شەجىرەلەر 2-جازبا 30:1—27
-
ەزەكيانىڭ قۇتقارىلۋ مەيرامىن تويلاۋى (1—27)
30 ەزەكيا بۇكىل يسرايل+ مەن ياھۋدا ەلىنە حابارشىلار جىبەردى. ول ٴتىپتى ەفرەم جانە ماناسا رۋلارىنا+ حات جازىپ، يسرايلدىڭ قۇدايى ەحوباعا ارنالعان قۇتقارىلۋ مەيرامىن*+ تويلاۋ ٷشىن يەرۋساليمدەگى ەحوبانىڭ ۇيىنە كەلۋگە شاقىردى.
2 پاتشا مەن ونىڭ بەكزادالارى، سونداي-اق يەرۋساليمدەگى بۇكىل جاماعات اقىلداسىپ، قۇتقارىلۋ مەيرامىن ەكىنشى ايدا وتكىزۋدى شەشتى+.
3 ويتكەنى تازارۋ راسىمىنەن وتكەن* ٴدىني قىزمەتكەرلەر جەتكىلىكسىز بولعاندىقتان+، ٵرى جۇرت يەرۋساليمگە جينالىپ ۇلگەرمەگەندىكتەن ولار مەيرامدى ٶز ۋاقىتىندا+ وتكىزە المادى.
4 مۇنداي شەشىمدى پاتشا دا، كۇللى جاماعات تا دۇرىس كوردى.
5 سونىمەن، ولار جۇرت يەرۋساليمگە كەلىپ، يسرايلدىڭ قۇدايى ەحوباعا ارناپ قۇتقارىلۋ مەيرامىن وتكىزۋ ٷشىن، بەر-شەبادان دانعا+ دەيىن، بۇكىل يسرايل ەلىنە حابار جىبەرۋدى شەشتى. سەبەبى بۇعان دەيىن جۇرت، زاڭ كىتابىندا جازىلعانداي، مەرەكەنى ٴبارى بىرىگىپ وتكىزبەگەن ەدى+.
6 سودان شابارماندار پاتشا مەن ونىڭ بەكزادالارىنىڭ حاتتارىن الىپ، بۇكىل يسرايل مەن ياھۋدا ەلىن ارالاۋعا كىرىستى. پاتشا بىلاي دەدى: «ۋا، يسرايل حالقى! ىبىرايىمنىڭ، ىسقاقتىڭ جانە يسرايلدىڭ قۇدايى ەحوباعا قايتا بەت بۇرىڭدار! سوندا ول اسسيريا پاتشاسىنىڭ+ قولىنان امان قالعان تامتىققا قايتا بەت بۇرادى.
7 اتا-بابالارىڭ مەن باۋىرلارىڭ سياقتى بولماڭدار! ولار اتا-بابالارىنىڭ قۇدايى ەحوباعا وپاسىزدىق جاساعان ەدى. سوندىقتان، وزدەرىڭ كورىپ وتىرعانداي، قۇداي ولاردى قورقىنىشتى كورىنىسكە اينالدىردى+.
8 ەندى سولارعا ۇقساپ قىڭىر بولماي+، قايتا، ەحوباعا مويىنسۇنىڭدار. ونىڭ ماڭگىلىككە كيەلى ەتكەن عيباداتحاناسىنا+ كەلىپ، قۇدايلارىڭ ەحوباعا قىزمەت ەتىڭدەر. سوندا ونىڭ لاۋلاعان قاھارى باسىلادى+.
9 ەگەر سەندەر ەحوباعا بەت بۇرساڭدار، باۋىرلارىڭ مەن ۇلدارىڭدى تۇتقىنعا ايداپ اكەتكەندەر ولارعا مەيىرىم تانىتىپ+، مىنا ەلگە قايتارادى+. ويتكەنى قۇدايلارىڭ ەحوبا جاناشىر ٵرى مەيىرىمدى+. سەندەر وعان بەت بۇرساڭدار، ول سەندەردەن تەرىس اينالمايدى+».
10 شابارماندار وسىنداي حابارمەن ەفرەم جانە ماناسا رۋلارىنىڭ+ قالالارىن ارالاپ، ٴتىپتى زابۋلون جەرىنە دەيىن جەتتى. ٴبىراق جۇرت ولاردى كۇلكى ەتىپ، كەلەكە-مازاق قىلدى+.
11 سويتسە دە اشير، ماناسا جانە زابۋلون رۋلارىنىڭ كەيبىر ادامدارى كىشىپەيىلدىلىك تانىتىپ، يەرۋساليمگە كەلدى+.
12 شىنايى قۇداي ياھۋدا ەلىنە دە جار بولىپ، ولاردى پاتشا مەن بەكزادالاردىڭ ەحوبانىڭ سوزىنە ساي بەرگەن بۇيرىعىن ورىنداۋعا ٴبىر كىسىدەي جۇمىلدىردى.
13 وسىلاي ەكىنشى ايدا+ يەرۋساليمگە كوپ ادام جينالىپ، اشىماعان نان مەيرامىن+ وتكىزۋگە دايىندالىپ جاتتى. جينالعان جۇرت وتە كوپ بولدى.
14 ولار يەرۋساليمدەگى جالعان تاڭىرلەرگە ارنالعان قۇرباندىق ورىندارى+ مەن حوش ٴيىستى زات تۇتەتەتىن ۇستەلدەردىڭ ٴبارىن قيراتىپ+، قيدرون اڭعارىنا اپارىپ، لاقتىرىپ تاستادى.
