مۇسانىڭ 3-جازباسى 4:1—35
-
كۇنا ٷشىن اكەلىنەتىن قۇرباندىق (1—35)
4 ەحوبا ٴسوزىن جالعاپ، مۇساعا بىلاي دەدى:
2 «يسرايلدىكتەرگە مىنانى ايت: —ەگەر الدەبىر جان ەحوبا تيىم سالعاندى ىستەپ، بايقاۋسىزدا كۇنا جاساپ قويسا+، بىلاي ىستەۋ كەرەك:
3 ەگەر مايلانعان* ٴدىني قىزمەتكەر+ كۇنا جاساپ+، سول ارقىلى بۇكىل حالىقتى ايىپتى ەتسە، جاساعان كۇناسى ٷشىن ەحوباعا ەش كەمىستىگى جوق جاس بۇقا اكەلسىن. بۇل — كۇنا ٷشىن اكەلىنەتىن قۇرباندىق+.
4 ول بۇقانى كەزدەسۋ شاتىرىنىڭ كىرەبەرىسىنە+، ەحوبانىڭ الدىنا اكەلىپ، ونىڭ باسىنا قولىن قويسىن. سوسىن بۇقانى ەحوبانىڭ الدىندا سويسىن+.
5 مايلانعان ٴدىني قىزمەتكەر+ ونىڭ قانىنان الىپ، كەزدەسۋ شاتىرىنا كىرسىن.
6 ول ساۋساعىن قانعا مالىپ+، ەحوبانىڭ الدىندا، ياعني قاسيەتتى ورىنداعى شىمىلدىقتىڭ الدىنا جەتى رەت بۇركىسىن+.
7 بۇدان سوڭ ول قاننان الىپ، كيەلى شاتىردا ەحوبانىڭ الدىندا تۇرعان حوش ٴيىستى زات تۇتەتەتىن ۇستەلدىڭ مۇيىزدەرىنە جاقسىن+. ال قالعان قاندى كەزدەسۋ شاتىرىنىڭ كىرەبەرىسىندەگى قۇرباندىق وشاعىنىڭ تۇبىنە توكسىن+.
8 بۇدان كەيىن ول كۇنا ٷشىن اكەلىنگەن بۇقانىڭ بار مايىن، اتاپ ايتقاندا: تەرى استى مايى مەن ٸشمايىن،
9 بۇيرەك مايىمەن بىرگە ەكى بۇيرەگىن — السىن. بۇيرەكتەرمەن قوسا باۋىر بەتىندەگى مايدى دا السىن+.
10 تاتۋلىق قۇرباندىعى رەتىندە اكەلىنگەن بۇقادان نە الىنسا، وسى بۇقادان دا سول الىنسىن+. سوسىن ٴدىني قىزمەتكەر مۇنىڭ ٴبارىن قۇرباندىق وشاعىندا ورتەپ جىبەرسىن.
11 ال بۇقانىڭ تەرىسى مەن بار ەتىن، باس-سيراعىن، ىشەك-قارنىن، جىنىن+،
12 ياعني بۇقادان قالعاننىڭ ٴبارىن قوس سىرتىنا شىعارسىن دا، كۇل* توگەتىن تازا جەرگە اپارىپ، جانىپ جاتقان وتىننىڭ ۇستىنە قويىپ، ورتەپ جىبەرسىن+. بۇل كۇل توگەتىن جەردە ورتەلۋ كەرەك.
13 ەگەر بۇكىل يسرايل قاۋىمى ەحوبا تيىم سالعاندى ىستەپ، بايقاۋسىزدا كۇنا جاساپ قويسا+، ٴبىراق قاۋىم بۇل تۋرالى بىلمەسە، ٴبارىبىر ايىپتى بولادى+.
14 كەيىن وزدەرىنىڭ كۇنا جاساعانىن بىلگەندە، قاۋىم كەزدەسۋ شاتىرىنىڭ الدىنا كۇنا ٷشىن قۇرباندىققا جاس بۇقا اكەلسىن.
15 قاۋىم اقساقالدارى ەحوبانىڭ الدىندا بۇقانىڭ باسىنا قولدارىن قويسىن. سوسىن بۇقا ەحوبانىڭ الدىندا سويىلسىن.
16 مايلانعان ٴدىني قىزمەتكەر بۇقانىڭ قانىن الىپ، كەزدەسۋ شاتىرىنا كىرەدى.
17 ول ساۋساعىن قانعا مالىپ، ەحوبانىڭ الدىندا، ياعني شىمىلدىقتىڭ+ الدىنا جەتى رەت بۇركيدى.
18 ول قاننان ٴبىراز الىپ، كيەلى شاتىردا ەحوبانىڭ الدىندا تۇرعان حوش ٴيىستى زات تۇتەتەتىن ۇستەلدىڭ+ مۇيىزدەرىنە جاعادى. قالعان قاندى كەزدەسۋ شاتىرىنىڭ كىرەبەرىسىندەگى قۇرباندىق وشاعىنىڭ+ تۇبىنە توگەدى.
19 سوسىن بۇقانىڭ بۇكىل مايىن الىپ، قۇرباندىق وشاعىندا ورتەپ جىبەرەدى+.
