مۇسانىڭ 1-جازباسى 26:1—35
26 ەلدى تاعى دا اشتىق جايلادى، العاش رەت اشتىق ىبىرايىمنىڭ كۇندەرىندە بولعان ەدى+. ىسقاق گەرارداعى فىلىستىرلەر پاتشاسى ابۋمالىككە باردى.
2 سول جەردە ەحوبا ىسقاققا كورىنىپ، بىلاي دەگەن ەدى: «مىسىرعا بارماي، شاتىرىڭدى مەن كورسەتكەن جەرگە تىك.
3 وسى ەلدە جاتجەرلىك رەتىندە تۇرا بەر+. مەن ساعان بۇدان بىلاي دا جار بولىپ، باتامدى توگەمىن. ويتكەنى وسى جەردىڭ ٴبارىن ساعان جانە سەنىڭ ۇرپاعىڭا بەرىپ+، اكەڭ ىبىرايىمعا بەرگەن كەلەسى انتىمدى ورىندايمىن+:
4 «مەن سەنىڭ ۇرپاعىڭدى اسپانداعى جۇلدىزدارداي كوبەيتىپ+، وسى جەردىڭ ٴبارىن ۇرپاقتارىڭا بەرەمىن+. جەر بەتىندەگى بارلىق حالىقتار سولار ارقىلى جارىلقانادى+».
5 مۇنى ىبىرايىم ماعان قۇلاق اسىپ، تالاپ ەتكەنىمنىڭ ٴبارىن: بۇيرىقتارىم، جارلىقتارىم مەن زاڭدارىمدى — ورىنداپ جۇرگەنى ٷشىن+ جۇزەگە اسىرامىن».
6 سونىمەن، ىسقاق گەراردا تۇرىپ جاتتى+.
7 جەرگىلىكتى ادامدار ونىڭ ايەلى جايلى سۇراعاندا، ىسقاق: «ول — مەنىڭ قارىنداسىم»+،— دەپ ٴجۇردى. ايەلى سۇلۋ بولعاندىقتان+، ىسقاق «ولار مەنى رابيعا ٷشىن ٶلتىرىپ تاستار» دەپ ويلاپ، ايەلىم دەپ ايتۋعا قورىقتى.
8 بىردە فىلىستىرلەر پاتشاسى ابۋمالىك تەرەزەدەن سىرتقا قاراپ تۇرعاندا، ىسقاقتىڭ رابيعانى ايمالاپ جاتقانىن+ كورىپ قالدى.
9 سوندا ول ىسقاقتى شاقىرىپ الىپ: «ول سەنىڭ ايەلىڭ ەكەن عوي! نەگە ونى قارىنداسىم دەپ ٴجۇرسىڭ؟»— دەگەندە، ىسقاق: «مەنى ايەلىم ٷشىن ٶلتىرىپ تاستار دەپ قورىققاندىقتان ايتتىم»+،— دەپ جاۋاپ بەردى.
10 ال ابۋمالىك: «بۇل نە قىلعانىڭ؟+ حالقىمنىڭ اراسىنان بىرەۋ سەنىڭ ايەلىڭمەن جاقىنداسىپ قويۋى مۇمكىن ەدى عوي. سوندا ٴبىز كىنالى بولىپ قالاتىن ەدىك+»،— دەدى.
11 كەيىن حالىققا بىلاي دەپ بۇيىردى: «كىمدە-كىم مىنا كىسىگە نە ايەلىنە تيىسسە، سول ولتىرىلەدى!»
12 ىسقاق وسى جەرگە ەگىن ەگىپ، سول جىلى ودان ٴجۇز ەسە ٶنىم الدى. سەبەبى ەحوبا باتاسىن بەرگەن ەدى+.
13 ول بايىپ، دۇنيە-مۇلكى كوبەيگەن ۇستىنە كوبەيە بەردى. ٴسۇيتىپ، وتە باي ادامعا اينالدى.
14 ونىڭ وتار-وتار قويى، تابىن-تابىن ٸرى قارا مالى جانە كوپتەگەن قىزمەتشىلەرى بولعاندىقتان+، فىلىستىرلەر وعان قىزعانا قاراي باستادى.
15 ولار ىسقاقتىڭ اكەسى ىبىرايىمنىڭ كوزى تىرىسىندە ونىڭ قىزمەتشىلەرى قازعان بارلىق قۇدىقتاردى توپىراقپەن كومىپ تاستادى+.
16 سوسىن ابۋمالىك ىسقاققا: «ٴبىزدىڭ ماڭىمىزدان كەت، سەبەبى سەن بىزدەن الدەقايدا كۇشەيىپ الدىڭ»،— دەدى.
17 ىسقاق سول جەردەن گەرار+ اڭعارىنا كوشىپ، سوندا قوسىن تىگىپ، تۇرىپ جاتتى.
