مۇسانىڭ 3-جازباسى 25:1—55
25 سيناي تاۋىندا ەحوبا مۇساعا تاعى بىلاي دەدى:
2 «يسرايلدىكتەرگە مىنانى ايت: —مەن وزدەرىڭە بەرگەلى جاتقان جەرگە كەلگەن سوڭ+، ەحوبانىڭ دەمالىسقا قاتىستى زاڭىن ۇستانىپ، جەردى تىنىقتىرىڭدار+.
3 التى جىل بويى تاناپقا ەگىن ەگىپ، جۇزىمدىكتى بۇتاپ، جەردىڭ ٶنىمىن جيناڭدار+.
4 ال جەتىنشى جىلى جەرلەرىڭ تولىقتاي تىنىقسىن، بۇل جىل — ەحوباعا ارنالعان دەمالىس جىلى. وسى جىلى تاناپقا ەشقانداي ەگىن ەكپەڭدەر، جۇزىمدىكتى بۇتاماڭدار.
5 سوڭعى وراق كەزىندە تۇسكەن داننەن شىققان ەگىندى ورماڭدار، بۇتالماعان جۇزىمدىكتىڭ جەمىسىن جيناماڭدار. بۇل جىل جەر تولىعىمەن تىنىعاتىن جىل بولسىن.
6 دەمالىس جىلى جەردىڭ ٶزى بەرگەن ٶنىمى سەندەرگە ازىق بولسىن. ونى وزدەرىڭ دە، قۇل-كۇڭدەرىڭ دە، جالدامالى جۇمىسشىلارىڭ دا، ارالارىڭدا تۇرىپ جاتقان كىرمەلەر دە،
7 مالدارىڭ دا، دالادا جۇرگەن اڭدار دا جەسىن. جەردەن ٶسىپ شىققاننىڭ ٴبارىن جەۋگە بولادى.
8 جەتى دەمالىس جىلىن، ياعني جەتى رەت جەتى جىلدان ەسەپتەڭدەر. سوندا جەتى دەمالىس جىلى 49 جىلدى قۇرايدى.
9 جەتىنشى ايدىڭ ونىنشى كۇنى، كۇنا وتەلەتىن كۇنى+، ٴمۇيىز كەرنەي تارتىڭدار، ونىڭ ٷنى قاتتى شىقسىن. بۇكىل ەلدە كەرنەي تارتىلاتىن بولسىن.
10 ەلۋىنشى جىل قاسيەتتى جىل بولىپ، ەلدىڭ كۇللى تۇرعىندارىنا ازاتتىق جاريالاڭدار+. بۇل جىل — سەندەر ٷشىن ازاتتىق جىلى. ٴارقايسىسىڭ مۇرا ەتكەن جەرلەرىڭە، وتباسىلارىڭا ورالىڭدار+.
11 ەلۋىنشى جىل سەندەر ٷشىن ازاتتىق جىلى بولماق. سول جىلى ەگىن ەكپەڭدەر، ٴتۇسىپ قالعان داننەن شىققان ەگىندى ورماڭدار، بۇتالماعان جۇزىمدىكتىڭ جەمىسىن دە جيناماڭدار+.
12 ويتكەنى بۇل — ازاتتىق جىلى، ول سەندەر ٷشىن قاسيەتتى بولسىن. وسى جىلى جەردىڭ ٶزى بەرگەن ٶنىمىن عانا ازىق ەتىڭدەر+.
13 ازاتتىق جىلى ٴارقايسىسىڭ مۇرا ەتكەن جەرلەرىڭە قايتىڭدار+.
14 ەگەر بىرەۋگە بىردەڭە ساتاتىن نە ودان ساتىپ الاتىن بولساڭدار، ٴبىر-بىرىڭنەن پايدا ٴتۇسىرۋدى كوزدەمەڭدەر+.
