مۇسانىڭ 2-جازباسى 40:1—38
40 بۇدان سوڭ ەحوبا مۇساعا مىنانى ايتتى:
2 «ٴبىرىنشى ايدىڭ ٴبىرىنشى كۇنى كيەلى شاتىردى*، ياعني كەزدەسۋ شاتىرىن قۇر+.
3 ىشىنە كۋالىك ساندىعىن كىرگىزىپ+، ونى شىمىلدىقپەن كوزدەن تاسالا+.
4 سوسىن ۇستەلدى+ كىرگىزىپ، ۇستىنە كەرەك-جاراقتارىنىڭ ٴبارىن قوي. سونداي-اق شامدالدى+ الىپ كىرىپ، شامدارىن جاق+.
5 حوش ٴيىستى زاتتاردى تۇتەتەتىن التىن ۇستەلدى+ كۋالىك ساندىعىنىڭ الدىنا قوي، ال كيەلى شاتىردىڭ كىرەبەرىسىنە پەردە ٸل+.
6 كيەلى شاتىردىڭ، ياعني كەزدەسۋ شاتىرىنىڭ، الدىڭعى جاعىنا ورتەلەتىن قۇرباندىق ۇسىناتىن وشاقتى+ ورنالاستىر.
7 شاتىر مەن قۇرباندىق وشاعىنىڭ ورتاسىنا ۇلكەن قازاندى قويىپ، ىشىنە سۋ قۇي+.
8 شاتىردىڭ اۋلاسىن+ قورشاپ، اۋلانىڭ كىرەبەرىسىنە پەردە ٸل+.
9 مايلاۋ راسىمىنە ارنالعان مايدى+ الىپ، كيەلى شاتىر مەن ونىڭ ىشىندەگىنىڭ ٴبارىن مايلا+. وسىلايشا شاتىردى جانە ونىڭ بارلىق بۇيىمدارىن قاسيەتتى ەت، سوندا ول كيەلى بولادى.
10 سوسىن ورتەلەتىن قۇرباندىق ۇسىناتىن وشاق پەن ونىڭ بار قۇرال-جابدىقتارىن مايلاپ، قاسيەتتى ەت. سوندا ول اسا كيەلى قۇرباندىق وشاعى بولادى+.
11 سونداي-اق ۇلكەن قازان مەن ونىڭ تۇعىرىن مايلاپ، قاسيەتتى ەت.
12 بۇدان كەيىن حارون مەن ونىڭ ۇلدارىن كەزدەسۋ شاتىرىنىڭ كىرەبەرىسىنە اكەل، ولار سول جەردە جۋىنسىن+.
13 حارونعا كيەلى كيىمدى كيگىز دە+، وعان مايلاۋ ٴراسىمىن جاساپ+، قاسيەتتى ەت. وسىلاي ول ماعان ٴدىني قىزمەتكەر رەتىندە قىزمەت ەتەدى.
14 سوسىن ونىڭ ۇلدارىن الىپ كەلىپ، ۇزىن جەڭدى كويلەكتەردى كيگىز+.
15 اكەلەرىنە جاساعانداي، ولارعا دا مايلاۋ ٴراسىمىن جاسا+. وسىلايشا ولار ماعان ٴدىني قىزمەتكەر رەتىندە قىزمەت ەتەدى. وسى مايلاۋ ٴراسىمىنىڭ ارقاسىندا ولار دا، ولاردان كەيىنگى ۇرپاقتارى دا ٴدىني قىزمەتكە ٴبىرجولا تاعايىندالادى+».
16 مۇسا بارلىعىن ەحوبا وزىنە بۇيىرعانداي ىستەدى+. ول ٴبارىن بۇلجىتپاي ورىندادى.
17 سونىمەن، ەكىنشى جىلدىڭ ٴبىرىنشى ايىنىڭ ٴبىرىنشى كۇنى كيەلى شاتىر قۇرىلدى+.
18 مۇسا كيەلى شاتىردى تۇرعىزۋ ٷشىن ويىعى بار تۇعىرلاردى+ قويىپ، ۇستىنە قابىرعاعا ارنالعان جاقتاۋلاردى+ ورناتتى، سىرىقتارىن+ كىرگىزىپ، باعانالارىن كوتەردى.
19 سوسىن، ەحوبا وزىنە بۇيىرعانداي، كيەلى شاتىردىڭ ۇستىنە جابىندارىن+ ٴبىرىنىڭ ۇستىنە ٴبىرىن جاپتى.