20 كۇنا ٷشىن اكەلىنگەن الدىڭعى بۇقاعا نە ىستەسە، بۇعان دا ٴدال سونى ىستەسىن. وسىلايشا ٴدىني قىزمەتكەر حالىقتىڭ كۇناسىن وتەيدى+، ٴسۇيتىپ، ولار كەشىرىمگە يە بولادى.
21 ول بۇقانى قوس سىرتىنا شىعارىپ، الدىڭعى بۇقانى ورتەگەنى سياقتى، مۇنى دا ورتەيدى+. بۇل — قاۋىمنىڭ كۇناسى ٷشىن اكەلىنەتىن قۇرباندىق+.
22 ەگەر باسشىلاردىڭ+ بىرەۋى ەحوبا قۇداي تيىم سالعان نارسەنىڭ ٴبىرىن ىستەپ، ابايسىزدا كۇنا جاساپ، ايىپتى بولسا،
23 يا بولماسا وسى تيىم سالىنعان نارسەنىڭ ٴبىرىن ىستەپ، ٴبىراق كۇنا جاساعانىن كەيىن بىلسە، وندا قۇرباندىققا ەش كەمىستىگى جوق جاس تەكە الىپ كەلسىن.
24 ول تەكەنىڭ باسىنا قولىن قويىپ، سوسىن ونى ەحوبانىڭ الدىندا تۇگەل ورتەلەتىن قۇرباندىق سويىلاتىن جەردە سويسىن+. بۇل — كۇنا ٷشىن اكەلىنگەن قۇرباندىق.
25 ٴدىني قىزمەتكەر كۇنا ٷشىن اكەلىنگەن قۇرباندىقتىڭ قانىنا ساۋساعىن مالىپ، قۇرباندىق وشاعىنىڭ مۇيىزدەرىنە جاعادى+. قالعان قاندى وشاقتىڭ تۇبىنە توگەدى+.
26 تاتۋلىق قۇرباندىعىنىڭ مايىن ورتەگەندەي، مۇنىڭ دا بۇكىل مايىن قۇرباندىق وشاعىندا ورتەيدى+. وسىلاي ٴدىني قىزمەتكەر ونىڭ كۇناسىن وتەيدى، ٴسۇيتىپ، ول كەشىرىمگە يە بولادى.
27 ەگەر قاراپايىم حالىقتان بىرەۋ ەحوبا تيىم سالعان نارسەنىڭ ٴبىرىن ىستەپ، كۇنا جاساپ قويىپ، ايىپتى بولسا+،
28 يا بولماسا وسى تيىم سالىنعان نارسەنىڭ ٴبىرىن ىستەپ، ٴبىراق كۇنا جاساعانىن كەيىن بىلسە، كۇناسى ٷشىن قۇرباندىق رەتىندە ەش كەمىستىگى جوق جاس ەشكى الىپ كەلسىن.
29 ول كۇناسى ٷشىن اكەلگەن قۇرباندىعىنىڭ باسىنا قولىن قويىپ، ونى تۇگەل ورتەلەتىن قۇرباندىق سويىلاتىن جەردە سويسىن+.
30 ٴدىني قىزمەتكەر ەشكىنىڭ قانىنا ساۋساعىن مالىپ، قۇرباندىق وشاعىنىڭ مۇيىزدەرىنە جاعادى. ال قالعان قاندى وشاقتىڭ تۇبىنە توگەدى+.
31 ول تاتۋلىق قۇرباندىعىنىڭ مايىن العانداي+، ەشكىنىڭ دە بۇكىل مايىن الىپ+، ەحوباعا ۇنامدى حوش ٴيىس رەتىندە قۇرباندىق وشاعىنىڭ ۇستىندە جاعىپ جىبەرەدى. وسىلايشا ٴدىني قىزمەتكەر ونىڭ كۇناسىن وتەيدى، ٴسۇيتىپ، ول كەشىرىمگە يە بولادى.
32 ەگەر ادام كۇناسى ٷشىن توقتى اكەلەتىن بولسا، ونىسى ەش كەمىستىگى جوق ۇرعاشى توقتى بولسىن.
33 ول توقتىنىڭ باسىنا قولىن قويىپ، ونى تۇگەل ورتەلەتىن قۇرباندىق سويىلاتىن جەردە كۇنا ٷشىن اكەلەتىن قۇرباندىق رەتىندە سويسىن+.
34 ٴدىني قىزمەتكەر توقتىنىڭ قانىنا ساۋساعىن مالىپ، قۇرباندىق وشاعىنىڭ مۇيىزدەرىنە جاعادى+. ال قالعان قاندى وشاقتىڭ تۇبىنە توگەدى.
35 ول تاتۋلىق قۇرباندىعى رەتىندە اكەلىنگەن جاس قوشقاردىڭ مايىن العانداي، مۇنىڭ دا بۇكىل مايىن الىپ، وشاقتاعى ەحوباعا ارنالعان ورتەلەتىن قۇرباندىقتاردىڭ ۇستىنە قويىپ، جاعىپ جىبەرەدى+. وسىلاي ٴدىني قىزمەتكەر ونىڭ جاساعان كۇناسىن وتەيدى دە، ول كەشىرىمگە يە بولادى+.
سىلتەمەلەر
^ نەمەسە «تاعايىندالعان».
^ نەمەسە «مايلى كۇل»، ياعني قۇرباندىقتاردىڭ مايى سىڭگەن كۇل.
