مۇسانىڭ 1-جازباسى 44:1—34
44 كەيىنىرەك ٴجۇسىپ ٷي باسقارۋشىسىنا: «بۇل ادامداردىڭ قاپتارىنا كوتەرگەنىنشە استىق تولتىر دا، ٴارقايسىسىنىڭ اقشاسىن قابىنىڭ اۋزىنا سالىپ قوي+.
2 ال كەنجەلەرىنىڭ قابىنا اقشامەن قوسا مەنىڭ كۇمىس توستاعانىمدى سال»،— دەدى. ول ٴبارىن ٴجۇسىپ ايتقانداي ىستەدى.
3 ەرتەڭىنە تاڭ بوزارا بەرە ولاردى جۇك تيەلگەن ەسەكتەرىمەن بىرگە جولعا شىعارىپ سالدى.
4 ولار قالادان ۇزاپ شىقپاي تۇرىپ، ٴجۇسىپ ٷي باسقارۋشىسىنا بىلاي دەدى: «تۇر دا، الگىلەردىڭ سوڭىنان قۋ! قۋىپ جەتكەندە، ولارعا: —نەگە سەندەر جاقسىلىققا جاماندىقپەن قايتاردىڭدار؟
5 نە ٷشىن قوجايىنىمنىڭ سۋسىن ىشەتىن توستاعانىن ۇرلاپ اكەتتىڭدەر؟ قوجايىنىم ونىمەن بال اشادى. سەندەردىڭ بۇل ىستەرىڭ جامان بولدى،— دەپ ايت».
6 ٷي باسقارۋشىسى ولاردى قۋىپ جەتىپ، وسى سوزدەردى جەتكىزدى.
7 سوندا ولار: «قوجايىنىمىز نەگە بۇلاي دەيدى؟ قۇلدارىڭىز مۇنداي جاماندىق جاساۋدان اۋلاق.
8 ٴبىز ٴتىپتى قابىمىزدان تابىلعان اقشانى سوناۋ قاناحان جەرىنەن قايتا اكەلدىك قوي+. ەندەشە قالايشا ٴبىز قوجايىنىمىزدىڭ ۇيىنەن كۇمىس نە التىن ۇرلايمىز؟
9 كۇمىس توستاعان قايسىسىمىزدان تابىلسا، سول ٶلىم قۇشسىن، ال قالعانىمىز قوجايىنىمىزعا قۇل بولايىق»،— دەدى.
10 ٷي باسقارۋشىسى: «جارايدى، ايتقاندارىڭداي بولسىن. توستاعان كىمنەن تابىلسا، سول ماعان قۇل بولادى، ال قالعاندارىڭ ايىپسىز بولاسىڭدار»،— دەدى.
11 سول كەزدە ولار تەزدەتىپ قاپتارىن جەرگە ٴتۇسىرىپ، اركىم ٶز قابىنىڭ اۋزىن اشتى.
12 ٷي باسقارۋشىسى ۇلكەنىنەن باستاپ كىشىسىنە دەيىن — ٴبارىنىڭ قاپتارىن ٴتىنتىپ شىقتى. توستاعان بەنياميننىڭ قابىنان تابىلدى+.
13 سوندا ولار كيىمدەرىنىڭ ٶڭىرىن ايىرا جىرتتى. جۇكتەرىن ەسەكتەرىنە ارتىپ، قالاعا قايتا ورالدى.
14 ياھۋدا+ باۋىرلارىمەن بىرگە ٴجۇسىپتىڭ ۇيىنە كەلگەندە، ول ٵلى سوندا ەدى. ولار ونىڭ الدىنا كەلىپ جىعىلدى+.
15 ٴجۇسىپ: «بۇل نە ىستەگەندەرىڭ؟ مەندەي ادامنىڭ بال اشىپ، ٴبارىن انىقتاي الاتىنىن بىلمەپ پە ەدىڭدەر؟»— دەدى+.
16 سوندا ياھۋدا: «قوجايىنىمىزعا نە ايتا الامىز؟ مۇنى قالاي ٴتۇسىندىرۋدى دە بىلمەي تۇرمىز. ٶزىمىزدىڭ ادال ەكەنىمىزدى قالاي دالەلدەسەك ەكەن؟ قۇداي قۇلدارىڭىزدىڭ كىناسىن اشكەرەلەپ وتىر+. ەندى ٴبىز دە، قابىنان توستاعان تابىلعان ادام دا ٴسىزدىڭ قۇلىڭىزبىز»،— دەدى.
17 الايدا ٴجۇسىپ: «جوق، مەن ولاي ەتپەيمىن! توستاعان كىمنەن تابىلسا، سول عانا ماعان قۇل بولادى+. ال قالعاندارىڭ اكەلەرىڭە تىنىشتىقپەن قايتا بەرىڭدەر»،— دەپ جاۋاپ قاتتى.
