لۇقا 21:1—38
21 يسا ساداقا سالاتىن ىدىستار تۇرعان جاققا قاراپ، بايلاردىڭ ساداقا سالىپ جاتقانىن كوردى+.
2 سوسىن قۇنى وتە تومەن ۇساق ەكى تيىن* سالىپ جاتقان ٴبىر بەيشارا جەسىر ايەلدى بايقاپ+،
3 بىلاي دەدى: «سەندەرگە شىندىعىن ايتامىن، مىنا كەدەي جەسىر ايەل بارىنەن دە كوپ سالدى+.
4 ويتكەنى مىنالاردىڭ ٴبارى وزدەرىنەن ارتىلعانىن سالسا، بۇل ايەل كەدەي بولا تۇرا، كۇنەلتەتىن نارسەسىنىڭ ٴبارىن سالدى+».
5 كەيىنىرەك بىرەۋلەر عيباداتحانانىڭ اسەم تاستارمەن جانە قۇدايعا باعىشتالعان نارسەلەرمەن قالاي اشەكەيلەنگەنىن ٴسوز ەتكەندە+،
6 يسا: «وزدەرىڭ كورىپ تۇرعان وسىلاردىڭ ٴبارى بىردە-ٴبىر تاسى قالماي كۇل-تالقان بولىپ قيرايتىن كۇندەر كەلەدى»+،— دەدى.
7 سوندا ولار: «ۇستاز، بۇل قاشان بولادى؟ مۇنىڭ ٴبارى جۇزەگە اساتىن ۋاقىتتى قانداي بەلگى بىلدىرمەك؟»— دەپ سۇرادى+.
8 يسانىڭ جاۋابى مىناۋ بولدى: «الدانىپ قالۋدان ساق بولىڭدار+! سەبەبى كوپ ادام «مەن سولمىن» دەپ، مەنىڭ اتىمنان كەلەدى جانە «بەلگىلەنگەن ۋاقىت جاقىنداپ قالدى» دەيتىن بولادى. ولارعا ەرمەڭدەر+.
9 سوعىستار مەن كوتەرىلىستەر جايلى ەستىگەندە، بۇعان ۇرەيلەنبەڭدەر. ويتكەنى الدىمەن وسىلار بولۋعا ٴتيىستى، ٴبىراق وسى زاماننىڭ سوڭى بىردەن كەلمەيدى+».
10 بۇدان كەيىن ول بىلاي دەدى: «ۇلت ۇلتقا قارسى+، مەملەكەت مەملەكەتكە قارسى اتتانادى+،
11 قاتتى جەر سىلكىنىستەرى، ٴتۇرلى جەرلەردە اشارشىلىق پەن ىندەتتەر بولادى+. ادامدار قورقىنىشتى نارسەلەر مەن اسپاننان عاجايىپ بەلگىلەر كورەدى.
12 وسىنىڭ ٴبارى ىسكە اسپاس بۇرىن، جۇرت سەندەردى تۇتقىندايدى، قۋدالايدى+، سوتتاۋ ٷشىن ٴماجىلىسحانالارعا اپارادى، تۇرمەلەرگە جابادى، مەنىڭ اتىما بولا پاتشالار مەن بيلەۋشىلەردىڭ الدىنا سۇيرەپ اپارادى+.
13 بۇل كۋالىك ەتۋلەرىڭە مۇمكىندىك بەرەدى.
14 ٴبىراق وزدەرىڭدى قالاي قورعاپ سويلەيتىندەرىڭدى الدىن الا ويلاستىرماۋعا بەل بۋىڭدار+.
15 سەبەبى مەن سەندەرگە دانالىق بەرىپ، ايتاتىن سوزدەرىڭدى اۋىزدارىڭا سالامىن. سوندا جاۋلارىڭنىڭ ٴبارى بىرىكسە دە، سەندەرگە قارسى شىعا دا، داۋلاسا دا المايدى+.
16 سەندەردى اتا-انالارىڭ، باۋىرلارىڭ، تۋىستارىڭ مەن دوستارىڭ ساتىپ كەتىپ، كەيبىرەۋىڭ ولتىرىلەسىڭدەر+.
17 مەنىڭ اتىما بولا جۇرتتىڭ ٴبارى سەندەردى جەك كورەتىن بولادى+.
18 الايدا باستارىڭداعى شاشتارىڭنىڭ ٴبىرى دە تۇسپەيدى+.
19 تاباندى بولۋلارىڭمەن جاندارىڭدى* ساقتاپ قالاسىڭدار+.
20 يەرۋساليمدى اسكەرلەر قورشاپ العانىن كورگەندە+، ونىڭ قاڭىراپ بوس قالاتىن كەزى جاقىن قالعانىن بىلەسىڭدەر+.
