مۇسانىڭ 5-جازباسى 1:1—46
1 مۇسا يورداننىڭ ماڭىنداعى ٴشول دالادا، ياعني سۇپتىڭ تۇسىنداعى ٴشول دالا مەن پاران، توپەل، لابان، حازەروت پەن ديزاحابتىڭ اراسىندا تۇرىپ، بۇكىل يسرايل حالقىنا ٴسوزىن ارنادى.
2 (سەيىر تاۋلى وڭىرىنە اپاراتىن جولمەن جۇرگەندە، حوريبتەن قادەش-بارنيعا+ دەيىن ون ٴبىر كۇندىك جول.)
3 قىرقىنشى جىلدىڭ+ ون ٴبىرىنشى ايىنىڭ ٴبىرىنشى كۇنى مۇسا ەحوبانىڭ* ايت دەگەن سوزدەرىنىڭ ٴبارىن يسرايلدىكتەرگە جەتكىزدى.
4 مۇنى ول حەشبوندا تۇراتىن امورلىقتاردىڭ پاتشاسى سيحوندى+ جانە ەدرەيدەگى اشتاروتتا تۇراتىن باشان پاتشاسى وگتى جەڭگەننەن+ كەيىن ايتتى.
5 مۇسا يورداننىڭ ماڭىنداعى مواب جەرىندە زاڭدى+ تۇسىندىرۋگە كىرىسىپ، بىلاي دەدى:
6 «ەحوبا قۇدايىمىز حوريبتە بىزگە: —وسى تاۋلى وڭىردە+ تۇرعاندارىڭا كوپ بولدى.
7 ەندى جولعا جينالىپ، امورلىقتاردىڭ تاۋلى جەرى+ مەن بارلىق كورشىلەس ەلدەرىنە: ارابا+ تاۋلى ايماعىنا، شەفەلاعا، نەگەۆكە جانە تەڭىز جاعالاۋىنداعى ايماققا+ — اتتانىڭدار. وسىلاي قاناحاندىقتاردىڭ جەرىنە بارىڭدار، سونداي-اق ليۆان*+ مەن ۇلى وزەن ەۆفراتقا+ دەيىن جەتىڭدەر.
8 مىنە، مەن سول جەردى سەندەرگە بەرگەلى تۇرمىن. بارىڭدار دا، ەحوبا اتا-بابالارىڭ ىبىرايىمعا، ىسقاق+ پەن جاقىپقا+ جانە ولاردىڭ ۇرپاقتارىنا بەرۋگە ۋادە ەتكەن جەردى يەمدەنىڭدەر+،— دەدى.
9 سول كەزدە مەن سەندەرگە: —جالعىز ٶزىم سەندەردى الىپ جۇرە المايمىن+.
10 ەحوبا قۇدايلارىڭ سەندەردى كوبەيتتى. مىنە، قازىر اسپانداعى جۇلدىزدارداي كوپسىڭدەر+.
11 اتا-بابالارىڭ سيىنعان ەحوبا قۇداي سەندەردى تاعى دا مىڭ ەسە كوبەيتىپ+، ٶزى ۋادە ەتكەندەي، باتاسىن بەرسىن+.
12 جالعىز ٶزىم سەندەردىڭ اۋىرتپالىقتارىڭدى قالاي كوتەرمەكپىن، قيىنشىلىقتارىڭ مەن داۋ-جانجالدارىڭدى قالاي شەشپەكپىن+؟
13 سوندىقتان ٶز رۋلارىڭنىڭ ىشىنەن اقىلدى دا پاراساتتى، تاجىريبەلى ەر ادامداردى تاڭداڭدار، مەن ولاردى سەندەرگە باسشى ەتىپ تاعايىندايىن+،— دەگەن ەدىم.
14 سوندا سەندەر: —ايتقانىڭىز دۇرىس،— دەپ كەلىستىڭدەر.
15 ٴسۇيتىپ، مەن اقىلدى دا تاجىريبەلى رۋ باسشىلاردى ۇستەرىڭنەن مىڭباسى، ٴجۇزباسى، ەلۋباسى، ونباسى جانە رۋ جەتەكشىلەرى ەتىپ تاعايىندادىم+.
16 سول كەزدە بيلەرىڭە نۇسقاۋ بەرىپ: —باۋىرلارىڭنىڭ نەمەسە باۋىرىڭ مەن جاتجەرلىكتىڭ اراسىنداعى+ داۋ-جانجالعا تورەلىك ايتقاندا، ٵدىل بولىڭدار+.