20 كەيىن كۋالىك تاقتاشالاردى+ الىپ، ساندىققا+ سالدى. ساندىقتىڭ+ سىرىقتارىن+ كىرگىزىپ، بەتىنە قاقپاعىن+ جاپتى.
21 سوسىن ساندىقتى كيەلى شاتىرعا كىرگىزىپ، الدىنا شىمىلدىق ٸلىپ+، كۋالىك ساندىعىن كوزدەن تاسالادى+. وسىلاي مۇسا ەحوبانىڭ بۇيىرعانىنداي ىستەدى.
22 مۇسا كيەلى شاتىردىڭ، ياعني كەزدەسۋ شاتىرىنىڭ، سولتۇستىك بەتىنە، شىمىلدىقتىڭ سىرت جاعىنا، ۇستەلدى+ قويىپ،
23 ۇستىنە ەحوبانىڭ الدىنا تارتۋ رەتىندە اكەلىنگەن كۇلشە نانداردى ٷستى-ۇستىنە قويىپ جايعاستىردى+. وسىلاي مۇسا ەحوبانىڭ بۇيىرعانىنداي ىستەدى.
24 ال شامدالدى+ كەزدەسۋ شاتىرىنىڭ وڭتۇستىك جاعىنا، ۇستەلدىڭ قارسى بەتىنە، ورنالاستىردى.
25 ٴسۇيتىپ، ەحوبانىڭ الدىندا شامداردى جاقتى+. وسىلاي مۇسا ەحوبانىڭ بۇيىرعانىنداي ىستەدى.
26 بۇدان سوڭ ول التىن ۇستەلدى+ كەزدەسۋ شاتىرىنداعى شىمىلدىقتىڭ الدىنا قويدى.
27 ونىڭ ۇستىندە حوش ٴيىستى زاتتار+ تۇتەتىلمەك ەدى+. وسىلاي مۇسا ەحوبانىڭ بۇيىرعانىنداي ىستەدى.
28 سودان كەيىن ول كيەلى شاتىردىڭ كىرەبەرىسىنە پەردەنى+ ٸلدى.
29 كيەلى شاتىردىڭ، ياعني كەزدەسۋ شاتىرىنىڭ، الدىڭعى جاعىنا ورتەلەتىن قۇرباندىقتار+ مەن استىق تارتۋلار ۇسىناتىن قۇرباندىق وشاعىن قويدى. وسىلاي مۇسا ەحوبانىڭ بۇيىرعانىنداي ىستەدى.
30 سوسىن شاتىر مەن قۇرباندىق وشاعىنىڭ ورتاسىنا ۇلكەن قازاندى قويىپ، ىشىنە جۋىناتىن سۋ قۇيدى+.
31 مۇسا، حارون جانە ونىڭ ۇلدارى وسى سۋمەن اياق-قولدارىن جۋدى.
32 ولار كەزدەسۋ شاتىرىنا كىرەردە نە قۇرباندىق وشاعىنا جاقىنداردا سول سۋمەن جۋىناتىن+. وسىلاي مۇسا ەحوبانىڭ بۇيىرعانىنداي ىستەدى.
33 اقىر سوڭىندا، مۇسا كيەلى شاتىر مەن قۇرباندىق وشاعىنىڭ اينالاسىن قورشاپ اۋلا ىستەپ+، كىرەبەرىسىنە پەردە ٸلدى+.
ٴسۇيتىپ، مۇسا بۇكىل جۇمىستى ٴبىتىردى.
34 سوندا كەزدەسۋ شاتىرىن بۇلت جاۋىپ، كيەلى شاتىر ەحوبانىڭ سالتاناتتى ۇلىلىعىنا كەنەلدى+.
35 كەزدەسۋ شاتىرىن بۇلت جاۋىپ، كيەلى شاتىر ەحوبانىڭ سالتاناتتى ۇلىلىعىنا كەنەلگەندىكتەن، مۇسا شاتىرعا كىرە المادى+.
36 بۇلت كيەلى شاتىردان جوعارى كوتەرىلگەندە، يسرايلدىكتەر قوستارىن جيناپ، كوشتەرىن جالعاستىراتىن+.
37 ال بۇلت كوتەرىلمەسە، قوستارىن جينامايتىن+.
38 وسىلايشا شاتىر ۇستىندە كۇندىز ەحوبانىڭ بۇلتى، ال تۇندە وت تۇردى. بۇكىل يسرايل حالقى مۇنى كوشىپ-قونىپ جۇرگەن ۋاقىتىنىڭ بارىندە كورىپ وتىردى+.
سىلتەمەلەر
^ B5 قوسىمشاسىن قاراڭىز.
