مۇسانىڭ 3-جازباسى 11:1—47
-
ادال جانە ارام جان-جانۋارلار (1—47)
11 سودان كەيىن ەحوبا مۇسا مەن حارونعا بىلاي دەدى:
2 «يسرايلدىكتەرگە مىنانى ايت: —جەر بەتىندەگى جان-جانۋارلاردىڭ ىشىنەن مىنالاردى جەۋلەرىڭە بولادى+:
3 اشاتۇياقتى، كۇيىس قايىراتىن جانۋاردىڭ ٴبارىن جەۋلەرىڭە بولادى.
4 ٴبىراق كۇيىس قايىراتىن نەمەسە اشاتۇياقتى جانۋارلاردىڭ ىشىنەن مىنالاردى جەۋگە بولمايدى: تۇيەنى، ويتكەنى ول كۇيىس قايىرعانمەن، اشاتۇياقتى ەمەس، سوندىقتان سەندەر ٷشىن ارام+؛
5 مايباساردى*+، ويتكەنى ول كۇيىس قايىرعانمەن، اشاتۇياقتى ەمەس، سول سەبەپتى سەندەر ٷشىن ارام؛
6 قوياندى، ويتكەنى ول كۇيىس قايىرعانمەن، اشاتۇياقتى ەمەس، سەندەر ٷشىن ارام؛
7 شوشقانى+، ويتكەنى ول اشاتۇياقتى بولعانمەن، كۇيىس قايىرمايدى، سول سەبەپتى سەندەر ٷشىن ارام.
8 بۇلاردىڭ ەتىن جەمەڭدەر، ولىگىنە دە تيمەڭدەر، ولار سەندەر ٷشىن ارام+.
9 سۋدا مەكەندەيتىندەردىڭ ىشىنەن ٴجۇزۋ قاناتتارى مەن قابىرشىقتارى بارلاردىڭ ٴبارىن جەۋلەرىڭە بولادى. ولار قاي سۋدا مەكەندەمەسىن، تەڭىزدە نە وزەندە بولسىن، ازىق ەتە بەرىڭدەر+.
10 ٴبىراق تەڭىزدە نە وزەندە قۇجىناعان جاندىكتەردىڭ جانە سۋداعى باسقا دا ماقۇلىقتاردىڭ* ىشىنەن ٴجۇزۋ قاناتتارى مەن قابىرشاقتارى جوقتارىنىڭ ٴبارى سەندەر ٷشىن جيىركەنىشتى بولسىن.
11 ولار سەندەر ٷشىن جيىركەنىشتى بولۋ كەرەك. ولاردىڭ ەتىن جەمەڭدەر+، ولىگىنەن جيرەنىڭدەر.
12 سۋدا مەكەندەيتىن ٴجۇزۋ قاناتتارى مەن قابىرشاقتارى جوق كەز كەلگەن ماقۇلىق سەندەر ٷشىن جيىركەنىشتى.
13 قاناتتىلاردىڭ ىشىنەن جيىركەنۋلەرىڭ كەرەك جانە جەۋگە بولمايتىن قۇستار مىنالار: بۇركىت+، بالىقشى تۇيعىن، تازقارا+،
14 قىزىل جانە قارا كەزقۇيرىقتىڭ بارلىق ٴتۇرى،
15 قارعانىڭ كەز كەلگەن ٴتۇرى،
16 تۇيەقۇس، جاپالاق، شاعالا، سۇڭقاردىڭ كەز كەلگەن ٴتۇرى،
17 بايعىز، سۋقۇزعىن، قۇلاقتى جاپالاق،
18 اققۋ، بىرقازان، كۇشىگەن،
19 دەگەلەك، قۇتاننىڭ كەز كەلگەن ٴتۇرى، بابىسەك، جارقانات.
20 جەر بەتىندە قۇجىناعان تورتاياقتى ٵرى قاناتتى جاندىكتەردىڭ ٴبارى سەندەر ٷشىن جيىركەنىشتى.
21 جەر بەتىندە قۇجىناعان تورتاياقتى ٵرى قاناتتى جاندىكتەردىڭ ىشىنەن سەكىرىپ جۇرەتىن قوسىمشا اياقتارى بارلارىن عانا جەۋلەرىڭە بولادى.
22 ولار مىنالار: كوشپەلى شەگىرتكە، كادىمگى شەگىرتكە+، قارا شەگىرتكە مەن شەكشەك شەگىرتكەلەردىڭ بارلىق ٴتۇرى.
23 جەردە قۇجىناپ جۇرەتىن تورتاياقتى ٵرى قاناتتى باسقا دا جاندىكتەردىڭ ٴبارى سەندەر ٷشىن جيىركەنىشتى.
24 بۇل جاندىكتەر سەندەردى ارامدايدى. ولاردىڭ ولىگىنە تيگەن كىسى كەشكە دەيىن تازا ەمەس بولىپ سانالادى+.
25 ولاردىڭ ولىگىن ۇستاعان اركىم كيىمىن جۋسىن+، ول كەشكە دەيىن تازا ەمەس بولىپ سانالادى.
26 اشاتۇياقتى، ٴبىراق تۇياعىنىڭ ايىرى تەرەڭ ەمەس، كۇيىس قايىرمايتىن كەز كەلگەن جانۋار سەندەر ٷشىن ارام. وعان تيگەن ادام دا ارامدالادى+.
27 تورتاياقتى جانۋارلاردىڭ ىشىنەن تۇياعى جوق، تابانىمەن جۇرەتىندەردىڭ ٴبارى سەندەر ٷشىن ارام. ولاردىڭ ولىگىنە تيگەن ادام كەشكە دەيىن تازا ەمەس بولىپ سانالادى.
