مۇسانىڭ 2-جازباسى 39:1—43
39 شەبەرلەر كوك جانە ال قىزىل جىپتەن، يىرىلگەن كۇلگىن جۇننەن+ قاسيەتتى ورىندا قىزمەت ەتكەندە كيەتىن كيىمدەر توقىدى. ولار حارونعا، ەحوبا ٴدال مۇساعا بۇيىرعانداي، ادەمىلەپ كيەلى كيىم توقىپ بەردى+.
2 ول* التىن، كوك جانە ال قىزىل جىپتەن، يىرىلگەن كۇلگىن ٴجۇن مەن جاقسىلاپ يىرىلگەن زىعىردان ەفود+ توقىدى.
3 بۇل ٷشىن ولار التىندى سوققىلاپ، جۇقا پاراقتار جاسادى، ال ول بۇلاردى جىڭىشكە ٴجىپ ەتىپ قيدى. ونىمەن كوك جىپتەن، يىرىلگەن كۇلگىن جۇننەن، ساپالى زىعىر جىپتەن توقىلعان ەفود ورنەكتەلدى.
4 سوسىن ولار ەفودتىڭ ەكى بولىگىن بىرىكتىرىپ تۇراتىن ەكى يىق جاپسىرما ىستەدى.
5 ەفودتى مىقتاپ ۇستاپ تۇراتىن بەلبەۋ+ دە ٴدال سول جىپتەردەن — التىن، كوك جانە ال قىزىل جىپتەن، يىرىلگەن كۇلگىن جۇننەن، جاقسىلاپ يىرىلگەن زىعىردان — توقىلىپ، ەحوبانىڭ ٴدال مۇساعا بۇيىرعانىنداي ىستەلدى.
6 ولار ونيكس تاستارىن التىن قۇرساۋلارعا ورناتىپ، تاستارعا يسرايل ۇلدارىنىڭ ەسىمدەرىن مورگە ويىپ جازعانداي جازدى+.
7 ٴسۇيتىپ، ول وسى ەكى تاستى، ەحوبا مۇساعا بۇيىرعانداي، يسرايل ۇلدارىنا ەستەلىك رەتىندە+ ەفودتىڭ يىق جاپسىرمالارىنا بەكىتتى.
8 كەيىن ول ٴتوسقالتا جاسادى+. ونى ەفود سياقتى التىن، كوك جانە ال قىزىل جىپتەن، يىرىلگەن كۇلگىن جۇننەن، جاقسىلاپ يىرىلگەن زىعىردان ورنەكتەپ توقىدى+.
9 ولار ٴتوسقالتانى ەكى بۇكتەگەندە ۇزىندىعى دا، ەنى دە ٴبىر قارىس* بولاتىنداي ٴتورت بۇرىشتى ەتىپ جاسادى.
10 سوسىن وعان ٴتورت قاتار ەتىپ اسىل تاستار ورناتتى: ٴبىرىنشى قاتارعا لاعىل، توپاز، ٴزۇبارجات؛
11 ەكىنشى قاتارعا فەرۋزا، جاقۇت، ياشما؛
12 ٷشىنشى قاتارعا لەشەم*، اقىق، امەتيست؛
13 ٴتورتىنشى قاتارعا حريزوليت، ونيكس، جادەيت. بۇل تاستار التىن قۇرساۋلارعا قوندىرىلدى.
14 تاستاردىڭ سانى يسرايل ۇلدارىنىڭ ەسىمدەرىنە ساي 12 بولدى. ٵر تاسقا 12 رۋدىڭ بىرەۋىنىڭ اتى مورگە جازىلعانداي ويىلىپ جازىلدى.
15 ٴتوسقالتانى اسىپ قويۋ ٷشىن، ولار ساف التىننان شيراتىلعان باۋ ىسپەتتى ەكى شىنجىر جاسادى+.
