مۇسانىڭ 5-جازباسى 13:1—18
-
جولدان تايعاندارعا بەرىلەتىن جازا (1—18)
13 ەگەر ارالارىڭنان پايعامبار نەمەسە ٴتۇس ارقىلى بولاشاقتى جوريتىن بىرەۋ شىعىپ، قانداي دا ٴبىر بەلگى نە بولاشاقتىڭ نىشانىن كورسەتسە،
2 سوسىن مۇنىسى جۇزەگە اسىپ، سەندەرگە: «بەيتانىس قۇدايلارعا بەت بۇرىپ، سولارعا قۇلشىلىق ەتەيىك»،— دەسە،
3 سونداي پايعامباردىڭ نە ٴتۇس كورۋشىنىڭ ٴسوزىن تىڭداماڭدار+، ويتكەنى ەحوبا قۇدايلارىڭ سەندەردى سىناپ جاتىر+. وسىلايشا ەحوبا قۇدايلارىڭ ٶزىن بار جۇرەكتەرىڭمەن، بۇكىل جان-تاندەرىڭمەن سۇيەتىن-سۇيمەيتىندەرىڭدى بىلمەك+.
4 تەك ەحوبا قۇدايلارىڭنىڭ جولىمەن جۇرىڭدەر، سودان عانا قورقىپ، زاڭدارىن ورىنداڭدار، تەك سونىڭ داۋسىنا قۇلاق ٴتۇرىپ، سوعان عانا قىزمەت ەتىپ، ەتەنە جاقىن بولىڭدار+.
5 ال الگى پايعامباردى نە ٴتۇس كورۋشىنى ولتىرىڭدەر+. سەبەبى ول سەندەردى مىسىردان الىپ شىققان ٵرى قۇلدىق ۇيىنەن ازات ەتكەن* ەحوبا قۇدايلارىڭا قارسى بۇلىك شىعارۋعا ارانداتىپ، ەحوبا قۇدايلارىڭ نۇسقاعان جولدان تايدىرماق بولدى. وسىلاي ارالارىڭنان زۇلىمدىقتى الاستاتىڭدار+.
6 ەگەر باۋىرىڭ، ٴبىر انادان تۋعان اعا-ٸنىڭ، نە ۇل-قىزىڭ، نە اياۋلى جارىڭ، نە جان دوسىڭ وڭاشادا: «ٴجۇر، بوتەن قۇدايلارعا تابىنايىق»،— دەپ+، ٶزىڭ دە، اتا-باباڭ دا بىلمەگەن قۇدايلارعا بەت بۇرۋعا ەلىكتىرسە،
7 ياعني اينالاڭدا — جاقىن نە الىستا، ياكي جەردىڭ و شەتى مەن بۇ شەتىندە — تۇراتىن حالىقتاردىڭ تاڭىرلەرىنە بەت بۇرۋعا ەلىكتىرسە،
8 وعان كونبە، سوزىنە قۇلاق اسپا+، سونداي-اق ونى اياپ-مۇسىركەمە، قورعاشتاما دا،
9 مىندەتتى تۇردە ونىڭ كوزىن قۇرت+. بۇل ٷشىن ٴبىرىنشى بولىپ ٶزىڭ ارەكەت ەت، سودان كەيىن بۇكىل حالىق قوسىلىپ+،
10 ونى تاسپەن اتقىلاپ ٶلتىرسىن+. ويتكەنى ول سەنى مىسىر ەلىنەن، قۇلدىق ۇيىنەن، الىپ شىققان ەحوبا قۇدايىڭنان الاستاتپاق بولدى.
11 سوندا وسى جايتتى كۇللى يسرايل حالقى ەستىپ، قورقاتىن بولادى. ٴسۇيتىپ، اراڭداعى ەشكىم مۇنداي جاماندىققا بارمايدى+.
12 ەگەر ەحوبا قۇدايلارىڭ مەكەن ەتۋگە بەرىپ وتىرعان قالالاردىڭ ٴبىرى تۋرالى:
13 «ارامىزدا قالا حالقىن ازعىرىپ، بەيتانىس قۇدايلارعا تابىنۋعا ەلىكتىرىپ جۇرگەن وڭباعان ادامدار شىعىپتى»،— دەگەندى ەستىسەڭدەر،
14 بۇل جايتتى تەكسەرىپ، سۇراستىرىپ، انىق-قانىعىنا جەتىڭدەر+. ەگەر وسىنداي جەكسۇرىن ٸستىڭ ورىن العانى دالەلدەنسە،
15 وندا سول قالانىڭ تۇرعىندارىن سەمسەردىڭ جۇزىمەن قىرىپ سالىڭدار+. قالانى، ونداعىنىڭ ٴبارىن، مالىمەن قوسا، جويىپ جىبەرىڭدەر+.
16 دۇنيە-مۇلىكتەرىن قالا الاڭىنىڭ ورتاسىنا ٷيىپ، بۇكىل قالاعا وت قويىڭدار. بۇل ەحوبا قۇدايلارىڭا ارنالعان تۇگەل ورتەلەتىن قۇرباندىق ىسپەتتى بولادى. ٴسۇيتىپ، قالا ماڭگىلىك ۇيىندىگە اينالىپ، ەشقاشان قايتا تۇرعىزىلمايدى.
17 جويىلۋعا بەلگىلەنگەن نارسەنىڭ ەشقايسىسىن الماڭدار+. سوندا ەحوبا قاھارىنان قايتىپ، مەيىرىمى مەن جاناشىرلىعىن تانىتادى جانە اتا-بابالارىڭا ۋادە ەتكەندەي، سەندەردى ٷبىرلى-ٴشۇبىرلى ەتىپ، كوبەيتەدى+.
18 مەن بۇگىن بۇيىرىپ وتىرعان زاڭداردى ورىنداپ، ەحوبا قۇدايلارىڭا مويىنسۇنىڭدار، وسىلاي ەحوبا قۇدايلارىڭنىڭ كوزىندە دۇرىس نارسەنى ىستەيسىڭدەر+.
سىلتەمەلەر
^ نەمەسە «قۇن تولەپ ازات ەتكەن».
