مۇسانىڭ 5-جازباسى 24:1—22
24 ەگەر الدەبىرەۋ ۇيلەنسە، ٴبىراق ايەلىنىڭ قانداي دا ٴبىر ۇنامسىز قىلىعىن كورىپ، ونى جاقتىرماي قالسا، وندا ايەلىنە تالاق قاعازىن+ جازىپ بەرىپ، قويا بەرسىن+.
2 ايەل ونىڭ ۇيىنەن كەتكەن سوڭ، باسقا بىرەۋگە تۇرمىسقا شىعۋىنا بولادى+.
3 ال ەگەر ەكىنشى كۇيەۋى دە ونى جاراتپاي، وعان تالاق قاعازىن جازىپ بەرىپ، قويا بەرسە نەمەسە سول كۇيەۋى قايتىس بولسا،
4 ايەل ارامدالعاندىقتان، ٴبىرىنشى كۇيەۋىنىڭ وعان قايتادان ۇيلەنۋىنە بولمايدى، ويتكەنى بۇل ەحوباعا جەركەنىشتى. ەحوبا قۇدايلارىڭ سەندەرگە مۇرالىققا بەرىپ وتىرعان جەردى كۇنامەن بىلعاماڭدار.
5 جاقىندا عانا ۇيلەنگەن ەر ادام اسكەرگە جىبەرىلمەسىن نەمەسە وعان باسقا دا مىندەتتەر جۇكتەلمەسىن. ول ٴبىر جىلعا بوساتىلسىن دا، ۇيىندە بولىپ، ايەلىن قۋانىشقا بولەسىن+.
6 ەشكىم بىرەۋگە بەرگەن قارىزى ٷشىن كەپىلدىككە ونىڭ قولديىرمەنىن نە قولديىرمەننىڭ ۇستىڭگى تاسىن الماسىن+. ويتكەنى بۇل — ونىڭ كۇنكورىس زاتى.
7 ەگەر بىرەۋ يسرايلدىك باۋىرىن ۇرلاپ كەتىپ، وعان قيانات جاساسا نە ساتىپ جىبەرسە+، وندا كىسى ۇرلاۋشى ٶلتىرىلسىن+. وسىلاي ارالارىڭنان زۇلىمدىقتى الاستاتىڭدار+.
8 ەگەر الاپەس اۋرۋى* پايدا بولسا، لەۋىلىك ٴدىني قىزمەتكەرلەردىڭ بەرگەن بارلىق نۇسقاۋىنا مۇقيات بولىڭدار+. مەنىڭ ولارعا بۇيىرعاندارىمدى بۇلجىتپاي ورىنداڭدار.
9 مىسىردان شىعىپ كەلە جاتقاندارىڭدا، ەحوبا قۇدايلارىڭ ٴماريامعا نە ىستەگەنىن ەستەن شىعارماڭدار+.
10 ەگەر الدەكىمگە قارىزعا بىردەڭە بەرسەڭ+، ونىڭ كەپىلدىككە بەرەتىن زاتىن الۋ ٷشىن ۇيىنە كىرۋشى بولما.
11 قارىز العان ادام كەپىلدىككە بەرەتىن زاتىن ٶزى الىپ شىققانشا، سىرتتا كۇت.
12 ەگەر ول مۇقتاجدىق كورىپ جاتسا، كەپىلدىككە بەرگەن زاتىن وزىڭدە قالدىرىپ، ۇيقىعا جاتپا+.
13 ونىڭ كەپىلدىككە بەرگەن زاتىن كۇن باتقانشا قايتارىپ بەر. سوندا ول كيىمىن جامىلىپ جاتادى+، ٵرى سەنىڭ تىلەۋىڭدى تىلەيدى. بۇل ٸسىڭ ەحوبا قۇدايىڭنىڭ الدىندا ٵدىل بولادى.
14 كەدەي ٵرى قيىندىققا تاپ بولعان جالدامالى جۇمىسشىنى — مەيلى باۋىرىڭ نە قالالارىڭدا تۇراتىن جاتجەرلىك بولسىن — الداپ، اقىسىن جەمە+.
15 ونىڭ جالاقىسىن سول كۇنى كەش باتپاي تۇرىپ بەر+، ويتكەنى ول مۇقتاجدىق كورىپ، كۇنى سوعان قاراپ وتىر عوي. ساعان نارازىلىق ٴبىلدىرىپ، ەحوباعا جالبارىنسا، وندا كۇنالى بولاسىڭ+.
16 بالالارىنىڭ ٸسى ٷشىن اكەلەرى، اكەلەرىنىڭ ٸسى ٷشىن بالالارى ولىمگە كەسىلمەسىن+. اركىم ٶز كۇناسى ٷشىن ولىمگە كەسىلۋ كەرەك+.
17 جاتجەرلىكتىڭ نە جەتىمنىڭ ٸسىن قاراستىرعاندا، ادىلدىكتى بۇرمالاما+. العان قارىزى ٷشىن جەسىردىڭ كيىمىن كەپىلدىككە الما+.
18 وزدەرىڭنىڭ مىسىردا قۇلدىقتا بولعاندارىڭدى ٵرى سول جەردەن ەحوبا قۇدايلارىڭ ازات ەتكەنىن* ۇمىتپاڭدار+. سوندىقتان دا سەندەرگە وسىلاردى ىستەۋدى بۇيىرىپ وتىرمىن.
19 ەگىن وراعى كەزىندە بايلاعان باۋىڭدى تاناپتا ۇمىتىپ كەتكەنىڭ ەسىڭە تۇسسە، ونى الۋ ٷشىن قايتىپ ورالما. ونى جاتجەرلىكتەر مەن جەتىم-جەسىرلەرگە قالدىر+. سوندا ەحوبا قۇدايىڭ بارلىق ٸسىڭدى جارىلقايتىن بولادى+.
20 ٴزايتۇن اعاشىنىڭ جەمىسىن قاققاندا، بۇتالارىندا قالىپ قويعاندارىن قاعىپ الما. ولاردى جاتجەرلىكتەر مەن جەتىم-جەسىرلەرگە قالدىر+.
21 جۇزىمدىگىڭنىڭ جەمىسىن جيناعاندا دا، قالىپ قويعاندارىن تەرۋ ٷشىن قايتىپ بارما. ولاردى جاتجەرلىكتەر مەن جەتىم-جەسىرلەرگە قالدىر.
22 وزدەرىڭنىڭ مىسىردا قۇلدىقتا بولعاندارىڭدى ۇمىتپاڭدار. سوندىقتان دا سەندەرگە وسىلاردى ىستەۋدى بۇيىرىپ وتىرمىن.
سىلتەمەلەر
^ «الاپەس» دەپ اۋدارىلعان ەۆرەي ٴسوزىنىڭ ماعىناسى كەڭ. ول ٴتۇرلى جۇقپالى تەرى اۋرۋلارىن، سونداي-اق كيىمدە نە ۇيدە پايدا بولاتىن جۇقپانىڭ كەيبىر تۇرلەرىن قامتۋى مۇمكىن.
^ نەمەسە «قۇن تولەپ ازات ەتكەنىن».
