مارقا 5:1—43
5 ولار تەڭىزدىڭ ارعى بەتىندەگى گەراسالىقتاردىڭ جەرىنە كەلدى+.
2 يسا قايىقتان تۇسكەن بويدا، وعان قابىرلەر اراسىنان شىققان جىن بۋعان ٴبىر كىسى كەزدەسە كەتتى.
3 ول قابىرلەردى پانالاپ جۇرەتىن. وسى ۋاقىتقا دەيىن ونى ەشكىم ٴتىپتى شىنجىرمەن دە بايلاپ قويا الماعان.
4 ونىڭ اياق-قولىن قانشاما رەت كىسەنمەن، شىنجىرمەن بۇعاۋلاپ تاستاسا دا، ول شىنجىردى ٷزىپ، كىسەندى سىندىرىپ تاستايتىن. ونى باعىندىرۋعا ەشكىمنىڭ كۇشى جەتپەيتىن.
5 ول كۇنى-ٴتۇنى قابىرلەر مەن تاۋلاردا ايعايلاپ، ٶز-ٶزىن تاسپەن تىلگىلەيتىن.
6 ٴبىراق يسانى الىستان كورە سالا، ول جۇگىرىپ كەلىپ، تاعزىم ەتتى دە+:
7 «قۇداي تاعالانىڭ ۇلى يسا، مۇندا نەگە كەلدىڭ؟ مەنى جازالامايمىن دەپ قۇداي الدىندا انت بەر!»— دەپ قاتتى داۋىستادى+.
8 سەبەبى يسا: «جىن، شىق بۇل كىسىدەن!»+— دەگەن ەدى.
9 سوسىن ودان: «اتىڭ كىم؟»— دەپ سۇراعاندا، الگى كىسى: «اتىم — قالىڭ قول*، ويتكەنى ٴبىز كوپپىز»،— دەپ جاۋاپ بەردى.
10 ول يسادان جىنداردى سول ايماقتان قۋىپ جىبەرمەۋىن سۇراپ، قايتا-قايتا ٶتىندى+.
11 سول جەردەگى تاۋ بەتكەيىندە كوپ شوشقا+ جايىلىپ ٴجۇر ەدى+.
12 سوندىقتان جىندار: «ٴبىزدى شوشقالارعا جىبەرە كور، سولارعا كىرەيىك»،— دەپ ٶتىندى.
13 يسا رۇقسات ەتكەندە، ولار الگى كىسىنىڭ بويىنان شىعىپ، شوشقالارعا كىردى. سوندا ولاردىڭ ٴبارى، شامامەن 2000 شوشقا، جاردان تەڭىزگە قارعىپ، سۋعا باتىپ، قىرىلىپ قالدى.
14 ال باقتاشىلار قاشىپ كەتىپ، بولعان جايتتى قالا مەن اۋىلدارعا تاراتتى. جۇرت نە بولعانىن كورۋگە شىقتى+.
15 ولار يساعا كەلگەندە، بويىنان جىنداردىڭ قالىڭ قولى شىققان الگى كىسىنىڭ اقىل-ەسى كىرىپ، ۇستىنە كيىم كيىپ وتىرعانىن كورىپ، زارەلەرى قالمادى.
16 وسى جاعدايدى ٶز كوزىمەن كورگەندەر ولارعا جىن بۋعان كىسىمەن جانە شوشقالارمەن نە بولعانىن ايتىپ بەردى.
17 سوندا جۇرت يسادان ٶز جەرلەرىنەن كەتۋدى ٶتىندى+.
18 يسا قايىققا ٴمىنىپ جاتقاندا، جىنداردان ارىلعان كىسى ونىمەن بىرگە جۇرۋگە رۇقسات ەتۋىن جالىنىپ سۇرادى+.
19 الايدا يسا رۇقسات ەتپەي: «ۇيىڭە بارىپ، تۋعان-تۋىسقاندارىڭا ەحوبانىڭ وزىڭە نە ىستەگەنىن جانە قالاي قايىرىمدىلىق كورسەتكەنىن ايتىپ بەر»،— دەدى.
20 ول بارىپ، يسانىڭ وزىنە ىستەگەندەرىنىڭ ٴبارىن دەكاپوليس* ايماعىندا جاريالاي باستادى. مۇنى ەستىگەندەردىڭ ٴبارى قايران قالىستى.
21 يسا قايىقپەن قايتادان تەڭىزدىڭ بەرگى بەتىنە وتكەندە، قاسىنا كوپ جۇرت جينالدى. ول تەڭىزدىڭ جاعاسىندا تۇردى+.
22 سول جەرگە جايىر ەسىمدى ٴبىر ٴماجىلىسحانا جەتەكشىسى كەلدى. يسانى كورگەندە، ول اياعىنا جىعىلىپ+:
23 «قىزىم حال ۇستىندە جاتىر. امان قالۋى ٷشىن بارىپ، ۇستىنە قولىڭىزدى قويىپ+، ايىقتىرا كورىڭىز»،— دەپ ٶتىنىپ تۇرىپ الدى.
