مۇسانىڭ 4-جازباسى 18:1—32
18 سوسىن ەحوبا حارونعا مىنانى ايتتى: «قاسيەتتى ورىنعا قاتىستى قانداي دا ٴبىر ەرەجە بۇزىلسا، بۇعان سەن جانە ۇلدارىڭ، بۇكىل اۋلەتىڭ جاۋاپتىسىڭدار+. سونداي-اق ٴدىني قىزمەتتەرىڭە قاتىستى قانداي دا ٴبىر ەرەجە بۇزىلسا، بۇعان سەن ۇلدارىڭمەن بىرگە جاۋاپتى بولاسىڭ+.
2 لەۋى رۋىنان شىققان باۋىرلارىڭدى قاسىڭا ال. ولار وزىڭمەن بىرگە بولىپ، كۋالىك ساندىعى تۇرعان شاتىردىڭ+ الدىندا ساعان جانە ۇلدارىڭا قىزمەت ەتسىن+.
3 ولار سەن تاپسىرعان جانە كيەلى شاتىرعا قاتىستى مىندەتتەردى اتقارسىن+. الايدا قاسيەتتى ورىننىڭ بۇيىمدارى مەن قۇرباندىق ۇستەلىنە جاقىنداماسىن، ايتپەسە ولار دا، سەندەر دە ولەسىڭدەر+.
4 ولار سەنىڭ قاسىڭدا بولىپ، كيەلى شاتىرداعى مىندەتتەرىن جانە قىزمەتتەرىن اتقارسىن، ٴبىراق بوتەن* ەشكىم سەندەرگە جاقىنداماسىن+.
5 يسرايل حالقى بۇدان بىلاي قاھارىما ۇشىراماس ٷشىن+، سەندەر قاسيەتتى ورىنعا+ جانە قۇرباندىق ۇستەلىنە+ قاتىستى ٶز مىندەتتەرىڭدى اتقارىڭدار.
6 مەن ٶزىم لەۋىلىك باۋىرلارىڭدى يسرايل حالقىنىڭ اراسىنان الىپ، سەندەرگە سي ەتىپ بەرىپ وتىرمىن+. ولار كيەلى شاتىردا قىزمەت اتقارۋ ٷشىن ەحوبانىكى بولادى+.
7 سەن جانە ۇلدارىڭ قۇرباندىق ورنىنداعى جانە شىمىلدىقتىڭ ىشىندەگى ٴدىني قىزمەتكە جاۋاپتىسىڭدار+، وسى قىزمەتتى اتقاراتىن بولىڭدار+. مەن سەندەرگە ٴدىني قىزمەتتى سي ەتىپ بەردىم. قاسيەتتى ورىنعا سەندەردەن باسقا* بىرەۋ جاقىنداسا، سول ادام ٶلتىرىلسىن+».
8 ەحوبا حارونعا تاعى بىلاي دەدى: «ماعان اكەلىنگەن سي-تارتۋلارعا باس-كوز بولۋدى ساعان تاپسىرامىن+. يسرايلدىكتەردىڭ ماعان سي-تارتۋ رەتىندە اكەلگەن قاسيەتتى نارسەلەرىنىڭ ٴبارىن ساعان جانە ۇلدارىڭا ۇلەس ەتىپ بەرەمىن. بۇل — ۇنەمى الىپ وتىراتىن سىباعالارىڭ+.
9 ورتەپ ۇسىنىلاتىن قۇرباندىقتاردىڭ اسا كيەلى بولىگى سەنىڭ ۇلەسىڭە تيەدى. حالىقتىڭ الىپ كەلەتىن كەز كەلگەن قۇرباندىعى — سونىڭ ىشىندە استىق تارتۋى+، كۇنا ٷشىن اكەلەتىن قۇرباندىعى+ جانە ايىپ قۇرباندىعى+ بار — سەن ٷشىن جانە ۇلدارىڭ ٷشىن اسا كيەلى بولسىن.
10 بۇلاردى قاسيەتتى ورىندا جە+. ونى ەركەك كىندىكتىلەردىڭ ٴبارى جەسىن. بۇل سەندەر ٷشىن اسا كيەلى بولماق+.
