مۇسانىڭ 5-جازباسى 15:1—23
15 ٵربىر جەتىنشى جىلى بىرەۋگە بەرگەن قارىزدارىڭدى كەشىڭدەر+.
2 بۇل ٷشىن قارىز بەرۋشى بىلاي ىستەۋ كەرەك: ول وزگە بىرەۋدىڭ نە باۋىرىنىڭ قارىزىن كەشىپ، ونى تولەۋدى تالاپ ەتپەسىن. سەبەبى، ەحوبانىڭ نۇسقاۋى بويىنشا، بۇل — قارىز كەشىرىلەتىن ۋاقىت+.
3 ٴبىراق جاتجەرلىكتەن قارىزدارىڭدى تالاپ ەتۋلەرىڭە بولادى+. ال باۋىرلارىڭنىڭ قارىزىن، قانشا بولماسىن، كەشىرىڭدەر.
4 ارالارىڭدا كەدەي-كەپشىك بولماۋ كەرەك، ويتكەنى ەحوبا قۇدايلارىڭ يەلىكتەرىڭە بەرەتىن جەردە تۇرىپ جاتقاندارىڭدا، ەحوبا مىندەتتى تۇردە سەندەرگە باتاسىن بەرەدى+.
5 تەك ەحوبا قۇدايلارىڭنىڭ ايتقاندارىنا تولىقتاي مويىنسۇنىپ، مەن بۇگىن بەرىپ وتىرعان زاڭداردىڭ ٴبارىن بۇلجىتپاي ورىنداڭدار+.
6 ويتكەنى ەحوبا قۇدايلارىڭ، ٶز ۋادەسىنە ساي، سەندەردى جارىلقايدى. سەندەر كوپتەگەن حالىقتارعا قارىز بەرەتىن بولاسىڭدار، ال وزدەرىڭ قارىز المايسىڭدار+. كوپتەگەن حالىقتاردان ۇستەم بولاسىڭدار، ال ولار سەندەرگە ۇستەمدىك ەتە المايدى+.
7 ەگەر ەحوبا قۇدايلارىڭ بەرگەن قالالارىڭنىڭ بىرىندە كەدەيلەنىپ قالعان باۋىرىڭ بولسا، وندا جۇرەكتەرىڭدى قاتۋلاندىرىپ، وعان ساراڭدىق جاساماڭدار+.
8 قايتا، قولدارىڭ اشىق بولسىن+، وعان مۇقتاجدىعىنا قاراي قارىز بەرىڭدەر.
9 الايدا كوڭىلدەرىڭە «قارىزدى كەشەتىن جەتىنشى جىل تاياپ قالدى» دەگەن ارام وي كەلىپ+، مۇقتاج بولعان باۋىرىڭا ساراڭدىق تانىتىپ، تۇك بەرمەي جۇرمەڭدەر. ايتپەسە ول ەحوباعا شاعىمدانسا، مويىندارىڭا كۇنا ارتىلادى+.
10 ەندەشە، وعان قىنجىلماي، جومارتتىقپەن بەرىڭدەر+. وسىلاي ەتۋلەرىڭ ٷشىن ەحوبا قۇدايلارىڭ بارلىق ٸس-ارەكەتتەرىڭە باتاسىن بەرەدى+.
11 ويتكەنى تۇرىپ جاتقان جەرلەرىڭدە كەدەي-كەپشىكتەر ارقاشان بولادى+. سوندىقتان دا سەندەرگە: «ەلدەرىڭدە تۇرىپ جاتقان بەيشارا، كەدەي باۋىرلارىڭا قولدارىڭ اشىق بولسىن»،— دەپ بۇيىرىپ وتىرمىن+.
12 ەگەر ارالارىڭداعى بىرەۋىڭ ەۆرەي باۋىرىڭدى، ەركەك نە ايەل بولسىن، ساتىپ الساڭ، ول ساعان التى جىل قىزمەت ەتكەن سوڭ، جەتىنشى جىلى بوستاندىققا جىبەر+.
13 ونى بوساتقاندا، قۇرقول جىبەرمە.
14 وعان وتارىڭنان مال، قىرمانىڭنان استىق، سونداي-اق ٴجۇزىم مەن ٴزايتۇن مايىن سىعاتىن ورىندارىڭنان تۇسكەن ونىمنەن بەر. ەحوبا قۇدايىڭ سەنى جارىلقاعانداي، سەن دە ونى جارىلقا.
15 ٶزىڭنىڭ دە مىسىر ەلىندە قۇل بولعانىڭدى جانە ەحوبا قۇدايىڭ سەنى سول جەردەن ازات ەتكەنىن* ۇمىتپا. مىنە، سوندىقتان دا بۇگىن ساعان وسىلاردى بۇيىرىپ وتىرمىن.
16 ەگەر قۇلىڭ سەنىمەن بىرگە تۇرعاندى ۇناتىپ، ٶزىڭدى دە، ٷي ٸشىڭدى دە جاقسى كورىپ: «سىزدەن كەتكىم كەلمەيدى»،— دەسە+،
17 وندا قولىڭا ٴبىز ال دا، قۇلاعىن ەسىككە تاقاپ تەس، سوندا ول ٶمىر بويى سەنىڭ قۇلىڭ بولادى. كۇڭىڭە دە وسىلاي ىستە.
18 قۇلىڭدى بوستاندىققا جىبەرۋدى قيىنسىنبا، ويتكەنى ول التى جىل جۇمىس ىستەپ، جالدامالى جۇمىسشىدان گورى ەكى ەسە كوپ پايدا كەلتىردى. ونىڭ ۇستىنە، ەحوبا قۇدايىڭ سەنى مولىنان جارىلقاپ كەلەدى.
19 وتار-تابىندارىڭداعى العاشقى ەركەك تولدەردىڭ ٴبارىن ەحوباعا ارناپ، قاسيەتتى ەتىڭدەر+. ٸرى قارانىڭ العاشقى ٴتولىن جۇمىسقا جەكپەڭدەر، ۇساق مالدىڭ العاشقى ٴتولىنىڭ ٴجۇنىن قىرىقپاڭدار.
20 ونى ەحوبا قۇدايلارىڭنىڭ الدىندا، ەحوبا تاڭداعان ورىندا بۇكىل ٷي ىشتەرىڭمەن جىل سايىن جەيتىن بولىڭدار+.
21 ەگەر ول كەمتار، اقساق نە سوقىر، ياكي ونىڭ باسقا دا ۇلكەن كەمىستىگى بولسا، ەحوبا قۇدايلارىڭا قۇرباندىققا ۇسىنباڭدار+.
22 ونى تۇرىپ جاتقان قالالارىڭدا جەڭدەر. كيىك نە بۇعىنىڭ ەتىن جەگەندەي، ونى تازا ادام دا، ارامدالعان ادام دا جەي الادى+.
23 ٴبىراق قانىن ٸشىپ-جەمەڭدەر+. ونى جەرگە، سۋ سياقتى، توگىپ تاستاڭدار+.
سىلتەمەلەر
^ نەمەسە «قۇن تولەپ ازات ەتكەنىن».
