مۇسانىڭ 1-جازباسى 32:1—32
32 جاقىپ ٶز جولىمەن كەتتى. جولدا وعان قۇدايدىڭ پەرىشتەلەرى كەزىكتى.
2 جاقىپ ولاردى كورە سالا: «بۇل — قۇداي اسكەرىنىڭ قوسى!»— دەدى دە، سول جەردى ماحانايم* دەپ اتادى.
3 سوسىن جاقىپ سەيىر جەرىندە، ەدوم+ ايماعىندا، تۇرىپ جاتقان+ اعاسى ەساۋعا حابارشىلار جىبەردى.
4 ولاردى اتتاندىرىپ جاتىپ، بىلاي دەپ بۇيىردى: «مەنىڭ قوجايىنىم ەساۋعا: —قۇلىڭىز جاقىپ بىلاي دەپ جاتىر دەڭدەر: «مەن ۇزاق ۋاقىت بويى لابانمەن بىرگە تۇرىپ كەلدىم+.
5 سول جەردە سيىر، ەسەك، قوي سياقتى ٸرىلى-ۇساقتى مالدارعا جانە قۇل-كۇڭدەرگە يە بولدىم+. ەندى، مىنە، قوجايىنىمنىڭ ىقىلاسىنا يە بولعىم كەلىپ، حابار جىبەرىپ وتىرمىن».
6 ٴبىراز ۋاقىتتان كەيىن قايتا ورالعان حابارشىلار جاقىپقا: «اعاڭىز ەساۋعا جولىقتىق. ول الدىڭىزدان شىعۋ ٷشىن، قاسىنا 400 ادامىن ەرتىپ كەلە جاتىر+»،— دەدى.
7 مۇنى ەستىگەن جاقىپ قاتتى قورقىپ، ابىرجىدى+. سودان ول ادامدارىن، ٸرىلى-ۇساقتى مالدارى مەن تۇيەلەرىن ەكى قوسقا ٴبولىپ:
8 «ەگەر ەساۋ ٴبىر قوسقا شاپسا، ەكىنشىسى امان قالار»،— دەدى.
9 سوسىن جاقىپ بىلاي دەپ دۇعا ەتتى: «اتام ىبىرايىمنىڭ، اكەم ىسقاقتىڭ قۇدايى، ۋا، ەحوبا! ماعان: —تۋعان جەرىڭە، تۋىستارىڭا قايتىپ بار، مەن ساعان باتامدى بەرەمىن+،— دەگەن ٶزىڭ ەدىڭ عوي.
10 مەندەي قۇلىڭا كورسەتكەن اينىماس سۇيىسپەنشىلىگىڭ مەن ادالدىعىڭا+ ەش تۇرمايمىن. يوردان وزەنىنەن وتكەندە، قولىمدا جالعىز تاياق بولاتىن، ال ەندى، مىنە، ەكى قوسقا جەتەرلىك مال-جانىم بار+.
11 مەنى اعام ەساۋدىڭ قولىنان قۇتقارا كورشى+! ول كەلىپ، ماعان، ايەلدەر مەن بالالارعا قيانات جاساي ما دەپ قورقامىن+.
12 ٶزىڭ ماعان: —ساعان باتامدى بەرىپ، ۇرپاعىڭدى تەڭىز جاعاسىنداعى قۇم قيىرشىقتارىنداي سانسىز كوپ ەتەمىن+،— دەپ ەدىڭ عوي».
13 جاقىپ سول جەردە تۇنەپ شىقتى. ول مال-مۇلكىنەن اعاسى ەساۋعا سي-تارتۋ جاساۋ ٷشىن+،
14 200 ەشكى مەن 20 تەكە، 200 قوي مەن 20 قوشقار،
15 30 بوتالى تۇيە، 40 سيىر مەن 10 بۇقا، 20 ۇرعاشى جانە 10 ەركەك ەسەكتى ٴبولىپ الدى+.
16 سودان كەيىن قىزمەتشىلەرىنە وسىلاردان ٴبىر-ٴبىر تابىن مەن وتار تابىستاپ: «مەنىڭ الدىما ٴتۇسىپ، وزەن اڭعارىنان وتىڭدەر دە، وتار-تابىنداردىڭ اراسىندا ەداۋىر قاشىقتىق قالدىرىپ، ايداپ وتىرىڭدار»،— دەدى.