15 ەگەردە بىرەۋدەن جەر ساتىپ الاتىن بولساڭدار، ونىڭ قۇنىن بەلگىلەۋ ٷشىن سوڭعى ازاتتىق جىلىنان بەرى قانشا جىل وتكەنىن ەسكەرىڭدەر. ال ساتۋشى جەردىڭ قۇنىن كەلەسى ازاتتىق جىلىنا دەيىن ٶنىم جينايتىن قانشا جىل قالسا، سوعان قاراي بەلگىلەسىن+.
16 ەگەر ازاتتىق جىلىنا دەيىن ٵلى كوپ جىل بار بولسا، ول جەردىڭ باعاسىن قىمباتتاتا الادى. ال ازعانا جىل قالسا، باعاسىن ارزانداتۋ كەرەك. سەبەبى ول جەردەن الاتىن ٶنىمدى ساتىپ وتىر.
17 ٴبىر-بىرىڭنەن پايدا كورۋگە تىرىسپاڭدار+. قۇدايدان قورقىڭدار+. مەن سەندەردىڭ قۇدايلارىڭ ەحوبامىن+.
18 مەنىڭ نۇسقاۋلارىم مەن شەشىمدەرىمدى ورىنداڭدار، سوندا ەلدەرىڭدە قاۋىپ-قاتەرسىز ٶمىر كەشەسىڭدەر+.
19 جەر ٶز ٶنىمىن بەرىپ+، سەندەر تويىنعانشا ٸشىپ-جەپ، بەيبىت ٶمىر سۇرەسىڭدەر+.
20 ٴبىراق سەندەر «جەتىنشى جىلى تۇقىم ەگىپ، ٶنىمىن جيناماساق، وندا قالاي كۇن كورەمىز؟» دەپ سۇرارسىڭدار+.
21 الايدا ۋايىمداماڭدار، ويتكەنى مەن التىنشى جىلى سەندەرگە باتامدى جاۋدىرامىن، سوندا جەر ٷش جىلعا جەتەرلىك ٶنىم بەرەدى+.
22 سەگىزىنشى جىلى ەگىن ەگەسىڭدەر، ٴبىراق سول جىلى التىنشى جىلدىڭ ٶنىمىن جەيسىڭدەر، ٴتىپتى ونى توعىزىنشى جىلدىڭ ەگىنىن جيناعانشا ازىق ەتەسىڭدەر.
23 جەردى ٴبىرجولا ساتىپ جىبەرۋگە بولمايدى+، سەبەبى جەر مەنىكى+. سەندەر مەن ٷشىن جاتجەرلىك ٵرى كىرمەسىڭدەر+.
24 يەلىكتەرىڭە تيگەن بۇكىل ەلدە اركىم ٶز جەرىن قايتا ساتىپ الۋعا قۇقىلى بولۋ كەرەك.
25 ەگەر يسرايلدىك باۋىرىڭ كەدەيلەنىپ، مەنشىگىندەگى جەرىنىڭ ٴبىر بولىگىن ساتىپ جىبەرسە، ەڭ جاقىن تۋىسى ونىڭ جەرىن قايتا ساتىپ اپەرۋى كەرەك+.
26 ال ساتىپ اپەرەتىن تۋىسى بولماي، ٴبىراق ٶزىنىڭ ٵل-اۋقاتى جاقسارىپ، جەرىن ساتىپ الۋعا قاراجات تاپسا،
27 وندا جەرىن ساتقان جىلدان بەرى تۇسكەن ٶنىمنىڭ باعاسىن ەسەپتەسىن دە، ونى باستاپقى باعاسىنان الىپ تاستاسىن. ٴسۇيتىپ، شىققان ايىرمانى الگى كىسىگە تولەسىن. وسىدان كەيىن ول ٶز جەرىن قايتا يەمدەنە الادى+.