15 بۇدان كەيىن ولار ەكىنشى ايدىڭ ون ٴتورتىنشى كۇنى قۇتقارىلۋ مەيرامىنا ارنالعان قۇرباندىقتى شالدى. سوندا ٴدىني قىزمەتكەرلەر مەن لەۋىلىكتەر ۇيالىپ، تازارۋ راسىمىنەن ٶتتى دە، ەحوبانىڭ ۇيىنە تۇگەل ورتەلەتىن قۇرباندىقتار اكەلدى.
16 ولار شىنايى قۇدايدىڭ ادامى مۇسانىڭ زاڭىنا ساي، ادەتتەگى ورىندارىندا تۇردى. سوسىن ٴدىني قىزمەتكەرلەر لەۋىلىكتەر اكەلگەن قاندى قۇرباندىق وشاعىنا بۇركىدى+.
17 حالىق اراسىندا تازارۋ راسىمىنەن وتپەگەندەر كوپ ەدى. سوندىقتان ولار ەحوبانىڭ الدىندا تازا بولۋلارى ٷشىن، لەۋىلىكتەرگە سولاردىڭ اتىنان دا قۇتقارىلۋ مەيرامىنا ارنالعان قۇرباندىقتاردى شالۋ تاپسىرىلدى+.
18 جۇرتتىڭ كوبى، اسىرەسە ەفرەم، ماناسا+، يساحار جانە زابۋلون رۋىنان كەلگەندەر، تازارۋ راسىمىنەن وتپەسە دە، مەيرامنىڭ اسىنان جەدى. بۇلارى زاڭعا قايشى ەدى. ٴبىراق ەزەكيا ولار ٷشىن بىلاي دەپ دۇعا ەتتى: «يگىلىگى مول ەحوبا+ كەشىرە كورسىن!
19 كيەلىلىك تالابىنا ساي تازارۋ راسىمىنەن وتپەسە دە، قاسيەتتى مەيرامعا قاتىسىپ جاتقاندار بار+. ولار مۇنى شىنايى قۇداي ەحوبانى، اتا-بابالارىنىڭ قۇدايىن، بار جۇرەگىمەن ىزدەۋگە بەل بۋعاندىقتان+ ىستەپ جاتىر. قۇدايىمىز سولاردىڭ ٴبارىن كەشىرە كورسىن!»
20 ەحوبا ەزەكيانىڭ دۇعاسىنا قۇلاق اسىپ، حالىقتى كەشىردى.
21 وسىلاي يەرۋساليمدەگى يسرايلدىكتەر جەتى كۇن بويى زور قۋانىشپەن+ اشىماعان نان مەيرامىن+ وتكىزدى. ال لەۋىلىكتەر مەن ٴدىني قىزمەتكەرلەر كۇن سايىن ەحوبانى ماداقتاپ، ساز اسپاپتارىمەن بارىن سالىپ ەحوبانى دارىپتەدى+.
22 ەزەكيا ەحوبانىڭ الدىندا قىزمەتتەرىن زەردەلىلىكپەن اتقارىپ جۇرگەن لەۋىلىكتەردىڭ ٴبارىن جىگەرلەندىردى. حالىق جەتى كۇن بويى مەيرامنىڭ اسىن جەپ+، تاتۋلىق قۇرباندىقتارىن شالىپ+، اتا-بابالارىنىڭ قۇدايى ەحوباعا العىستارىن بىلدىرۋمەن بولدى.
23 بۇدان كەيىن كۇللى جاماعات مەيرامدى تاعى جەتى كۇنگە سوزۋدى شەشىپ، سول كۇندەردى قۋانىشپەن وتكىزدى+.
24 ياھۋدا پاتشاسى ەزەكيا جاماعاتقا ارناپ 1000 بۇقا، 7000 قوي، ال بەكزادالار 1000 بۇقا، 10000 قوي بەردى+. بۇل كەزدە كوپتەگەن ٴدىني قىزمەتكەرلەر تازارۋ راسىمىنەن وتكەن ەدى+.
25 وسىلاي ياھۋدا ەلىنىڭ كۇللى جاماعاتى، ٴدىني قىزمەتكەرلەر مەن لەۋىلىكتەر، يسرايل ەلىنەن كەلگەن كۇللى جاماعات+، سونداي-اق يسرايلدەن كەلگەن جانە ياھۋدا ەلىندە تۇرىپ جاتقان جاتجەرلىكتەردىڭ+ قۋانىشىندا شەك بولمادى.
26 يسرايل پاتشاسى ٴداۋىت ۇلى سۇلەيمەننىڭ كەزىنەن بەرى مۇنداي مەيرام بولىپ كورمەگەندىكتەن، يەرۋساليم زور قۋانىشقا تولدى+.
27 سوڭىندا لەۋىلىك ٴدىني قىزمەتكەرلەر حالىققا باتاسىن بەردى+. قۇداي ولاردىڭ داۋىسىن ەستىدى، دۇعالارى ونىڭ تۇراعىنا، كوككە جەتتى.
سىلتەمەلەر
^ تۇسىندىرمەنى قاراڭىز.
^ سوزبە-ٴسوز «وزدەرىن قاسيەتتى ەتكەن». تۇسىندىرمەدەگى «قاسيەتتى» ٴسوزىن قاراڭىز.