مۇسانىڭ 3-جازباسى 14:1—57
14 ەحوبا مۇساعا ٴتىل قاتىپ، تاعى بىلاي دەدى:
2 «الاپەسپەن اۋىرعان ادام تازا دەپ جاريالاناتىن كۇنى ورىندالۋ كەرەك زاڭ مىناداي: ونى ٴدىني قىزمەتكەرگە اپارۋ كەرەك+.
3 ٴدىني قىزمەتكەر قوستىڭ سىرتىنا شىعىپ، ناۋقاستى قاراپ شىقسىن. ەگەر ول الاپەسىنەن ايىققان بولسا،
4 ٴدىني قىزمەتكەر وعان ەكى ادال قۇستى، قاراعاي بۇتاعىن، ال قىزىل ٴتۇستى ٴجىپ پەن سايساعىز وسىمدىگىن اكەلۋدى بۇيىرسىن.
5 سوسىن ٴدىني قىزمەتكەر قۇستىڭ بىرەۋىن اعىن سۋ قۇيىلعان قىش ىدىستىڭ ۇستىندە باۋىزداتسىن.
6 ول ٴتىرى قۇستى جانە قاراعاي بۇتاعىن، ال قىزىل ٴجىپ پەن سايساعىزدى الىپ، ولاردىڭ ٴبارىن اعىن سۋ ۇستىندە باۋىزدالعان قۇستىڭ قانىنا باتىرىپ السىن.
7 ٴسۇيتىپ، ونى الاپەستەن تازارعان ادامعا جەتى رەت بۇركىسىن. سوسىن ادامدى تازا دەپ جاريالاپ، ٴتىرى قۇستى دالاعا قويا بەرسىن+.
8 تازارۋ راسىمىنەن ٶتىپ جاتقان ادام كيىمىن جۋىپ، دەنەسىندەگى تۇكتى تۇگەل قىرسىن، سونداي-اق سۋمەن ٷستى-باسىن جۋسىن، سوندا تازا بولادى. سودان كەيىن عانا قوسقا كىرۋىنە بولادى، ٴبىراق جەتى كۇن بويى شاتىرىنىڭ سىرتىندا تۇرسىن.
9 جەتىنشى كۇنى شاشىن، ساقال-مۇرتى مەن قاسىن قىرىپ تاستاسىن. وسىنىڭ ٴبارىن تۇگەل قىرىپ، كيىمىن جۋسىن، سونداي-اق سۋمەن ٷستى-باسىن جۋسىن، سوندا تازا بولىپ سانالادى.
10 سەگىزىنشى كۇنى ول ەش كەمىستىگى جوق ەكى جاس قوشقار، ەش كەمىستىگى جوق ٴبىر جاسقا دەيىنگى ۇرعاشى توقتى+، استىق تارتۋى+ رەتىندە ماي قوسىلعان ساپالى ۇننان ەفانىڭ وننان ٷش بولىگىن* جانە ٴبىر لوگ* ماي الىپ كەلسىن+.
11 ادامدى تازا دەپ جاريالايتىن ٴدىني قىزمەتكەر ونى جانە ونىڭ اكەلگەندەرىن ەحوبانىڭ الدىنا، كەزدەسۋ شاتىرىنىڭ كىرەبەرىسىنە، اپارادى.
12 ٴسۇيتىپ، ٴدىني قىزمەتكەر ايىپ قۇرباندىعى ٷشىن شالىنعان جاس قوشقاردىڭ+ ٴبىرىن جانە ٴبىر لوگ مايدى الىپ، تەربەپ اكەلەتىن تارتۋ رەتىندە ەحوبانىڭ الدىندا ٵرى-بەرى تەربەيدى+.
13 سوسىن جاس قوشقاردى قاسيەتتى ورىندا، كۇنا ٷشىن اكەلىنەتىن جانە تۇگەل ورتەلەتىن قۇرباندىق سويىلاتىن جەردە، سويادى+. كۇنا ٷشىن اكەلىنەتىن قۇرباندىق سياقتى، ايىپ قۇرباندىعى دا ٴدىني قىزمەتكەرگە تيەسىلى+. ول اسا كيەلى+.