28 ال ەگەر جەرىن ساتىپ الۋعا قاراجات تاپپاسا، وندا ساتقان جەرى جاڭا يەسىنىڭ قاراماعىندا ازاتتىق جىلىنا دەيىن قالا بەرەدى+. سول جىل كەلگەندە، جەر بۇرىنعى يەسىنە قايتارىلادى. وسىلاي ول ٶز مەنشىگىن قايتا يەمدەنەدى+.
29 ەگەر بىرەۋ بەكىنىسى بار قالاداعى ٷيىن ساتسا، ونى ٴبىر جىلدىڭ ىشىندە قايتا ساتىپ الۋعا قۇقى بار+. ونىڭ بۇل قۇقى ٴبىر جىلعا دەيىن كۇشىندە بولادى.
30 ال ەگەر ٴبىر جىلدىڭ ىشىندە ساتىپ الماسا، بەكىنىسى بار قالاداعى ٷي ونىڭ جاڭا يەسىنە جانە سونىڭ ٷرىم-بۇتاعىنا ٴبىرجولا وتەدى. ازاتتىق جىلى ٷي بۇرىنعى يەسىنە قايتارىلمايدى.
31 ال بەكىنىسى جوق اۋىلدى جەرلەردەگى ۇيلەر ەگىستىك جەردىڭ ٴبىر بولىگى بولىپ ەسەپتەلەدى. سوندىقتان ٷيدى قايتا ساتىپ الۋ قۇقىعى ساقتالىپ قالادى. ازاتتىق جىلىندا ٷي بۇرىنعى يەسىنە قايتارىلادى.
32 ال لەۋىلىكتەر ٶز قالالارىنداعى+ ۇيلەرىن قايتا ساتىپ الۋعا ٵردايىم قۇقىلى.
33 ەگەر لەۋىلىك ٷيىن ساتىپ الماسا، ازاتتىق جىلى وزىنە قايتارىلۋ كەرەك+. ويتكەنى لەۋىلىكتەردىڭ قالالارىنداعى ۇيلەر يسرايلدىكتەردىڭ اراسىنداعى ولاردىڭ مەنشىكتەرى بولىپ تابىلادى+.
34 ال ولاردىڭ قالالارىنىڭ ماڭىنداعى جايىلىمداردى+ ساتۋعا بولمايدى. سەبەبى بۇلار لەۋىلىكتەردىڭ ماڭگىلىك يەلىكتەرى.
35 ەگەر قاسىڭدا تۇراتىن يسرايلدىك باۋىرىڭ كەدەيلەنىپ، كۇنىن كورە الماي قالسا، اراڭدا تۇرا بەرۋى ٷشىن، جاتجەرلىك پەن كىرمەگە+ كومەكتەسكەنىڭدەي، وعان دا كومەكتەس+.
36 ودان ٶسىم الما نە پايدا ٴتۇسىرۋدى كوزدەمە+. قۇدايدان قورىق+. باۋىرىڭنىڭ اراڭدا تۇرا بەرۋىنە جاعداي جاسا.
37 وعان قارىزدى وسىممەن بەرمە+، ازىق-تۇلىك بەرگەندە دە، پايدا كوزدەمە.
38 مەن سەندەرگە قاناحان جەرىن سيلاپ، قۇدايلارىڭ بولۋ ٷشىن مىسىر ەلىنەن الىپ شىققان+ قۇدايلارىڭ ەحوبامىن+.
39 ەگەر قاسىڭدا تۇراتىن يسرايلدىك باۋىرىڭ كەدەيلەنىپ، ٶزىن ساعان قۇلدىققا ساتسا+، ونى قۇل سياقتى اۋىر جۇمىسقا سالما+.
40 وعان جالدامالى جۇمىسشىعا+ نەمەسە كىرمەگە قاراعانداي قارا. ول ساعان ازاتتىق جىلىنا دەيىن قىزمەت ەتسىن.
