مۇسانىڭ 1-جازباسى 31:1—55
31 كەيىنىرەك جاقىپ لاباننىڭ ۇلدارى: «جاقىپ اكەمىزگە تيەسىلىنىڭ ٴبارىن الىپ قويدى. ول اكەمىزدىڭ مال-مۇلكىمەن بايىپ وتىر»،— دەپ جۇرگەنىن ەستىدى+.
2 جاقىپ لابانمەن جۇزدەسكەندە، وزىنە بۇرىنعىداي قارامايتىنىن بايقادى+.
3 ٴبىر كۇنى ەحوبا جاقىپقا: «اتا-باباڭنىڭ جەرىنە، ٶز تۋىستارىڭا ورال+، مەن ساعان ٵرى قاراي دا جار بولامىن»،— دەدى.
4 سوندا جاقىپ راحيلا مەن لياعا حابار جىبەرىپ، مال جايىپ جۇرگەن جەرىنە شاقىرتىپ الدى دا،
5 بىلاي دەدى:
«اكەلەرىڭ ماعان بۇرىنعىداي قارامايتىنىن بايقاپ ٴجۇرمىن+. ٴبىراق اكەمنىڭ قۇدايى ماعان جار بولىپ كەلەدى+.
6 اكەلەرىڭە ايانباي قىزمەت ەتكەنىمدى جاقسى بىلەسىڭدەر+.
7 ٴبىراق ول مەنى الداماق بولىپ، ەڭبەكاقىمدى ون رەت وزگەرتتى. ايتكەنمەن قۇداي ونىڭ ماعان قيانات جاساۋىنا جول بەرمەدى.
8 اكەلەرىڭ ماعان: —سەنىڭ اقىڭ تەڭبىل مال بولسىن،— دەگەندە، وتارداعى مالدىڭ ٴبارى تەڭبىل ٴتول بەردى. ال ول: —سەنىڭ اقىڭ شۇبار مال بولسىن،— دەگەندە، وتارداعى مالدىڭ ٴبارى شۇبار ٴتول بەردى+.
9 وسىلايشا قۇداي اكەلەرىڭنىڭ مالىن الىپ، ماعان بەرىپ وتىر.
10 بىردە مال كۇيەگى كەزىندە ٴتۇس كوردىم: وتاردا ەشكىلەرمەن شاعىلىسىپ جۇرگەن تەكەلەر شۇبار، تەڭبىل، الا ەكەن+.
11 سوندا تۇسىمدە قۇدايدىڭ پەرىشتەسى ماعان: —جاقىپ،— دەدى. مەن: —تىڭداپ تۇرمىن،— دەدىم.
12 ول: —قاراشى، ەشكىلەرمەن شاعىلىسىپ جۇرگەن تەكەلەردىڭ ٴبارى شۇبار، تەڭبىل، الا، ويتكەنى لاباننىڭ ساعان نە ىستەگەنىنىڭ ٴبارىن كوردىم+.
13 مەن ساعان بەتەلدە+ كورىنگەن قۇدايمىن. سول جەردە ەسكەرتكىش تاس ورناتىپ، ۇستىنە ماي قۇيىپ، ماعان سەرت بەرگەنسىڭ+. ەندى بۇل جەردەن كەتىپ، تۋعان جەرىڭە قايت،— دەدى+».
14 سوندا راحيلا مەن ليا جاقىپقا: «اكەمىزدىڭ ۇيىندە ٴبىزدىڭ قانداي ۇلەسىمىز قالدى دەيسىڭ؟!
15 ول بىزگە جاتجەرلىككە قاراعانداي قارايدى ەمەس پە؟ ٴبىزدى ساتىپ جىبەرىپ، اقشاسىن ٶزى جەپ وتىر عوي+.
16 قۇداي اكەمىزدەن الىپ قويعان بايلىقتىڭ ٴبارى بىزدىكى جانە بالالارىمىزدىكى+. ەندەشە قۇداي نە ايتسا، سونى ىستە+»،— دەدى.
17 جاقىپ جينالىپ، بالالارى مەن ايەلدەرىن تۇيەلەرگە وتىرعىزدى دا+،
18 جيىپ-تەرگەن دۇنيە-مۇلكىن جانە پادان-ارامدا تاپقان بار وتارىن الىپ+، قاناحان جەرىندەگى اكەسى ىسقاققا قاراي جول تارتتى+.
19 بۇل كەزدە لابان قوي قىرقۋعا كەتكەن ەدى. راحيلا اكەسىنىڭ ۇيىندەگى پۇتتاردى*+ ۇرلاپ اكەتتى+.
20 جاقىپ قۋلىق جاساپ، ارامەيلىك لابانعا ٶزىنىڭ كوشىپ بارا جاتقانىن ايتپاي كەتتى.
21 وسىلاي ول قاشا وتىرىپ، بار يەلىگىمەن ەۆفرات وزەنىنەن+ ٶتتى دە، عالاقات+ تاۋلى وڭىرىنە بەت الدى.
