مۇسانىڭ 1-جازباسى 43:1—34
43 ەلدە اشتىق ۇدەپ تۇرعان ەدى+.
2 مىسىردان اكەلىنگەن استىق تاۋسىلعاندا+، جاقىپ ۇلدارىنا: «تاعى دا بارىپ، ٴبىراز استىق ساتىپ اكەلىڭدەر»،— دەدى.
3 بۇعان ياھۋدا بىلاي دەدى: «الگى كىسى: —ىنىلەرىڭدى اكەلمەسەڭدەر، كوزىمە كورىنبەڭدەر،— دەپ ناقتى ەسكەرتكەن بولاتىن+.
4 ەگەر ٸنىمىزدى بىزبەن جىبەرسەڭىز، ازىق اكەلۋگە بارامىز.
5 ال جىبەرمەسەڭىز، بارمايمىز، ويتكەنى ول بىزگە: —ىنىلەرىڭدى اكەلمەسەڭدەر، كوزىمە كورىنبەڭدەر+،— دەپ ايتقان».
6 سوندا يسرايل+: «مەنى وسىنشا ازاپقا سالىپ، ٸنىمىز بار دەپ نەگە عانا ايتتىڭدار؟»— دەپ كەيىدى.
7 ولار بولسا: «الگى ادام ٴبىز جايلى، تۋىستارىمىز جايلى: —اكەلەرىڭ ٴتىرى مە؟ باسقا دا باۋىرلارىڭ بار ما؟— دەپ ناقتى سۇراعان سوڭ، ايتقان ەدىك+. ىنىلەرىڭدى اكەلىڭدەر دەيتىنىن ٴبىز قايدان بىلەيىك+؟»— دەدى.
8 ياھۋدا اكەسى يسرايلدى كوندىرمەك بولىپ: «بالانى مەنىمەن جىبەرىڭىز+. ٶزىمىز دە، بالا-شاعامىز دا+ اشتان ولمەسىن دەسەڭىز، جولعا شىعايىق+.
9 بالانىڭ قاۋىپسىزدىگى ٷشىن مەن باسىممەن جاۋاپ بەرەمىن+. ەگەر ونى وزىڭىزگە قايتا اكەلمەسەم، ٶمىر بويى ٴسىزدىڭ الدىڭىزدا كىنالى بولىپ وتەيىن.
10 ٴبىز ۋاقىتتى وسىلاي سوزا بەرمەگەنىمىزدە، سول جاققا ەكى رەت بارىپ كەلگەن بولار ەدىك»،— دەدى.
11 سوندا يسرايل ٶز ۇلدارىنا بىلاي دەپ ٴتىل قاتتى: «ولاي بولسا، مەيلى. وندا بىلاي ىستەڭدەر: ەلدەگى ەڭ جاقسى ونىمدەردەن — ازداپ بالزام+ مەن بال، لادان، شايىرلى قابىق+، پىستە مەن بادام دانىنەن — قاپتارىڭا سالىپ، الگى كىسىگە سي رەتىندە اپارىڭدار+.
12 سونداي-اق ەكى ەسە كوپ اقشا الىڭدار. قاپتارىڭنان تابىلعان اقشانى دا الا بارىڭدار+، بالكىم، ولار قاتەلەسكەن شىعار.
13 ىنىلەرىڭدى ەرتىپ، الگى كىسىگە قايتا بارىڭدار.
14 قۇدىرەتى شەكسىز قۇداي سەندەرگە سول ادامنىڭ راقىمىن ٴتۇسىرتىپ، وعان قاماۋداعى باۋىرلارىڭدى دا، بەنياميندى دە بوساتتىرا كورسىن. ال ماعان بالاسىز قالۋ كەرەك بولسا، سولاي-اق بولسىن+!»
15 جاقىپتىڭ ۇلدارى قولدارىنا سي-تارتۋ جانە ەكى ەسە كوپ اقشا الىپ، قاستارىنا بەنياميندى ەرتىپ، مىسىرعا جول تارتتى. ٴسۇيتىپ، تاعى دا ٴجۇسىپتىڭ الدىنا باردى+.
16 ٴجۇسىپ ولاردىڭ اراسىنان بەنياميندى كورگەندە، ٷي باسقارۋشىسىنا: «مىنا ادامداردى ۇيگە الىپ بار. سوسىن مال سويىپ، تاماق ازىرلە. بۇگىن ولار تۇسكى استى مەنىمەن بىرگە ىشەدى»،— دەدى.
17 ٷي باسقارۋشىسى دەرەۋ ٴجۇسىپتىڭ ايتقانىن ىستەپ+، كەلگەن ادامداردى ونىڭ ۇيىنە اكەتتى.
18 ٴجۇسىپتىڭ ۇيىنە كەلە جاتقانىن كورگەندە، ولار قورقىپ، ٴبىر-بىرىنە: «ٴبىزدى وتكەن جولى قابىمىزعا قايتا سالىپ جىبەرگەن اقشاعا بولا وسىندا اكەلە جاتىر. ەندى بىزگە كۇش كورسەتىپ، قۇلعا اينالدىرىپ، ەسەكتەرىمىزدى تارتىپ الاتىن بولدى!»— دەستى+.
