۇلدارىنان شيمري مەن ەيەل؛ اساپ ۇلدارىنان+ زاكاريا مەن ماتانياح؛
14 حەمان ۇلدارىنان+ ەحيەل مەن شيمەي؛ ەدۋتۋن ۇلدارىنان+ شەماياح پەن ۇزيەل.
15 وسى لەۋىلىكتەر باۋىرلارىن جيناپ الىپ، تازارۋ راسىمىنەن ٶتتى دە، ەحوبا ايتقانداي، پاتشانىڭ بۇيىرۋىمەن ەحوبانىڭ ٷيىن تازارتۋعا كىرىستى+.
16 ٴدىني قىزمەتكەرلەر ەحوبانىڭ ٷيىن تازارتۋ ٷشىن، ونىڭ ىشىنە كىرىپ، ەحوبانىڭ عيباداتحاناسىنداعى ارام نارسەلەردىڭ ٴبارىن ەحوبانىڭ ٷيىنىڭ اۋلاسىنا+ شىعاردى. ال لەۋىلىكتەر ولاردى الىپ، قيدرون اڭعارىنا+ اپارىپ تاستادى.
17 ولار تازارتۋدى ٴبىرىنشى ايدىڭ ٴبىرىنشى كۇنى باستاپ سەگىزىنشى كۇنى ەحوبانىڭ ٷيىنىڭ كىرەبەرىسىنە+ جەتتى. سوسىن ەحوبانىڭ ٷيىن كيەلى ەتۋگە سەگىز كۇن جۇمساپ، ٴبىرىنشى ايدىڭ ون التىنشى كۇنى جۇمىستارىن اياقتادى.
18 بۇدان كەيىن ولار ەزەكيا پاتشاعا بارىپ، بىلاي دەدى: «ٴبىز ەحوبانىڭ ٷيىن، قۇرباندىق ورتەيتىن وشاق+ پەن بارلىق قۇرال-سايماندارىن+، نان تارتۋى قويىلاتىن ۇستەلدەر+ مەن بارلىق ىدىستارىن تۇگەل تازارتىپ شىقتىق.
19 احاز پاتشا بيلىك قۇرىپ وتىرعانىندا وپاسىزدىق جاساپ، مەنسىنبەي شىعارىپ تاستاعان بۇيىمداردى+ دا دايارلاپ، كيەلى ەتتىك+. قازىر ولار ەحوبانىڭ قۇرباندىق وشاعىنىڭ الدىنا قويىلدى».
20 ەزەكيا پاتشا ەرتە تۇرىپ، قالاداعى بارلىق بەكزادالاردى جيناپ الدى دا، ٴبارى ەحوبانىڭ ۇيىنە ورلەپ باردى.
21 ولار كۇنا ٷشىن بەرىلەتىن قۇرباندىق رەتىندە پاتشالىق ٷشىن، عيباداتحانا ٷشىن جانە ياھۋدا حالقى ٷشىن جەتى بۇقا، جەتى قوشقار، جەتى ەركەك توقتى جانە جەتى تەكە اكەلدى+. سوسىن پاتشا حاروننىڭ ۇرپاقتارىنان تاراعان ٴدىني قىزمەتكەرلەرگە اكەلىنگەن مالدى ەحوبانىڭ قۇرباندىق وشاعىندا قۇرباندىققا شالۋدى تاپسىردى.
22 الدىمەن ٴدىني قىزمەتكەرلەر ٸرى قارا مالدى شالىپ+، قانىن وشاقتىڭ ۇستىنە بۇركىدى+. سوسىن قوشقارلاردى شالىپ، قانىن وشاقتىڭ ۇستىنە بۇركىدى. بۇدان كەيىن ەركەك توقتىلاردى شالىپ، ولاردىڭ دا قانىن وشاقتىڭ ۇستىنە بۇركىدى.
23 سوسىن كۇنا ٷشىن ۇسىنىلعان تەكەلەردى پاتشا مەن جاماعاتتىڭ الدىنا اكەلىپ، ۇستەرىنە قولدارىن قويدى.
24 ولار بۇكىل يسرايلدىڭ كۇناسىن وتەۋ ٷشىن، تەكەلەردى قۇرباندىققا شالىپ، قانىن كۇنا ٷشىن شالىناتىن قۇرباندىق رەتىندە وشاققا بۇركىدى. ويتكەنى پاتشا تۇگەل ورتەلەتىن جانە كۇنا ٷشىن اكەلىنەتىن قۇرباندىقتى بۇكىل يسرايل حالقى ٷشىن شالۋدى تاپسىرعان بولاتىن.