24 يسا وعان ەردى. وعان ىلەسكەن قالىڭ جۇرت ونى جان-جاقتان قىسپاقتادى.
25 توبىر اراسىندا 12 جىل بويى قان كەتىپ اۋىرعان+ ٴبىر ايەل بار ەدى+.
26 ول كوپ دارىگەرگە ەمدەلەمىن دەپ تالاي ازاپ شەگىپ، قولىنداعى بار مال-مۇلكىن جۇمساسا دا، ەش ەم قونباي، قايتا، ٴحالى بۇرىنعىسىنان دا ناشارلاي تۇسكەن بولاتىن.
27 يسا جايلى ەستىگەن ول توبىردىڭ اراسىمەن ٶتىپ، ونىڭ ارت جاعىنان كەلىپ، جامىلعىسىنا قولىن تيگىزدى+.
28 ويتكەنى ول ىشىنەن: «ەڭ بولماعاندا، جامىلعىسىنا قولىمدى تيگىزسەم، ايىعىپ كەتەمىن»،— دەۋمەن بولدى+.
29 ايەل سول زاماتتا-اق قانى توقتاپ، جانىنا باتقان دەرتىنەن ايىققانىن سەزدى.
30 يسا دا بويىنان كۇش+ شىققانىن بىردەن سەزىپ، كەرى بۇرىلىپ، جۇرتتان: «جامىلعىما كىم قولىن تيگىزدى؟»— دەپ سۇرادى+.
31 سوندا شاكىرتتەرى: «جۇرتتىڭ جان-جاقتان قىسپاقتاپ جاتقانىن كورە تۇرا: —ماعان كىم قولىن تيگىزدى؟— دەگەنىڭىز قالاي؟»— دەدى.
32 الايدا ول مۇنى ىستەگەن ادامدى كورۋ ٷشىن اينالاسىنا قارادى.
33 وزىمەن نە بولعانىن بىلگەن ايەل قورىققاننان دىرىلدەپ، ونىڭ الدىنا كەلدى دە، اياعىنا جىعىلىپ، بار شىندىقتى ايتىپ بەردى.
34 يسا وعان: «قىزىم، سەنىمىڭنىڭ ارقاسىندا ايىقتىڭ. ۋايىمداماي قايتا بەر+، جانىڭا باتقان دەرتتەن ساۋىقتىڭ»،— دەدى+.
35 ول ٵلى سويلەپ تۇرعاندا، ٴماجىلىسحانا جەتەكشىسىنىڭ ۇيىنەن ٴبىر كىسىلەر كەلىپ: «قىزىڭىزدان ايىرىلىپ قالدىق. ەندى ۇستازدى اۋرەلەمەي-اق قويىڭىز»،— دەدى+.
36 مۇنى ەستىگەن يسا ٴماجىلىسحانا جەتەكشىسىنە: «قورىقپاڭىز، تەك سەنىمىڭىز بولسىن!»— دەدى+.
37 ٴسۇيتىپ، ول پەتىر، جاقىپ پەن ونىڭ باۋىرى جوحاننان باسقا ەشكىمگە وزىنە ىلەسۋگە رۇقسات ەتپەدى+.
38 ولار ٴماجىلىسحانا جەتەكشىسىنىڭ ۇيىنە كەلگەندە، يسا ونداعىلاردىڭ ۋ-شۋ بولىپ ابىرجىپ، زار ەڭىرەپ جىلاپ جۇرگەندەرىن كوردى+.
39 ۇيگە كىرىپ، ولارعا: «نەگە جىلاپ، ۋ-شۋ بولىپ ابىرجىپ جاتىرسىزدار؟ قىز ولگەن جوق، ۇيىقتاپ جاتىر»،— دەدى+.
40 بۇنى ەستىگەندە، ولار يسانى مىسقىلداپ كۇلە باستادى. ٴبىراق ول بارلىعىن سىرتقا شىعارىپ جىبەرىپ، قىزدىڭ اكە-شەشەسىن جانە شاكىرتتەرىن عانا ەرتىپ، قىز جاتقان بولمەگە كىردى.
41 قىزدىڭ قولىنان ۇستاپ: «تاليفا كۋمي»،— دەدى. مۇنىڭ ماعىناسى: «قىزىم، ساعان ايتامىن، تۇرا عوي!»+
42 سوندا 12 جاسار قىز بىردەن ورنىنان تۇرىپ، جۇرە باستادى. مۇنى كورگەن ساتتە، اكە-شەشەسىنىڭ قۋانىشى قوينىنا سيماي، شات-شادىمان بولدى.
43 ٴبىراق يسا ولارعا بۇل تۋرالى ەشكىمگە ٴتىس جارماۋدى قايتا-قايتا ەسكەرتتى*+، سوسىن قىزعا تاماق بەرۋدى ايتتى.
سىلتەمەلەر
^ سوزبە-ٴسوز «لەگيون». لەگيون — ەجەلگى ٴريمنىڭ اسكەري جاساعى.
^ نەمەسە «ون قالا ٶڭىرى».
^ نەمەسە «قاتاڭ ەسكەرتتى».