17 سوتتا ەشكىمدى الالاماڭدار+. قاراپايىمنىڭ دا، بەدەلدىنىڭ دە ٴۋاجىن بىردەي تىڭداڭدار+. ادامنان قايمىقپاڭدار+، ويتكەنى سەندەر قۇداي سوتىن جۇرگىزىپ جاتىرسىڭدار+. ەگەر قانداي دا ٴبىر ماسەلە سەندەر ٷشىن تىم قيىن بولسا، ونى ماعان ايتىڭدار، مەن تىڭدايمىن+،— دەگەن ەدىم.
18 سول كەزدە مەن ورىنداۋلارىڭ كەرەك ٸستىڭ بارىنە قاتىستى نۇسقاۋ بەرگەنمىن.
19 سودان كەيىن حوريبتەن شىعىپ، ەحوبا قۇدايىمىز بۇيىرعانداي، امورلىقتاردىڭ تاۋلى وڭىرىنە+ الىپ باراتىن جولدا، وزدەرىڭ كورگەندەي، ۇلان-عايىر ٵرى قورقىنىشتى شولمەن وتتىك+. اقىر سوڭىندا، قادەش-بارنيعا كەلدىك+.
20 مەن سول جەردە سەندەرگە: —ەحوبا قۇدايىمىز بىزگە بەرەمىن دەپ ۋادە ەتكەن امورلىقتاردىڭ تاۋلى وڭىرىنە كەلدىڭدەر.
21 مىنە، ەحوبا قۇدايلارىڭ سول جەردى سەندەرگە بەرىپ وتىر. تۇرىڭدار دا، اتا-بابالارىڭ سيىنعان ەحوبا قۇداي ايتقانداي، ونى يەمدەنىڭدەر+. ەش قورىقپاڭدار، ۇرەيلەرىڭ ۇشپاسىن،— دەگەنمىن.
22 الايدا سەندەر ماعان كەلىپ: —سول ەلدى بارلاپ كەلۋگە ادامدار جىبەرەيىك. ولار قانداي جولمەن ٴجۇرۋىمىز كەرەكتىگىن، الدىمىزدا قانداي قالالار جاتقانىن كورىپ كەلسىن+،— دەدىڭدەر.
23 مەن بۇل ۇسىنىستارىڭدى قۇپ كورىپ، ٵر رۋدان ٴبىر-بىردەن، بارلىعى 12 ادام تاڭداپ الدىم+.
24 ولار تاۋلى وڭىرگە جول تارتىپ+، ەشقول اڭعارىنا* دەيىنگى جەردى بارلاپ شىقتى.
25 سول ولكەنىڭ جەمىستەرىنەن الىپ، قايتا ورالعاندا: —ەحوبا قۇدايىمىز بىزگە بەرگەلى جاتقان جەر شۇرايلى ەكەن،— دەپ ايتىپ كەلدى+.
26 ٴبىراق سەندەر سول جاققا بارعىلارىڭ كەلمەي، ەحوبا قۇدايلارىڭنىڭ بۇيرىعىنا قارسى شىقتىڭدار+.
27 شاتىرلارىڭدا وتىرىپ الىپ، نارازىلىق ٴبىلدىرىپ: —ەحوبا ٴبىزدى جەك كورەدى، سوندىقتان دا ٴبىزدى امورلىقتاردىڭ قولىمەن قىرىپ سالۋ ٷشىن مىسىردان الىپ شىقتى.
28 ەندى قايدا بارا جاتىرمىز؟ باۋىرلارىمىز «ول جەردىڭ ادامدارى بىزدەن كۇشتى جانە ٸرى، ال قالالارى ۇلكەن، بەكىنىستەرى اسپانمەن تالاسقانداي بيىك ەكەن+، سول جاقتان ەناكتىڭ ۇرپاقتارىن+ دا كوردىك» دەپ، جىگەرىمىزدى جاسىتتى+،— دەدىڭدەر.
29 سوندا مەن سەندەرگە: —ولاردان ەش قورىقپاڭدار، زارەلەرىڭ ۇشپاسىن+.
30 ەحوبا قۇدايلارىڭ الدارىڭدا ٴجۇرىپ وتىرادى. ول مىسىردا كوز الدارىڭدا سەندەر ٷشىن قالاي شايقاسسا، بۇل جولى دا سولاي شايقاسادى+.