28 سولاردىڭ ولىگىن ۇستاعان كىسى كيىمىن جۋسىن+، ول كەشكە دەيىن تازا ەمەس بولىپ سانالادى+. ونداي جانۋارلار سەندەر ٷشىن ارام.
29 جەر بەتىندە قۇجىناپ جۇرگەن ماقۇلىقتاردىڭ ىشىندە مىنالار سەندەر ٷشىن ارام: كورتىشقان، تىشقان+، كەسىرتكەنىڭ ٴتۇر-ٴتۇرى،
30 جارماسقى*، كەلەس، تريتون، قۇم كەسىرتكەسى جانە قۇبىلعى*.
31 جەر بەتىندە قۇجىناعان وسى ماقۇلىقتار سەندەر ٷشىن ارام+. ولاردىڭ ولىگىنە تيگەن اركىم كەشكە دەيىن تازا ەمەس بولىپ سانالادى+.
32 ەگەر وسىلاردىڭ ولىگى قانداي دا ٴبىر نارسەنىڭ ىشىنە نە ۇستىنە ٴتۇسىپ كەتسە — مەيلى ول اعاش ىدىس، كيىم، تەرى نە ماتا بولسىن — ارامدالادى. ارامدالعان ىدىستى، نە نارسەگە قولدانىلماسىن، سۋعا سالىپ قويۋ كەرەك. ول كەشكە دەيىن ارام بولىپ سانالادى، سودان كەيىن تازا بولادى.
33 ەگەر ولىك قىش ىدىسقا ٴتۇسىپ كەتسە، ونىڭ ىشىندەگىنىڭ ٴبارى ارامدالادى. ىدىستى سىندىرىپ تاستاۋ كەرەك+.
34 وسىنداي ىدىستاعى سۋ تيگەن تاماق ارامدالادى. مۇنداي ىدىسقا قۇيىلعان كەز كەلگەن سۇيىقتىق تا ارام بولادى.
35 ۇستىنە ولىك تۇسكەن نارسە، تاندىر نە ىدىس قويعىش بولسىن، ارامدالادى، ولاردى قيراتىپ تاستاۋ كەرەك. ولار تازا ەمەس، سەندەر ٷشىن ارام بولىپ قالا بەرمەك.
36 بۇلاقتاعى نە سۋ ساقتايتىن قۇدىقتاعى سۋ عانا تازا بولىپ قالادى. ٴبىراق ونداعى ولىكتى شىعارعان ادام ارامدالادى.
37 ەگەر ولىك سەبىلەتىن تۇقىمنىڭ ۇستىنە تۇسسە، تۇقىم تازا بولىپ قالا بەرەدى.
38 ال ولىكتىڭ قانداي دا ٴبىر بولىگى سۋعا جىبىتىلگەن تۇقىمعا ٴتۇسىپ كەتسە، ول سەندەر ٷشىن ارام.
39 ەگەر ەتىن جەۋگە بولاتىن مال ٶلىپ قالسا، ونىڭ ولىگىنە تيگەن ادام كەشكە دەيىن تازا ەمەس بولىپ سانالادى+.
40 كىم ونى جەسە، كيىمىن جۋسىن، ول كەشكە دەيىن تازا ەمەس بولىپ سانالادى+. ولىكتى شىعارعان ادام دا كيىمىن جۋسىن، ول كەشكە دەيىن تازا ەمەس بولىپ سانالادى.
41 جەر بەتىندە قۇجىناعان ماقۇلىقتار جيىركەنىشتى+. ولاردى جەۋگە بولمايدى.
42 باۋىرىمەن جورعالاۋشىلاردىڭ، تورتاياقتىلاردىڭ نە جەر بەتىندە قۇجىناپ جۇرگەن كوپاياقتىلاردىڭ ەشقايسىسىن جەمەڭدەر، ويتكەنى ولار جيىركەنىشتى+.
43 جەر بەتىندە قۇجىناعان ماقۇلىقتار ارقىلى وزدەرىڭدى جەركەنىشتى ەتىپ، لاستاماڭدار جانە ارامداماڭدار+.
44 ويتكەنى مەن قۇدايلارىڭ ەحوبامىن+. وزدەرىڭدى تازا ۇستاپ، كيەلى بولىڭدار+، سەبەبى مەن كيەلىمىن+. جەر بەتىندە قۇجىناپ جۇرگەن ەشبىر ماقۇلىق ارقىلى وزدەرىڭدى ارامداۋشى بولماڭدار.
45 ويتكەنى مەن قۇدايلارىڭ بولۋ ٷشىن سەندەردى مىسىردان الىپ شىققان ەحوبامىن+. مەن كيەلى بولعاندىقتان+، سەندەر دە كيەلى بولىڭدار+.
46 جانۋارلارعا، قاناتتىلارعا، سۋدا جۇزەتىن جانە جەردە قۇجىناپ جۇرگەن ٴتۇرلى ماقۇلىققا* قاتىستى زاڭ، مىنە، وسىنداي.
47 بۇل زاڭ سەندەرگە تازانى تازا ەمەستەن، جەۋگە بولاتىن جانۋاردى جەۋگە بولمايتىندارىنان اجىراتا بىلۋلەرىڭ ٷشىن بەرىلدى+».
سىلتەمەلەر
^ تاۋ-تاستا مەكەندەيتىن قويان ٴتارىزدى اڭ.
^ سوزبە-ٴسوز «جانداردىڭ».
^ ياعني حامەلەون.
^ ياعني گەككون.
^ سوزبە-ٴسوز «جانعا».