مۇسانىڭ 3-جازباسى 8:1—36
-
حارون مەن ونىڭ ۇلدارىن ٴدىني قىزمەتكە تاعايىنداۋ (1—36)
8 ەحوبا ٵرى قاراي مۇساعا بىلاي دەدى:
2 «حارون مەن ونىڭ ۇلدارىن+، كيىمدەردى+، مايلاۋ راسىمىنە ارنالعان مايدى+، كۇنا ٷشىن قۇرباندىققا ۇسىناتىن بۇقانى، ەكى قوشقاردى جانە اشىتقىسىز پىسىرىلگەن نان سالىنعان سەبەتتى الىپ كەلىپ+،
3 بۇكىل قاۋىمدى كەزدەسۋ شاتىرىنىڭ الدىنا جينا».
4 مۇسا ەحوبانىڭ ايتقانىنداي ىستەدى. بۇكىل قاۋىم كەزدەسۋ شاتىرىنىڭ الدىنا جينالدى.
5 مۇسا جۇرتقا: «ەحوبا بىزگە مىنانى ىستەۋدى بۇيىردى»،— دەدى دە،
6 حارون مەن ونىڭ ۇلدارىن اكەلىپ، جۋىنۋدى بۇيىردى+.
7 سوسىن ول حارونعا ۇزىن جەڭدى كويلەك+ كيگىزىپ، بەلىنە بەلبەۋ+ بايلادى. ونىڭ سىرتىنان جەڭسىز كويلەك+ پەن ەفود+ كيگىزىپ، توقىلعان بەلبەۋىمەن+ بەلىن مىقتاپ بۋدى.
8 سونان سوڭ كەۋدەسىنە ٴتوسقالتانى+ تاعىپ، ىشىنە ۋريم مەن تۋمميم*+ سالدى.
9 باسىنا سالدە+ كيگىزىپ، سالدەنىڭ ماڭداي تۇسىنا جىلتىراعان التىن تاسپانى، ياعني قۇدايعا باعىشتالعانىنىڭ كيەلى بەلگىسىن تاقتى+. وسىلاي مۇسا ەحوبانىڭ بۇيىرعانىنداي ىستەدى.
10 كەيىن مۇسا مايلاۋ راسىمىنە ارنالعان مايدى الىپ، كيەلى شاتىر مەن ونىڭ ىشىندەگىنىڭ ٴبارىن مايلاپ+، قاسيەتتى ەتتى.
11 سوسىن مايدان الىپ، قۇرباندىق وشاعىنا جەتى رەت بۇركىدى دە، وشاق پەن ونىڭ قۇرال-جابدىقتارىن، قازان مەن ونىڭ تۇعىرىن مايلاپ، ولاردى قاسيەتتى ەتتى.
12 سوڭىندا، وسى مايدان حاروننىڭ باسىنا قۇيىپ، ونى مايلاپ، قاسيەتتى ەتتى+.
13 بۇدان سوڭ مۇسا حاروننىڭ ۇلدارىن العا شىعارىپ، ۇستەرىنە ۇزىن جەڭدى كويلەكتى كيگىزدى دە، بەلدەرىن بەلبەۋمەن بۋىپ، باسكيىم كيگىزىپ+، ەحوبانىڭ بۇيىرعانىنداي ىستەدى.
14 سودان كەيىن مۇسا كۇنا ٷشىن ۇسىناتىن بۇقانى اكەلدى. حارون مەن ونىڭ ۇلدارى بۇقانىڭ باسىنا قولدارىن قويدى+.
15 مۇسا ونى سويىپ، قانىنا+ ساۋساعىن باتىردى دا، قۇرباندىق وشاعىنىڭ ٴتورت بۇرىشىنداعى مۇيىزدەرگە جاعىپ، وشاقتى كۇنادان تازارتتى. قالعان قاندى ونىڭ تۇبىنە توكتى. وسىلاي ول وشاقتى قاسيەتتى ەتتى جانە تازارتتى*.
16 سوسىن بۇقانىڭ بۇكىل ٸشمايىن، باۋىر بەتىندەگى مايىن جانە ەكى بۇيرەگىن مايىمەن قوسا الىپ، وشاقتىڭ ۇستىندە ورتەپ جىبەردى+.
17 ال بۇقانىڭ قالعان بولىگىن — تەرىسى، ەتى مەن جىنىن — قوستىڭ سىرتىنا شىعارىپ ورتەدى+. مۇسا ٴبارىن ەحوبا وزىنە بۇيىرعانداي ىستەدى.
18 كەيىن ول تۇگەل ورتەلەتىن قۇرباندىققا ۇسىنىلاتىن قوشقاردى اكەلدى. حارون مەن ونىڭ ۇلدارى قوشقاردىڭ باسىنا قولدارىن قويدى+.
19 مۇسا ونى باۋىزداپ، قانىن وشاقتىڭ بارلىق جاعىنا بۇركىپ شىقتى.
20 سوسىن قوشقاردى مۇشەلەدى. ٴسۇيتىپ، ونىڭ باسىن، مۇشەلەرى مەن مايىن* ورتەدى.
21 مۇسا قوشقاردىڭ ىشەك-قارنى مەن سيراقتارىن جۋىپ، بۇكىل قوشقاردى وشاقتا جاعىپ جىبەردى. بۇل — تۇگەل ورتەلەتىن قۇرباندىق، قۇدايعا ۇنامدى حوش ٴيىس. مۇنى مۇسا ەحوبا وزىنە بۇيىرعانداي ىستەپ، ەحوباعا ورتەپ ۇسىندى.