11 يسرايلدىكتەردىڭ تەربەپ ۇسىناتىن قۇرباندىقتارىمەن+ بىرگە اكەلگەن سي-تارتۋلارى+ دا سەنىڭ ۇلەسىڭ. بۇل — ساعان جانە ۇل-قىزدارىڭا ۇنەمى بەرىپ وتىراتىن سىباعام+. مۇنى ٷي ىشىڭدەگى ارامدالماعان تازا ادامنىڭ ٴبارى جەي الادى+.
12 ولاردىڭ ەحوباعا الىپ كەلەتىن العاشقى ونىمدەرىنىڭ+ — مايدىڭ، جاڭا شاراپتىڭ، استىقتىڭ — ەڭ جاقسىسىن ساعان بەرەمىن+.
13 حالىقتىڭ ٶز جەرىنەن جيناپ، ەحوباعا الىپ كەلگەن العاشقى ٶنىمىنىڭ قاي-قايسىسى دا سەنىكى+. ونى ٷي ىشىڭدەگى ارامدالماعان تازا ادامنىڭ ٴبارى جەي الادى.
14 يسرايلدەگى باعىشتالعان نارسەنىڭ* ٴبارى سەنىكى بولادى+.
15 ولاردىڭ ەحوباعا ۇسىنعان تۇڭعىش تۋىلعاندارىنىڭ ٴبارى+ — ادامنىڭ دا، مالدىڭ دا تۇڭعىشى — سەنىكى بولادى. الايدا تۇڭعىش ۇلدىڭ جانە ارام مالدىڭ تۇڭعىش ٴتولىنىڭ قۇنىن مىندەتتى تۇردە وتەپ ال+.
16 بۇلاردىڭ قۇنىن ٴبىر ايعا تولعان جانە ودان اسقان كەزدەن باستاپ وتە. ولاردىڭ بەلگىلەنگەن قۇنى قاسيەتتى ورىننىڭ شەكەلىمەن 5 كۇمىس شەكەل* بولسىن+. ٴبىر شەكەل 20 گەراحقا* تەڭ.
17 تەك سيىر، قوي جانە ەشكىنىڭ العاشقى ٴتولىنىڭ قۇنىن وتەمە+، ويتكەنى بۇلار قاسيەتتى. ولاردىڭ قانىن قۇرباندىق وشاعىنا بۇركى+، مايىن بولسا تارتۋ رەتىندە ورتەپ جىبەر. بۇل — ەحوباعا ۇنامدى حوش ٴيىس+.
18 ال ەتى سەنىكى، تەربەپ اكەلىنەتىن ٴتوس جانە وڭ اياق سياقتى، ول دا سەنىڭ ۇلەسىڭە تيەدى+.
19 يسرايلدىكتەردىڭ ەحوباعا اكەلگەن قاسيەتتى سي-تارتۋلارىنىڭ ٴبارىن+ ساعان جانە ۇل-قىزدارىڭا بەرەمىن، ونى ۇنەمى الىپ تۇراسىڭدار+. بۇل — ەحوبانىڭ سەنىمەن جانە ۇرپاقتارىڭمەن جاساسقان ەشقاشان بۇزىلمايتىن كەلىسىمى*».
20 ٵرى قاراي ەحوبا حارونعا بىلاي دەدى: «يسرايلگە بەرىلگەن جەردەن ساعان يەلىككە جەر ٴبولىپ بەرىلمەيدى، ودان ەشقانداي ۇلەس المايسىڭ+. يسرايلدىكتەردىڭ اراسىنداعى سەنىڭ ۇلەسىڭ دە، يەلىگىڭ دە مەنمىن+.
21 لەۋىلىكتەردىڭ اتقارعان قىزمەتى، ياعني كەزدەسۋ شاتىرىنداعى قىزمەتى ٷشىن، ولاردىڭ يەلىگىنە يسرايلدەگى بارلىق نارسەنىڭ وننان ٴبىرىن بەردىم+.
22 بۇدان بىلاي يسرايل حالقى كەزدەسۋ شاتىرىنا جاقىنداماسىن، ايتپەسە كۇنالى بولىپ، ٶلىم قۇشادى.