31 ٴشول دالادان وسى جەرگە جەتكەنشە، ەحوبا قۇدايلارىڭ، بالاسىن كوتەرىپ جۇرگەن اكەدەي، سەندەرگە جول بويى قامقور بولعانىن وزدەرىڭ كوردىڭدەر،— دەدىم.
32 سوندا دا سەندەر ەحوبا قۇدايلارىڭا سەنبەدىڭدەر+.
33 ال ول قوس تىگەتىن جەرلەرىڭدى كورسەتۋ ٷشىن الدارىڭدا ٴجۇرىپ وتىردى. تۇندە وت، كۇندىز بۇلت بولىپ، جۇرەتىن جولدارىڭدى كورسەتتى+.
34 ەحوبا سەندەردىڭ ايتقان سوزدەرىڭنىڭ ٴبارىن ەستىگەندە، اشۋى كەلدى. سوندىقتان ول انت ەتىپ+:
35 —مەن اتا-بابالارىڭا ۋادە ەتكەن شۇرايلى جەردى وسى زۇلىم ۇرپاقتىڭ بىردە-بىرەۋى كورمەيدى+.
36 تەك ەپۋنەح ۇلى حالەپ قانا كورەدى. ول ەحوباعا تولىق مويىنسۇنعاندىقتان، ونىڭ اياق باسقان جەرىن وزىنە جانە ٷرىم-بۇتاعىنا بەرەمىن+.
37 (سەندەرگە بولا ەحوبا ٴتىپتى ماعان دا اشۋلانىپ: «سەن دە سول جەرگە كىرمەيسىڭ+.
38 وعان قاسىڭدا جۇرگەن نۇن ۇلى ەشۋا+ كىرەدى+. سەن ونى نىعايت*+، سونىڭ باسشىلىعىمەن يسرايل سول جەردى يەمدەنەتىن بولادى»،— دەدى.)
39 جاۋعا ولجا بولادى دەگەن بالالارىڭ+، جاقسى مەن جاماندى ايىرا المايتىن ۇلدارىڭ، سول جەرگە كىرەدى. مەن ونى سولاردىڭ يەلىگىنە بەرەمىن+.
40 ال سەندەر كەرى بۇرىلىپ، قىزىل تەڭىزگە اپاراتىن جولمەن شولگە قاراي بەت الىڭدار+،— دەدى.
41 سوندا سەندەر ماعان: —ٴبىز ەحوبانىڭ الدىندا كۇنا جاسادىق. قازىر-اق، ەحوبا قۇدايىمىز بۇيىرعانداي، بارامىز دا، شايقاسامىز،— دەدىڭدەر. ٴسۇيتىپ، ٴارقايسىسىڭ قارۋ-جاراعىڭدى اسىنىپ الىپ، تاۋلى وڭىرگە وپ-وڭاي كوتەرىلەمىز دەپ ويلادىڭدار+.
42 ٴبىراق ەحوبا سەندەرگە: —مەن سەندەرگە جار بولمايمىن، سوندىقتان ول جاققا كوتەرىلمەڭدەر، شايقاسپاڭدار+. ايتپەسە جاۋلارىڭنان ويسىراي جەڭىلەسىڭدەر،— دەگەن سوزدەردى ماعان جەتكىز دەدى.
43 مەن وسىنى ايتقاندا، سەندەر تىڭدامادىڭدار. ەحوبانىڭ بۇيرىعىنا قارسى شىقتىڭدار، مەنمەندىك تانىتىپ، تاۋ جاققا بەتتەدىڭدەر.
44 سوندا سول جەردە تۇرىپ جاتقان امورلىقتار الدارىڭنان شىقتى. ولار قۇجىناعان اراداي سوڭدارىڭا ٴتۇسىپ، سەيىرگە، ودان ٵرى حورماعا دەيىن قۋىپ باردى.
45 سودان سەندەر قايتىپ كەلىپ، ەحوبانىڭ الدىندا زار ەڭىرەپ جىلادىڭدار. ٴبىراق ەحوبا سەندەرگە قۇلاق اسپادى، نازارىن دا سالمادى.
46 سوندىقتان دا قادەشتە ۇزاق ۋاقىت تۇرىپ قالدىڭدار.
سىلتەمەلەر
^ بۇل — قۇدايدىڭ ەسىمى. تۇسىندىرمەنى قاراڭىز.
^ ليۆان تاۋ جوتاسى بولسا كەرەك.
^ نەمەسە «وزەن اڭعارىنا».
^ مۇمكىن: «قۇداي ونى نىعايتتى».