مۇسانىڭ 1-جازباسى 13:1—18
13 سونىمەن، ىبىرام ايەلىن، بار مەنشىگىن جانە لۇتتى الىپ، مىسىردان نەگەۆكە+ كەتتى.
2 ىبىرامنىڭ مالى مەن التىن-كۇمىسى وتە كوپ ەدى+.
3 سودان ول نەگەۆتەن بەتەلگە قاراي كوشىپ-قونا ٴجۇرىپ، بەتەل مەن گايدىڭ+ ورتاسىندا ٶزى العاش رەت شاتىر تىككەن
4 ٵرى قۇرباندىق ورنىن تۇرعىزعان جەرگە جەتتى. سول جەردە ىبىرام ەحوبانىڭ ەسىمىن ماداقتادى.
5 ىبىراممەن بىرگە كوشىپ-قونىپ جۇرگەن لۇتتىڭ دا ٸرىلى-ۇساقتى مالدارى جانە شاتىرلارى بولدى.
6 ەكەۋىنىڭ دە مال-مۇلىكتەرى كوبەيىپ كەتكەندىكتەن، جەر تارلىق ەتىپ، ەندى ولار بىرگە تۇرا المادى.
7 سودان ىبىرامنىڭ مالشىلارى مەن لۇتتىڭ مالشىلارىنىڭ اراسىندا داۋ-جانجال تۋا باستادى. (ول زاماندا قاناحاندىقتار مەن پەرەزدىكتەر سول جەردى مەكەندەيتىن+.)
8 سوندىقتان ىبىرام لۇتقا+: «ەكەۋمىزدىڭ دە، مالشىلارىمىزدىڭ دا اراسىندا داۋ-جانجال بولماي-اق قويسىنشى، ويتكەنى اعايىندىمىز عوي.
9 مىنە، قالاعان جەرىڭدى تاڭداپ ال دا، مەنەن بولەك شىعا عوي. سەن سول جاققا كەتسەڭ، مەن وڭعا كەتەيىن، ال وڭ جاققا كەتسەڭ، مەن سولعا كەتەيىن»،— دەدى.
10 سوندا لۇت اينالاسىنا كوز تاستاپ، يوردان اڭعارىنان سيعورعا+ دەيىنگى بۇكىل ايماقتىڭ+ (ەحوبا سودوم مەن عومورانى قۇرتقانعا دەيىن) ەحوبانىڭ باعى+ ىسپەتتى ٵرى مىسىر جەرى سياقتى سۋى مول ەكەنىن كوردى.
11 ٴسۇيتىپ، لۇت يوردان اڭعارىنداعى بۇكىل ايماقتى تاڭداپ الدى دا، قوسىن شىعىسقا قاراي كوشىردى. وسىلايشا ەكەۋى ٴبىر-بىرىنەن ٴبولىنىپ كەتتى.
12 ىبىرام قاناحان جەرىندە تۇرىپ جاتتى. ال لۇت ٶزى تاڭداعان ايماقتاعى قالالاردىڭ ماڭىندا تۇرىپ+، اقىر سوڭىندا شاتىرىن سودوم قالاسىنىڭ جانىنا تىكتى.
13 سودومنىڭ تۇرعىندارى ەحوبانىڭ كوز الدىندا اۋىر كۇناعا باتقان زۇلىم ادامدار ەدى+.
14 لۇت ٴبولىنىپ كەتكەننەن كەيىن، ەحوبا ىبىرامعا بىلاي دەدى: «اينالاڭا كوز تاستاپ، ٶزىڭ تۇرعان جەردەن سولتۇستىك پەن وڭتۇستىككە، شىعىس پەن باتىسقا قاراشى.
15 كوز الدىڭداعى وسى جەردىڭ ٴبارىن ساعان جانە سەنىڭ ۇرپاعىڭا ماڭگىلىككە بەرەمىن+.
16 مەن ۇرپاعىڭدى جەر بەتىندەگى قۇم قيىرشىقتارىنداي سانسىز كوپ ەتەمىن. كىم قۇم قيىرشىقتارىن ساناي السا، سەنىڭ ۇرپاعىڭدى دا ساناي العانى+.
17 تۇر دا، وسى جەردى و شەتىنەن بۇ شەتىنە دەيىن كەزىپ شىق، ويتكەنى ونى ساعان بەرمەكپىن».
18 سونىمەن، ىبىرام شاتىرلاردا تۇرىپ، كوشىپ-قونىپ ٴجۇردى. كەيىنىرەك حەبرونداعى+ ۇلكەن اعاشتار وسەتىن مامرەگە+ كەلىپ قونىس تەپتى. سول جەردە ول ەحوباعا ارناپ قۇرباندىق ورنىن تۇرعىزدى+.
