مۇسانىڭ 4-جازباسى 11:1—35
-
كۇڭكىلدەگەن حالىققا قۇدايدىڭ وت جىبەرۋى (1—3)
-
حالىقتىڭ ەت سۇراۋى (4—9)
-
مۇسانىڭ حالىقتىڭ اۋىرتپالىعىن كوتەرە الماۋى (10—15)
-
ەحوبانىڭ 70 اقساقالعا رۋحىن بەرۋى (16—25)
-
ەلداد پەن مەداد؛ ەشۋانىڭ مۇسا ٷشىن قىزعانۋى (26—30)
-
بودەنە ۇشىرىپ اكەلۋ؛ حالىقتىڭ اشكوزدىك ٷشىن جازالانۋى (31—35)
11 حالىق قاتتى نالىپ، ەحوبانىڭ الدىندا كۇڭكىلدەي باستادى. مۇنى ەستىگەندە ەحوبا قاھارىنا ٴمىندى. ٴسۇيتىپ، ەحوبادان وت ٴتۇسىپ، قوستىڭ شەتىندەگىلەردى جالماي باستادى.
2 سوندا حالىق كومەك سۇراپ مۇساعا كەلدى. مۇسا ەحوباعا جالبارىنىپ ەدى+، وت ٴسوندى.
3 ەحوبادان وت ٴتۇسىپ، ادامداردى جالماعان جەر تابەرا* دەپ اتالدى+.
4 ولاردىڭ اراسىنداعى باسقا ۇلت ادامدارىنان قۇرالعان+ توبىر قۇلقىنىن ويلاپ+، نارازىلىق بىلدىرە باستادى. سوندا يسرايلدىكتەر دە قايتادان جىلاپ-سىقتاپ: «بىزگە كىم ەت بەرەدى+؟
5 مىسىردا تەگىن جەگەن بالىق، قيار، قاربىز، جۋا، پياز، سارىمساق دەگەندەر قايدا ەكەن، شىركىن+؟!
6 ال ەندى ٵلىمىز قۇرىپ، ولەتىن بولدىق. كوز الدىمىزدا مىنا ماننادان باسقا تۇك جوق+»،— دەپ نالىدى.
7 ماننا+ كورياندر دانىنە+ جانە حوش ٴيىستى شايىرعا ۇقسايتىن.
8 حالىق ونى جيناپ الىپ، قولديىرمەنگە تارتاتىن نە كەلىگە سالىپ تۇيەتىن. ٴسۇيتىپ، ونى قازانعا قايناتاتىن، ياكي ودان كۇلشە نان پىسىرەتىن+. ونىڭ ٴدامى ماي قوسىلعان ٴتاتتى ناننىڭ دامىندەي بولاتىن.
9 تۇندە قوس تۇرعان جەرگە شىق تۇسكەندە، ماننا دا تۇسەتىن+.
10 مۇسا جۇرتتىڭ ٶز شاتىرلارىنىڭ اۋزىندا وتباسىلارىمەن بىرگە جىلاپ وتىرعانىن ەستىدى. ەحوبا بۇعان قاتتى قاھارلاندى+، ولاردىڭ مۇنىسىنا مۇسا دا وتە نارازى بولدى.
11 سوندا ول ەحوباعا بىلاي دەدى: «نەگە ٶز قىزمەتشىڭدى قينايسىڭ؟ كوڭىلىڭنەن شىقپايتىنداي مەن نە ىستەدىم؟ نەگە مىنا حالىقتىڭ اۋىرتپالىعىن مەنىڭ موينىما ارتىپ قويدىڭ+؟
12 ولاردىڭ ٴبارىن قۇرساقتا كوتەرگەن مەن بە ەدىم؟ اتا-بابالارىنا بەرەمىن دەپ ۋادە ەتكەن جەرگە+ بارعانشا، «بالا باعۋشىداي باۋىرىڭا سالىپ كوتەرىپ ٴجۇر» دەيتىندەي، ولاردى مەن تۋىپ پا ەدىم؟
13 بۇلاردىڭ بارىنە ەتتى قايدان تاۋىپ بەرەمىن؟ ولار ماعان كەلىپ: —بىزگە جەيتىن ەت تاۋىپ بەر!— دەپ زار يلەۋدە.