16 سوسىن التىننان ەكى قۇرساۋ، ەكى ساقينا جاساپ، ساقينالاردى ٴتوسقالتانىڭ جوعارعى ەكى شەتىنە بەكىتتى.
17 ٴسۇيتىپ، ەكى التىن شىنجىر باۋدى ٴتوسقالتانىڭ شەتىندەگى وسى التىن ساقينالاردان وتكىزدى.
18 قالعان ۇشتارىن ەفودتىڭ يىق جاپسىرماسىنداعى قۇرساۋلاردىڭ الدىڭعى جاعىنا بەكىتتى.
19 باسقا ەكى التىن ساقينا جاساپ، ولاردى ٴتوسقالتانىڭ ەفودقا قاراعان ىشكى جاعىنىڭ تومەنگى ەكى شەتىنە قوندىردى+.
20 تاعى دا ەكى التىن ساقينا ىستەپ، يىق جاپسىرمالاردىڭ تومەنگى ۇشىنىڭ بەت جاعىنا، توقىلعان بەلبەۋدىڭ ەفودقا بايلانعان جەرىنىڭ جوعارعى تۇسىنا، بەكىتتى.
21 سوسىن ٴتوسقالتانىڭ ساقينالارىنا بايلانعان كوك باۋلاردىڭ ەكىنشى ۇشتارىن ەفودتاعى وسى ساقينالارعا بايلادى. وسىلايشا ٴتوسقالتا ورنىنان قوزعالماي، بەلبەۋدىڭ ۇستىڭگى جاعىندا بەرىك تۇردى. ولار مۇنى ەحوبا مۇساعا بۇيىرعانداي ىستەدى.
22 بۇدان كەيىن ول كوك جىپتەن ەفودتىڭ ىشىنەن كيەتىن جەڭسىز كويلەك توقىدى+.
23 ونىڭ جوعارعى جاعىنان باس سۇعاتىن ويىق جاسادى. سوگىلىپ كەتپەس ٷشىن، ويىقتىڭ شەتىنە اينالدىرا ساۋىتتىكىندەي مىقتى جيەكتەمە توقىدى.
24 سوسىن جەڭسىز كويلەكتىڭ ەتەگىنە كوك جانە ال قىزىل جىپتەن، يىرىلگەن كۇلگىن جۇننەن انار جەمىستەرىن جاسادى.
25 سونداي-اق ساف التىننان قوڭىراۋشالار ىستەپ، جەڭسىز كويلەكتىڭ ەتەگىن اينالدىرا، انارلاردىڭ ارا-اراسىنا ٸلىپ قويدى.
26 ولار ٴبىر التىن قوڭىراۋشا، ٴبىر انار بولىپ كەزەك-كەزەك ورنالاستى. وسىلايشا قىزمەت كەزىندە كيەتىن جەڭسىز كويلەك ەحوبانىڭ مۇساعا بۇيىرعانىنداي ىستەلىندى.
27 ولار حارون مەن ونىڭ ۇلدارىنا ارناپ ساپالى زىعىر جىپتەن ۇزىن جەڭدى كويلەك توقىدى+.
28 سونداي-اق ساپالى زىعىر جىپتەن سالدە+، ساندەلگەن باسكيىم+، جاقسىلاپ يىرىلگەن زىعىردان دامبال+ توقىدى.
29 سونىمەن قاتار جاقسىلاپ يىرىلگەن زىعىردان، كوك جانە ال قىزىل جىپتەن، كۇلگىن جۇننەن بەلبەۋ توقىدى. ولار مۇنى ەحوبا مۇساعا بۇيىرعانداي ىستەدى.
30 سوڭىندا، ساف التىننان قۇدايعا باعىشتالۋدىڭ كيەلى بەلگىسى بولاتىن جىلتىراعان شاعىن تاسپا جاساپ، بەتىنە «كيەلىلىك ەحوباعا تيەسىلى» دەپ مورگە جازعانداي ويىپ جازدى+.
