مۇسانىڭ 3-جازباسى 1:1—17
-
تۇگەل ورتەلەتىن قۇرباندىق (1—17)
1 ەحوبا* مۇسانى شاقىرىپ، وعان كەزدەسۋ شاتىرىنان+ بىلاي دەپ ٴتىل قاتتى:
2 «يسرايلدىكتەرگە مىنانى ايت: —كىمدە-كىم ەحوباعا ارناپ مالىنان قۇرباندىق اكەلگىسى كەلسە، ٴمۇيىزدى ٸرى قارادان نە ۇساق مالدان الىپ كەلسىن+.
3 ەگەر تۇگەل ورتەلەتىن قۇرباندىعى ٴمۇيىزدى ٸرى قارادان بولسا، وندا كەمىستىگى جوق ەركەك مال اكەلسىن+. ونى كەزدەسۋ شاتىرىنىڭ كىرەبەرىسىنە، ەحوبانىڭ الدىنا ٶز ەركىمەن+ اكەلسىن.
4 ول ورتەلەتىن مالدىڭ باسىنا قولىن قويسىن. سوندا كۇناسىن وتەۋ ٷشىن اكەلگەن قۇرباندىعى قابىل بولادى.
5 سودان كەيىن جاس بۇقا ەحوبانىڭ الدىندا باۋىزدالسىن. حاروننىڭ ٴدىني قىزمەتكەر+ ۇلدارى ونىڭ قانىنان الىپ، كەزدەسۋ شاتىرىنىڭ الدىندا تۇرعان قۇرباندىق وشاعىنىڭ بارلىق جاعىنا بۇركىسىن+.
6 سوسىن تۇگەل ورتەلەتىن قۇرباندىققا اكەلىنگەن مالدىڭ تەرىسى سىلىنىپ، ەتى جىلىكتەلسىن+.
7 حاروننىڭ ٴدىني قىزمەتكەر ۇلدارى وشاققا وت سالسىن+، ال وتتىڭ ۇستىنە اعاش قالاسىن.
8 كەيىن ولار مالدىڭ بولىكتەرىن، باسى مەن مايىن* قوسا، قۇرباندىق وشاعىنداعى تۇتاتىلعان وتىننىڭ ۇستىنە رەت-رەتىمەن جايعاستىرسىن+.
9 ىشەك-قارنى مەن سيراقتارى سۋمەن جۋىلسىن. سوسىن ٴدىني قىزمەتكەر ونىڭ ٴبارىن وشاقتىڭ ۇستىندە تۇگەل ورتەلەتىن قۇرباندىق رەتىندە جاعىپ جىبەرسىن. بۇل — ەحوباعا ۇنامدى حوش ٴيىس رەتىندە ورتەپ ۇسىناتىن تارتۋ+.
10 ەگەر الدەكىم تۇگەل ورتەلەتىن قۇرباندىققا وتارىنان+ جاس قوي نە ەشكى اكەلگىسى كەلسە، ول كەمىستىگى جوق ەركەك مال بولسىن+.
11 بۇل مال ەحوبانىڭ الدىندا، قۇرباندىق وشاعىنىڭ سولتۇستىك جاعىندا باۋىزدالسىن. حاروننىڭ ٴدىني قىزمەتكەر ۇلدارى ونىڭ قانىنان الىپ، وشاقتىڭ بارلىق جاعىنا بۇركىسىن+.
12 ەتى جىلىكتەلگەن سوڭ، ٴدىني قىزمەتكەر ونى، باسى مەن مايىن* قوسا، قۇرباندىق وشاعىنداعى تۇتاتىلعان وتىننىڭ ۇستىنە جايعاستىرسىن.
13 ىشەك-قارنى مەن سيراقتارى سۋمەن جۋىلسىن. كەيىن ٴدىني قىزمەتكەر ونىڭ ٴبارىن قۇرباندىق وشاعىندا جاعىپ جىبەرەدى. بۇل — تۇگەل ورتەلەتىن قۇرباندىق، ەحوباعا ۇنامدى حوش ٴيىس رەتىندە ورتەپ ۇسىناتىن تارتۋ.
14 ەگەر ادام ەحوباعا ارناپ تۇگەل ورتەلەتىن قۇرباندىققا قۇستان الىپ كەلەتىن بولسا، كەپتەر نە جاس كوگەرشىن اكەلسىن+.
15 ٴدىني قىزمەتكەر ونى قۇرباندىق وشاعىنا اكەلسىن دە، موينىن ٷزىپ، ورتەپ جىبەرسىن. ال قانى قۇرباندىق وشاعىنىڭ قابىرعاسىنا اعىزىلسىن.
16 ول قۇستىڭ جەمساۋى مەن ٴجۇنىن قۇرباندىق وشاعىنىڭ جانىنا، شىعىس بەتىنە، كۇل* توگەتىن جەرگە تاستاسىن+.
17 قۇستىڭ دەنەسىن قاناتتارىنىڭ تۇسىنان قاق جارسىن، ٴبىراق ٴبولىپ تاستاماسىن. سوسىن ٴدىني قىزمەتكەر ونى قۇرباندىق وشاعىنداعى تۇتاتىلعان وتىننىڭ ۇستىنە قويىپ، ورتەپ جىبەرەدى. بۇل — تۇگەل ورتەلەتىن قۇرباندىق، ەحوباعا ۇنامدى حوش ٴيىس رەتىندە ورتەپ ۇسىناتىن تارتۋ.
سىلتەمەلەر
^ بۇل — قۇدايدىڭ ەسىمى. تۇسىندىرمەنى قاراڭىز.
^ نەمەسە «بۇيرەك مايىن».
^ نەمەسە «بۇيرەك مايىن».
^ نەمەسە «مايلى كۇل»، ياعني قۇرباندىقتاردىڭ مايى سىڭگەن كۇل.
