مۇسانىڭ 1-جازباسى 45:1—28
45 سوندا ٴجۇسىپ قىزمەتشىلەرىنىڭ الدىندا ٶزىن ۇستاي المايتىنىن سەزىپ+، ولارعا: «ٴبارىڭ دە قاسىمنان كەتىڭدەر!»— دەپ ايقايلادى. باۋىرلارىمەن وڭاشا قالعاندا، ولارعا ٶزىنىڭ كىم ەكەنىن اشتى+.
2 ٴجۇسىپ قاتتى جىلاي باستادى، ونى ٴتىپتى سىرتتاعى مىسىرلىقتار ەستىدى. بۇل حابار پەرعاۋىننىڭ سارايىنا دا جەتتى.
3 ٴجۇسىپ باۋىرلارىنا: «مەن ٴجۇسىپپىن. اكەم ٵلى ٴتىرى مە؟»— دەدى. ٴبىراق قاتتى ابىرجىعان باۋىرلارى ەشتەڭە ايتا المادى.
4 ٴجۇسىپ ولارعا: «بەرى جاقىنداڭدارشى»،— دەگەندە، باۋىرلارى ونىڭ قاسىنا كەلدى.
ٴجۇسىپ بىلاي دەدى: «مەن ٴجۇسىپپىن، وزدەرىڭ مىسىرلىقتارعا ساتىپ جىبەرگەن ىنىلەرىڭمىن عوي+.
5 ٴبىراق ەندى قايعىرماڭدار، مەنى وسىندا ساتىپ جىبەرگەندەرىڭ ٷشىن ٴبىر-ٴبىرىڭدى جازعىرماڭدار. سەبەبى قۇداي ومىرلەرىڭدى ساقتاپ قالۋ ٷشىن بۇل جەرگە مەنى سەندەردەن بۇرىن جىبەردى+.
6 ەلدى اشارشىلىق جايلاعانىنا ەكى جىل بولدى+، ٵلى بەس جىل بويى جەر جىرتىلمايدى، ەگىن دە ورىلمايدى.
7 قۇداي ۇلى ىسپەن ومىرلەرىڭدى قۇتقارىپ، جەر بەتىندە ارتتارىڭنان ۇرپاق* قالدىرۋ ٷشىن+ مەنى وسىندا سەندەردەن بۇرىن جىبەردى.
8 ولاي بولسا، مەنى مۇندا سەندەر ەمەس، قۇداي جىبەردى. ول مەنى پەرعاۋىننىڭ باس ٴۋازىرى*، سارايىنىڭ قوجايىنى جانە بۇكىل مىسىر ەلىنە بيلەۋشى ەتىپ قويدى+.
9 تەزىرەك اكەمە بارىپ، مىنانى ايتىڭدار: —ۇلىڭىز ٴجۇسىپ بىلاي دەپ سالەم جولدادى: «قۇداي مەنى بۇكىل مىسىر ەلىنە ٵمىرشى ەتىپ تاعايىندادى+. كىدىرمەي ماعان كەلىڭىز+.
10 گوشەن جەرىنە+ قونىستانىپ، ۇلدارىڭىز بەن نەمەرەلەرىڭىزدى، ٸرىلى-ۇساقتى مالدارىڭىز بەن يەلىگىڭىزدەگىنىڭ ٴبارىن اكەلىپ، مەنىڭ قاسىمدا تۇرىڭىز.
11 اشتىق ٵلى بەس جىلعا سوزىلادى. وسى كەزدىڭ بارىندە ٴسىزدى ازىق-تۇلىكپەن قامتاماسىز ەتەمىن+. ايتپەسە ٶزىڭىز دە، ٷي ٸشىڭىز دە جوقشىلىققا ۇشىراپ، بار مال-مۇلكىڭىزدەن تۇك قالمايدى».
12 سەندەرمەن سويلەسىپ تۇرعان شىنىمەن مەن ەكەنىمدى ٸنىم بەنيامين دە، وزدەرىڭ دە كورىپ تۇرسىڭدار+.