22 سودان كەيىن مۇسا ەكىنشى قوشقاردى، ٴدىني قىزمەتكە تاعايىنداۋ كەزىندە+ سويىلاتىن قوشقاردى، اكەلدى. حارون مەن ونىڭ ۇلدارى قوشقاردىڭ باسىنا قولدارىن قويدى+.
23 مۇسا ونى باۋىزدادى دا، قانىنان الىپ، حاروننىڭ وڭ قۇلاعىنىڭ سىرعالىعىنا، وڭ قولى مەن وڭ اياعىنىڭ باس بارماعىنا جاقتى.
24 سوسىن مۇسا حاروننىڭ ۇلدارىن العا شىعارىپ، ٴارقايسىسىنىڭ وڭ قۇلاعىنىڭ سىرعالىعىنا، وڭ قولى مەن وڭ اياعىنىڭ باس بارماعىنا دا قان جاقتى. ال قالعان قاندى قۇرباندىق وشاعىنىڭ بارلىق جاعىنا بۇركىپ شىقتى+.
25 كەيىن مۇسا قوشقاردىڭ بۇكىل مايىن: قۇيرىق مايىن، ٸشمايىن، باۋىر بەتىندەگى مايىن، ەكى بۇيرەگىن مايىمەن بىرگە، سونداي-اق ارتقى وڭ اياعىن الدى+.
26 بۇعان قوسا، ەحوبانىڭ الدىنا اكەلىنگەن اشىتقىسىز پىسىرىلگەن نان سالىنعان سەبەتتەن ٴبىر تەسىك كۇلشە+، ماي قوسىپ پىسىرىلگەن ٴبىر تەسىك كۇلشە+ جانە ٴبىر ٴپاتىر نان الىپ، قوشقاردىڭ الگى مايى مەن وڭ اياعىنىڭ ۇستىنە قويدى.
27 مۇسا بۇلاردىڭ ٴبارىن حارون مەن ونىڭ ۇلدارىنىڭ قولدارىنا قويىپ، تەربەپ اكەلەتىن تارتۋ رەتىندە ەحوبانىڭ الدىندا ٵرى-بەرى تەربەدى.
28 سودان سوڭ بۇلاردى ولاردىڭ قولىنان الىپ، قۇرباندىق وشاعىنداعى تۇگەل ورتەلەتىن قۇرباندىقتىڭ ۇستىنە قويىپ ورتەپ جىبەردى. بۇل — ٴدىني قىزمەتكە تاعايىنداۋ كەزىندە ۇسىنىلاتىن قۇرباندىق، قۇدايعا ۇنامدى حوش ٴيىس. بۇل — ەحوباعا ورتەپ ۇسىناتىن تارتۋ.
29 مۇسا قوشقاردىڭ ٴتوسىن الىپ، تەربەپ اكەلەتىن تارتۋ رەتىندە ەحوبانىڭ الدىندا ٵرى-بەرى تەربەدى+. ەحوبا مۇساعا بۇيىرعانداي، ٴدىني قىزمەتكە تاعايىنداۋ كەزىندە سويىلاتىن قوشقاردان مۇساعا تيگەن ۇلەس وسى بولدى+.
30 بۇدان سوڭ مۇسا مايلاۋ راسىمىنە ارنالعان مايدان+ جانە قۇرباندىق وشاعىنداعى قاننان الىپ، حارون مەن ونىڭ كيىمىنە، ۇلدارى مەن ولاردىڭ كيىمدەرىنە بۇركىدى. وسىلايشا حارون مەن ونىڭ كيىمىن، ۇلدارى+ مەن ولاردىڭ كيىمدەرىن قاسيەتتى ەتتى+.
31 سوسىن مۇسا حارون مەن ونىڭ ۇلدارىنا بىلاي دەدى: «قۇرباندىقتىڭ ەتىن كەزدەسۋ شاتىرىنىڭ كىرەبەرىسىندە پىسىرىڭدەر+. سول جەردە ەتتى ٴدىني قىزمەتكە تاعايىنداۋ كەزىندە قولدانىلعان سەبەتتەگى نانمەن جەڭدەر. ويتكەنى قۇداي ماعان «ونى حارون مەن ونىڭ ۇلدارى جەسىن+» دەپ بۇيىرعان.
32 ال ارتىلىپ قالعان ەت پەن ناندى ورتەپ جىبەرىڭدەر+.
33 ٴدىني قىزمەتكە تاعايىندالۋ كۇندەرىڭ بىتپەيىنشە، جەتى كۇن بويى كەزدەسۋ شاتىرىنىڭ كىرەبەرىسىنەن الىس كەتپەڭدەر. ويتكەنى سەندەردى ٴدىني قىزمەتكە تاعايىنداۋ ٴراسىمى جەتى كۇنگە سوزىلادى+.
34 كۇنالارىڭدى وتەۋ+ ٷشىن بۇگىن ىستەگەنىمىزدى ەحوبا قالعان كۇندەرى دە ىستەۋدى بۇيىردى.
35 ٶلىپ قالماۋلارىڭ ٷشىن جەتى كۇن بويى+ كۇنى-ٴتۇنى كەزدەسۋ شاتىرىنىڭ كىرەبەرىسىندە بولىپ، ەحوبانىڭ الدىنداعى مىندەتتەرىڭدى ورىنداۋلارىڭ كەرەك+. ويتكەنى ماعان وسىنداي بۇيرىق بەرىلدى».
36 حارون مەن ونىڭ ۇلدارى ەحوبانىڭ مۇسا ارقىلى بۇيىرعاندارىنىڭ ٴبارىن ورىندادى.
سىلتەمەلەر
^ تۇسىندىرمەنى قاراڭىز.
^ سوزبە-ٴسوز «كۇناسىن وتەدى».
^ نەمەسە «بۇيرەك مايىن».