31 سوسىن ونى، ەحوبا مۇساعا بۇيىرعانداي، كوك باۋمەن سالدەنىڭ ماڭداي تۇسىنا بايلاپ قويدى.
32 وسىلايشا كيەلى شاتىردىڭ، ياعني كەزدەسۋ شاتىرىنىڭ، بۇكىل جۇمىسى اياقتالدى. يسرايلدىكتەر بارلىعىن ەحوبا مۇساعا بۇيىرعانداي ىستەدى+. ٴبارىن ٴدال سولاي ورىندادى.
33 بۇدان كەيىن ولار مۇساعا كيەلى شاتىردى+، ونىڭ جابىندارى+ مەن بارلىق بۇيىمدارىن اكەلدى. اتاپ ايتقاندا، ىلمەكتەرىن+، قابىرعاسى ٷشىن جاسالعان جاقتاۋلارىن+، سىرىقتارىن+، باعانالارى مەن ولاردىڭ ويىعى بار تۇعىرلارىن+،
34 قىزىل تۇسكە بويالعان قوي تەرىسىنەن جاسالعان جابىندى+، يتبالىق تەرىسىنەن جاسالعان جابىندى، ساندىقتى كوزدەن تاسالاپ تۇراتىن شىمىلدىقتى+،
35 كۋالىك ساندىعىن، ونىڭ سىرىقتارى+ مەن قاقپاعىن+،
36 ۇستەلدى، ونىڭ بار قۇرال-جابدىقتارىن+، نان تارتۋىن،
37 ساف التىننان جاسالعان شامدالدى، ونىڭ قاتار تۇرعان شامدارىن+، بۇكىل قۇرال-جابدىقتارىن+، جاعاتىن مايىن+،
38 حوش ٴيىستى زات تۇتەتەتىن التىن ۇستەلدى+، مايلاۋ راسىمىنە ارنالعان مايدى+، تۇتەتىلەتىن حوش ٴيىستى زاتتاردى+، شاتىردىڭ كىرەبەرىسىنە ىلىنەتىن پەردەنى+،
39 مىستان جاسالعان قۇرباندىق وشاعىن+، ونىڭ مىس تورىن، سىرىقتارى+ مەن بارلىق قۇرال-جابدىقتارىن+، ۇلكەن قازان مەن ونىڭ تۇعىرىن+،
40 اۋلانى قورشايتىن ماتانى، ونىڭ باعانالارى مەن ويىعى بار تۇعىرلارىن+، كىرەبەرىسىنە ىلىنەتىن پەردەنى+، ارقاندارى مەن قازىقتارىن+، كيەلى شاتىرداعى، ياعني كەزدەسۋ شاتىرىنداعى، قىزمەتكە ارنالعان بارلىق قۇرال-جابدىقتاردى،
41 قاسيەتتى ورىندا قىزمەت ەتكەندە كيەتىن ادەمى توقىلعان كيىمدەردى، حاروننىڭ كيەلى كيىمى+ مەن ونىڭ ۇلدارى ٴدىني قىزمەت اتقارعاندا كيەتىن كيىمدەردى الىپ كەلدى.
42 يسرايلدىكتەر بار جۇمىستى ەحوبا مۇساعا بۇيىرعانداي ىستەدى+.
43 مۇسا اتقارىلعان بۇكىل جۇمىستى تەكسەرگەندە، ولار ٴبارىن ٴدال ەحوبا بۇيىرعانداي ىستەگەنىن كوردى. ٴسۇيتىپ، مۇسا ولارعا باتاسىن بەردى.
سىلتەمەلەر
^ وسى جانە 7، 8، 22-تارماقتارداعى «ول» ەسىمدىگى بەسەليەلگە نۇسقاسا كەرەك.
^ شامامەن 2.22 سانتيمەتر. B14 قوسىمشاسىن قاراڭىز.
^ بەلگىسىز اسىل تاس. بۇل يانتار، گياسينت، وپال نە تۋرمالين بولۋى مۇمكىن.
