لۇقا 20:1—47
20 بىردە يسا عيباداتحانادا جۇرتقا ٴتالىم بەرىپ، ىزگى حاباردى جاريالاپ تۇرعاندا، جوعارعى ٴدىني قىزمەتكەرلەر، ٴدىن مۇعالىمدەرى مەن اقساقالدار كەلىپ:
2 «ايتشى، بۇلاردى قانداي بيلىكپەن ىستەپ ٴجۇرسىڭ؟ مۇنداي بيلىكتى ساعان كىم بەردى؟»— دەدى+.
3 يسا بىلاي جاۋاپ بەردى: «مەن دە سەندەرگە سۇراق قويايىن، سوعان جاۋاپ بەرىڭدەر:
4 جاقيا شومىلدىرۋ ٴراسىمىن جاساۋعا بيلىكتى كوكتەن الدى ما، الدە ادامداردان با؟»
5 ولار ٶزارا بىلاي دەپ پىكىرلەستى: «ەگەر: —كوكتەن،— دەسەك، ول: —وندا نەگە وعان سەنبەدىڭدەر؟— دەيدى.
6 ال: —ادامداردان،— دەسەك، جۇرتتىڭ ٴبارى ٴبىزدى تاس لاقتىرىپ ولتىرەدى. ويتكەنى ولار جاقيانىڭ پايعامبار بولعانىنا سەنەدى+».
7 سوندىقتان ولار مۇنى بىلمەيتىنىن ايتتى.
8 سوندا يسا: «ەندەشە، بۇلاردى قانداي بيلىكپەن ىستەپ جۇرگەنىمدى مەن دە ايتپايمىن»،— دەدى.
9 سوسىن ول حالىققا مىناداي مىسال ايتتى: «ٴبىر كىسى ٴجۇزىم باعىن وتىرعىزىپتى+. سودان ونى جۇزىمشىلەرگە جالعا بەرىپ، ٶزى ۇزاق ۋاقىتقا باسقا ەلگە ساپارعا اتتانادى+.
10 مەرزىمى جەتكەندە ول ونىمنەن ٶز ۇلەسىن الۋ ٷشىن جۇزىمشىلەرگە ٴبىر قۇلىن جۇمسايدى. ٴبىراق ولار ونى ۇرىپ-سوعىپ، قۇرالاقان قايتارادى+.
11 جۇزىمدىك يەسى باسقا ٴبىر قۇلىن جۇمسايدى. ولار ونى دا ۇرىپ-سوعىپ، قورلاپ، قۇرالاقان جىبەرەدى.
12 ول ٷشىنشىسىن جۇمسايدى. جۇزىمشىلەر ونى دا جاراقاتتاپ، قۋىپ جىبەرەدى.
13 سوندا جۇزىمدىك يەسى: —نە ىستەسەم ەكەن؟ ٶزىمنىڭ سۇيىكتى ۇلىمدى جىبەرەيىن+. مۇمكىن، ۇلىمدى سيلار،— دەيدى.
14 جۇزىمشىلەر ونى كورگەندە، ٶزارا اقىلداسىپ: —بۇل — مۇراگەر عوي! جۇرىڭدەر، ونى ولتىرەيىك، سوندا مۇراسى بىزدىكى بولادى،— دەسەدى.
15 ونى جۇزىمدىك سىرتىنا سۇيرەپ شىعارىپ، ٶلتىرىپ تاستايدى+. ەندى جۇزىمدىك يەسى ولارعا نە ىستەيدى؟
16 ول كەلىپ، جۇزىمشىلەردىڭ كوزىن قۇرتادى دا، جۇزىمدىگىن باسقالارعا بەرەدى».
بۇنى ەستىگەندەر: «مۇندايدىڭ بەتىن اۋلاق قىلسىن!»— دەستى.
17 يسا ولارعا تىكە قاراپ، بىلاي دەدى: «وندا جازباداعى «قۇرىلىسشىلار باس تارتقان تاس نەگىزگى بۇرىشتىق تاسقا* اينالدى»+ دەگەن سوزدەر نەنى بىلدىرەدى؟
18 وسى تاسقا قۇلاعان اركىم پارشا-پارشا بولادى+، ال ۇستىنە وسى تاس تۇسكەن ادام جانشىلىپ قالادى».
19 ٴدىن مۇعالىمدەرى مەن جوعارعى ٴدىني قىزمەتكەرلەر بۇل مىسالدىڭ وزدەرىنە قاتىستى ايتىلعانىن ٴتۇسىنىپ، يسانى سول ساتتە ۇستاپ الماق بولدى، ٴبىراق حالىقتان قورىقتى+.
20 ونى مۇقيات باقىلاعان سوڭ، ولار يسانى ۇكىمەت باسىنداعى ٵمىرشىنىڭ بيلىگىنە تاپسىرۋ ٷشىن، بىرەۋلەردى جاسىرىن جالدادى. بۇلار وزدەرىن ٵدىل ەتىپ كورسەتىپ، ونى سوزدەن ۇستاپ بەرمەك بولدى+.
21 ٴسۇيتىپ، وعان مىناداي سۇراق قويدى: «ۇستاز، ٴبىز ٴسىزدىڭ ٴسوزىڭىزدىڭ دە، ٴتالىمىڭىزدىڭ دە دۇرىس ەكەنىن، ەشكىمدى الالامايتىنىڭىزدى جانە شىنىمەن قۇداي جولىنا ۇيرەتەتىنىڭىزدى بىلەمىز.