18 ول اكەسى ىبىرايىمنىڭ تۇسىندا قازىلىپ، ٴبىراق ول ولگەن سوڭ فىلىستىرلەر كومىپ تاستاعان قۇدىقتاردى قايتا اشىپ+، كەزىندە اكەسى قويعان اتتارمەن اتادى+.
19 ىسقاقتىڭ قىزمەتشىلەرى اڭعاردا جەر قازىپ ٴجۇرىپ، تازا سۋى بار قۇدىق تاۋىپ الدى.
20 الايدا گەراردىڭ مالشىلارى ىسقاقتىڭ مالشىلارىمەن: «بۇل سۋ بىزدىكى!»— دەپ داۋلاستى. وزىمەن داۋلاسقاندىقتان ىسقاق قۇدىقتى ەزەك* دەپ اتادى.
21 ىسقاقتىڭ قىزمەتشىلەرى باسقا ٴبىر قۇدىق قازدى، ٴبىراق الگىلەر بۇعان دا داۋلاستى. سول سەبەپتى ىسقاق ونى سيتنا* دەپ اتادى.
22 كەيىنىرەك ىسقاق باسقا جەرگە كوشىپ بارىپ، تاعى ٴبىر قۇدىق قازدى. بۇل جولى وعان ەشكىم داۋلاسپاعاندىقتان، قۇدىقتى رەحوبوت* دەپ اتاپ: «ەحوبا بىزگە بايتاق جەر بەرىپ، وسى ەلدە ٷرىم-بۇتاعىمىزدى كوبەيتىپ وتىر+»،— دەدى.
23 سوسىن ىسقاق بەر-شەباعا+ كوشتى.
24 سول ٴتۇنى ەحوبا وعان كورىنىپ: «مەن سەنىڭ اكەڭ ىبىرايىمنىڭ قۇدايىمىن+. قورىقپا+، مەن ساعان جار بولامىن. قىزمەتشىم ىبىرايىم ٷشىن ساعان باتامدى بەرىپ، ٷرىم-بۇتاعىڭدى كوبەيتەمىن»+،— دەدى.
25 ىسقاق سول جەرگە قۇرباندىق ورنىن تۇرعىزىپ، ەحوبانىڭ ەسىمىن ماداقتادى+. كەيىن سول ماڭعا شاتىرىن تىكتى+. ونىڭ قىزمەتشىلەرى تاعى دا قۇدىق قازدى.
26 ٴبىراز ۋاقىت وتكەن سوڭ وعان گەراردان جەكە كەڭەسشىسى احۋزات پەن قولباسشىسى پيحولدى ەرتىپ، ابۋمالىك كەلدى+.
27 ىسقاق ولارعا: «ماعان نەگە كەلدىڭىزدەر؟ مەنى جەك كورىپ، ماڭايلارىڭىزدان قۋىپ جىبەرىپ ەدىڭىزدەر عوي»،— دەدى.
28 بۇعان ولار بىلاي جاۋاپ قاتتى: «ەحوبانىڭ ساعان جار بولىپ جۇرگەنىنە كوزىمىز جەتتى+. سوندىقتان مىنانى ايتقالى كەلدىك: «ٴبىر-بىرىمىزگە انت بەرىپ، ٶزارا كەلىسىم جاساسايىقشى+:
29 ٴبىز ساعان تيىسپەي، بەيبىت تۇردە جىبەرىپ، جاقسىلىق ىستەگەنىمىزدەي، سەن دە بىزگە جاماندىق جاساما. سەن ەحوبانىڭ باتاسى قونعان ادامسىڭ».
30 سوندا ىسقاق قوناقاسى بەرىپ، بارلىعى ٸشىپ-جەدى.
31 ولار تاڭ اتا ەرتە تۇرىپ، ٴبىر-بىرىنە انت بەرىستى+. ٴسۇيتىپ، ىسقاق قوناقتارمەن جىلى جۇزبەن قوشتاستى.
32 سول كۇنى ىسقاقتىڭ قىزمەتشىلەرى: «ٴبىز سۋ تاپتىق!»— دەپ، وزدەرى قازعان قۇدىق+ جايلى ايتىپ كەلدى.
33 ىسقاق قۇدىقتى شيبا* دەپ اتادى. سوندىقتان دا سول جەردەگى قالا بۇگىنگە دەيىن بەر-شەبا*+ دەپ اتالادى.
34 ەساۋ 40 جاسقا تولعاندا، حەتتىك بەگەريدىڭ قىزى ەحۋديتتى جانە حەتتىك ەلوننىڭ قىزى باسەماتتى ايەلدىككە الدى+.
35 بۇل ايەلدەر ىسقاق پەن رابيعانى قايعىعا باتىردى+.
سىلتەمەلەر
^ ماعىناسى «داۋ».
^ ماعىناسى «ايىپ».
^ ماعىناسى «بايتاق جەر».
^ ماعىناسى «انت؛ جەتى».
^ ماعىناسى «انت قۇدىعى؛ جەتىنىڭ قۇدىعى».