41 ال سول جىلى بالالارىمەن بىرگە ٶز تۋىستارىنا، اتا-باباسىنان مۇرا ەتكەن يەلىگىنە قايتسىن+.
42 ويتكەنى يسرايل ۇلدارى — مىسىر ەلىنەن الىپ شىققان مەنىڭ قۇلدارىم+. ولار وزدەرىن قۇلدىققا ساتپاۋ كەرەك.
43 ولارعا قاتىگەزدىك تانىتپا+، قۇدايدان قورىق+.
44 قۇل مەن كۇڭىڭ اينالاڭدا تۇراتىن حالىقتاردان بولسىن. قۇل نە كۇڭدى سولاردان ساتىپ ال.
45 سونداي-اق قۇلدى ارالارىڭدا تۇراتىن كىرمەلەردەن+، ەلدەرىڭدە تۋىلعان ولاردىڭ ۇرپاقتارىنان ساتىپ الىڭدار. مىنە، سولار سەندەردىڭ مەنشىكتەرىڭ بولا الادى.
46 ولاردى بالالارىڭا ماڭگىلىك مۇراعا قالدىرا الاسىڭدار. سولاردى جۇمىسقا سالساڭدار بولادى، ٴبىراق يسرايلدىك باۋىرلارىڭا قاتىگەزدىك تانىتپاڭدار+.
47 ەگەر جاتجەرلىك نە كىرمە ادام بايىسا، ال ونىڭ قاسىندا تۇراتىن يسرايلدىك باۋىرىڭ كەدەيلەنىپ، ٶزىن سوعان نە سونىڭ اۋلەتىندەگى بىرەۋگە قۇلدىققا ساتسا،
48 ونى قايتا ساتىپ الۋ قۇقىعى ساقتالا بەرەدى. ونى نە باۋىرلارىنىڭ ٴبىرى+،
49 نە اكەسىنىڭ اعاسى، نە اعاسىنىڭ بالاسى، نە قانداس تۋىستارىنىڭ ٴبىرى قايتا ساتىپ السا بولادى.
قۇلدىقتاعى ادام بايىپ كەتسە، ٶز-ٶزىن قۇلدىقتان ساتىپ الۋىنا بولادى+.
50 ول ٶزىن قۇلدىققا ساتقان جىلدان باستاپ ازاتتىق جىلعا+ دەيىنگى ۋاقىتتى قوجايىنىمەن بىرگە ەسەپتەسىن، ونىڭ ٶزىن ساتقان قۇنى سول جىلدارعا ساي بولۋ كەرەك+. سول ۋاقىتتاعى ونىڭ جۇمىس كۇندەرى جالدامالى جۇمىسشىنىكىندەي بولۋ كەرەك+.
51 ەگەر ازاتتىق جىلىنا دەيىن ٵلى كوپ جىل بار بولسا، ول ٶزىن ساتىپ الۋ قۇنىن سول جىلدارعا ساي تولەسىن.
52 از جىل قالسا دا، ٶزىن ساتىپ الۋ قۇنىن سول قالعان جىلدارعا ساي ەسەپتەپ، تولەسىن.
53 قىزمەت ەتكەن جىلدارىنىڭ بارىندە قوجايىنى وعان جالدامالى جۇمىسشى رەتىندە قاراسىن. سەندەر ونىڭ يسرايلدىك قۇلعا قاتىگەزدىك كورسەتۋىنە جول بەرمەڭدەر+.
54 ال ەگەر ول وسى جولمەن ٶزىن قۇلدىقتان قايتا ساتىپ الا الماسا، وندا ازاتتىق جىلى ٶزى دە، بالا-شاعاسى دا بوساتىلسىن+.
55 ويتكەنى يسرايلدىكتەر — مەنىڭ قۇلدارىم. ولار — مەنىڭ مىسىردان الىپ شىققان قۇلدارىم+. مەن سەندەردىڭ قۇدايلارىڭ ەحوبامىن.