22 ايتىڭىزشى، پاتشاعا* الىم-سالىق تولەۋ زاڭدى ما، جوق پا؟»
23 ٴبىراق يسا ولاردىڭ ارام ويلارىن ٴبىلىپ:
24 «ماعان ديناردى كورسەتىڭدەرشى. مىنا سۋرەت پەن جازۋ كىمدىكى؟»— دەپ سۇرادى. ولار: «پاتشانىكى»،— دەگەندە،
25 يسا: «ەندەشە، پاتشانىكىن پاتشاعا+، ال قۇدايدىكىن قۇدايعا بەرىڭدەر»+،— دەدى.
26 وسىلاي ولار ونى ەل الدىندا سوزىنەن ۇستاي المادى. قايتا، جاۋابىنا اڭ-تاڭ بولىپ، ٷنسىز قالدى.
27 ٴبىراق وعان قايتا تىرىلۋگە سەنبەيتىن ساددۋكەيلەر*+ كەلىپ، مىناداي سۇراق قويدى+:
28 «ۇستاز، مۇسا بىزگە ەگەر ۇيلەنگەن بىرەۋ ارتىندا بالا قالدىرماي ولسە، وندا باۋىرى ونىڭ جەسىرىنە ۇيلەنىپ، مارقۇمنىڭ ۇرپاعىن جالعاستىرۋى كەرەكتىگىن جازعان بولاتىن+.
29 جەتى اعايىندى بار ەدى. سولاردىڭ ۇلكەنى ۇيلەنىپ، ارتىندا بالا قالدىرماي ٶلدى.
30 جەسىرىنە ەكىنشىسى،
31 سوسىن ٷشىنشىسى ۇيلەندى. وسىلاي وعان جەتەۋى دە ۇيلەنىپ، ارتتارىندا بالا قالدىرماي، ٴبارى دە كوز جۇمدى.
32 سوڭىندا ايەلدىڭ ٶزى دە دۇنيە سالدى.
33 ولاي بولسا، ولگەندەر قايتا تىرىلگەندە، ول كىمنىڭ ايەلى بولادى؟ وعان جەتەۋى دە ۇيلەنگەن ەدى عوي».
34 يسانىڭ جاۋابى مىناۋ بولدى: «وسى زاماننىڭ* ادامدارى ۇيلەنەدى، كۇيەۋگە شىعادى.
35 ال كەلەر زاماندا ٶمىر سۇرۋگە جانە ولىمنەن قايتا تىرىلۋگە لايىق بولعاندار ۇيلەنبەيدى دە، كۇيەۋگە دە شىقپايدى+.
36 ولار پەرىشتەلەر ىسپەتتى بولادى، سوندىقتان ەشقاشان ولمەيدى. سونداي-اق ولىمنەن قايتا تىرىلەتىندىكتەن قۇدايدىڭ بالالارى بولادى.
37 ٴتىپتى مۇسا پايعامبار تىكەندى بۇتا تۋرالى اڭگىمەدە ەحوبانى «ىبىرايىم، ىسقاق جانە جاقىپتىڭ قۇدايى» دەپ اتاۋىمەن ولگەندەردىڭ قايتا تىرىلەتىنىن ايتقان+.
38 ول — ولگەندەردىڭ ەمەس، تىرىلەردىڭ قۇدايى. ويتكەنى ول ٷشىن ٴبارى ٴتىرى+».
39 سوندا ٴبىر ٴدىن ٴمۇعالىمى: «ۇستاز، ٴسىز دۇرىس ايتتىڭىز»،— دەدى.
40 بۇدان كەيىن وعان سۇراق قويۋعا ەشكىمنىڭ باتىلى بارمادى.
41 ال يسا ولارعا مىناداي سۇراق قويدى: «نەگە ولار ٴماسىحتى ٴداۋىتتىڭ ۇلى دەيدى+؟
42 ٴداۋىتتىڭ ٶزى ٴزابۇر كىتابىندا: —ەحوبا مەنىڭ يەمە بىلاي دەدى: «جاۋلارىڭدى اياعىڭنىڭ استىنا سالىپ بەرگەنىمشە،
43 وڭ جاعىمدا وتىر+»،— دەگەن عوي.
44 ەگەر ٴداۋىت ونى يەم دەپ اتاسا، وندا قالايشا ول ونىڭ ۇلى بولادى؟»
45 كۇللى حالىق تىڭداپ تۇرعاندا، يسا شاكىرتتەرىنە بىلاي دەدى:
46 «ٴدىن مۇعالىمدەرىنەن ساقتانىڭدار! ولار ۇزىن شاپان كيىپ جۇرگەندى، بازار الاڭدارىندا جۇرتتىڭ وزدەرىنە سالەم بەرگەنىن، ٴماجىلىسحانالاردا الدىڭعى ورىنداردا وتىرىپ، ال قوناقاسىلاردا توردە جانتايعاندى ۇناتادى+؛
47 ولار جەسىرلەردىڭ ٷي-جايىن جالمايدى؛ ادەيى جۇرت كوزىنە ٴتۇسۋ ٷشىن ۇزاق دۇعا ەتەدى. ولارعا الدەقايدا قاتاڭ ۇكىم شىعارىلادى».
سىلتەمەلەر
^ تۇسىندىرمەنى قاراڭىز.
^ سوزبە-ٴسوز «سەزارعا».
^ تۇسىندىرمەنى قاراڭىز.
^ تۇسىندىرمەنى قاراڭىز.