14 مىنا حالىقتىڭ اۋىرتپالىعىن جالعىز ٶزىم كوتەرىپ جۇرە المايمىن، بۇل مەن ٷشىن تىم اۋىر+.
15 ەگەر ماعان وسىلاي ەتپەك بولساڭ، وتىنەمىن، مەنى ٴدال قازىر ولتىرە سال+. ال ىقىلاسىڭا يە بولسام، بۇدان بىلاي مەنى ازاپقا سالا كورمە».
16 سوندا ەحوبا مۇساعا بىلاي دەپ جاۋاپ قاتتى: «يسرايل اقساقالدارىنىڭ ىشىنەن 70 كىسىنى، ياعني ٶزىڭ ەل اقساقالدارى مەن باسشىلارى+ دەپ بىلەتىندەردى جيناپ، كەزدەسۋ شاتىرىنا الىپ كەل. ولار سول جەردە سەنىڭ جانىڭدا تۇرسىن.
17 مەن تومەن ٴتۇسىپ+، سول جەردە سەنىمەن سويلەسەمىن+. سەندەگى رۋحتان الىپ+، ولارعا بەرەمىن. سوندا وسى حالىقتىڭ اۋىرتپالىعىن جالعىز ٶزىڭ كوتەرمەيسىڭ، ولار ساعان كومەكتەسەتىن بولادى+.
18 ال حالىققا بىلاي دە: —تازارىپ*، ەرتەڭگە دايىندالىڭدار+! ەرتەڭ ەت جەيسىڭدەر. ويتكەنى سەندەردىڭ: «بىزگە ەتتى كىم بەرەدى؟ مىسىردا جۇرگەن كەزىمىز جاقسى ەدى عوي!»+— دەپ جىلاعاندارىڭ ەحوبانىڭ قۇلاعىنا جەتتى+. ەندى ەحوبا سەندەرگە ەت بەرمەك، سونى جەيتىن بولاسىڭدار+.
19 ەتتى سەندەر ٴبىر كۇن، ەكى كۇن، بەس كۇن، ون نە جيىرما كۇن ەمەس،
20 ٴبىر اي بويى جەيسىڭدەر. ارالارىڭداعى ەحوبادان باس تارتىپ، ونىڭ الدىندا: —نەگە عانا مىسىردان كەتتىك ەكەن؟— دەپ جىلاعاندارىڭ ٷشىن+، ەتتى اۋىز-مۇرىندارىڭنان شىققانشا جەپ، ودان جەركەنەتىن بولاسىڭدار+».
21 سوندا مۇسا: «اينالامدا 600000 ەر ادامى بار حالىق تۇر+. ال سەن بولساڭ: —ولارعا ٴبىر ايعا جەتەتىن ەت بەرەمىن!— دەيسىڭ.
22 وتار-وتار قوي-ەشكى، تابىن-تابىن ٸرى قارا سويىپ بەرگەن كۇندە دە، ولارعا جەتەر مە ەكەن؟ ٴتىپتى تەڭىزدىڭ بار بالىعىن اۋلاپ بەرسەڭ دە، ولارعا جەتكىلىكتى بولا ما؟»— دەدى.
23 ەحوبا مۇساعا: «ەحوبانىڭ قولى قىسقا ما ەدى+؟ ايتقان ٴسوزىم ورىندالا ما، جوق پا — مۇنى ٶز كوزىڭمەن كورەسىڭ»،— دەدى.
24 مۇسا سىرتقا شىعىپ، ەحوبانىڭ ٴسوزىن حالىققا جەتكىزدى. سودان ول ەل اقساقالدارىنىڭ ىشىنەن 70 كىسىنى جيناپ، كيەلى شاتىردى اينالدىرا تۇرعىزدى+.