22 ٷشىنشى كۇنى لابان جاقىپتىڭ قاشىپ كەتكەنىن ەستىپ،
23 باۋىرلارىن* ەرتىپ الدى دا، ارتىنان قۋدى. ونى جەتىنشى كۇن دەگەندە عالاقات تاۋلارىندا قۋىپ جەتتى.
24 تۇندە قۇداي ارامەيلىك+ لاباننىڭ تۇسىنە ەنىپ+: «جاقىپقا نە ايتساڭ دا*، ابايلاپ سويلە»،— دەدى+.
25 لابان جاقىپتى قۋىپ جەتكەندە، ول شاتىرىن عالاقات تاۋلارىندا تىگىپ وتىرعان بولاتىن. لابان دا باۋىرلارىمەن سول ماڭعا قوس تىكتى.
26 ول جاقىپقا بىلاي دەدى: «بۇل نە قىلعانىڭ؟ نەگە مەنى الداپ، قىزدارىمدى قولعا تۇسكەن تۇتقىن سياقتى الىپ كەتتىڭ؟
27 قۋلىقپەن جاسىرىن تۇردە، ەشتەڭە ايتپاستان قاشا جونەلگەنىڭ قالاي؟ ايتقانىڭدا، مەن سەنى داڭعىرا قاعىپ، ارفا تارتىپ، ٵن-كۇيمەن كۇلىپ-ويناپ شىعارىپ سالار ەدىم عوي.
28 ال سەن نەمەرەلەرىم* مەن قىزدارىمنىڭ بەتتەرىنەن سۇيگىزبەي الىپ كەتىپ، اقىماقتىق جاسادىڭ.
29 سەندەرگە جاماندىق جاساۋعا كۇشىم جەتەدى، ٴبىراق كەشە تۇندە اتا-بابالارىڭنىڭ قۇدايى ماعان: —جاقىپقا ابايلاپ سويلە،— دەدى+.
30 مەيلى، اكەڭنىڭ ٷيىن قاتتى ساعىنعاندىقتان كەتكەن ەكەنسىڭ، ٴبىراق مەنىڭ تاڭىرلەرىمدى+ نەگە ۇرلايسىڭ؟»
31 جاقىپ وعان: «قىزدارىڭىزدى مەنەن تارتىپ الارسىز دەپ قورىققان ەدىم.
32 ال تاڭىرلەرىڭىزدى كىمنەن تاپساڭىز، سول ٴتىرى قالمايدى. باۋىرلارىمىزدىڭ كوزىنشە ٴبارىن ٴتىنتىپ شىعىڭىز. زاتىڭىزدى تاپساڭىز، الىڭىز»،— دەدى. جاقىپ ولاردى راحيلانىڭ ۇرلاپ العانىن بىلمەگەن ەدى.
33 سودان لابان الدىمەن جاقىپتىڭ، كەيىن ليانىڭ، سوسىن ەكى كۇڭنىڭ+ شاتىرىنا كىرىپ، ىزدەگەنىن تاپپادى. اقىرىندا، ليانىڭ شاتىرىنان شىعىپ، راحيلانىكىنە كىردى.
34 وسى ارالىقتا راحيلا پۇتتاردى تۇيە قومىنىڭ استىنا تىعىپ، ٶزى ۇستىنە وتىرىپ العان ەدى. لابان شاتىردىڭ ٸشىن ٴتىنتىپ شىعىپ، ەشتەڭە تاپپادى.
35 سوندا راحيلا اكەسىنە: «مىرزام، ورنىمنان تۇرىپ، قارسى الماعانىما اشۋلانا كورمەڭىز. قازىر مەنىڭ ايەلدەرگە ٴتان اۋىراتىن كەزەڭىم+ ەدى»،— دەدى. ٴسۇيتىپ، لابان قانشا ىزدەگەنىمەن، پۇتتارىن تابا المادى+.
36 سوندا جاقىپتىڭ اشۋى كەلىپ، لاباننىڭ ىستەگەنىن بەتىنە باسىپ بىلاي دەدى: «ارتىمنان سونشا قۋاتىنداي مەن نە ٴبۇلدىردىم، قانداي كۇنام بار؟
37 دۇنيە-مۇلكىمنىڭ ٴبارىن اقتارىپ، ٷيىڭىزدىڭ ٴبىر زاتىن تاپتىڭىز با؟ تاپساڭىز، ونى مەنىڭ ادامدارىم مەن ٶز ادامدارىڭىزدىڭ الدىنا قويىڭىز، ولار ەكەۋمىزگە تورەلىگىن ايتسىن.
38 مەن قاسىڭىزدا جۇرگەن جيىرما جىلدىڭ ىشىندە ٴسىزدىڭ قوي-ەشكىلەرىڭىز ەشقاشان قوزى نە لاق تاستاعان ەمەس+، بىردە-ٴبىر قوشقارىڭىزدى سويىپ جەگەن ەمەسپىن.
39 الدىڭىزعا جىرتقىش اڭ جارىپ كەتكەن مالدى اكەلگەن ەمەسپىن+، ولاردىڭ ورنىن ٶزىم تولتىرىپ وتىردىم. مال كۇندىز ۇرلانسا دا، تۇندە ۇرلانسا دا، ونىڭ قۇنىن ماعان تولەتتىڭىز.
