مۇسانىڭ 3-جازباسى 2:1—16
-
استىق تارتۋى (1—16)
2 ەگەر بىرەۋ ەحوباعا استىق تارتۋىن اكەلمەك بولسا+، ساپالى ۇن اكەلسىن. ونىڭ ۇستىنە ماي قۇيىپ، لادان* قويسىن+.
2 سوسىن ونى حاروننىڭ ٴدىني قىزمەتكەر ۇلدارىنا بەرسىن. ٴدىني قىزمەتكەر ۇندى، مايدى جانە بۇكىل لاداندى ٴبىرۋىس ەتىپ الىپ، قۇرباندىق وشاعىندا ەسكە سالاتىن تارتۋ+ رەتىندە ورتەپ جىبەرەدى. بۇل — ەحوباعا ورتەپ ۇسىناتىن ۇنامدى حوش ٴيىستى تارتۋ.
3 ال استىق تارتۋىنىڭ قالعان بولىگى حارون مەن ونىڭ ۇلدارىنىڭ ۇلەسىنە تيەدى+. بۇل ەحوباعا ورتەپ ۇسىنىلعان تارتۋدىڭ اسا كيەلى بولىگى بولماق+.
4 ەگەر استىق تارتۋىن تاندىردا پىسىرىلگەن ناننان اكەلمەك بولساڭ، ول ساپالى ۇنعا ماي قوسىپ، اشىتقىسىز پىسىرىلگەن تەسىك كۇلشە نەمەسە ماي جاعىلعان ٴپاتىر نان بولسىن+.
5 ال استىق تارتۋىڭ تاباعا پىسىرىلگەن نان بولسا+، ول ساپالى ۇنعا ماي قوسىپ، اشىتقىسىز ٴپىسىرىلسىن.
6 ونى سىندىرىپ-سىندىرىپ، ۇستىنە ماي قۇي+. بۇل — استىق تارتۋى.
7 ەگەر استىق تارتۋىڭ قازاندا پىسىرىلگەن بولسا، ول ماي ارالاستىرىلعان ساپالى ۇننان جاسالسىن.
8 وسىلاي دايىندالعان استىق تارتۋىڭدى ەحوباعا اكەلىپ، ٴدىني قىزمەتكەرگە بەر. ول ونى قۇرباندىق وشاعىنا الىپ بارادى.
9 ٴدىني قىزمەتكەر استىق تارتۋىنان الىپ، ونى ەسكە سالاتىن تارتۋ رەتىندە+ قۇرباندىق وشاعىندا ورتەپ جىبەرەدى. بۇل — ەحوباعا ورتەپ ۇسىناتىن ۇنامدى حوش ٴيىستى تارتۋ+.
10 استىق تارتۋىنىڭ قالعان بولىگى بولسا حارون مەن ونىڭ ۇلدارىنىڭ ۇلەسىنە تيەدى. بۇل ەحوباعا ورتەپ ۇسىنىلعان تارتۋدىڭ اسا كيەلى بولىگى بولماق+.
11 ەحوباعا ۇسىناتىن استىق تارتۋىڭنىڭ ەشقايسىسى اشىتىلعان بولماسىن+. ويتكەنى ەشقانداي اشىتقى نە بال* ەحوباعا ورتەلەتىن تارتۋ رەتىندە وتقا جاعىلماۋ كەرەك.
12 ولاردى ەحوباعا ارناپ العاشقى ٶنىم تارتۋى رەتىندە الىپ كەل+. ٴبىراق ولاردى قۇرباندىق وشاعىندا حوش ٴيىستى ۇنامدى تارتۋ رەتىندە ورتەۋگە بولمايدى.
13 استىق تارتۋلارىڭنىڭ بارىنە دە تۇز قوس. وعان تۇزدى مىندەتتى تۇردە قوس، ويتكەنى ول سەنىڭ قۇدايمەن جاساسقان كەلىسىمىڭدى ەسكە سالىپ تۇرادى. ٵربىر تارتۋىڭدى تۇزبەن ۇسىن+.
14 ەگەر ەحوباعا استىق تارتۋىن العاش جيناعان ونىمىڭنەن ۇسىنباق بولساڭ، جاڭا پىسكەن ٴداندى وتقا قۋىرىپ، جارمالاپ اكەل. بۇل العاشقى ونىمىڭنەن اكەلگەن استىق تارتۋى بولادى+.
15 وعان ماي قۇيىپ، ۇستىنە لادان قوي. بۇل — استىق تارتۋى.
16 ٴدىني قىزمەتكەر وسى جارمالانعان ٴدان مەن مايدىڭ ٴبىرازىن جانە بۇكىل لاداندى الىپ، ەسكە سالاتىن تارتۋ رەتىندە ورتەپ جىبەرەدى+. بۇل — ەحوباعا ورتەپ ۇسىنىلاتىن تارتۋ.
سىلتەمەلەر
^ بۇل — جانعاندا جۇپار ٴيىس شىعاراتىن حوش ٴيىستى زات. ٴتۇسى اق، كاۋچۋك اعاشىنىڭ شايىرىنا ۇقسايدى.
^ بۇل ارا بالى ەمەس، ٸنجىر نە باسقا دا جەمىستەردىڭ شىرىنى بولسا كەرەك.