25 سوندا ەحوبا بۇلتپەن تومەن ٴتۇسىپ+، مۇسامەن سويلەستى دە+، وعان قونعان رۋحتان الىپ+، 70 اقساقالدىڭ ٴارقايسىسىنا بەردى. رۋح قونا سالىسىمەن، ولار پايعامبارلار ىسپەتتى ارەكەت ەتە باستادى*+. سوسىن بۇلارىن توقتاتتى.
26 قوستا ەلداد جانە مەداد دەگەن ەكى كىسى قالىپ قويعان ەدى. ولار كەزدەسۋ شاتىرىنا كەلمەسە دە، تىزىمگە الىنعانداردىڭ قاتارىندا بولاتىن. سوندىقتان ولارعا دا رۋح قونىپ، قوستا پايعامبارلار ىسپەتتى ارەكەت ەتە باستادى.
27 سوندا ٴبىر جاس جىگىت مۇساعا جۇگىرىپ بارىپ: «ەلداد پەن مەداد قوستا پايعامبارلار سياقتى ارەكەت ەتىپ جاتىر!»— دەپ جەتكىزدى.
28 جاستايىنان مۇساعا قىزمەت ەتىپ جۇرگەن نۇن ۇلى ەشۋا+ مۇنى ەستىگەندە، مۇساعا: «مىرزام، ولاردى توقتاتىڭىز!»+— دەدى.
29 ٴبىراق مۇسا: «مەنىڭ بەدەلىمدى ويلاپ، قىزعانىپ تۇرسىڭ با؟ قىزعانبا. ەحوبا بۇكىل حالقىنا ٶز رۋحىن قوندىرىپ، ٴبارىنىڭ دە ەحوبانىڭ پايعامبارى بولعانىن قالار ەدىم!»— دەپ جاۋاپ بەردى.
30 كەيىنىرەك مۇسا يسرايل اقساقالدارىمەن بىرگە قوسقا ورالدى.
31 ەحوبا قاتتى جەل تۇرعىزدى. جەل تەڭىز جاقتان بودەنەلەر ۇشىرىپ اكەلدى. ولار قوستىڭ اينالاسىن — ٴبىر جاعى ٴبىر كۇندىك جەرگە، ەكىنشى جاعى دا ٴبىر كۇندىك جەرگە دەيىنگى ايماقتى — قاپتاپ+، ەكى شىنتاق* بيىكتىكتە ۇشىپ ٴجۇردى.
32 سودان حالىق سول كۇنى، ٴتىپتى ٴتۇنى بويى جانە كەلەسى كۇنى دە تىنباي بودەنە ۇستادى. ەڭ از ۇستادى دەگەن ادامنىڭ وزىندە 10 حومەر* بودەنە بولدى. جۇرت ولاردى قوستىڭ اينالاسىنا تۇگەل جايىپ تاستادى.
33 ولار سول ەتتى جەپ بىتپەي جاتىپ-اق، ەحوبا حالىققا قاھارىن توكتى. ٴسۇيتىپ، ەحوبا جۇرتتى قىرا باستادى+.
34 سوندىقتان ول جەر قيبروت-حاتاۋا*+ دەپ اتالىپ كەتتى. سەبەبى اشكوزدىك تانىتقاندار سول جەرگە جەرلەنگەن ەدى+.
35 حالىق قيبروت-حاتاۋادان شىعىپ، حازەروتقا بەت الدى. سول جەرگە جەتكەندە، قوستارىن تىكتى+.
سىلتەمەلەر
^ ماعىناسى «جانۋ»، ياعني ٶرت، جالىن.
^ سوزبە-ٴسوز «قاسيەتتى ەتۋ». تۇسىندىرمەدەگى «قاسيەتتى» ٴسوزىن قاراڭىز.
^ نەمەسە «پايعامبارلىق ەتە باستادى».
^ 1 شىنتاق 5.44 سانتيمەترگە تەڭ. B14 قوسىمشاسىن قاراڭىز.
^ 1 حومەر 220 ليترگە تەڭ. B14 قوسىمشاسىن قاراڭىز.
^ ماعىناسى «اشكوزدىكتىڭ مولاسى».
