مۇسانىڭ 5-جازباسى 20:1—20
20 سوعىسقا شىققاندا، جاۋدىڭ اتتارى، سوعىس اربالارى مەن ساربازدارىنىڭ باسىم ەكەنىن كورىپ، زارەلەرىڭ ۇشپاسىن، ويتكەنى وزدەرىڭدى مىسىردان الىپ شىققان ەحوبا قۇدايلارىڭ سەندەرگە جار بولادى+.
2 شايقاس الدىندا، ٴدىني قىزمەتكەر كەلىپ، حالىققا ٴسوز سويلەپ+:
3 «تىڭدا، ۋا، يسرايل! مىنە، جاۋىڭمەن سوعىسقالى جاتىرسىڭ. جىگەرىڭ جاسىماسىن! قورىقپا، ۇرەيىڭ ۇشىپ، قالتىراما!
4 ويتكەنى ەحوبا قۇدايىڭ جورىققا بىرگە شىعىپ، جاۋىڭمەن ٶزى سوعىسىپ، سەنى قۇتقارادى+»،— دەسىن.
5 سوسىن باسشىلار حالىققا: «ارالارىڭدا جاڭادان ٷي سالىپ، ٵلى كوشىپ كىرمەگەن بىرەۋ بار ما؟ وندا ول ۇيىنە قايتا بەرسىن، ايتپەسە سوعىستا قازا بولىپ، ۇيىنە باسقا بىرەۋ كوشىپ كىرىپ جۇرەر.
6 ارالارىڭدا جۇزىمدىك وتىرعىزىپ، ٵلى ٶنىمىن جيناماعان بىرەۋ بار ما؟ ول دا ۇيىنە قايتا بەرسىن، ايتپەسە سوعىستا قازا بولىپ، ونى وزگە بىرەۋ جيناپ جۇرەر.
7 ارالارىڭدا اتاستىرىلعان قالىڭدىعىنا ٵلى ۇيلەنبەگەن بىرەۋ بار ما؟ سونداي ادام دا ۇيىنە قايتا بەرسىن+، ايتپەسە سوعىستا مەرت بولىپ، وعان باسقا بىرەۋ ۇيلەنىپ جۇرەر»،— دەسىن.
8 سونداي-اق ولار حالىققا: «ارالارىڭدا جۇرەكسىنىپ، قورقىپ تۇرعان بىرەۋ بار ما+؟ وندا مۇنداي ادام ۇيىنە قايتسىن. ايتپەسە قاسىنداعى باۋىرلارىنىڭ دا جىگەرىن جاسىتىپ جۇرەر+»،— دەپ ايتسىن.
9 باسشىلار ٴسوزىن اياقتاعان سوڭ، حالىقتى سوعىسقا باستاپ باراتىن قولباسشىلار تاعايىنداسىن.
10 قالانى جاۋلاماق بولىپ كەلگەندە، الدىمەن ونىڭ تۇرعىندارىنا سوعىسسىز بەرىلۋدى ۇسىنىڭدار+.
11 ولار بەيبىت ۇسىنىستارىڭدى قابىلداپ، قالا قاقپالارىن اشسا، ونداعى ادامداردىڭ ٴبارى سەندەرگە باسىبايلى قىزمەتشى بولىپ، جۇمىس ىستەسىن+.
12 ال ەگەر بىتىمگە كەلمەي، سەندەرگە قارسى سوعىسسا، وندا قالانى قورشاۋعا الىڭدار.
13 ەحوبا قۇدايلارىڭ ولاردى مىندەتتى تۇردە قولدارىڭا بەرەدى. سوندا ەركەك كىندىكتىلەردى سەمسەردىڭ جۇزىمەن ٴبىرىن قالدىرماي قىرىپ سالىڭدار.
14 ٴبىراق قالاداعى ايەل، بالا-شاعا، مال-مۇلىكتى تۇگەل ولجا ەتىپ الىڭدار+. ەحوبا قۇدايلارىڭ قولدارىڭا بەرگەن جاۋلارىڭنان تۇسىرگەن ولجانى ٸشىپ-جەڭدەر+.
15 وزدەرىڭ كىرگەلى تۇرعان جەردەگى حالىقتاردىڭ مەنشىگىنە جاتپايتىن، الىستا ورنالاسقان قالالارعا عانا وسىلاي ىستەڭدەر.
16 ال ەحوبا قۇدايلارىڭ يەلىككە بەرگەلى وتىرعان ولكەدەگى حالىقتاردىڭ قالالارىندا بىردە-ٴبىر ٴتىرى جان قالدىرماڭدار+.
17 ەحوبا قۇدايلارىڭ وزدەرىڭە بۇيىرعانداي، حەتتىكتەردى، امورلىقتاردى، قاناحاندىقتاردى، پەرەزدىكتەردى، حەۆتىكتەر مەن ەبۋستىكتەردى تۇگەل قۇرتىپ جىبەرىڭدەر+.
18 ايتپەسە ولار جالعان تاڭىرلەرىنە قۇلشىلىق ەتكەندە جاسايتىن جەكسۇرىن ىستەرىن سەندەرگە ۇيرەتىپ، ەحوبا قۇدايلارىڭا قارسى كۇنا جاساۋلارىڭا تۇرتكى بولادى+.
19 ەگەر قالانى جاۋلاپ الماق بولىپ، ۇزاق ۋاقىت قورشاۋدا ۇستاساڭدار، ونىڭ توڭىرەگىندەگى اعاشتاردى بالتامەن شاۋىپ قۇرتپاڭدار. ولاردىڭ جەمىسىن جەۋلەرىڭە بولادى، ٴبىراق اعاشتاردى كەسپەڭدەر+. سەبەبى دالادا ٶسىپ تۇرعان اعاشتارمەن سوعىساتىنداي، ولار ادام ەمەس قوي.
20 جەمىسى جەۋگە جارامسىز اعاشتاردى عانا شابۋعا بولادى. وزدەرىڭمەن سوعىسىپ جاتقان قالا قۇلاعانعا دەيىن، سول اعاشتاردان قالانى قورشاۋعا الاتىن قابىرعا جاساۋلارىڭا بولادى.