13 مەنىڭ مىسىرداعى بار اتاق-ابىرويىمدى جانە كورگەن-بىلگەندەرىڭنىڭ ٴبارىن اكەمە ايتىپ بەرىڭدەر. ال ەندى تەزدەتىپ بارىپ، اكەمدى وسىندا اكەلىڭدەر».
14 سوسىن ٴجۇسىپ ٸنىسى بەنياميندى باۋىرىنا باسىپ، ەگىلە جىلادى. بەنيامين دە ونى موينىنان قۇشاقتاپ جىلادى+.
15 كەيىن ٴجۇسىپ اعالارىنىڭ بەتىنەن ٴسۇيىپ، قۇشاقتاپ جىلادى. سودان كەيىن عانا باۋىرلارى ونىمەن سويلەسە باستادى.
16 «ٴجۇسىپتىڭ باۋىرلارى كەلىپتى» دەگەن حابار پەرعاۋىننىڭ سارايىنا جەتتى. بۇعان پەرعاۋىن دا، ونىڭ قىزمەتشىلەرى دە قۋانىشتى بولدى.
17 پەرعاۋىن جۇسىپكە بىلاي دەدى: «باۋىرلارىڭا: —ەسەكتەرىڭە جۇك ارتىپ، قاناحان ەلىنە ورالىڭدار،
18 ٴسۇيتىپ، اكەلەرىڭدى جانە ٷي ىشتەرىڭدى الىپ ماعان كەلىڭدەر. مەن سەندەرگە مىسىردىڭ ەڭ جاقسىسىن بەرەمىن، سەندەر ەڭ قۇنارلى جەردىڭ ٶنىمىن جەيتىن بولاسىڭدار+،— دەپ ايت.
19 سونداي-اق ولارعا بىلاي دەۋىڭدى بۇيىرامىن+: —مىسىردان اربالار+ الا كەتىپ، وعان بالا-شاعالارىڭدى، ايەلدەرىڭدى جانە اكەلەرىڭدى وتىرعىزىپ اكەلىڭدەر+.
20 مال-مۇلىكتەرىڭدى ۋايىمداماڭدار+، ويتكەنى مىسىر ەلىنىڭ ەڭ جاقسىسى سەندەردىكى بولادى».
21 يسرايلدىڭ ۇلدارى وسى ايتىلعانداردى ىستەدى. پەرعاۋىننىڭ بۇيرىعى بويىنشا، ٴجۇسىپ باۋىرلارىنا اربالار مەن جول ازىعىن بەردى.
22 سونداي-اق ٴارقايسىسىنا ٴبىر-بىردەن جاڭا كيىم، بەنيامينگە بولسا 300 كۇمىس اقشا مەن بەس جاڭا كيىم سيلادى+.
23 ال اكەسىنە ون ەسەككە ارتىلعان مىسىردىڭ ەڭ جاقسى نارسەلەرىن، تاعى ون ۇرعاشى ەسەككە استىق، نان، جول ازىعىن ارتىپ جىبەردى.
24 ٴجۇسىپ باۋىرلارىن شىعارىپ سالىپ جاتىپ: «جول-جونەكەي ٶزارا كەرىسپەڭدەر»+،— دەدى. وسىلايشا ولار ەلدەرىنە ٴجۇرىپ كەتتى.
25 ولار مىسىردان شىعىپ، قاناحان جەرىندەگى اكەلەرى جاقىپقا كەلدى دە،
26 وعان: «ٴجۇسىپ ٴتىرى ەكەن! ول بۇكىل مىسىر ەلىن بيلەپ وتىر+!»— دەدى. بۇل سوزگە سەنبەگەندىكتەن، اكەلەرىنىڭ جۇرەگى بۇلك ەتپەدى+.
27 ٴبىراق ولار ٴجۇسىپتىڭ ايتقاندارىن تۇگەل بايانداپ بەرگەندە جانە وزىنە ارناپ جىبەرگەن اربالاردى كورگەندە عانا، جاقىپتىڭ رۋحى جاندانا باستادى.
28 سوندا يسرايل قۋانىپ: «ەندى كوزىم جەتتى! ۇلىم ٴجۇسىپ ٴتىرى ەكەن! ولمەي تۇرعاندا بارىپ، ونى كورىپ قالايىن+!»— دەدى.