21 سوندا ياھۋدەياداعىلار تاۋلارعا قاشسىن+. يەرۋساليمدەگىلەر قالادان شىقسىن، ال ماڭىنداعىلار وعان كىرمەسىن!
22 سەبەبى بۇل — قۇدايدىڭ حالىقتى جازالايتىن* كۇندەرى. وسىلايشا كيەلى جازبادا ايتىلعانداردىڭ ٴبارى جۇزەگە اسپاق.
23 سول كۇندەرى جۇكتى جانە بالا ەمىزىپ جۇرگەن ايەلدەر قاسىرەتكە قالادى+! ويتكەنى وسى ايماققا زور قاسىرەت كەلەدى، ٵرى بۇل حالىق جازالانادى.
24 ولار سەمسەردەن ولەدى جانە بارلىق ەلدەرگە تۇتقىنعا ايدالادى+. يەرۋساليمدى باسقا ۇلتتار وزدەرىنە بەلگىلەنگەن ۋاقىت بىتكەنشە، اياقتارىمەن تاپتايدى+.
25 كۇندە، اي مەن جۇلدىزداردا بەلگىلەر بولادى+. ال جەر بەتىندە حالىقتار دولدانعان تەڭىزدىڭ قاتتى شۋىنان نە ىستەرىن بىلمەي ازاپقا تۇسەدى.
26 سەبەبى اسپان كۇشتەرى شايقالاتىندىقتان، ادامدار جەر بەتىندە نە بولار ەكەن دەپ كۇتىپ، ٵرى بويلارىن ۇرەي بيلەپ ەسەڭگىرەپ قالادى.
27 سودان كەيىن ولار ادام ۇلىنىڭ+ قۇدىرەتپەن جانە سالتاناتتى ۇلىلىقپەن بۇلتتا كەلە جاتقانىن كورەدى+.
28 بۇل جايتتار ورىن الا باستاعاندا، سەندەر ەڭسەلەرىڭدى تۇزەپ، باستارىڭدى كوتەرىڭدەر، ويتكەنى قۇتقارىلۋلارىڭ جاقىن».
29 سوسىن ولارعا مىناداي مىسال كەلتىردى: «ٸنجىر اعاشى مەن باسقا دا اعاشتارعا قاراڭدار+:
30 ولاردىڭ بۇرشىك اتقانىن كورگەندە، جازدىڭ جاقىنداپ قالعانىن بىلەسىڭدەر.
31 سول سياقتى، سەندەر دە وسىلاردىڭ بولىپ جاتقانىن كورگەندە، قۇداي پاتشالىعىنىڭ تاياپ قالعانىن بىلەسىڭدەر.
32 سەندەرگە شىندىعىن ايتامىن، وسى ۇرپاق ولمەي تۇرىپ-اق، بۇلاردىڭ ٴبارى ورىندالادى+.
33 كوك پەن جەر قۇرىپ جوق بولىپ كەتسە دە، مەنىڭ سوزدەرىم ەش قۇرىمايدى+.
34 ٴبىراق وزدەرىڭە ساق بولىڭدار! مەشكەيلىك، ىشىمدىككە سالىنۋ+ جانە كۇندەلىكتى تۇرمىس ۋايىمى جۇرەكتەرىڭدى جاۋلاپ الىپ+، سول كۇن سەندەرگە قاپىلىستا كەلىپ،
35 تور سياقتى بولماسىن+. ويتكەنى بۇل كۇن بۇكىل جەر بەتىنىڭ تۇرعىندارىنىڭ باسىنا تۋادى.
36 سوندىقتان الدا بولاتىن وسى جايتتاردىڭ بارىنەن قاشىپ قۇتىلا الۋ ٷشىن جانە ادام ۇلىنىڭ الدىندا تۇرا الۋ ٷشىن ۇدايى جالبارىنىپ+، سەرگەك بولىڭدار+!»
37 يسا كۇندىز عيباداتحانادا ٴتالىم بەرىپ، ال كەشكە سول جەردەن شىعىپ، ٴزايتۇن دەپ اتالاتىن تاۋعا بارىپ تۇنەپ ٴجۇردى.
38 تاڭ اتا بارشا جۇرت ونى تىڭداۋ ٷشىن عيباداتحاناعا كەلەتىن.
سىلتەمەلەر
^ سوزبە-ٴسوز «ەكى لەپتا». B14 قوسىمشاسىن قاراڭىز.
^ نەمەسە «ومىرلەرىڭدى». تۇسىندىرمەدەگى «جان» ٴسوزىن قاراڭىز.
^ نەمەسە «كەك الاتىن».