23 لەۋىلىكتەر كيەلى شاتىرداعى قىزمەتتى وزدەرى اتقارسىن. ولار حالىقتىڭ قاسيەتتى ورىنعا قاتىستى جاساعان كۇناسىنا جاۋاپ بەرەدى+. كەلەر ۇرپاقتارىڭا بەرىلەتىن نۇسقاۋ مىناۋ: لەۋىلىكتەر يسرايلدىكتەردىڭ اراسىنان يەلىككە جەر المايدى+.
24 يسرايلدىكتەر ەحوباعا سي-تارتۋ رەتىندە اكەلگەن وننان ٴبىر بولىكتى لەۋىلىكتەردىڭ يەلىگىنە بەرەمىن. سوندىقتان دا مەن ولارعا: —يسرايلدىكتەردىڭ اراسىنان يەلىككە جەر المايسىڭدار+،— دەدىم».
25 كەيىن ەحوبا مۇساعا بىلاي دەدى:
26 «لەۋىلىكتەرگە مىنانى ايت: —مەن سەندەرگە ۇلەس ەتىپ بەرگەن وننان ٴبىر بولىكتى يسرايلدىكتەردەن قابىل الىڭدار+. سول العاندارىڭنىڭ وننان ٴبىر بولىگىن سەندەر دە ەحوباعا تارتۋ ەتىڭدەر+.
27 بۇل تارتۋلارىڭ ٶز قىرماندارىڭدا باستىرعان استىقتان نەمەسە ٴجۇزىم مەن ماي سىعاتىن ورىندارىڭنىڭ ونىمىنەن اكەلگەن تارتۋ دەپ ەسەپتەلەدى+.
28 وسىلايشا يسرايلدىكتەردەن العان وننان ٴبىر بولىكتەردەن وزدەرىڭ دە ەحوباعا تارتۋ جاساڭدار. ەحوباعا ارناپ اكەلگەن بۇل تارتۋلارىڭدى ٴدىني قىزمەتكەر حارونعا بەرىڭدەر.
29 وزدەرىڭە تارتۋ ەتىلگەندەردىڭ ەڭ جاقسىسىن ەحوباعا كيەلى تارتۋ ەتىپ ۇسىنىڭدار+.
30 ولارعا تاعى مىنانى ايت: —لەۋىلىكتەر، سيعا العاندارىڭنىڭ ەڭ جاقسىسىن تارتۋ ەتكەننەن قالعانى وزدەرىڭدىكى. بۇل ٶز قىرماندارىڭدا باستىرعان استىق نەمەسە ٴجۇزىم مەن ماي سىعاتىن ورىندارىڭنىڭ ٶنىمى دەپ قاراستىرىلادى.
31 ونى وزدەرىڭ جانە ٷي ىشتەرىڭ قالاعان جەردە جەي الاسىڭدار، ويتكەنى بۇل — كەزدەسۋ شاتىرىندا اتقارعان قىزمەتتەرىڭنىڭ اقىسى+.
32 كۇنالى بولىپ قالماۋ ٷشىن، العان سي-تارتۋلارىڭنىڭ ەڭ جاقسىسىن بەرىپ تۇرىڭدار، ٶلىپ كەتپەس ٷشىن، يسرايلدىكتەردىڭ كيەلى نارسەسىن ارامداۋدان اۋلاق بولىڭدار+».
سىلتەمەلەر
^ ياعني حاروننىڭ اۋلەتىنە جاتپايتىن.
^ ياعني حاروننىڭ اۋلەتىنە جاتپايتىن.
^ ياعني تولەمى وتەلمەيتىندەي ەتىپ، ٴبىرجولا قۇدايعا باعىشتاۋ ارقىلى قاسيەتتى ەتىلگەن نارسە.
^ 1 شەكەل 4.11 گرامغا تەڭ. B14 قوسىمشاسىن قاراڭىز.
^ 1 گەراح 57.0 گرامغا تەڭ. B14 قوسىمشاسىن قاراڭىز.
^ سوزبە-ٴسوز «تۇز كەلىسىمى».