14 بۇدان سوڭ ٴدىني قىزمەتكەر ايىپ قۇرباندىعىنىڭ قانىنان الىپ، تازارۋ راسىمىنەن ٶتىپ جاتقان ادامنىڭ وڭ قۇلاعىنىڭ سىرعالىعىنا، وڭ قولى مەن وڭ اياعىنىڭ باس بارماعىنا جاقسىن.
15 سوسىن ٴبىر لوگ مايدىڭ+ ٴبىرازىن ٶزىنىڭ سول الاقانىنا قۇيىپ السىن دا،
16 وڭ قولىنىڭ ساۋساعىن سول مايعا باتىرىپ، ەحوبانىڭ الدىندا جەتى رەت بۇركىسىن.
17 سونداي-اق الاقانىنداعى مايدان تازارۋ راسىمىنەن ٶتىپ جاتقان ادامنىڭ وڭ قۇلاعىنىڭ سىرعالىعىنا، وڭ قولى مەن وڭ اياعىنىڭ باس بارماعىنا جاعىلعان ايىپ قۇرباندىعىنىڭ قانىنىڭ ۇستىنە جاقسىن.
18 الاقانىندا قالعان مايدى ٴدىني قىزمەتكەر ونىڭ باسىنا جاعىپ، ەحوبانىڭ الدىندا كۇناسىن وتەيدى+.
19 ٴدىني قىزمەتكەر كۇنا ٷشىن اكەلىنگەن قۇرباندىقتى+ شالىپ، تازارۋ راسىمىنەن ٶتىپ جاتقان ادامنىڭ كۇناسىن وتەسىن، سودان كەيىن تۇگەل ورتەلەتىن قۇرباندىقتى سويسىن.
20 سوسىن ونى استىق تارتۋىمەن+ بىرگە قۇرباندىق وشاعىندا ورتەپ، الگى ادامنىڭ كۇناسىن وتەسىن+، سوندا ول تازا بولىپ سانالادى+.
21 ەگەر ول كەدەي بولىپ، مۇنداي قۇرباندىق بەرۋگە جاعدايى كەلمەسە، كۇناسىن وتەۋ ٷشىن ايىپ قۇرباندىعىنا ٴبىر جاس قوشقار اكەلىپ، تەربەپ ۇسىناتىن تارتۋ رەتىندە ۇسىنسىن. مۇنىمەن بىرگە استىق تارتۋى رەتىندە ماي قوسىلعان ساپالى ۇننان ەفانىڭ وننان ٴبىر بولىگىن* جانە ٴبىر لوگ ماي اكەلسىن.
22 سونداي-اق جاعدايىنا قاراي، ەكى كەپتەر نە ەكى جاس كوگەرشىن الىپ كەلسىن: بىرەۋىن كۇنا ٷشىن قۇرباندىققا، ەكىنشىسىن تۇگەل ورتەلەتىن قۇرباندىققا+.
23 سەگىزىنشى كۇنى+ ادام تازا دەپ جاريالانۋى ٷشىن بۇلاردى ەحوبانىڭ الدىنا، ياعني كەزدەسۋ شاتىرىنىڭ كىرەبەرىسىنە اكەلىپ، ٴدىني قىزمەتكەرگە بەرسىن+.
24 ٴدىني قىزمەتكەر ايىپ قۇرباندىعىنا اكەلىنگەن جاس قوشقاردى+ جانە ٴبىر لوگ مايدى الىپ، تەربەپ ۇسىناتىن تارتۋ رەتىندە ەحوبانىڭ الدىندا ٵرى-بەرى تەربەسىن+.
25 سوسىن قوشقاردى سويسىن دا، قانىنان الىپ، تازارۋ راسىمىنەن ٶتىپ جاتقان ادامنىڭ وڭ قۇلاعىنىڭ سىرعالىعىنا، وڭ قولى مەن وڭ اياعىنىڭ باس بارماعىنا جاقسىن+.