40 كۇندىز ىستىقتا، تۇندە سۋىقتا ٴجۇرىپ، ۇيقى كورمەدىم+.
41 ۇيىڭىزدە جيىرما جىل ٴجۇردىم: ون ٴتورت جىل ەكى قىزىڭىز ٷشىن، التى جىل مالىڭىز ٷشىن قىزمەت ەتتىم. ال ٴسىز بولساڭىز ەڭبەكاقىمدى ون رەت وزگەرتتىڭىز+.
42 ەگەر اكەمنىڭ قۇدايى+ — ىبىرايىمنىڭ قۇدايى ٵرى ىسقاق قورقاتىن قۇداي+ — ماعان جاق بولماعاندا، ٴسىز مەنى قۇرالاقان جىبەرەر ەدىڭىز. قۇداي مەنىڭ شەككەن ازابىمدى، اۋىر ەڭبەگىمدى كورىپ، كەشە تۇندە سىزگە ەسكەرتۋ ايتتى+».
43 لابان جاقىپقا بىلاي دەدى: «مىنا ايەلدەر — مەنىڭ قىزدارىم، مىنا بالالار — مەنىڭ نەمەرەلەرىم، مىنا مال دا مەنىكى. كوز الدىڭدا تۇرعاننىڭ ٴبارى مەنىكى جانە مەنىڭ قىزدارىمدىكى. مەن قىزدارىما، ولاردان تۋعان بالالارعا قيانات جاساي الامىن با؟!
44 كەل، ەكەۋمىز كەلىسىم جاساسايىق. بۇل ەكەۋمىزگە كۋا بولسىن».
45 سوندا جاقىپ ٴبىر تاس الىپ، ەسكەرتكىش رەتىندە ورناتتى+.
46 سوسىن ادامدارىنا: «تاس جيناڭدار»،— دەدى. ولار تاس جيناپ، توبە جاسادى. ٴسۇيتىپ، ولار ونىڭ ۇستىندە وتىرىپ تاماق جەدى.
47 لابان توبەنى ەگار-ساحادۋتا*، ال جاقىپ عاليەت* دەپ اتادى.
48 لابان: «وسى تاس توبە ەكەۋىمىزدىڭ ارامىزداعى كەلىسىمنىڭ كۋاسى بولماق»،— دەدى. سوندىقتان دا وسى توبە عاليەت دەپ اتالدى+.
49 سونداي-اق ول كۇزەت مۇناراسى دەپ تە اتالدى. سەبەبى لابان بىلاي دەگەن ەدى: «ٴبىر-بىرىمىزدەن ٴبولىنىپ كەتكەندە، ەحوبا ەكەۋمىزدىڭ ۇستىمىزدەن كۇزەتىپ تۇرسىن.
50 ەگەر قىزدارىما قيانات جاساپ، ۇستەرىنەن تاعى ايەل الاتىن بولساڭ، ەسىڭدە بولسىن، ەشكىم كورمەسە دە، ەكەۋمىزگە كۋا بولعان قۇداي كورەدى».
51 ول تاعى مىنانى ايتتى: «مىناۋ — ەكەۋىمىزدىڭ ارامىزداعى كەلىسىمنىڭ بەلگىسى رەتىندە مەن تۇرعىزعان ەسكەرتكىش تاس پەن تاس توبە.
52 ساعان جاماندىق جاساۋ نيەتىمەن ارى بارمايتىنىما، سەنىڭ دە ماعان جاماندىق جاساۋ نيەتىمەن بەرى وتپەيتىنىڭە وسى تاس توبە مەن ەسكەرتكىش كۋا بولسىن+.
53 ىبىرايىم مەن ناحوردىڭ قۇدايى، ولاردىڭ اكەلەرىنىڭ قۇدايى، ەكەۋىمىزگە تورەلىك ەتسىن». جاقىپ بولسا اكەسى ىسقاق قورقاتىن قۇدايدىڭ الدىندا انت بەردى+.
54 كەيىن جاقىپ تاۋدا قۇرباندىق شالدى، سوسىن تۋىستارىن تاماققا شاقىردى. ولار تاماقتانىپ، تاۋدا تۇنەپ شىقتى.
55 لابان تاڭەرتەڭ ەرتە تۇرىپ، نەمەرەلەرى مەن قىزدارىن ٴسۇيىپ+، باتاسىن بەردى+. سوسىن ۇيىنە قايتىپ كەتتى+.
سىلتەمەلەر
^ سوزبە-ٴسوز «تەرافيم»، ياعني وتباسى تاڭىرلەرى.
^ نەمەسە «تۋىستارىن».
^ سوزبە-ٴسوز «جاقسى نە جامان ايتساڭ دا».
^ سوزبە-ٴسوز «ۇلدارىم».
^ بۇل ارامەي ٴسوزىنىڭ ماعىناسى «كۋا توبە».
^ بۇل ەۆرەي ٴسوزىنىڭ ماعىناسى «كۋا توبە».