مۇسانىڭ 2-جازباسى 14:1—31
14 ەحوبا مۇساعا بىلاي دەدى:
2 «يسرايلدىكتەرگە: —كەرى بۇرىلىپ، ميعدول مەن تەڭىزدىڭ ورتاسىنداعى پي-حاحيروتتىڭ الدىنا، باعال-سەپونعا+ قاراما-قارسى تەڭىز جاعالاۋىنا قوس تىكسىن،— دەپ ايت.
3 سوندا پەرعاۋىن: —يسرايلدىكتەر اداسىپ كەتىپ، ٴشول دالادان شىعا الماي ٴجۇر،— دەيتىن بولادى.
4 مەن پەرعاۋىنعا جۇرەگىن قاسارىستىرۋعا جول بەرەمىن+. ول سەندەردىڭ سوڭدارىڭنان قۋادى. ٴبىراق مەن پەرعاۋىندى جانە ونىڭ كۇللى اسكەرىن تاس-تالقان ەتىپ، داڭقىمدى شىعارامىن+. سوندا مىسىرلىقتار ەحوبانىڭ كىم ەكەنىن بىلەتىن بولادى+». يسرايلدىكتەر ٴدال سولاي ىستەدى.
5 كەيىنىرەك مىسىر پاتشاسىنا يسرايلدىكتەر قاشىپ كەتتى دەگەن حابار جەتتى. سول-اق ەكەن، پەرعاۋىن مەن قىزمەتشىلەرى حالىقتى جىبەرگەندەرىنە وكىنىپ+: «بۇل نە ىستەگەنىمىز؟ بىزگە قۇل بولىپ جۇرگەن يسرايل حالقىن نەگە بوساتىپ جىبەردىك؟»— دەستى.
6 پەرعاۋىن سوعىس اربالارىن جاساقتاپ، قاسىنا اسكەرىن جينادى+.
7 سوسىن 600 تاڭداۋلى سوعىس ارباسىن، سونداي-اق مىسىردىڭ باسقا دا اربالارىن قوسىپ الدى. اربالاردىڭ ٴارقايسىسىندا جاۋىنگەرلەر بولدى.
8 ەحوبا مىسىر پاتشاسى پەرعاۋىنعا جۇرەگىن قاسارىستىرۋعا جول بەرگەندىكتەن، ول يسرايلدىكتەردى وكشەلەي قۋا جونەلدى. ال بۇل ۋاقىتتا يسرايلدىكتەر مىسىر جەرىنەن نىق سەنىممەن شىعىپ بارا جاتقان ەدى+.
9 ولاردىڭ سوڭىنا تۇسكەن مىسىرلىقتار+ — سوعىس اربالارى مەن سالت اتتىلارى، پەرعاۋىننىڭ اسكەرى — يسرايلدىكتەردى پي-حاحيروتتىڭ جانىندا، باعال-سەپونعا قاراما-قارسى تەڭىز جاعالاۋىندا قوس تىگىپ وتىرعان جەرىندە قۋىپ جەتتى.
10 پەرعاۋىن جاقىنداپ قالعاندا، يسرايلدىكتەر وزدەرىن قۋىپ كەلە جاتقان مىسىرلىقتاردى كورىپ، زارە-قۇتتارى قالماي، ەحوباعا جالبارىنا باستادى+.
11 ولار مۇساعا: «ٴبىزدى ٴشول دالاعا اكەلىپ ولتىرەتىندەي، مىسىردا مولا تابىلماي قالدى ما+؟! ٴبىزدى نەگە عانا مىسىردان الىپ شىقتىڭ؟!
12 مىسىردا جۇرگەندە، ساعان: —ٴبىزدى جايىمىزعا قالدىر، مىسىرلىقتارعا قىزمەت ەتە بەرەيىك،— دەمەپ پە ەدىك؟ مىنا ٴشول دالادا ولگەننەن گورى، مىسىرلىقتارعا قىزمەت ەتىپ جۇرگەنىمىز ارتىق ەدى عوي+!»— دەدى.
13 سوندا مۇسا حالىققا: «قورىقپاڭدار+. بەرىك تۇرىڭدار، ەحوبانىڭ بۇگىن سەندەردى قالاي قۇتقاراتىنىن كورىڭدەر+. كوز الدارىڭداعى مىنا مىسىرلىقتاردى ەندى قايتىپ ەشقاشان كورمەيسىڭدەر+.
14 سەندەر ٷشىن ەحوبانىڭ ٶزى شايقاسادى+. ال سەندەر تىنىش تۇراتىن بولاسىڭدار»،— دەپ جاۋاپ بەردى.
15 ەحوبا مۇساعا بىلاي دەپ ٴتىل قاتتى: «نەگە ماعان جالبارىنىپ تۇرسىڭ؟ يسرايلدىكتەرگە قوستارىن جيناسىن دەپ ايت.
16 ال ٶزىڭ تاياعىڭدى الىپ، قولىڭدى تەڭىزگە قاراي سوز دا، سۋدى قاق ايىر. سوندا يسرايلدىكتەر تەڭىز ورتاسىنان اشىلعان قۇرعاق جەرمەن ارعى بەتكە وتەدى.
