مۇسانىڭ 2-جازباسى 27:1—21
27 قاراعان اعاشىنان ۇزىندىعى مەن ەنى 5 شىنتاق*، ال بيىكتىگى 3 شىنتاق بولاتىن ٴتورت بۇرىشتى+ قۇرباندىق ۇسىناتىن وشاق جاسا+.
2 ونىڭ ٴتورت بۇرىشىنان ٴبىرتۇتاس جاسالعان ٴتورت ٴمۇيىز شىعار+. قۇرباندىق وشاعىن مىسپەن قاپتا+.
3 سونداي-اق وعان مىستان مىناداي قۇرال-جابدىقتار جاسا: كۇل* شىعاراتىن شەلەكتەر، كۇرەكتەر، كەرسەندەر، شانىشقىلار مەن شوقسالعىش قالاقتار+.
4 قۇرباندىق وشاعىنا ارناپ مىس تور جاسا دا، ٴتورت بۇرىشىنا ٴتورت مىس ساقينا بەكىت.
5 توردى وشاقتىڭ جوعارعى جيەگىنەن تومەن، ىشكى جاعىنا ورنالاستىر. ونى وشاقتىڭ ورتا شەنىنە قويۋ كەرەك.
6 بۇعان قوسا، قۇرباندىق وشاعى ٷشىن قاراعان اعاشىنان سىرىقتار جاساپ، ولاردى مىسپەن قاپتا.
7 قۇرباندىق وشاعىن الىپ جۇرگەندە، سىرىقتاردى ساقينالاردان وتكىز. ولار وشاقتىڭ ەكى بۇيىرىندە تۇرۋ كەرەك+.
8 وشاقتى استى-ٷستى اشىق قوراپ ىسپەتتى ەتىپ تاقتايدان جاسا. ونى تاۋدا كورسەتىلگەن ۇلگىگە ساي ىستەيتىن بول+.
9 سوسىن كيەلى شاتىردىڭ اۋلاسىن جاسا+. ونىڭ وڭتۇستىككە قاراعان جاعىن جابۋ ٷشىن ۇزىندىعى 100 شىنتاق ماتا توقى. بۇعان جاقسىلاپ يىرىلگەن زىعىردى پايدالان+.
10 ماتانى ٸلۋ ٷشىن مىستان 20 باعانا، ولاردىڭ استىنا ويىعى بار 20 مىس تۇعىر ىستە. باعانالاردىڭ ىلگىشتەرى مەن بىرىكتىرگىشتەرى كۇمىستەن بولسىن.
11 اۋلانىڭ سولتۇستىك جاعىن قورشاۋ ٷشىن جاسالعان ماتانىڭ دا ۇزىندىعى 100 شىنتاق بولۋ كەرەك. ونى ٸلۋ ٷشىن دە مىستان 20 باعانا، ال ولاردىڭ استىنا ويىعى بار 20 مىس تۇعىر جاسا. باعانالاردىڭ ىلگىشتەرى مەن بىرىكتىرگىشتەرى كۇمىستەن بولسىن.
12 اۋلانىڭ ەنىنە، ياعني باتىس جاعىنا 50 شىنتاق ماتا تارتىلسىن. بۇل ٷشىن 10 باعانا جانە ويىعى بار 10 تۇعىر قويىلسىن.
13 اۋلانىڭ كۇنشىعىس جاعىنىڭ ۇزىندىعى 50 شىنتاق بولسىن.
14 ونداعى كىرەبەرىستىڭ وڭ قاناتىنا تارتىلعان ماتانىڭ ۇزىندىعى 15 شىنتاق بولىپ، 3 باعانا مەن ويىعى بار 3 تۇعىر ورناتىلسىن+.
15 سول قاناتىنا دا 15 شىنتاق ماتا تارتىلىپ، 3 باعانا مەن ويىعى بار 3 تۇعىر قويىلسىن.
16 ال كىرەبەرىستىڭ وزىنە ۇزىندىعى 20 شىنتاق پەردە ٸلىنسىن. ول كوك پەن ال قىزىل جىپتەن، يىرىلگەن كۇلگىن جۇننەن جانە جاقسىلاپ يىرىلگەن زىعىردان توقىلسىن+. پەردەنى ٸلۋ ٷشىن ويىعى بار 4 تۇعىرعا ورناتىلعان 4 باعانا قويىلسىن+.
17 اۋلانى قورشاپ تۇرعان بارلىق باعانالاردىڭ ىلگىشتەرى مەن بىرىكتىرگىشتەرى كۇمىستەن، ال ويىعى بار تۇعىرلارى مىستان جاسالۋ كەرەك+.
18 اۋلا قورشاۋىنىڭ ۇزىندىعى 100+، ەنى 50، بيىكتىگى 5 شىنتاق بولسىن. وعان تارتىلعان ماتا جاقسىلاپ يىرىلگەن زىعىردان توقىلىپ، ويىعى بار تۇعىرلارى مىستان ىستەلسىن.
19 كيەلى شاتىرداعى قىزمەت ٷشىن قولدانىلاتىن كۇللى زاتتار، سونداي-اق شاتىر مەن اۋلانىڭ بارلىق قازىقتارى مىستان جاسالسىن+.
20 شامدار ۇنەمى جانىپ تۇرۋ ٷشىن، يسرايلدىكتەرگە زايتۇننەن سىعىپ الىنعان تازا ماي اكەلۋدى بۇيىر+.
21 حارون مەن ونىڭ ۇلدارى كەزدەسۋ شاتىرىنداعى، ياعني كۋالىك ساندىعىن تاسالاپ تۇرعان شىمىلدىقتىڭ سىرت جاعىندا تۇرعان+، شامداردىڭ كەش باتقاننان تاڭ اتقانشا ەحوبانىڭ الدىندا جانىپ تۇرۋىن قاداعالاسىن+. بۇل — يسرايلدىكتەر ۇرپاقتان ۇرپاققا ورىنداۋ كەرەك نۇسقاۋ+.
سىلتەمەلەر
^ 1 شىنتاق 5.44 سانتيمەترگە تەڭ. B14 قوسىمشاسىن قاراڭىز.
^ نەمەسە «مايلى كۇل»، ياعني قۇرباندىقتاردىڭ مايى سىڭگەن كۇل.