25 بۇل ۋاقىتتا لەۋىلىكتەر ەحوبانىڭ ٷيىنىڭ الدىندا جەز تاباقشالار، ىشەكتى اسپاپتار جانە ارفالار+ ۇستاپ تۇردى. بۇل ٴداۋىتتىڭ+ جانە پاتشانىڭ ايان الاتىن پايعامبارى عادتىڭ+، سونداي-اق ناتان پايعامباردىڭ+ وسيەتىنە ساي ىستەلدى. ويتكەنى ەحوبا پايعامبارلارى ارقىلى وسىنى وسيەت ەتكەن ەدى.
26 وسىلاي لەۋىلىكتەر ٴداۋىتتىڭ ىشەكتى اسپاپتارىن، ال ٴدىني قىزمەتكەرلەر كەرنەيلەر ۇستاپ تۇردى+.
27 سوندا ەزەكيا وشاقتا تۇگەل ورتەلەتىن قۇرباندىق+ شالىنسىن دەپ بۇيىردى. قۇرباندىق شالىنا باستاعاندا، ەحوباعا ارنالعان ٵن دە باستالدى. يسرايل پاتشاسى ٴداۋىتتىڭ اسپاپتارىنا ۇيلەستىرىلىپ كەرنەي دە تارتىلدى.
28 تۇگەل ورتەلەتىن قۇرباندىق شالىنىپ بىتكەنشە، ٵن ايتىلىپ، كەرنەي تارتىلىپ جاتتى. ال بۇكىل جاماعات تاعزىم ەتۋمەن بولدى.
29 قۇرباندىق شالىنىپ بىتكەندە، پاتشا مەن ونىڭ قاسىنداعىلاردىڭ ٴبارى جەرگە جىعىلا كەتىپ، تاعزىم ەتتى.
30 ەزەكيا پاتشا مەن بەكزادالار لەۋىلىكتەرگە ەحوبانى ٴداۋىت+ پەن ايان الۋشى اساپتىڭ+ جىرلارىمەن دارىپتەۋدى تاپسىردى. سوندا ولار زور قۋانىشپەن ماداق ايتتى دا، جەرگە دەيىن ٴيىلىپ تاعزىم ەتتى.
31 بۇدان كەيىن ەزەكيا: «ەندى سەندەر ەحوباعا ارنالعان قاسيەتتى قىزمەت اتقاراسىڭدار. ەحوبانىڭ ۇيىنە كەلىپ، ريزاشىلىق قۇرباندىقتارى مەن باسقا دا قۇرباندىقتار ۇسىنىڭدار»،— دەدى. مۇنى ەستىگەن جاماعات ريزاشىلىق قۇرباندىقتارى مەن باسقا دا قۇرباندىقتار اكەلە باستادى. اركىم جۇرەك قالاۋىنا قاراي تۇگەل ورتەلەتىن قۇرباندىقتار اكەلىپ جاتتى+.
32 كۇللى جاماعات تۇگەل ورتەلەتىن قۇرباندىق رەتىندە ەحوباعا ارناپ 70 ٸرى قارا مال، 100 قوشقار، 200 ەركەك توقتى شالدى+.
33 ال قاسيەتتى قۇرباندىق رەتىندە 600 ٸرى قارا جانە 3000 ۇساق مال اكەلدى.
34 ٴبىراق تۇگەل ورتەلەتىن قۇرباندىقتاردىڭ تەرىسىن سىدىراتىن ٴدىني قىزمەتكەرلەر جەتىسپەدى. سوندىقتان جۇمىس بىتكەنشە، ٵرى باسقا ٴدىني قىزمەتكەرلەر تازارۋ راسىمىنەن وتكەنشە+، ولارعا لەۋىلىك باۋىرلارى كومەكتەستى+. ويتكەنى لەۋىلىكتەر ٴدىني قىزمەتكەرلەرگە قاراعاندا، تازارۋ ٴراسىمىن قۇلشىنا اتقاراتىن.
35 سونىمەن، تۇگەل ورتەلەتىن قۇرباندىق+، تاتۋلىق قۇرباندىعىنىڭ مايى+ جانە سۇيىق تارتۋ+ كوپتەپ ۇسىنىلدى. وسىلاي ەحوبانىڭ ۇيىندەگى قىزمەت قالپىنا كەلتىرىلدى.
36 ەزەكيا مەن كۇللى حالىق شىنايى قۇدايدىڭ ٶز حالقى ٷشىن جاساعان ىستەرىنە+ قاتتى قۋاندى. ويتكەنى مۇنىڭ ٴبارى اياقاستىنان جاسالعان بولاتىن.
سىلتەمەلەر
^ سوزبە-ٴسوز «وزدەرىڭدى قاسيەتتى ەتىڭدەر». تۇسىندىرمەدەگى «قاسيەتتى» ٴسوزىن قاراڭىز.