26 بۇدان سوڭ ٴدىني قىزمەتكەر سول قولىنىڭ الاقانىنا ماي قۇيىپ+،
27 وعان وڭ قولىنىڭ ساۋساعىن باتىرسىن دا، ەحوبانىڭ الدىندا جەتى رەت بۇركىسىن.
28 سودان كەيىن الاقانىنداعى مايدان تازارۋ راسىمىنەن ٶتىپ جاتقان ادامنىڭ وڭ قۇلاعىنىڭ سىرعالىعىنا، وڭ قولى مەن وڭ اياعىنىڭ باس بارماعىنا جاعىلعان ايىپ قۇرباندىعىنىڭ قانىنىڭ ۇستىنە جاقسىن.
29 ال قالعان مايدى ونىڭ باسىنا جاعىپ، ەحوبانىڭ الدىندا كۇناسىن وتەسىن.
30 ٴدىني قىزمەتكەر ادامنىڭ جاعدايىنا قاراي اكەلگەن كەپتەرلەرىن نە جاس كوگەرشىندەرىن الىپ+،
31 ونىڭ ٴبىرىن كۇنا ٷشىن قۇرباندىققا، ەكىنشىسىن تۇگەل ورتەلەتىن قۇرباندىققا شالۋ كەرەك+. ول بۇلاردى استىق تارتۋىمەن بىرگە ۇسىنسىن. وسىلاي ٴدىني قىزمەتكەر تازارۋ راسىمىنەن ٶتىپ جاتقان ادامنىڭ كۇناسىن ەحوبانىڭ الدىندا وتەسىن+.
32 بۇل — الاپەسپەن اۋىرعان، ٴبىراق تازا دەپ جاريالانۋىنا قاجەتتى نارسەلەردى اكەلۋگە جاعدايى كەلمەيتىن ادام ٷشىن بەرىلگەن زاڭ».
33 ەحوبا ٴسوزىن جالعاپ، مۇساعا بىلاي دەدى:
34 «مەن يەلىكتەرىڭە+ بەرىپ وتىرعان قاناحان جەرىنە+ كەلگەننەن كەيىن، ۇيلەرىڭە الاپەستىڭ جۇعۋىنا جول بەرەمىن+.
35 سوندا ٷيدىڭ يەسى ٴدىني قىزمەتكەرگە كەلىپ: «ۇيىمدە الاپەسكە ۇقساعان داق پايدا بولدى»،— دەپ ايتسىن.
36 ٴدىني قىزمەتكەر داقتى كورمەس بۇرىن، ۇيدەگى دۇنيە-مۇلىكتىڭ ٴبارىن سىرتقا شىعارۋدى بۇيىرسىن. سوندا ولار تازا ەمەس دەپ جاريالانبايدى. بۇدان كەيىن ٴدىني قىزمەتكەر ۇيگە كىرىپ كورسىن.
37 ٷي قابىرعاسىنداعى داقتاردى تەكسەرگەندە، ولاردىڭ ٴتۇسى سارعىش-جاسىل نە قىزعىلت بولسا جانە قابىرعاعا تەرەڭدەي تۇسكەن بولىپ كورىنسە،
38 وندا ٴدىني قىزمەتكەر سىرتقا شىعىپ، ٷيدى جەتى كۇنگە جاۋىپ تاستاسىن+.
39 جەتىنشى كۇنى ول كەلىپ، ٷيدى تاعى قاراپ شىقسىن. ەگەر داقتار قابىرعاعا جايىلعان بولسا،
40 ونىڭ داعى بار تاستارىن الىپ، قالانىڭ سىرتىنداعى ارام نارسەلەر تاستايتىن جەرگە شىعارۋدى بۇيىرسىن.
41 سونداي-اق ٷيدىڭ ىشكى قابىرعالارىنىڭ سىلاعىن تۇگەل قىرىپ، قوقىستى قالا سىرتىنداعى ارام نارسەلەر تاستايتىن جەرگە شىعارۋدى تاپسىرسىن.
42 ٴسۇيتىپ، الىنعان تاستاردىڭ ورنىنا باسقا تاستاردى قالاتىپ، ٷيدى جاڭا لاي سىلاقپەن سىلاتسىن.