17 ٴبىرىنشى بولىپ جۇرەتىن قىزمەتشىسىنە مىنانى ايتتى: «اعام ەساۋ كەزىگىپ: —قوجايىنىڭ كىم، قايدا بارا جاتىرسىڭ، ايداعان مالىڭ كىمدىكى؟— دەپ سۇراسا،
18 بىلاي دەپ جاۋاپ بەر: —بۇلار قۇلىڭىز جاقىپتىكى. بۇل — قوجايىنىم ەساۋعا ارناعان ونىڭ سيى+. ٶزى بولسا ارتىمىزدا كەلە جاتىر».
19 جاقىپ ەكىنشى جانە ٷشىنشى قىزمەتشىسىنە دە، ٵر وتاردىڭ سوڭىندا بارا جاتقانداردىڭ بارىنە دە نۇسقاۋ بەرىپ، بىلاي دەدى: «ەساۋدى كەزدەستىرگەندە وسىنى ايتىڭدار.
20 وعان تاعى دا: —قۇلىڭىز جاقىپ ارتىمىزدا كەلە جاتىر،— دەڭدەر». ويتكەنى ول: «اعامنىڭ كوزىنە كورىنبەي تۇرىپ، وسى سيلىقتارمەن اشۋىن باسايىن+. سوندا ول مەنى جىلى جۇزبەن قارسى الار»،— دەپ ويلادى.
21 ٴسۇيتىپ، قىزمەتشىلەرى سيلىقتارمەن وزەن اڭعارىنىڭ* ارعى جاعىنا ٶتتى، ال ٶزى قوستا تۇنەپ قالدى.
22 سول ٴتۇنى جاقىپ ورنىنان تۇرىپ، ەكى ايەلىن+، ەكى كۇڭى+ مەن ون ٴبىر ۇلىن ەرتىپ، يابوك+ وزەنىنىڭ ساياز جەرىنەن ارعى بەتكە ٶتتى.
23 سونىمەن، جاقىپ ولاردى جانە بار مال-مۇلكىن وزەن اڭعارىنان* وتكىزدى.
24 جاقىپ جالعىز قالعاندا، ٴبىر كىسى پايدا بولىپ، ونىمەن تاڭ اتقانشا كۇرەستى+.
25 ول جاقىپتى جەڭە الماي جاتقان سوڭ، ونىڭ جامباسىنا قولىن تيگىزىپ، بۋىنىن شىعارىپ جىبەردى+.
26 سوسىن ول: «مەنى قويا بەر، تاڭ اتىپ قالدى»،— دەگەندە، جاقىپ: «ماعان باتاڭدى بەرمەيىنشە، جىبەرمەيمىن+»،— دەدى.
27 الگى كىسى: «اتىڭ كىم؟»— دەپ سۇراعاندا، ول: «جاقىپ»،— دەپ جاۋاپ قاتتى.
28 «بۇدان بىلاي اتىڭ جاقىپ ەمەس، يسرايل*+ بولادى. ويتكەنى سەن قۇدايمەن جانە ادامدارمەن كۇرەسىپ+، جەڭىپ شىقتىڭ»،— دەدى ول.
29 جاقىپ ودان: «ايتشى، ەسىمىڭ كىم؟»— دەپ سۇرادى. سوندا ول: «ەسىمىمدى نەگە سۇرايسىڭ+؟»— دەدى دە، وعان باتاسىن بەردى.
30 سوندىقتان جاقىپ: «قۇدايمەن بەتپە-بەت جۇزدەستىم، ٴبىراق جانىم امان قالدى+»،— دەپ، سول جەرگە پەنيەل*+ دەگەن ات بەردى.
31 جاقىپ پەنۋەلدىڭ* قاسىنان ٶتىپ بارا جاتقاندا، كۇن ۇياسىنان شىقتى. جامباسى زاقىمدانعاندىقتان، ول اقساڭداپ جۇرەتىن بولدى+.
32 الگى كىسى قولىن تيگىزىپ، جاقىپتىڭ جامباس بۋىنىنداعى ٴسىڭىردى زاقىمداعاندىقتان، يسرايلدىڭ ۇلدارى وسى كۇنگە دەيىن مالدىڭ جامباسىنداعى ٴسىڭىردى جەمەيدى.
سىلتەمەلەر
^ ماعىناسى «ەكى قوس».
^ تۇسىندىرمەنى قاراڭىز.
^ تۇسىندىرمەنى قاراڭىز.
^ ماعىناسى «قۇدايمەن كۇرەسۋشى (قايسار)» نەمەسە «قۇداي كۇرەسەدى».
^ ماعىناسى «قۇدايدىڭ ٴجۇزى».
^ نەمەسە «پەنيەل».