18 سوندا ياھۋدا ٴجۇسىپتىڭ قاسىنا كەلىپ، بىلاي دەدى: «قوجايىن، وتىنەمىن، ٴبىراۋىز ٴسوز ايتۋعا رۇقسات ەتىڭىز، قۇلىڭىزعا اشۋلانا كورمەڭىز، ويتكەنى ٴسىز پەرعاۋىنعا پاراپار ادامسىز+.
19 وتكەن جولى قوجايىنىم قۇلدارىنان: —اكەلەرىڭ، باسقا دا باۋىرلارىڭ بار ما؟— دەپ سۇراعان.
20 سوندا ٴبىز: —ەگدە تارتقان اكەمىز جانە ونىڭ قارتايعان شاعىندا كورگەن كەنجە ۇلى بار+. ٴبىراق ونىڭ ٴبىر انادان تۋعان اعاسى قايتىس بولىپ، جالعىز قالدى+. اكەسى ونى قاتتى جاقسى كورەدى،— دەپ جاۋاپ بەرگەن ەدىك.
21 ال ٴسىز: —ونى ماعان الىپ كەلىڭدەر، ٶز كوزىممەن كورەيىن+،— دەگەن بولاتىنسىز.
22 ٴبىراق ٴبىز قوجايىنىمىزعا: —بالا اكەسىن قالدىرىپ كەتە المايدى. ول قاسىنان كەتسە، اكەسى ٶلىپ قالادى+،— دەگەندە،
23 ٴسىز قۇلدارىڭىزعا: —كەنجە ىنىلەرىڭ سەندەرمەن كەلمەسە، كوزىمە قايتا كورىنبەڭدەر،— دەپ بۇيىردىڭىز+.
24 ٴبىز ٴسىزدىڭ قۇلىڭىزعا، اكەمىزگە، بارىپ، قوجايىنىمىزدىڭ سوزدەرىن جەتكىزدىك.
25 كەيىنىرەك اكەمىز: —تاعى دا بارىپ، ٴبىراز ازىق ساتىپ اكەلىڭدەر،— دەگەندە+،
26 ٴبىز: —ول جاققا بارا المايمىز. كەنجە ٸنىمىزدى بىزبەن جىبەرسەڭىز عانا بارامىز، ويتكەنى ونسىز ول كىسىنىڭ ٴجۇزىن كورە المايمىز+،— دەدىك.
27 سوندا ٴسىزدىڭ قۇلىڭىز، مەنىڭ اكەم: —سەندەر ايەلىمنىڭ ماعان ەكى ۇل تۋىپ بەرگەنىن جاقسى بىلەسىڭدەر+.
28 بىرەۋىنەن ايىرىلعاندا: «ول جىرتقىش اڭعا جەم بولىپتى-اۋ+!»— دەدىم. سودان بەرى ونى كورگەن ەمەسپىن.
29 ەگەر مىنا ۇلىمدى دا الىپ كەتىپ، ول ٴبىر پالەگە ۇشىراسا، شاشىم اعارعان شاعىمدا مەنى قايعىعا باتىرىپ، كورگە*+ تىعاسىڭدار،— دەپ كونبەگەن+.
30 قوجايىن، اكەمە جانىنداي جاقسى كورەتىن وسى بالاسىن الىپ قايتپاسام،
31 ونىڭ قاسىمىزدا جوق ەكەنىن كورسە، اكەم سول ساتتە ولەدى. سوندا ٴبىز، ٴسىزدىڭ قۇلدارىڭىز، اق شاشتى اكەمىزدى قايعىعا باتىرىپ، كورگە* كىرگىزەمىز.
32 بالانىڭ قاۋىپسىزدىگىنە باسىممەن جاۋاپ بەرەتىنىمدى ايتىپ، قۇلىڭىز ٶز اكەسىنە: —ەگەر ونى سىزگە قايتىپ اكەلمەسەم، ٶمىر بويى الدىڭىزدا كىنالى بولىپ وتەيىن،— دەگەن بولاتىن+.
33 سوندىقتان بالانىڭ ورنىنا قوجايىنىما مەن قۇل بولايىن، ال ونى اعالارىمەن ۇيىنە قايتارا كورىڭىز.
34 اكەمنىڭ الدىنا بالاسىز قالاي بارماقپىن؟ اكەمنىڭ باسىنا تۇسكەن قاسىرەتتى كورۋگە قالاي ٴداتىم شىداماق؟!»
سىلتەمەلەر
^ ەۆرەيشە «شەول». تۇسىندىرمەنى قاراڭىز.
^ ەۆرەيشە «شەول». تۇسىندىرمەنى قاراڭىز.