19 ٴجۇسىپتىڭ ٷيىنىڭ كىرەبەرىسىنە كەلگەندە، ولار ٷي باسقارۋشىسىنىڭ قاسىنا كەلىپ،
20 بىلاي دەدى: «مىرزا، قۇلاق سالىڭىزشى! ٴبىز وتكەن جولى دا كەلىپ، ازىق العانبىز+.
21 قايتار جولدا تۇنەيتىن جەرگە توقتاپ، قاپتارىمىزدى اشساق، ٴارقايسىسىمىزدىڭ تولەگەن اقشامىز تۇگەلىمەن قابىمىزدىڭ بەتىندە جاتىر ەكەن+. سول اقشانى ٶز قولىمىزبەن قايتارايىق دەپ ەدىك.
22 بۇل جولى دا ازىق الۋ ٷشىن اقشا الا كەلدىك. ٴبىراق الگى اقشالاردى قابىمىزعا كىمنىڭ سالعانىن بىلمەيمىز+».
23 سوندا ٷي باسقارۋشىسى: «قورىقپاڭدار، ٴبارى دۇرىس. استىقتىڭ اقشاسىن تولەگەندەرىڭدى بىلەمىن. ال قاپتارىڭا قازىنانى سالىپ جىبەرگەن — سەندەردىڭ جانە اكەلەرىڭنىڭ قۇدايى»،— دەدى. سوسىن ولارعا شيموندى الىپ كەلدى+.
24 ٷي باسقارۋشىسى قوناقتاردى ٴجۇسىپتىڭ ۇيىنە كىرگىزىپ، اياقتارىن جۋاتىن سۋ بەردى. ەسەكتەرىنىڭ الدىنا جەم سالدى.
25 ولار اكەلگەن سيلىقتارىن+ تۇسكە قاراي ٴجۇسىپتىڭ كەلۋىنە دايىنداپ قويدى، ويتكەنى ونىمەن بىرگە تۇستەنەتىندەرىن ەستىگەن ەدى+.
26 ٴجۇسىپ كەلگەندە، ولار ۇيىنە كىرىپ، سيلىقتارىن ۇسىندى دا، جەرگە باس ۇرىپ تاعزىم ەتتى+.
27 ولاردىڭ حال-جاعدايىن سۇراعان سوڭ، ٴجۇسىپ: «قارت اكەمىز بار دەپ ەدىڭدەر عوي، ونىڭ جاعدايى قالاي؟ كوزى ٴتىرى مە؟»— دەپ سۇرادى+.
28 بۇعان ولار: «تاقسىر، اكەمىز ٴتىرى، جاعدايى جاقسى»،— دەپ جاۋاپ بەردى دە، تاعى دا جەرگە باس ۇرىپ تاعزىم ەتتى+.
29 ٴجۇسىپ ٶز اناسىنان تۋعان ٸنىسى بەنياميندى+ كورىپ: «ماعان ايتقان كەنجە ىنىلەرىڭ وسى بولار+؟»— دەپ سۇرادى دا، وعان بۇرىلىپ: «قۇداي ساعان شاپاعاتىن ٴتۇسىرسىن، بالام!»— دەدى.
30 تۋعان ٸنىسىن كورگەندە، ٴجۇسىپ ىشتەي قاتتى تولقىپ كەتتى. كوزىنە جاس ۇيىرىلگەن ول اسىعىس شىعىپ كەتتى دە، وڭاشا بولمەگە بارىپ، جىلاپ الدى+.
31 سودان كەيىن بەتىن جۋىپ، بويىن جيىپ الدى دا، كەرى ورالدى. ٴسۇيتىپ، قىزمەتشىلەرىنە: «تاماق اكەلىڭدەر»،— دەدى.
32 سوندا جۇسىپكە ٶز الدىنا، اعالارىنا ٶز الدىنا جانە سونداعى مىسىرلىقتارعا ٶز الدىنا تاماق بەرىلدى. سەبەبى مىسىرلىقتار ەۆرەيلەرمەن بىرگە تاماقتانبايتىن، بۇل ولار ٷشىن جيىركەنىشتى ەدى+.
33 باۋىرلارى ٴجۇسىپتىڭ قارسى الدىنا جاسىنا قاراي — تۇڭعىشتىق جولىنا+ قاراي الدىمەن ۇلكەنى، سودان كەيىن كىشىلەرى — وتىرعىزىلدى. بۇعان باۋىرلارى تاڭعالىسىپ، ٴبىر-بىرىنە قاراستى.
34 ٴجۇسىپ ٶز داستارقانىنان ولارعا ارناپ تاباق تارتقىزدى، بەنياميننىڭ تاباعىنا باسقالاردىكىنەن بەس ەسە ارتىق سالعىزدى+. وسىلايشا ٴبارى مول داستارقاننان تويعاندارىنشا ٸشىپ-جەدى.