43 ەگەر ٷيدىڭ تاستارى الىنىپ، ەسكى سىلاعى قىرىلىپ، قايتا سىلانعاننان كەيىن دە داق پايدا بولسا،
44 ٴدىني قىزمەتكەر كەلىپ، ونى تەكسەرسىن. ەگەر داق ٷيدىڭ ىشكى قابىرعالارىنا جايىلعان بولسا، وندا بۇل — جۇقپالى الاپەس+. ول ٷي تازا ەمەس.
45 ٴدىني قىزمەتكەر ٷيدى بۇزىپ، ونىڭ تاستارىن، بورەنەلەرى مەن بۇكىل سىلاعىن قالا سىرتىنداعى تازا ەمەس نارسەلەر تاستايتىن جەرگە شىعارۋدى بۇيىرسىن+.
46 ەگەر كىمدە-كىم سول ۇيگە جابىق تۇرعان كۇندەرى كىرسە+، كەشكە دەيىن تازا ەمەس بولىپ سانالادى+.
47 سونداي-اق كىم ونداي ۇيدە جاتسا نە تاماق جەسە، كيىم-كەشەگىن جۋسىن.
48 ال ەگەر ٴدىني قىزمەتكەر كەلىپ، ٷيدى قاراعاندا، سىلاعى جاڭارتىلعاننان كەيىن ۇيدە داق قايتا پايدا بولماسا، ونى تازا دەپ جاريالاسىن، ويتكەنى داق جوق بولىپ كەتتى.
49 ٴدىني قىزمەتكەر ۇيگە تازارتۋ ٴراسىمىن جاساۋ ٷشىن ەكى قۇستى، قاراعايدىڭ بۇتاعىن، ال قىزىل ٴجىپتى جانە سايساعىزدى+ السىن.
50 ٴسۇيتىپ، قۇستىڭ بىرەۋىن اعىن سۋ قۇيىلعان قىش ىدىستىڭ ۇستىندە باۋىزداسىن.
51 كەيىن قاراعاي بۇتاعىن، سايساعىزدى، ال قىزىل ٴجىپ پەن ٴتىرى قۇستى الىپ، ولاردى اعىن سۋ ۇستىندە باۋىزدالعان قۇستىڭ قانىنا باتىرىپ، ٷي جاققا قاراي جەتى رەت بۇركىسىن+.
52 وسىلاي ول قۇستىڭ قانىن، اعىن سۋدى، ٴتىرى قۇستى، قاراعاي بۇتاعىن، سايساعىز بەن ال قىزىل ٴجىپتى قولدانىپ، ٷيدى ارام نارسەدەن تازارتۋ ٴراسىمىن جاساسىن.
53 ٴتىرى قۇستى قالا سىرتىنا شىعارىپ، دالاعا ۇشىرىپ جىبەرسىن. وسىلاي ول ٷيدى ارام نارسەدەن ارىلتادى* دا، ٷي تازا بولىپ سانالادى.
54 بۇل زاڭ الاپەس اۋرۋىنىڭ كەز كەلگەن تۇرىنە، يەككە جانە باسقا شىققان جاراعا+،
55 كيىمدە نە ۇيدە پايدا بولعان الاپەسكە+،
56 تەرىدەگى ىسىككە، بورتپەگە جانە داققا+ قاتىستى.
57 بۇل زاڭ ٴبىر نارسەنىڭ قاي كەزدە تازا، قاي كەزدە تازا ەمەس ەكەنىن انىقتاۋ ٷشىن بەرىلدى+. الاپەسكە قاتىستى زاڭ، مىنە، وسىنداي+».
سىلتەمەلەر
^ ياعني 6.6 ليتر. B14 قوسىمشاسىن قاراڭىز.
^ 1 لوگ 31.0 ليترگە تەڭ. B14 قوسىمشاسىن قاراڭىز.
^ ياعني 2.2 ليتر. B14 قوسىمشاسىن قاراڭىز.
^ سوزبە-ٴسوز «كۇناسىن وتەيدى».
