مۇسانىڭ 4-جازباسى 27:1—23
27 بۇدان كەيىن ٴجۇسىپتىڭ ۇلى ماناسانىڭ اۋلەتىنەن شىققان سالوپاحادتىڭ ماحلا، نوعا، حوگلا، مىلقا جانە تيرسا دەگەن قىزدارى+ كەلدى. ولاردىڭ اكەسى سالوپاحاد حەفەردىڭ ۇلى، عالاقاتتىڭ نەمەرەسى، ماناسانىڭ ۇلى ٴماحيردىڭ شوبەرەسى ەدى.
2 سالوپاحادتىڭ قىزدارى كەزدەسۋ شاتىرىنىڭ كىرەبەرىسىنە كەلىپ، مۇسانىڭ، ٴدىني قىزمەتكەر ەلازاردىڭ، باسشىلاردىڭ+ جانە بۇكىل قاۋىمنىڭ الدىنا شىعىپ، بىلاي دەدى:
3 «اكەمىز ٴشول دالادا قايتىس بولدى. ٴبىراق ول ەحوباعا قارسى شىققان قوراحتىڭ سىبايلاستارىنىڭ اراسىندا بولعان جوق+، ول ٶز كۇناسى ٷشىن ٶلدى. ونىڭ ارتىنان ۇل قالمادى.
4 ۇل بالاسى بولماعانى ٷشىن اكەمىزدىڭ اتى ٶز رۋىنان ٶشىپ قالۋ كەرەك پە؟ اكەمىزدىڭ باۋىرلارىمەن بىرگە ٴبىزدىڭ دە يەلىگىمىزگە جەر بەرسەڭىز ەكەن».
5 مۇسا وسى ماسەلەمەن ەحوبانىڭ الدىنا باردى+.
6 سوندا ەحوبا مۇساعا مىنانى ايتتى:
7 «سالوپاحادتىڭ قىزدارى دۇرىس ايتادى. ولارعا دا اكەلەرىنىڭ باۋىرلارىمەن بىرگە مىندەتتى تۇردە جەر بەر. اكەلەرىنىڭ مۇرالىق جەرى سولارعا ٶتسىن+.
8 يسرايلدىكتەرگە بىلاي دە: —ەگەر بىرەۋ ارتىنان ۇل قالدىرماي كوز جۇمسا، ونىڭ يەلىگىندەگى جەرىن قىزىنا بەرىڭدەر.
9 قىزى جوق بولسا، مارقۇمنىڭ تۋعان باۋىرلارىنا بەرىڭدەر.
10 ەگەر تۋعان باۋىرلارى جوق بولسا، جەردى اكەسىنىڭ باۋىرلارىنا بەرىڭدەر.
11 ال اكەسىنىڭ باۋىرلارى بولماسا، ونى ٶز اۋلەتىنىڭ ىشىندەگى ەڭ جاقىن قانداس تۋىستارىنىڭ بىرىنە بەرىڭدەر، جەرگە سول يەلىك ەتسىن. ەحوبا مۇساعا بۇيىرعانداي، بۇل شەشىمدى يسرايلدىكتەر نۇسقاۋ رەتىندە ۇستانسىن».
12 بۇدان كەيىن ەحوبا مۇساعا بىلاي دەدى: «مىنا اباريم تاۋىنا شىعىپ+، مەن يسرايلدىكتەرگە بەرگەلى جاتقان جەرگە كوز تاستا+.
13 ونى كورگەن سوڭ، اعاڭ حارون سياقتى سەن دە كوز جۇمىپ+، اتا-بابالارىڭا قوسىلاسىڭ+.
14 ويتكەنى زين شولىندە يسرايل قاۋىمى ماعان قارسى جانجال شىعارعاندا، سەندەر بۇيرىعىما قارسى شىعىپ، سول سۋدىڭ قاسىندا مەنىڭ كيەلى ەكەنىمدى پاش ەتپەدىڭدەر+. (ول زين شولىندەگى+ قادەشتەگى+ مەريبا سۋى+ ەدى.)».
15 سول كەزدە مۇسا ەحوباعا:
16 «بارىنە ٶمىر بەرۋشى ەحوبا قۇداي بۇكىل قاۋىمنىڭ ۇستىنەن ٴبىر ادامدى تاعايىنداسا ەكەن.
17 بۇل ادام حالىققا بارلىق ىستە باسشىلىق بەرىپ وتىرار ەدى، سوندا ەحوبانىڭ قاۋىمى باعۋشىسى جوق قويلارداي بولمايدى»،— دەپ ٶتىنىش ايتتى.
18 ەحوبا مۇساعا بىلاي دەدى: «ەرەكشە رۋح تانىتىپ جۇرگەن نۇن ۇلى ەشۋانى شاقىرىپ، ونىڭ ۇستىنە قولىڭدى قوي+.
19 ٴسۇيتىپ، ونى ٴدىني قىزمەتكەر ەلازار مەن بۇكىل جاماعاتتىڭ الدىنا تۇرعىزىپ، سولاردىڭ كوز الدىندا ونى باسشى ەتىپ تاعايىندا+.
20 بۇكىل يسرايل حالقى ونى تىڭداۋ ٷشىن+، قولىڭداعى بيلىكتەن* ٴبولىپ بەر+.
21 ول ٴدىني قىزمەتكەر ەلازاردىڭ الدىنا كەلەتىن بولادى. ال ەلازار ەحوبانىڭ نۇسقاۋىن ۋريم+ ارقىلى ٴبىلىپ بەرەدى. سوندا ەشۋا مەن كۇللى يسرايل حالقى سول نۇسقاۋعا ساي ٴجۇرىپ-تۇراتىن بولادى».
22 مۇسا ٴبارىن ەحوبا قالاي بۇيىرسا، سولاي ىستەدى. ول ەشۋانى ٴدىني قىزمەتكەر ەلازار مەن بۇكىل قاۋىمنىڭ الدىنا اكەلىپ تۇرعىزدى دا،
23 ونىڭ ۇستىنە قولىن قويىپ، باسشى ەتىپ تاعايىندادى+. وسىلاي ەحوبانىڭ وزىنە ايتقانىنداي ىستەدى+.
سىلتەمەلەر
^ نەمەسە «داڭقىڭنان».