17 مەن بولسام مىسىرلىقتاردىڭ جۇرەگىنىڭ قاسارىسۋىنا جول بەرەمىن. سول سەبەپتى ولار سوڭدارىڭنان قۋا جونەلەدى. سوندا مەن پەرعاۋىندى جانە ونىڭ كۇللى اسكەرىن، سوعىس اربالارى مەن سالت اتتىلارىن تاس-تالقان ەتىپ، داڭقىمدى شىعارامىن+.
18 پەرعاۋىندى، ونىڭ سوعىس اربالارى مەن سالت اتتىلارىن جەڭىپ، داڭقىمدى شىعارعاندا، مىسىرلىقتار ەحوبانىڭ كىم ەكەنىن بىلەتىن بولادى+».
19 سول كەزدە يسرايل قوسىنىڭ الدىندا كەلە جاتقان قۇدايدىڭ پەرىشتەسى+ سوڭىنا بارىپ تۇردى. ٴسۇيتىپ، ولاردىڭ الدىنداعى بۇلت باعاناسى قوستىڭ سوڭىنا قاراي جىلجىپ+،
20 مىسىرلىقتار مەن يسرايلدىكتەردىڭ ورتاسىنا بارىپ تۇردى+. بۇلت ٴبىر جاعىندا قاراڭعىلىق ورناتىپ، ەكىنشى جاعىندا ٴتۇندى جارىق ەتىپ تۇردى+. وسىلايشا مىسىرلىقتار ٴتۇنى بويى يسرايلدىكتەرگە جاقىنداي المادى.
21 مۇسا قولىن تەڭىزگە قاراي سوزعاندا+، ەحوبا شىعىستان كۇشتى جەل تۇرعىزدى. جەل ٴتۇنى بويى سوعىپ، سۋدى ەكىگە ٴبولىپ+، تەڭىزدىڭ ٴتۇبىن قۇرعاتتى+.
22 ٴسۇيتىپ، يسرايلدىكتەر تەڭىز ورتاسىنداعى قۇرعاق جەرمەن ٶتتى+. ال سۋ ولاردىڭ وڭ جانە سول جاعىندا قابىرعا ىسپەتتى تۇردى+.
23 مىسىرلىقتار ولاردىڭ سوڭىنان قۋىپ، پەرعاۋىننىڭ بارلىق اتتارى، سوعىس اربالارى مەن سالت اتتىلارى تەڭىزگە كىردى+.
24 تاڭعى كۇزەت* كەزىندە ەحوبا وت پەن بۇلت باعاناسىنان+ مىسىرلىقتاردىڭ اسكەرىنە نازار اۋدارىپ، ولاردى ابدەن ساستىرىپ، دۇربەلەڭگە ٴتۇسىردى.
25 قۇداي اربالارىنىڭ دوڭگەلەكتەرىن شىعارىپ تاستاعاندىقتان، ولار ارەڭ جىلجىدى. سوندا قۋعىنشىلار: «يسرايلدىكتەردەن قاشايىق، ويتكەنى ولار ٷشىن ەحوبا مىسىرلىقتارعا قارسى شايقاسىپ جاتىر!»— دەپ ايعايلادى+.
26 ەحوبا مۇساعا: «قولىڭدى تەڭىزگە قاراي سوز. سۋ ورنىنا كەلىپ، مىسىرلىقتاردى، ولاردىڭ سوعىس اربالارى مەن سالت اتتىلارىن باسىپ قالسىن»،— دەدى.
27 مۇسا سول زاماتتا قولىن تەڭىزگە قاراي سوزدى. تاڭعا جۋىق تەڭىز قايتادان قالپىنا كەلە باستادى. مىسىرلىقتار قاشپاق بولعاندا، ەحوبا ولاردى تەڭىزگە باتىرىپ جىبەردى+.
28 ورنىنا كەلگەن سۋ يسرايلدىكتەردى قۋىپ تەڭىزگە كىرگەن سوعىس اربالارى مەن سالت اتتىلاردى، پەرعاۋىننىڭ كۇللى اسكەرىن باسىپ قالدى+. ولاردىڭ بىردە-ٴبىرى امان قالمادى+.
29 يسرايلدىكتەر تەڭىز ورتاسىنان قۇرعاق جەرمەن وتكەندە+، سۋ ولاردىڭ وڭ جاعى مەن سول جاعىندا قابىرعا ىسپەتتى تۇردى+.
30 وسىلاي ەحوبا سول كۇنى يسرايلدى مىسىرلىقتاردىڭ قولىنان قۇتقاردى+. ولار جاۋلارىنىڭ تەڭىز جاعاسىندا جاتقان ولىكتەرىن كوردى.
31 سونداي-اق يسرايل حالقى ەحوبانىڭ مىسىرلىقتارعا قارسى قولدانعان قۇدىرەتتى كۇشىن كوردى. ٴسۇيتىپ، ولار ەحوبادان قورقا باستادى جانە ەحوبا مەن ونىڭ قىزمەتشىسى مۇساعا سەندى+.
سىلتەمەلەر
^ شامامەن تۇنگى 00:2 مەن تاڭعى 00:6 ارالىعى. تۇسىندىرمەدەگى «كۇزەت» ٴسوزىن قاراڭىز.
